(1)

L-opportunitajiet tas-sajd tal-Unjoni għall-capelin fl-ilmijiet ta’ Greenland taż-żoni V u XIV tal-ICES huma stipulati provviżorjament fl-Anness IB għar-Regolament (UE) Nru 53/2010 u jammontaw għal 0 tunnellati. Skont l-Artikolu 5(4) ta’ dak ir-Regolament, il-Kummissjoni għandha tistabbilixxi dawk l-opportunitajiet tas-sajd malli l-ammont ta’ qabdiet totali permissibbli (TAC) għal dak it-tip ta’ sajd ikunu ġew stabbiliti.

(2)

Skont il-Protokoll li jistabbilixxi l-opportunitajiet ta’ sajd u l-kontribut finanzjarju previsti fil-Ftehim ta’ Sħubija fis-Sajd bejn l-Unjoni Ewropea, minn naħa waħda, u l-Gvern tad-Danimarka u l-Gvern Awtonomu ta’ Greenland, min-naħa l-oħra (2), l-Unjoni għandha tirċievi 7,7 % tat-TAC għall-capelin fl-ilmijiet ta’ Greenland taż-żoni V u XIV tal-ICES.

(3)

Il-Kummissjoni rċeviet informazzjoni mill-awtoritajiet ta’ Greenland li t-TAC ġie stabbilit għal 150 000 tunnellata u li Greenland se talloka 11 550 tunnellata lill-Unjoni f’konformità mas-sehem stabbilit skont il-Protokoll, li għandu jiġi mistad sat-30 ta’ April 2010.

(4)

Fid-dawl tal-Minuti Maqbula dwar il-Konklużjonijiet mill-konsultazzjonijiet rigward is-sajd bejn l-Unjoni u l-Iżlanda għall-2009, iffirmati fis-16 ta’ Ottubru 2009, u b’mod partikolari l-kwantità pendenti ta’ 21 624 tunnellata ta’ capelin dovuti lill-Islanda mill-istaġun tas-sajd preċedenti, huwa xieraq li l-opportunitajiet għas-sajd tal-capelin tal-Unjoni Ewropea fl-2010 jiġu ttrasferiti lill-Iżlanda.

(5)

L-Anness IB tar-Regolament (UE) Nru 53/2010 għandu għalhekk jiġi emendat skont dan.

(6)

Sabiex tiġi evitata l-interruzzjoni għall-attivitajiet tas-sajd, dan ir-Regolament għandu jidħol fis-seħħ immedjatament wara l-pubblikazzjoni tiegħu u japplika mill-1 ta’ Jannar 2010,