(1)

An 6 Meitheamh 2024, chuir an Fhionlainn iarraidh faoi bhráid an Choimisiúin ar neamhchur i bhfeidhm Rialachán Cur Chun Feidhme (AE) 2023/1695 ón gCoimisiún (2) maidir leis an rian píolótach EKA go dtí 2035 (‘an iarraidh’). Cuireadh an iarraidh sin isteach ar bhonn Airteagal 7(1), pointe (c), de Threoir (AE) 2016/797.

(2)

Faoi phointe 7.2.4.2. d’Iarscríbhinn I a ghabhann le Rialachán Cur Chun Feidhme (AE) 2023/1695, maidir le fochóras um rialú agus ceannas agus um comharthaíocht taobh riain, ní mór dó an tSonraíocht Theicniúil maidir le hIdir-inoibritheacht atá i bhfeidhm tráth na hiarrata ar údarú chun an bonneagar a chur i mbun seirbhíse a chur i bhfeidhm. Éilítear leis sin suiteáil an Chórais Eorpaigh um Rialú Traenacha (‘ETCS’) a chomhlíonann sonraíochtaí Bhonnlíne 4 ar rian píolótach EKA.

(3)

Is éard atá i gceist leis an tionscadal dá dtagraítear san iarraidh fochóras um rialú agus ceannas agus um chomharthaíocht taobh riain a shuiteáil de réir shonraíochtaí leagan 2.1 de chóras Bhonnlíne 3 maidir leis an limistéar i gcodanna Lielahti-Siuro-Kokemäki-Pori/Rauma ja Pori/Mäntyluoto/Tahkoluoto de rian píolótach ETCS EKA. Is éard atá sa stráice sin thart ar 190 ciliméadar de líne rian aonair agus 18 stáisiún (‘tionscadal an riain phíolótaigh EKA’).

(4)

De réir na ndoiciméad a chuir an Fhionlainn isteach, dá gcomhlíonfaí pointe 7.2.4.2. d’Iarscríbhinn I a ghabhann le Rialachán Cur Chun Feidhme (AE) 2023/1695 ón gCoimisiún, bheadh costas breise EUR 16,3 milliún ar a laghad i gceist. Is amhlaidh atá toisc go mbeadh gá le leasú ar an gconradh sínithe agus le hathdhearadh an réitigh theicniúil atá le cur chun feidhme chun Bonnlíne ETCS is déanaí a chur chun feidhme. Chuirfeadh sé sin moill dhá bhliain go leith ar chur chun feidhme an tionscadail mar gheall ar an ngá atá le fógra a thabhairt sa chlár bonneagair (RINF) (3) 5 bliana roimh an athrú ar na feidhmiúlachtaí ETCS is gá ó fheithiclí atá i gcúrsaíocht ar an líne sin (4). D’fhéadfadh caillteanas cóchistithe faoi phlean téarnaimh agus athléimneachta na Fionlainne a bheith mar thoradh ar mhoill a chur ar chur chun feidhme an tionscadail.

(5)

Mar fhoráil mhalartach, molann an Fhionlainn Rialachán (AE) 2016/919 ón gCoimisiún (5) a chur i bhfeidhm le gach leasú ina dhiaidh sin, rud a chiallaíonn nach gá ach Bonnlíne 3 ETCS a chur chun feidhme. Tá sé beartaithe ag an bhFionlainn leagan 2.1 de chóras Bhonnlíne 3 ETCS a shuiteáil. Amach anseo, geallann an Fhionlainn ETCS a shuiteáil de réir Bhonnlíne 4 faoi 2035, faoi réir anailís ar inmharthanacht eacnamaíoch nua a thacóidh leis an gcéim sin.

(6)

Tá gealltanas tugtha ag an bhFionlainn measúnú a dhéanamh ar inmharthanacht eacnamaíoch uasghrádú ETCS taobh riain go Bonnlíne 4 ar thionscadal an riain phíolótaigh EKA in 2030 ar a dhéanaí, lena n-áirítear an fhéidearthacht an caighdeán raidió amach anseo don Chóras Todhchaíochta um Chumarsáid Mhóibíleach Iarnróid a thabhairt isteach ar an líne sin. Ba cheart don Fhionlainn an Coimisiún a chur ar an eolas faoi thoradh na hanailíse ar inmharthanacht eacnamaíoch in 2030 agus ar bhonn débhliantúil ag deireadh 2032 agus 2034 faoin dul chun cinn maidir le cur chun feidhme Bhonnlíne 4 ETCS ar an líne sin, ar choinníoll go ndearnadh cinneadh ina leith.

(7)

Bunaithe ar an údar leis an iarraidh a chuir an Fhionlainn ar fáil agus ar na forálacha malartacha atá beartaithe, is féidir a mheas go bhfuil na coinníollacha a leagtar amach in Airteagal 7(1), pointe (c), agus in Airteagal 7(4) de Threoir (AE) 2016/797 comhlíonta i ndáil leis tionscadal an riain phíolótaigh EKA a bhfuil cur síos air anseo. Dá bhrí sin, ba cheart glacadh leis an iarraidh.

(8)

Tá na bearta dá bhforáiltear sa Chinneadh seo i gcomhréir leis an tuairim ón gCoiste dá dtagraítear in Airteagal 51(1) de Threoir (AE) 2016/797,