(1)

Is éard a bhunaítear le Rialachán Cur Chun Feidhme (AE) 2018/2019 ón gCoimisiún (2), ar bhonn réamh-mheasúnú riosca, liosta plandaí, táirgí plandaí agus réad eile a mbaineann ardriosca leo.

(2)

Is éard a leagtar síos le Rialachán Cur Chun Feidhme (AE) 2018/2018 ón gCoimisiún (3) rialacha sonracha maidir leis an nós imeachta atá le leanúint chun an measúnú riosca dá dtagraítear in Airteagal 42(4) de Rialachán (AE) 2016/2031 a dhéanamh ar na plandaí, táirgí plandaí agus réada eile a mbaineann ardriosca leo.

(3)

Tar éis réamh-mheasúnú riosca a dhéanamh, áiríodh torthaí Momordica L. de thionscnamh tríú tíortha nó limistéir de thríú tíortha arb eol go mbíonn Thrips palmi Karny iontu agus nach bhfuil bearta maolaithe éifeachtacha i bhfeidhm iontu i ndáil leis an lotnaid sin, san Iarscríbhinn a ghabhann le Rialachán Cur Chun Feidhme (AE) 2018/2019 mar phlandaí a mbaineann ardriosca leo.

(4)

An 13 Samhain 2019, chuir Meicsiceo iarraidh faoi bhráid an Choimisiúin chun torthaí Momordica charantia L. a onnmhairiú chuig an Aontas. Cuireadh an sainchomhad teicniúil ábhartha isteach leis an iarraidh sin.

(5)

An 27 Samhain 2019, chuir Hondúras, Srí Lanca agus an Téalainn iarraidh faoi bhráid an Choimisiúin chun torthaí Momordica charantia L. a onnmhairiú chuig an Aontas. Cuireadh an sainchomhad teicniúil ábhartha isteach leis na hiarrataí sin.

(6)

AN 31 Nollaig 2020, ghlac an tÚdarás Eorpach um Shábháilteacht Bia (“an tÚdarás”) tuairimí eolaíocha maidir leis an measúnú riosca tráchtearraí ar thorthaí Momordica charantia L. de thionscnamh Mheicsiceo (4), Hondúras (5), Shrí Lanca (6) agus na Téalainne (7). Ba é Thrips palmi Karny an t-aon lotnaid a bhfuil imní fúithi a ndearnadh anailís uirthi sna tuairimí sin. Rinne an tÚdarás meastóireacht ar na bearta maolaithe riosca faoina ndéantar tuairisc sna sainchomhaid i dtaca leis an lotnaid sin agus rinne sé meastachán ar an dóchúlacht atá ann go mbeadh na plandaí sin saor ón lotnaid sin.

(7)

Ar bhonn na dtuairimí sin, féadfar aghaidh a thabhairt ar an riosca fíteashláintíochta a eascraíonn as torthaí Momordica charantia L. ó Hondúras, ó Mheicsiceo, ó Shrí Lanca agus ón Téalainn a thabhairt isteach san Aontas trí bhíthin ceanglais allmhairiúcháin fíteashláintíochta chun a áirithiú go ndéanfar an riosca a laghdú go leibhéal inghlactha agus a choimeád ag an leibhéal sin. Dá bhrí sin, ba cheart torthaí Momordica charantia L. de thionscnamh na dtíortha sin a bhaint de liosta na bplandaí, na dtáirgí plandaí agus na réad eile a mbaineann ardriosca leo atá san Iarscríbhinn a ghabhann le Rialachán Cur Chun Feidhme (AE) 2018/2019.

(8)

Meastar gur leor iad na bearta maolaithe riosca a chuireann Srí Lanca i bhfeidhm chun an riosca fíteashláintíochta a eascraíonn as torthaí Momordica charantia L. de thionscnamh na tíre sin a thabhairt isteach san Aontas a choimeád ag leibhéal inghlactha.

(9)

Measann an Coimisiún nach leor astu féin iad na bearta maolaithe riosca a mholann Hondúras, Meicsiceo agus an Téalainn sna sainchomhaid chun an riosca fíteashláintíochta a eascraíonn as torthaí Momordica charantia L. de thionscnamh na dtíortha sin a thabhairt isteach san Aontas a laghdú go leibhéal inghlactha. Da bhrí sin, ba cheart allmhairiú thorthaí Momordica charantia L. de thionscnamh na dtíortha sin isteach san Aontas ceanglais allmhairiúcháin shonracha a chomhlíonadh: ba cheart na torthaí sin a bheith de thionscnamh limistéar atá saor ó lotnaidí, nó ó láithreán táirgthe a bhfuil cosaint fhisiceach iomlán aige, nó ó láithreán táirgthe inar tógadh roinnt beart maidir le táirgeadh, láimhseáil agus iniúchadh na dtorthaí sin.

(10)

Dá bhrí sin, toisc go liostaítear in Iarscríbhinn II a ghabhann le Rialachán Cur Chun Feidhme (AE) 2019/2072 ón gCoimisiún (8) Thrips palmi Karny mar lotnaid choraintín de chuid an Aontais agus toisc go ndéantar foráil i bpointe 71 d’Iarscríbhinn VII a ghabhann leis an Rialachán Cur Chun Feidhme sin maidir le ceanglais allmhairiúcháin speisialta le haghaidh thorthaí Momordica L. de thionscnamh na dtríú tíortha ar fad, ba cheart ceanglais allmhairiúcháin shonracha le haghaidh thorthaí Momordica charantia L. de thionscnamh Hondúras, Mheicsiceo, Shrí Lanca agus na Téalainne a chur le hIarscríbhinn VII a ghabhann le Rialachán Cur Chun Feidhme (AE) 2019/2072.

(11)

Dá bhrí sin, ba cheart Rialacháin Cur Chun Feidhme (AE) 2018/2019 agus (AE) 2019/2072 a leasú dá réir.

(12)

Chun oibleagáidí an Aontais Eorpaigh a eascraíonn as comhaontú na hEagraíochta Trádála Domhanda maidir bearta sláintíochta agus fíteashláintíochta a chur i bhfeidhm (9) a chomhlíonadh, ba cheart allmhairiú thorthaí Momordica charantia L. de thionscnamh Hondúras, Mheicsiceo, Shrí Lanca agus na Téalainne a atosú a luaithe is féidir. Dá bhrí sin, ba cheart don Rialachán seo teacht i bhfeidhm an tríú lá tar éis lá a fhoilsithe.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,