European flag

Iris Oifigiúil
an Aontais Eorpaigh

GA

Sraith L


2026/1385

19.6.2026

CINNEADH (AE) 2026/1385 ÓN gCOMHAIRLE

an 8 Iúil 2025

maidir le heasnamh iomarcach a bheith ann san Ostair

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 126(6) de,

Ag féachaint don togra ón gCoimisiún Eorpach,

Ag féachaint do na barúlacha a thug an Ostair,

De bharr an mhéid seo a leanas:

(1)

De réir Airteagal 126 den Chonradh ar Fheidhmiú an Aontais Eorpaigh (CFAE), seachnóidh na Ballstáit easnaimh rialtais iomarcacha.

(2)

Tá an Comhshocrú Cobhsaíochta agus Fáis bunaithe ar chuspóir an airgeadais rialtais fhónta agus inbhuanaithe mar mhodh chun na dálaí a neartú a bhaineann le cobhsaíocht praghsanna agus le fás cuimsitheach inbhuanaithe láidir a mbeidh cobhsaíocht airgeadais mar bhonn taca leis, rud a thacóidh le cuspóirí an Aontais maidir le fás inbhuanaithe agus fostaíocht a bhaint amach.

(3)

Leis an nós imeachta um easnamh iomarcach faoi Airteagal 126 CFAE, mar a soiléiríodh le Rialachán (CE) Uimh. 1467/97 ón gComhairle an 7 Iúil 1997 maidir le dlús a chur le cur chun feidhme an nós imeachta um easnamh iomarcach (1) agus soiléiriú a dhéanamh air, ar cuid den Chomhshocrú Cobhsaíochta agus Fáis é, déantar foráil maidir le cinneadh i ndáil le heasnamh iomarcach a bheith ann. I bPrótacal Uimh. 12 maidir leis an nós imeachta um easnamh iomarcach, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, leagtar amach forálacha breise a bhaineann le cur chun feidhme an nós imeachta um easnamh iomarcach. Le Rialachán (CE) Uimh. 479/2009 ón gComhairle (2), leagtar síos rialacha agus sainmhínithe mionsonraithe maidir le cur i bhfeidhm na bhforálacha sin. Áirítear i gcreat rialachais eacnamaíoch athchóirithe an Aontais, a tháinig i bhfeidhm an 30 Aibreán 2024 (3), Rialachán (AE) 2024/1264 ón gComhairle lenar leasaíodh Rialachán (CE) Uimh. 1467/97. Leis an athchóiriú, coinníodh rialacha an nós imeachta um easnamh iomarcach mar gheall ar neamhchomhlíonadh an chritéir easnaimh gan athrú tríd is tríd, ach i gcás na mBallstát a bhfuil cóimheas fiachais rialtais os cionn 60 % de OTI acu, díreofar leis an nós imeachta um easnamh iomarcach mar gheall ar neamhchomhlíonadh an chritéir fiachais ar imeachtaí ó na huasrátaí fáis glanchaiteachais (4) a mholtar, ar uasrátaí iad a shocraigh an Chomhairle faoi Rialachán (AE) 2024/1263 ó Phairlimint na hEorpa agus ón gComhairle (5). Leis an Moladh ón gComhairle an 8 Iúil 2025 lena bhformhuinítear plean meántéarmach na hOstaire (6), socraítear uasrátaí fáis glanchaiteachais don Ostair agus ba é 2025 an bhliain tosaigh, i dtéarmaí bliantúla agus carnacha. Ní féidir an measúnú ar chomhlíonadh an chritéir fiachais a dhéanamh go dtí go mbeidh na sonraí olltoraidh le haghaidh 2025 ar fáil in earrach 2026. Ní bhaineann an Cinneadh seo ón gComhairle, dá bhrí sin, ach le barrachas an chóimheasa idir an t-easnamh rialtais agus OTI i ndáil le luach tagartha 3 % de OTI, i gcomhréir leis na forálacha dlíthiúla atá ann cheana.

(4)

De réir Airteagal 126(5) CFAE, má mheasann an Coimisiún go bhfuil easnamh iomarcach ann i mBallstát nó go bhféadfadh easnamh iomarcach a bheith ann i mBallstát, ní mór dó tuairim a dhíriú chuig an mBallstát lena mbaineann agus cuirfidh sé an Chomhairle ar an eolas dá réir sin. Tar éis dó a thuarascáil arna glacadh de bhun Airteagal 126(3) CFAE a chur san áireamh agus ag féachaint don tuairim ón gCoiste Eacnamaíoch agus Airgeadais arna glacadh de bhun Airteagal 126(4) CFAE, chinn an Coimisiún go bhfuil easnamh iomarcach ann san Ostair. Dá bhrí sin, an 23 Meitheamh 2025 chuir an Coimisiún an tuairim sin faoi bhráid na hOstaire agus chuir sé an Chomhairle ar an eolas dá réir sin. (7)

(5)

Le hAirteagal 126(6) CFAE, cuirtear in iúl go bhfuil an Chomhairle le haon bharúil a bhreithniú, ar barúil í is mian leis an mBallstát lena mbaineann a thabhairt, sula gcinnfidh sí, tar éis measúnú foriomlán a dhéanamh, an bhfuil easnamh iomarcach ann. I gcás na hOstaire, is iad na conclúidí seo a leanas a eascraíonn as an measúnú foriomlán.

(6)

De réir na sonraí a sholáthair Eurostat an 22 Aibreán 2025 (8), bhain easnamh rialtais ghinearálta san Ostair 4,7 % de OTI amach in 2024, agus ba é 81,8 % de OTI fiachas ginearálta an rialtais. In 2025, tá sé beartaithe go sroichfidh easnamh rialtais ghinearálta na hOstaire 4,5 % de OTI. (9) Réamh-mheastar i Réamhaisnéis an Earraigh 2025 ón gCoimisiún (10) go mbeidh easnamh rialtais 4,4 % de OTI ann in 2025. Measadh sa tuarascáil ón gCoimisiún faoi Airteagal 126(3) CFAE go raibh farasbarr an easnaimh os cionn luach tagartha an Chonartha de 3 % de OTI in 2024 eisceachtúil, mar gheall ar chúlú eacnamaíoch fada in 2023 agus 2024. Maidir leis an bhfarasbarr os cionn luach tagartha an Chonartha, níl sé gar don luach tagartha agus níl sé sealadach, bunaithe ar Réamhaisnéis an Earraigh 2025 ón gCoimisiún, ina réamh-mheastar go bhfanfaidh easnamh rialtais ghinearálta os cionn 3 % de OTI in 2025 agus 2026. Dá bhrí sin, níor comhlíonadh prima facie an critéar easnaimh mar a shainítear é sa Chonradh agus i Rialachán (CE) Uimh. 1467/97.

(7)

I gcomhréir le ceanglais Airteagal 126(3) CFAE, rinne an Coimisiún anailís freisin ar na tosca ábhartha uile ina thuarascáil faoi Airteagal 126(3) CFAE. Mar a leagtar síos in Airteagal 2(4) de Rialachán (CE) Uimh. 1467/97, agus measúnú á dhéanamh ar chomhlíontacht ar bhonn an chritéir easnaimh, má sháraíonn an cóimheas idir an fiachas rialtais agus OTI an luach tagartha, ní chuirfear tosca ábhartha san áireamh sna céimeanna a leanann an tuarascáil faoi Airteagal 126(3) CFAE agus as a dtiocfaidh an cinneadh maidir le heasnamh iomarcach a bheith ann ach amháin más rud é – sula gcuirtear na tosca ábhartha sin san áireamh – go bhfanann an t-easnamh rialtais ghinearálta gar don luach tagartha agus go bhfuil a fharasbarr thar an luach tagartha sealadach. I gcás na hOstaire, ní chomhlíontar an coinníoll dúbailte. Dá bhrí sin, ní chuirtear tosca ábhartha san áireamh sna céimeanna as a dtiocfaidh an cinneadh seo.

TAR ÉIS AN CINNEADH SEO A GHLACADH:

Airteagal 1

Fágann measúnú foriomlán go bhfuil easnamh iomarcach ann san Ostair mar gheall ar neamhchomhlíonadh an chritéir easnaimh.

Airteagal 2

Is chuig Poblacht na hOstaire a dhírítear an cinneadh seo.

Arna dhéanamh sa Bhruiséil, an 8 Iúil 2025.

Thar ceann na Comhairle

An tUachtarán

S. LOSE


(1)   IO L 209, 2.8.1997, lch. 6, ELI: http://data.europa.eu/eli/reg/1997/1467/oj.

(2)   IO L 145, 10.6.2009, lch. 1.

(3)  Rialachán (AE) 2024/1264 ón gComhairle an 29 Aibreán 2024 lena leasaítear Rialachán (CE) Uimh. 1467/97 maidir le beartais eacnamaíocha a chomhordú go héifeachtach agus maidir le faireachas buiséadach iltaobhach (IO L, 2024/1264, 30.4.2024, ELI: http://data.europa.eu/eli/reg/2024/1264/oj)

(4)  De réir Airteagal 2(2) de Rialachán (AE) 2024/1263, ciallaíonn ‘glanchaiteachas’ caiteachas rialtais atá glan ar úschaiteachas, ar bhearta lánroghnacha ioncaim, ar chaiteachas ar chláir an Aontais arna meaitseáil go hiomlán le hioncam ó chistí an Aontais, ar chaiteachas náisiúnta ar chómhaoiniú clár arna gcistiú ag an Aontas, ar ghnéithe timthriallacha den chaiteachas ar shochar dífhostaíochta, agus ar bhearta aonuaire agus bearta sealadacha eile.

(5)  Rialachán (AE) 2024/1263 ó Pharlaimint na hEorpa agus ón gComhairle an 29 Aibreán 2024 maidir le beartais eacnamaíocha a chomhordú go héifeachtach agus maidir le faireachas buiséadach iltaobhach agus lena n-aisghairtear Rialachán (CE) Uimh. 1466/97 ón gComhairle (IO L, 2024/1263, 30.4.2024, ELI: http://data.europa.eu/eli/reg/2024/1263/oj).

(6)   IO C, C/2025/3958, 20.8.2025, ELI: http://data.europa.eu/eli/C/2025/3958/oj.

(7)  Is féidir teacht ar na doiciméid uile a bhaineann leis an nós imeachta um easnamh iomarcach le haghaidh na hOstaire ag an suíomh seo a leanas: https://economy-finance.ec.europa.eu/economic-and-fiscal-governance/stability-and-growth-pact/corrective-arm-excessive-deficit-procedure/excessive-deficit-procedures-overview/austria_ga.

(8)  Táscairí Euro Eurostat a foilsíodh an 22 Aibreán 2025 (https://ec.europa.eu/eurostat/en/web/products-euro-indicators/w/2-22042025-AP), i gcomhréir le hAirteagal 14 de Rialachán (CE) Uimh. 479/2009 ón gComhairle.

(9)  An t-easnamh atá beartaithe mar a tuairiscíodh do Eurostat i gcomhthéacs fhógra fioscach Earrach 2025. Féach: https://ec.europa.eu/eurostat/web/government-finance-statistics/excessive-deficit-procedure/edp-notification-tables.

(10)  Réamhaisnéis Eacnamaíoch na hEorpa – Earrach 2025, Geilleagar na hEorpa-Páipéar Institiúideach, Uimh. 318, an 19 Bealtaine 2025.


ELI: http://data.europa.eu/eli/dec/2026/1385/oj

ISSN 1977-0839 (electronic edition)