|
Iris Oifigiúil |
GA Sraith L |
|
2026/2495 |
5.11.2026 |
CINNEADH CUR CHUN FEIDHME (AE) 2026/2495 ÓN gCOMHAIRLE
an 29 Deireadh Fómhair 2026
lena leasaítear Cinneadh Cur Chun Feidhme (AE) 2024/1641 a mhéid a bhaineann le síneadh a chur leis an údarú don Rómáin bearta speisialta a chur i bhfeidhm de mhaolú ar Airteagail 26(1), pointe (a), agus ar Airteagal 168 de Threoir 2006/112/CÉ maidir leis an gcomhchóras cánach breisluacha
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh,
Ag féachaint do Threoir 2006/112/CE ón gComhairle an 28 Samhain 2006 maidir leis an gcomhchóras cánach breisluacha (1), agus go háirithe Airteagal 395(1), an chéad fhomhír, de,
Ag féachaint don togra ón gCoimisiún Eorpach,
De bharr an mhéid seo a leanas:
|
(1) |
Le Cinneadh Cur Chun Feidhme (AE) 2024/1641 ón gComhairle (2), údaraíodh an Rómáin teorainn 50 % a chur leis an gceart cáin bhreisluacha (‘CBL’) a asbhaint maidir le mótarfheithiclí bóthair áirithe a cheannach, a fháil laistigh den Chomhphobal, a allmhairiú, a fháil ar cíos nó a léasú chomh maith leis an CBL a ghearrtar ar chaiteachas a bhaineann leis na feithiclí sin, i gcás nach n-úsáidtear na feithiclí sin go hiomlán chun críoch gnó agus chun faoiseamh a thabhairt do dhaoine inchánach ón ngá atá le caitheamh le húsáid na bhfeithiclí sin chun críoch eile seachas críocha a ngnó mar sholáthar seirbhísí ar chomaoin de bhun Airteagal 26(1), pointe (a), de Threoir 2006/112/CE (‘na bearta speisialta’). Tá Cinneadh Cur Chun Feidhme (AE) 2024/1641 le dul in éag an 31 Nollaig 2026. |
|
(2) |
Le litir a cláraíodh leis an gCoimisiún an 19 Bealtaine 2026, d’iarr an Rómáin údarú i gcomhréir le hAirteagal 395(2), an chéad fhomhír, de Threoir 2006/112/cé, chun leanúint de na bearta speisialta a chur i bhfeidhm tar éis an 31 Nollaig 2026 (‘an iarraidh’). |
|
(3) |
Le litir dar dáta an 22 Bealtaine 2026, tharchuir an Coimisiún an iarraidh a chuir an Rómáin chuig na Ballstáit eile i gcomhréir le hAirteagal 395(2), an dara fomhír, de Threoir 2006/112/CE. Le litir dar dáta an 26 Bealtaine 2026, thug an Coimisiún fógra don Rómáin go raibh an fhaisnéis uile is gá aige chun breithmheas a dhéanamh ar an iarraidh. |
|
(4) |
De bhun Airteagal 5(3) de Chinneadh Cur Chun Feidhme (AE) 2024/1641 ón gComhairle, chuir an Rómáin tuarascáil faoi bhráid an Choimisiúin, in éineacht leis an iarraidh, inar áiríodh an t-athbhreithniú ar chéatadán na teorann a chuirtear i bhfeidhm maidir leis an gceart asbhainte CBL dá dtagraítear in Airteagal 1 den Chinneadh sin. Bunaithe ar an bhfaisnéis atá ar fáil faoi láthair, áitíonn an Rómáin go bhfuil an teorainn 50 % fós inchosanta agus go bhfuil sí iomchuí go fóill. |
|
(5) |
I bhfianaise thionchar dearfach na mbeart speisialta maidir leis an ualach riaracháin ar cháiníocóirí agus ar údaráis chánach a laghdú trí bhailiú CBL a shimpliú agus maidir le cosc a chur ar imghabháil cánach a eascraíonn as taifid mhíchearta a choinneáil, is iomchuí síneadh a chur leis an údarú dá bhforáiltear i gCinneadh Cur Chun Feidhme (AE) 2024/1641 |
|
(6) |
Ní bheidh ach éifeacht shuarach ag cur i bhfeidhm na mbeart speisialta tar éis an 31 Nollaig 2026 ar mhéid foriomlán an ioncaim cánach a bhailíonn an Rómáin ag céim an tomhaltais deiridh agus ní dhéanfaidh sé dochar d’acmhainní dílse an Aontais a fhabhraíonn ó CBL. |
|
(7) |
Ba cheart teorainn ama a chur le síneadh na mbeart speisialta ionas go mbeifear in ann meastóireacht a dhéanamh ar éifeachtacht na mbeart speisialta sin agus ar oiriúnacht na teorann céatadáin atá le cur i bhfeidhm maidir leis an gceart CBL a asbhaint. |
|
(8) |
Ba cheart, dá bhrí sin, údarú a thabhairt don Rómáin leanúint de chur i bhfeidhm na mbeart speisialta go dtí an 31 Nollaig 2029. |
|
(9) |
Tá na bearta speisialta comhréireach leis na cuspóirí atá á saothrú, is iad sin an nós imeachta um bailiú CBL a shimpliú agus cineálacha áirithe imghabhála cánach nó seachanta cánach a chosc, ós rud é go bhfuil siad teoranta ó thaobh ama agus raon feidhme de. Ina theannta sin, ní chruthaítear leis na bearta speisialta an riosca go n-aistreofaí calaois chuig earnálacha eile nó chuig Ballstáit eile. |
|
(10) |
I gcás ina measann an Rómáin gur gá síneadh breise a chur leis na bearta speisialta tar éis dháta éaga Chinneadh Cur Chun Feidhme (AE) 2024/1641, ba cheart di iarraidh ar shíneadh a chur faoi bhráid an Choimisiúin faoin 31 Márta 2029, mar aon le tuarascáil ina n-áirítear athbhreithniú ar chéatadán na teorann a chuirtear i bhfeidhm maidir leis an gceart CBL a asbhaint. |
|
(11) |
Ba cheart, dá bhrí sin, Cinneadh Cur Chun Feidhme (AE) 2024/1641 a leasú dá réir sin, |
TAR ÉIS AN CINNEADH SEO A GHLACADH:
Airteagal 1
In Airteagal 5 de Rialachán Cur Chun Feidhme (AE) 2024/1641, cuirtear an méid seo a leanas in ionad mhíreanna 2 agus 3:
‘2. Rachaidh an Cinneadh seo in éag an 31 Nollaig 2029.
3. Aon iarraidh ar shíneadh a chur leis an údarú dá bhforáiltear in Airteagail 1 agus 3, cuirfear faoi bhráid an Choimisiúin í faoin 31 Márta 2029, agus beidh tuarascáil ag gabháil léi ina n-áireofar athbhreithniú ar an teorainn chéatadáin a chuirtear i bhfeidhm ar an gceart CBL a asbhaint ar bhonn an Chinnidh seo.’.
Airteagal 2
Tiocfaidh an Cinneadh seo i bhfeidhm an dáta a thabharfar fógra faoi.
Airteagal 3
Dírítear an Cinneadh seo chuig an Rómáin.
Arna dhéanamh i Lucsamburg, an 29 Deireadh Fómhair 2026.
Thar ceann na Comhairle
An tUachtarán
D. O’BRIEN
(1) IO L 347, 11.12.2006, lch. 1, ELI: http://data.europa.eu/eli/dir/2006/112/oj.
(2) Cinneadh Cur Chun Feidhme (AE) 2024/1641 ón gComhairle an 24 Bealtaine 2024 lena n-údaraítear don Rómáin bearta speisialta a chur i bhfeidhm de mhaolú ar Airteagail 26(1), pointe (a) agus ar Airteagal 168 de Threoir 2006/112/CE maidir leis an gcomhchóras cánach breisluacha (IO L, 2024/1641, 6.6.2024, ELI: http://data.europa.eu/eli/dec_impl/2024/1641/oj).
ELI: http://data.europa.eu/eli/dec_impl/2026/2495/oj
ISSN 1977-0839 (electronic edition)