(1)

Il-Ftehim dwar it-Trasport Internazzjonali ta’ Oġġetti Perikolużi bit-Triq (ADR) daħal fis-seħħ fid-29 ta’ Jannar 1968. Il-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN) daħal fis-seħħ fit-28 ta’ Frar 2008.

(2)

Skont l-Artikolu 14 tal-ADR, kull Parti Kontraenti tista’ tipproponi emenda waħda jew aktar għall-Annessi tal-ADR. Il-Grupp ta’ Ħidma dwar it-Trasport ta’ Oġġetti Perikolużi (WP.15) huwa l-korp kompetenti biex jiddeċiedi dwar l-adozzjoni ta’ kwalunkwe emenda bħal din.. Skont l-Artikolu 20 tal-ADN, kwalunkwe Parti Kontraenti tista’ tipproponi emenda waħda jew aktar għar-Regolamenti annessi mal-ADN. Il-Kumitat Amministrattiv stabbilit skont l-ADN huwa l-korp kompetenti biex jiddeċiedi dwar l-adozzjoni ta’ kwalunkwe emenda bħal din.

(3)

Matul il-perjodu ta’ sentejn bejn l-2022 u l-2024 id-WP.15 u mill-Kumitat Amministrattiv tal-ADN adottaw emendi għall-Annessi tal-ADR u għar-Regolamenti annessi mal-ADN, rispettivament, li ġew notifikati lill-Partijiet Kontraenti tal-ADR u lill-Partijiet Kontraenti tal-ADN fl-1 ta’ Lulju 2024 u fl-1 ta’ Settembru 2024, rispettivament.

(4)

Skont l-Artikolu 14 tal-ADR, l-emendi proposti għall-Annessi jitqiesu aċċettati sakemm mill-inqas terz tal-Partijiet Kontraenti, jew ħamsa minnhom jekk terz jaqbeż dik iċ-ċifra, ma joġġezzjonawx għal dawk l-emendi fi żmien tliet xhur mid-data li fiha s-Segretarju Ġenerali jkun iċċirkola l-emendi proposti. Skont l-Artikolu 20 tal-ADN, kwalunkwe abbozz ta’ emenda għar-Regolamenti annessi mal-ADN jitqies bħala aċċettat sakemm mill-inqas terz tal-Partijiet Kontraenti, jew ħamsa minnhom jekk terz jaqbeż dik iċ-ċifra, ma joġġezzjonawx għal dawk l-emendi fi żmien tliet xhur mid-data li fiha s-Segretarju Ġenerali jkun iċċirkolahom.

(5)

Jixraq li tiġi stabbilita l-pożizzjoni li għandha tiġi adottataf’isem l-Unjoni fir-rigward ta’ dawk l-emendi għall-ADR u għall-ADN, peress li dawk se jkunu vinkolanti skont id-dritt internazzjonali u kapaċi jinfluwenzaw b’mod deċiżiv il-kontenut tal-liġi tal-Unjoni, jiġifieri d-Direttiva 2008/68/KE tal-Parlament Ewropew u tal-Kunsill (1). Dik id-Direttiva tistabbilixxi r-rekwiżiti għat-trasport tal-oġġetti perikolużi bit-triq, bil-ferrovija jew fuq il-passaġġi tal-ilma interni, li għandhom japplikaw fl-Istati Membri jew bejniethom, billi tirreferi għall-ADR u għall-ADN. Barra minn hekk, dik id-Direttiva tipprevedi li t-trasport tal-oġġetti perikolużi bejn l-Istati Membri u l-pajjiżi terzi għandu jiġi awtorizzat diment li dan ikun konformi mar-rekwiżiti tal-ADR, ir-Regolamenti dwar it-Trasport Internazzjonali ta’ Oġġetti Perikolużi bil-Ferrovija (RID) u l-ADN. Barra minn hekk, f’konformità mal-Artikolu 8 tad-Direttiva 2008/68/KE, il-Kummissjoni għandha s-setgħa li tadatta l-Anness I, it-Taqsima I.1, u l-Anness III, it-Taqsima III.1, tad-Direttiva 2008/68/KE għall-progress xjentifiku u tekniku, b’mod partikolari biex jitqiesu l-emendi għall-ADR, għall-RID jew għall-ADN.

(6)

L-Unjoni mhix Parti Kontraenti għall-ADR jew għall-ADN. Madankollu, dan il-fatt ma jwaqqafhiex milli teżerċita l-kompetenza tagħha billi tistabbilixxi, permezz tal-istituzzjonijiet tagħha, pożizzjoni li għandha tiġi adottata f’isimha fil-korp stabbilit b’wieħed minn dawk il-Ftehimiet, b’mod partikolari permezz tal-Istati Membri li huma Partijiet Kontraenti għal xi wieħed minn dawk iż-żewġ Ftehimiet filwaqt li jaġixxu b’mod konġunt fl-interesstal-Unjoni.

(7)

L-Istati Membri kollha huma Partijiet Kontraenti għall-ADR u japplikawh, u 13-il Stat Membru huma Partijiet Kontraenti għall-ADN u japplikawh.

(8)

L-emendi previsti għandhom l-għan li jiżguraw it-trasport sikur u effiċjenti tal-oġġetti perikolużi, filwaqt li jitqies il-progress xjentifiku u tekniku fis-settur, u l-iżvilupp ta’ sustanzi u oġġetti ġodda li jistgħu joħolqu periklu waqt it-trasport tagħhom. L-iżvilupp tat-trasport tal-oġġetti perikolużi bit-triq u fuq il-passaġġi tal-ilma interni, fl-Unjoni u anki bejn l-Unjoni u l-pajjiżi ġirien tagħha, hu komponent ewlieni tal-politika komuni tat-trasport u jiżgura l-funzjonament tajjeb tal-fergħat industrijali kollha li jipproduċu jew jużaw oġġetti klassifikati bħala perikolużi skont l-ADR jew l-ADN.

(9)

L-emendi previsti huma kkunsidrati xierqa għat-trasport sikur tal-oġġetti perikolużi b’mod kosteffettiv, huma ġustifikati u ta’ benefiċċju u għalhekk jenħtieġ li jiġu appoġġati mill-Unjoni.

(10)

Il-pożizzjoni tal-Unjoni fir-rigward tal-emendi għall-Annessi tal-ADR u l-emendi għar-Regolamenti annessi mal-ADN għandha tiġi espressa mill-Istati Membri tagħha li huma Partijiet Kontraenti għall-ADR u għall-ADN, rispettivament, filwaqt li jaġixxu b’mod konġunt fl-interess tal-Unjoni,