(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

Preparat ta’ Saccharomyces cerevisiae CNCM I-1077 ġie awtorizzat għal perjodu ta’ 10 snin bħala addittiv tal-għalf għall-ħrief u ż-żwiemel bir-Regolament ta’ Implimentazzjoni tal-Kummissjoni (UE) 2020/149 (2).

(3)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni ta’ preparat ta’ Saccharomyces cerevisiae CNCM I-1077. Flimkien ma’dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

L-applikazzjoni tikkonċerna l-awtorizzazzjoni tal-preparat ta’ Saccharomyces cerevisiae CNCM I-1077 bħala addittiv tal-għalf għar-ruminanti (għajr il-ħrief) u l-kamelidi mrobbija għall-produzzjoni tal-ħalib jew imrobbija għar-riproduzzjoni, ir-ruminanti żgħar tas-simna għajr l-għoġġiela u l-ħrief, l-għoġġiela kamelidi tas-simna, u l-Equidae għajr iż-żwiemel, bit-talba li l-addittiv jiġi kklassifikat fil-kategorija “addittivi żootekniċi” u fil-gruppi funzjonali “sustanzi li jsaħħu d-diġestibbiltà” u “stabbilizzanti għall-batterji li jkun hemm fil-musrana”.

(5)

F’konformità mal-Artikolu 13(3) tar-Regolament (KE) Nru 1831/2003, tressqet applikazzjoni għall-modifika tat-termini tal-awtorizzazzjoni tal-preparat ta’ Saccharomyces cerevisiae CNCM I-1077 kif stabbilit fir-Regolament ta’ Implimentazzjoni (UE) 2020/149 fir-rigward tal-użu għall-ħrief. Dik l-applikazzjoni kkonċernat talba biex il-livell minimu tal-inklużjoni fl-għalf jitbaxxa minn 3 × 109 għal 1 × 109 CFU/kg ta’ għalf komplet b’kontenut ta’ ndewwa ta’ 12 %.

(6)

Fl-opinjoni tagħha tal-15 ta’ Ottubru 2024 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, fil-kundizzjonijiet proposti tal-użu, il-preparat ta’ Saccharomyces cerevisiae CNCM I-1077 hu sikur għall-ispeċijiet fil-mira, għall-konsumaturi u għall-ambjent. L-Awtorità kkonkludiet ukoll li l-preparat ta’ Saccharomyces cerevisiae CNCM I-1077, fiż-żewġ formulazzjonijiet, jenħtieġ li jitqies bħala sensitizzatur tal-ġilda u respiratorju u kwalunkwe esponiment mill-ġilda u mill-apparat respiratorju jitqies bħala riskju. Il-forma mhux miksija tal-addittiv mhijiex irritanti għall-ġilda jew għall-għajnejn. Ma tista’ tinsilet l-ebda konklużjoni dwar il-potenzjal ta’ irritazzjoni tal-għajnejn tal-forma miksija tal-addittiv minħabba n-nuqqas ta’ data. L-Awtorità kkonkludiet ukoll li l-preparat ta’ Saccharomyces cerevisiae CNCM I-1077 għandu l-potenzjal li jkun effikaċi fir-ruminanti u l-kamelidi kollha mrobbija għall-produzzjoni tal-ħalib jew għat-treddigħ jew għar-riproduzzjoni fil-livell minimu ta’ użu propost ta’ 5 × 108 CFU/kg ta’ għalf komplet, fl-ispeċijiet ta’ ruminanti minuri (żgħar) kollha u l-kamelidi għas-simna u l-ħrief fil-livell ta’ 1 × 109 CFU/kg ta’ għalf komplet, u fl-ispeċijiet kollha tal-Equidae għajr iż-żwiemel fil-livell ta’ 3 × 109 CFU/kg ta’ għalf komplet. Ma kinitx tal-fehma li hemm bżonn ta’ rekwiżiti speċifiċi ta’ monitoraġġ ta’ wara l-introduzzjoni fis-suq.

(7)

F’konformità mal-Artikolu 5(4), il-punt (a) tar-Regolament tal-Kummissjoni (KE) Nru 378/2005 (4), il-Laboratorju ta’ Referenza stabbilit bir-Regolament (KE) Nru 1831/2003 qies li l-konklużjonijiet u r-rakkomandazzjonijiet milħuqa f’valutazzjoni preċedenti fir-rigward tal-istess addittiv huma validi u applikabbli għall-applikazzjoni attwali.

(8)

Fid-dawl ta’ dan ta’ hawn fuq, il-Kummissjoni hija tal-fehma li l-preparat ta’ Saccharomyces cerevisiae CNCM I-1077 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dak il-preparat jiġi awtorizzat għar-ruminanti (għajr il-ħrief) u għall-kamelidi mrobbija għall-produzzjoni tal-ħalib jew imrobbija għar-riproduzzjoni, għar-ruminanti żgħar tas-simna għajr l-għoġġiela u l-ħrief, għall-għoġġiela kamelidi tas-simna, u għall-Equidae għajr iż-żwiemel. Barra minn hekk, il-Kummissjoni jidhrilha li jenħtieġ li jittieħdu miżuri protettivi xierqa biex jiġu evitati l-effetti negattivi fuq is-saħħa tal-utenti tal-addittiv.

(9)

Barra minn hekk, fid-dawl ta’ dan ta’ hawn fuq, il-Kummissjoni tqis li l-awtorizzazzjoni tal-preparat ta’ Saccharomyces cerevisiae CNCM I-1077 tkun għadha tissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003 jekk jiġu mmodifikati t-termini tagħha fir-rigward tal-użu għall-ħrief, billi jitnaqqas il-kontenut minimu tal-addittiv għal 1 × 109 CFU/kg ta’ għalf komplet. Għalhekk, jenħtieġ li r-Regolament ta’ Implimentazzjoni (UE) 2020/149 jiġi emendat kif xieraq.

(10)

Billi r-raġunijiet ta’ sikurezza ma jirrikjedux li jiġu applikati minnufih il-modifiki tal-kundizzjonijiet tal-awtorizzazzjoni tal-preparat ta’ Saccharomyces cerevisiae CNCM I-1077 għall-ħrief, jixraq li jiġi previst perjodu ta’ tranżizzjoni biex il-partijiet interessati jkunu jistgħu jħejju ruħhom biex jissodisfaw ir-rekwiżiti l-ġodda li jirriżultaw mill-modifika tal-awtorizzazzjoni kkonċernata.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,