|
22.3.2023 |
GA |
Iris Oifigiúil an Aontais Eorpaigh |
L 83/68 |
CINNEADH CUR CHUN FEIDHME (AE) 2023/664 ÓN gCOMHAIRLE
an 21 Márta 2023
lena n-údaraítear do Phoblacht na hIodáile beart speisialta a chur i bhfeidhm de mhaolú ar Airteagal 285 de Threoir 2006/112/CE maidir leis an gcomhchóras cánach breisluacha agus lena n-aisghairtear Cinneadh Cur Chun Feidhme (AE) 2020/647
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh,
Ag féachaint do Threoir 2006/112/CE ón gComhairle an 28 Samhain 2006 maidir leis an gcomhchóras cánach breisluacha (1), agus go háirithe Airteagal 395(1), an chéad fhomhír, de,
Ag féachaint don togra ón gCoimisiún Eorpach,
De bharr an mhéid seo a leanas:
|
(1) |
Le Cinneadh Cur Chun Feidhme (AE) 2020/647 ón gComhairle (2), údaraítear don Iodáil beart speisialta a chur i bhfeidhm de mhaolú ar Airteagal 285 de Threoir 2006/112/CE chun daoine inchánach nach mó a láimhdeachas bliantúil ná EUR 65 000 a dhíolmhú ó CBL go dtí an 31 Nollaig 2024. |
|
(2) |
Le litir a cláraíodh leis an gCoimisiún an 29 Samhain 2022, d’iarr an Iodáil údarú chun beart a chur i bhfeidhm ón 1 Eanáir 2023 go dtí an 31 Nollaig 2024, de mhaolú ar Airteagal 285 de Threoir 2006/112/CE chun daoine inchánach nach airde ná EUR 85 000 a láimhdeachas bliantúil a dhíolmhú ó CBL (“an beart speisialta”). |
|
(3) |
De bhun Airteagal 395(2), an dara fomhír, de Threoir 2006/112/CE, tharchuir an Coimisiún an iarraidh a rinne an Iodáil chuig na Ballstáit eile, le litir dar dáta an 8 Nollaig 2022. Le litir dar dáta an 9 Nollaig 2022, thug an Coimisiún fógra don Iodáil go raibh an fhaisnéis uile aige chun breithmheas a dhéanamh ar an iarraidh. |
|
(4) |
Tá an beart speisialta i gcomhréir le Treoir (AE) 2020/285 ón gComhairle (3), lena bhféachtar leis an ualach comhlíontachta ar fhiontair bheaga a laghdú agus le saobhadh iomaíochta sa mhargadh inmheánach a sheachaint. |
|
(5) |
Leanfaidh an beart speisialta de bheith roghnach do dhaoine inchánach. Féadfaidh daoine inchánach na gnáthshocruithe CBL a roghnú i gcomhréir le hAirteagal 290 de Threoir 2006/112/CE. |
|
(6) |
De réir na faisnéise a chuir an Iodáil ar fáil, ní bheidh ach éifeacht dhiomaibhseach ag an mbeart speisialta ar mhéid foriomlán an ioncaim cánach a bhailíonn an Iodáil ag céim an tomhaltais deiridh. |
|
(7) |
Tar éis theacht i bhfeidhm Rialachán (AE, Euratom) 2021/769 ón gComhairle (4), níl aon ríomh ar chúiteamh le déanamh ag an Iodáil maidir leis an ráiteas faoin acmhainní dílse CBL-bhunaithe don bhliain airgeadais 2021 agus ina dhiaidh sin. |
|
(8) |
Ós rud é go raibh tionchar dearfach ag an mbeart speisialta ar shimpliú na n-oibleagáidí a bhaineann le CBL, agus é gur laghdaigh sé t-an ualach riaracháin agus na costais chomhlíontachta d’fhiontair bheaga agus d’údaráis chánach araon agus gur thug sé cead don Iodáil tuilleadh acmhainní a leithdháileadh ar an gcomhrac i gcoinne calaois CBL trína gníomhaíochtaí rialaithe a dhíriú ar na daoine is mó atá inchánach, agus ós rud é nach mbeidh aon tionchar mór aige ar an ioncam CBL iomlán a ghinfear, ba cheart údarú a thabhairt don Iodáil an beart speisialta a chur i bhfeidhm. |
|
(9) |
Chun sláine thréimhse chánach na hIodáile, dar tús an 1 Eanáir agus a mhaireann go ceann bliana, a áirithiú agus chun nach gcuirfear ualach iomarcach riaracháin ar dhaoine inchánach agus ar údaráis chánach, is iomchuí údarú a thabhairt chun an beart speisialta a chur i bhfeidhm ón 1 Eanáir 2023. Trína fhoráil go gcuirfear an beart speisialta i bhfeidhm ó dháta a thagann roimh an dáta a ngabhann éifeacht leis, déantar ionchais dhlisteanacha daoine inchánach incháilithe a urramú ós rud é nach gcuireann an beart speisialta isteach ar a gcearta ná ar a n-oibleagáidí. |
|
(10) |
Ba cheart cur i bhfeidhm an bhirt speisialta a bheith teoranta ó thaobh ama de. Ba cheart an teorainn ama a bheith leordhóthanach chun gur féidir leis an gCoimisiún meastóireacht a dhéanamh ar éifeachtacht agus oiriúnacht na tairsí reatha. Thairis sin, de bhun Airteagal 3(1) de Threoir (AE) 2020/285, tá na Ballstáit, faoin 31 Nollaig 2024, leis na dlíthe, na rialacháin agus na forálacha riaracháin is gá a ghlacadh agus a fhoilsiú chun Airteagal 1(12) den Treoir sin a chomhlíonadh, agus tá siad leis na forálacha sin a chur i bhfeidhm ón 1 Eanáir 2025. Is iomchuí, dá bhrí sin, údarú a thabhairt don Iodáil an beart speisialta a chur i bhfeidhm go dtí an 31 Nollaig 2024. |
|
(11) |
Dá bhrí sin, ba cheart Cinneadh Cur Chun Feidhme (AE) 2020/647 a aisghairm, |
TAR ÉIS AN CINNEADH SEO A GHLACADH:
Airteagal 1
De mhaolú ar Airteagal 285 de Threoir 2006/112/CE, maidir le daoine inchánach ag a bhfuil láimhdeachas bliantúil nach airde ná EUR 85 000, údaraítear don Iodáil iad a dhíolmhú ó CBL.
Airteagal 2
Aisghairtear Cinneadh Cur Chun Feidhme (AE) 2020/647.
Airteagal 3
Gabhfaidh éifeacht leis an gCinneadh seo ar an dáta a dtabharfar fógra ina leith.
Beidh feidhm aige ón 1 Eanáir 2023 go dtí an 31 Nollaig 2024.
Airteagal 4
Dírítear an Cinneadh seo chuig Poblacht na hIodáile.
Arna dhéanamh sa Bhruiséil, an 21 Márta 2023.
Thar ceann na Comhairle
An tUachtarán
J. ROSWALL
(1) IO L 347, 11.12.2006, lch. 1.
(2) Cinneadh Cur Chun Feidhme (AE) 2020/647 ón gComhairle an 11 Bealtaine 2020 lena n-údaraítear do Phoblacht na hIodáile beart speisialta a chur i bhfeidhm de mhaolú ar Airteagal 285 de Threoir 2006/112/CE maidir leis an gcomhchóras cánach breisluacha (IO L 151, 14.5.2020, lch. 7).
(3) Treoir (AE) 2020/285 ón gComhairle an 18 Feabhra 2020 lena leasaítear Treoir 2006/112/CE maidir leis an gcomhchóras cánach breisluacha a mhéid a bhaineann leis an scéim speisialta d’fhiontair bheaga agus Rialachán (AE) Uimh. 904/2010 a mhéid a bhaineann leis an gcomhar riaracháin agus leis an malartú faisnéise chun faireachán a dhéanamh ar chur i bhfeidhm ceart na scéime speisialta d’fhiontair bheaga (IO L 62, 2.3.2020, lch. 13).
(4) Rialachán (AE, Euratom) 2021/769 ón gComhairle an 30 Aibreán 2021 lena leasaítear Rialachán Uimh. 1553/89 maidir leis na comhshocraíochtaí aonfhoirmeacha cinntitheacha chun acmhainní dílse a fhabhraíonn ó cháin bhreisluacha a bhailiú (IO L 165, 11.5.2021, lch. 9).’.