(1)

Fit-13 ta’ Marzu 2024, il-Kunsill Governattiv iddeċieda li jintroduċi bidliet fil-qafas operattiv għall-implimentazzjoni tal-politika monetarja. Ir-remunerazzjoni tad-differenza bejn il-valur tal-assi assenjati ta’ bank ċentrali nazzjonali u l-valur tal-bażi tal-passiv tiegħu jenħtieġ li tinbidel biex jiġi minimizzat l-effett fuq id-dħul monetarju li jirriżulta minn bidliet fil-pożizzjonijiet tal-assi finanzjarji netti tal-bank ċentrali nazzjonali. Barra minn hekk, il-pretensjonijiet u l-passiv intra-Eurosistema għandhom jiġu remunerati bl-applikazzjoni ta’ kriterju oġġettiv biex tiġi definita l-ispiża tal-flus. F’dan il-kuntest, ir-rata tal-imgħax fuq il-faċilità ta’ depożitu titqies xierqa.

(2)

Fil-karta tal-bilanċ armonizzata (HBS) l-ebda bilanċ tal-Eurosistema ma għandu jiġi rrapportat jew mill-banek ċentrali nazzjonali taħt il-partita 10.2 tal-passiv tal-HBS “Passiv relatat mal-ħruġ ta’ ċertifikati ta’ dejn tal-BĊE” jew mill-BĊE taħt il-partita 9.3 tal-attiv tal-HBS “Pretensjonijiet relatati mal-ħruġ ta’ ċertifikati ta’ dejn tal-BĊE”. Il-partita tal-passiv tal-HBS 10.2 għandha tirrapporta l-passiv tat-TARGET separatament mill-passiv l-ieħor intra-Eurosistema, li għandhu jiġi rrapportat taħt il-partita 10.4 tal-passiv tal-HBS “Passiv ieħor fi ħdan l-Eurosistema (nett)”. Bl-istess mod, il-partita 9.3 tal-attiv tal-HBS għandha tirrapporta l-pretensjonijiet tat-TARGET separatament minn pretensjonijiet oħra intra-Eurosistema. Għall-finijiet tal-allokazzjoni tad-dħul monetarju, il-kompożizzjoni tal-bażi tal-passiv u l-lista tal-assi assenjabbli jenħtieġ li jiġu emendati biex jirriflettu dawn l-aspetti.

(3)

Għaldaqstant, id-Deċiżjoni (UE) 2016/2248 tal-Bank Ċentrali Ewropew (BĊE/2016/36) (1) għandha tiġi emendata kif meħtieġ,