(1)

Fis-6 ta’ Ġunju 2024, il-Finlandja ppreżentat talba lill-Kummissjoni sal-2035 biex ma tapplikax ir-Regolament ta’ Implimentazzjoni tal-Kummissjoni (UE) 2023/1695 (2) għall-binarju pilota tal-EKA(it-“talba”). It-talba tressqet abbażi tal-Artikolu 7(1)(c) tad-Direttiva (UE) 2016/797.

(2)

Skont il-punt 7.2.4.2. tal-Anness I tar-Regolament ta’ Implimentazzjoni (UE) 2023/1695, subsistema ta’ sinjalazzjoni ta’ kontroll u ta’ maġenb il-binarji trid tikkonforma mal-Ispeċifikazzjoni Teknika għall-Interoperabbiltà fis-seħħ fiż-żmien tat-talba għall-awtorizzazzjoni għat-tqegħid fis-servizz tal-infrastruttura. Dan ikun jeħtieġ l-installazzjoni tas-Sistema Ewropea ta’ Kontroll tal-Ferroviji (“ETCS”) li tikkonforma mal-ispeċifikazzjonijiet tal-Linja Bażi 4 fuq il-binarju pilota tal-EKA.

(3)

Il-proġett imsemmi fit-talba jikkonsisti fl-installazzjoni ta’ subsistema ta’ kmand tal-kontroll u sinjalazzjoni ta’ maġenb il-binarji skont l-ispeċifikazzjonijiet tal-verżjoni 2.1 tas-sistema tal-Linja bażi 3 fuq iż-żona tas-sezzjoni tal-binarju pilota tal-EKA ETCS Lielahti-Siuro-Kokemäki-Pori/Rauma ja Pori/Mäntyluoto/Tahkoluoto. Din it-taqsima tikkonsisti f’madwar 190 kilometru ta’ linja b’binarju wieħed u 18-il stazzjon (il-“proġett tal-linja pilota tal-EKA”).

(4)

Skont id-dokumenti ppreżentati mill-Finlandja, il-konformità mal-punt 7.2.4.2. tal-Anness I tar-Regolament ta’ Implimentazzjoni (UE) 2023/1695 tkun tinvolvi kost addizzjonali ta’ mill-inqas EUR 16,3 miljun. Dan għaliex l-implimentazzjoni tal-aħħar Linja Bażi tal-ETCS tkun teħtieġ emenda għall-kuntratt iffirmat u tfassil mill-ġdid tas-soluzzjoni teknika li għandha tiġi implimentata. Dan idewwem l-implimentazzjoni tal-proġett b’sentejn u nofs minħabba l-ħtieġa li jiġu nnotifikati fir-reġistru tal-infrastruttura (RINF) (3) ħames snin qabel il-bidla fil-funzjonalitajiet tal-ETCS meħtieġa mill-vetturi li jiċċirkolaw fuq din il-linja (4). Id-dewmien fl-implimentazzjoni tal-proġett jista’ jwassal ukoll għal telf ta’ kofinanzjament skont il-pjan għall-irkupru u r-reżiljenza tal-Finlandja.

(5)

Bħala dispożizzjoni alternattiva, il-Finlandja tissuġġerixxi l-applikazzjoni tar-Regolament tal-Kummissjoni (UE) 2016/919 (5) bl-emendi sussegwenti kollha, li jfisser li l-Linja Bażi 3 tal-ETCS biss ikun jeħtieġ li tiġi implimentata. Il-Finlandja biħsiebha tinstalla l-verżjoni 3 tas-sistema tal-Linja Bażi 2.1 tal-ETCS. Għall-futur, il-Finlandja timpenja ruħha li tinstalla l-Linja Bażi 4 tal-ETCS sal-2035, soġġetta għal analiżi ġdida tal-vijabbiltà ekonomika li ssostni dan il-pass.

(6)

Il-Finlandja impenjat ruħha li tivvaluta l-vijabbiltà ekonomika ta’ titjib tal-ETCS ta’ maġenb il-binarji għal-Linja Bażi 4 fuq il-proġett pilota tal-linja ferrovjarja EKA sa mhux aktar tard mill-2030, inkluża l-possibbiltà li tintroduċi fuq din il-linja s-sistema futura ta’ komunikazzjoni mobbli ferrovjarja standard tar-radju. Jenħtieġ li l-Finlandja tinforma lill-Kummissjoni dwar l-eżitu tal-analiżi ekonomika fl-2030 u fuq bażi biennali fi tmiem l-2032 u l-2034 dwar il-progress fir-rigward tal-implimentazzjoni tal-Linja Bażi 4 tal-ETCS fuq din il-linja, dment li tkun ittieħdet deċiżjoni rispettiva.

(7)

Abbażi tal-ġustifikazzjoni għat-talba pprovduta mill-Finlandja u d-dispożizzjonijiet alternattivi proposti, il-kundizzjonijiet stabbiliti fl-Artikolu 7(1), il-punt (c) u l-Artikolu 7(4) tad-Direttiva (UE) 2016/797 jistgħu jitqiesu bħala ssodisfati għall-proġett pilota tal-binarju tal-EKA mfisser hawnhekk. Għalhekk, jenħtieġ li t-talba tiġi aċċettata.

(8)

Il-miżuri previsti f’din id-Deċiżjoni huma skont l-opinjoni tal-Kumitat imsemmi fl-Artikolu 51(1) tad-Direttiva (UE) 2016/797,