European flag

Iris Oifigiúil
an Aontais Eorpaigh

GA

Sraith L


2025/2519

16.12.2025

CINNEADH CUR CHUN FEIDHME (AE) 2025/2519 ÓN gCOIMISIÚN

an 15 Nollaig 2025

lena leasaítear Cinneadh Cur Chun Feidhme (AE) 2023/740 a mhéid a bhaineann le caighdeáin chomhchuibhithe maidir le cluichí boird boltanacha, trealamh cosmaidí agus cluichí blastachta agus maidir le haistriú gnéithe áirithe ó bhréagáin

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 1025/2012 ó Pharlaimint na hEorpa agus ón gComhairle an 25 Deireadh Fómhair 2012 maidir le caighdeánú Eorpach, lena leasaítear Treoracha 89/686/CEE agus 93/15/CEE ón gComhairle agus Treoracha 94/9/CE, 94/25/CE, 95/16/CE, 97/23/CE, 98/34/CE, 2004/22/CE, 2007/23/CE, 2009/23/CE agus 2009/105/CE ó Pharlaimint na hEorpa agus ón gComhairle agus lena n-aisghairtear Cinneadh 87/95/CEE ón gComhairle agus Cinneadh Uimh. 1673/2006/CE ó Pharlaimint na hEorpa agus ón gComhairle (1), agus go háirithe Airteagal 10(6) de,

De bharr an mhéid seo a leanas:

(1)

I gcomhréir le hAirteagal 13 de Threoir 2009/48/CE ó Pharlaimint na hEorpa agus ón gComhairle (2), bréagáin atá i gcomhréir le caighdeáin chomhchuibhithe nó le codanna díobh, caighdeáin ar foilsíodh na tagairtí dóibh in Iris Oifigiúil an Aontais Eorpaigh, glacfar leis go bhfuil siad i gcomhréir leis na ceanglais a chumhdaítear leis na caighdeáin sin nó leis na codanna sin díobh agus a leagtar amach in Airteagal 10 de Threoir 2009/48/CE agus in Iarscríbhinn II a ghabhann leis an Treoir sin.

(2)

I gCuid III d’Iarscríbhinn II a ghabhann le Treoir 2009/48/CE, leagtar ceanglais shonracha síos chun a áirithiú nach bhfuil aon riosca go mbeadh éifeachtaí díobhálacha ann ó thaobh shláinte an duine de bharr nochtadh do na substaintí ceimiceacha nó na meascáin cheimiceacha as a ndearnadh na bréagáin nó atá sna bréagáin. Thairis sin, leagtar síos in Airteagal 10(2) an ceanglas sábháilteachta ginearálta.

(3)

Le Cinneadh Cur Chun Feidhme C(2022)7410 (3), rinne an Coimisiún iarraidh ar an gCoiste Eorpach um Chaighdeánú (CEN) agus ar Choiste Eorpach na gCaighdeán Leictriteicniúil (Cenelec) caighdeáin chomhchuibhithe nua a dhréachtú agus caighdeáin chomhchuibhithe atá ann cheana a athbhreithniú chun tacú le Treoir 2009/48/CE.

(4)

Ar bhonn na hiarrata a leagtar amach i gCinneadh Cur Chun Feidhme C(2022)7410, rinne CEN athbhreithniú ar chaighdeáin chomhchuibhithe EN 71-13:2021+A1:2022 ‘Sábháilteacht bréagán - Cuid 13: Cluichí boird boltanacha, trealamh cosmaidí agus cluichí blastachta’ agus EN 71-3:2019+A1:2021 ‘Sábháilteacht bréagán – Cuid 3: Aistriú gnéithe áirithe’, ar foilsíodh na tagairtí dóibh le Cinneadh Cur Chun Feidhme (AE) 2023/740 ón gCoimisiún (4) . Is é an toradh a bhí air sin gur glacadh caighdeáin chomhchuibhithe EN 71-13:2021+A2:2024 agus EN 71-3:2019+A2:2024.

(5)

Rinne an Coimisiún measúnú i gcomhar le CEN féachaint an gcomhlíonann na caighdeáin sin an iarraidh a leagtar amach i gCinneadh Cur Chun Feidhme C(2022) 7410.

(6)

Caighdeáin chomhchuibhithe EN 71-13:2021+A2:2024 agus EN 71-3:2019+A2:2024, comhlíonann siad na ceanglais fhíor-riachtanacha is aidhm dóibh a chumhdach agus a leagtar amach i dTreoir 2009/48/AE. Dá bhrí sin, is iomchuí na tagairtí do na caighdeáin sin a fhoilsiú in Iris Oifigiúil an Aontais Eorpaigh.

(7)

San Iarscríbhinn a ghabhann le Cinneadh Cur Chun Feidhme (AE) 2023/740, liostaítear na tagairtí do na caighdeáin chomhchuibhithe a dréachtaíodh chun tacú le Treoir 2009/48/CE. Chun a áirithiú go liostófar in aon ghníomh amháin na tagairtí do chaighdeáin chomhchuibhithe a dréachtaíodh chun tacú le Treoir 2009/48/CE, ba cheart na tagairtí do EN 71-13:2021+A2:2024 agus EN 71-3:2019+A2:2024 a chuimsiú i gCinneadh Cur Chun Feidhme (AE) 2023/740.

(8)

Cuirtear caighdeáin chomhchuibhithe EN 71-13:2021+A2:2024 agus EN 71-3:2019+A2:2024 in ionad chaighdeáin chomhchuibhithe EN 71-13:2021+A1:2022 agus 71-3:2019+A1:2021 faoi seach. Dá bhrí sin, is gá na tagairtí do na caighdeáin sin a tharraingt siar as Iris Oifigiúil an Aontais Eorpaigh. Tarraingt siar na dtagairtí do chaighdeáin chomhchuibhithe EN 71-13:2021+A1:2022 agus 71-3:2019+A1:2021, is gá í a chur siar ionas go mbeidh dóthain ama ag monaróirí bréagán a dtáirgí a oiriúnú do na sonraíochtaí athbhreithnithe i gcaighdeáin EN 71-13:2021+A2:2024 agus EN 71-3:2019+A2:2024.

(9)

Dá bhrí sin, ba cheart Cinneadh Cur Chun Feidhme (AE) 2023/740 a leasú dá réir.

(10)

Is éard a thugtar le fios le caighdeán comhchuibhithe a chomhlíonadh go nglactar leis go bhfuil comhréir ann leis na ceanglais fhíor-riachtanacha chomhfhreagracha a leagtar amach i reachtaíocht chomhchuibhithe an Aontais ón dáta a fhoilsítear an tagairt don chaighdeán sin in Iris Oifigiúil an Aontais Eorpaigh. Dá bhrí sin, ba cheart an Cinneadh seo a theacht i bhfeidhm lá a fhoilsithe,

TAR ÉIS AN CINNEADH SEO A GHLACADH:

Airteagal 1

Leasaítear an Iarscríbhinn a ghabhann le Cinneadh Cur Chun Feidhme (AE) 2023/740 i gcomhréir leis an Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm lá a fhoilsithe in Iris Oifigiúil an Aontais Eorpaigh.

Beidh feidhm ag pointe (1) den Iarscríbhinn ón 16 Meitheamh 2027.

Beidh feidhm ag pointe (2) den Iarscríbhinn ó lá foilsithe an Chinnidh seo in Iris Oifigiúil an Aontais Eorpaigh.

Arna dhéanamh sa Bhruiséil, an 15 Nollaig 2025.

Thar ceann an Choimisiúin

An tUachtarán

Ursula VON DER LEYEN


(1)   IO L 316, 14.11.2012, lch. 12, ELI: http://data.europa.eu/eli/reg/2012/1025/oj.

(2)  Treoir 2009/48/CE ó Pharlaimint na hEorpa agus ón gComhairle an 18 Meitheamh 2009 maidir le sábháilteacht bréagán (IO L 170, 30.6.2009, lch. 1, ELI: http://data.europa.eu/eli/dir/2009/48/oj).

(3)  Cinneadh Cur Chun Feidhme C(2022)7410 final ón gCoimisiún an 24 Deireadh Fómhair 2022 maidir le hiarraidh um chaighdeánú i ndáil le bréagáin chuig an gCoiste Eorpach um Chaighdeánú agus chuig Coiste Eorpach na gCaighdeán Leictriteicniúil chun tacú le Treoir 2009/48/CE ó Pharlaimint na hEorpa agus ón gComhairle.

(4)  Cinneadh Cur Chun Feidhme (AE) 2023/740 ón gCoimisiún an 4 Aibreán 2023 maidir le caighdeáin chomhchuibhithe i ndáil le bréagáin a dréachtaíodh chun tacú le Treoir 2009/48/CE ó Pharlaimint na hEorpa agus ón gComhairle (IO L 96, 5.4.2023, lch. 85, ELI: http://data.europa.eu/eli/dec_impl/2023/740/oj).


IARSCRÍBHINN

Leasaítear mar a leanas an Iarscríbhinn a ghabhann le Cinneadh Cur Chun Feidhme (AE) 2023/740:

(1)

scriostar rónna 3 agus 9;

(2)

cuirtear na rónna seo a leanas isteach in ord seicheamhach:

Uimh.

Uimhir thagartha an chaighdeáin

‘3a.

71-3:2019+A2:2024

Sábháilteacht bréagán – Cuid 3: Aistriú gnéithe áirithe’;

‘9a.

EN 71-13:2021+A2:2024

Sábháilteacht bréagán – Cuid 13: Cluichí boird boltanacha, trealamh cosmaidí agus cluichí blastachta’.


ELI: http://data.europa.eu/eli/dec_impl/2025/2519/oj

ISSN 1977-0839 (electronic edition)