AN COIMISIÚN EORPACH
An Bhruiséil,16.9.2025
COM(2025) 491 final
TUARASCÁIL ÓN gCOIMISIÚN CHUIG PARLAIMINT NA hEORPA AGUS CHUIG AN gCOMHAIRLE
maidir le feidhmiú na gcumhachtaí a tarmligeadh ar an gCoimisiún chun gníomhartha tarmligthe a ghlacadh, de bhun Airteagail 6(6), 7(6) agus 27 de Threoir 2016/798
1.Réamhrá
Tugtar cumhachtaí don Choimisiún, le hAirteagail 6(6) agus 7(6) de Threoir (AE) 2016/798 ó Pharlaimint na hEorpa agus ón gComhairle an 11 Bealtaine 2016 maidir le sábháilteacht iarnróid ( 1 ), gníomhartha tarmligthe a ghlacadh i gcomhréir leis na coinníollacha a leagtar síos le hAirteagal 27 den Treoir sin go ceann tréimhse 5 bliana, dar tús an 15 Meitheamh 2016, tréimhse a fhadófar go hintuigthe go ceann tréimhsí comhfhaid.
Baineann an tuarascáil seo le cumhacht an Choimisiúin gníomhartha tarmligthe a ghlacadh agus liostaítear inti na gníomhartha arna nglacadh ag an gCoimisiún ina fheidhmiú don tréimhse ón 17 Eanáir 2022, dáta na tuarascála roimhe sin ( 2 ), go dtí an 16 Meán Fómhair 2025.
2.An bunús dlí le haghaidh na tuarascála
I gcomhréir le hAirteagal 27(2) de Threoir (AE) 2016/798, ní mór don Choimisiún tuarascáil a tharraingt suas maidir le tarmligean na cumhachta tráth nach déanaí ná 9 mí roimh dheireadh na tréimhse 5 bliana.
3.Feidhmiú na cumhachta gníomhartha tarmligthe a ghlacadh
Léirítear sa tábla seo a leanas na cumhachtuithe ábhartha:
|
Treoir (AE) 2016/798 |
Cumhachtú chun gníomhartha tarmligthe a ghlacadh |
|
Airteagal 6(6) i gcomhar le hAirteagal 6(1) |
Tugtar de chumhacht don Choimisiún gníomhartha tarmligthe a ghlacadh, i gcomhréir le hAirteagal 27, a bhaineann le hinneachar na Modhanna Comhchoiteanna Sábháilteachta i dtaca leis an méid seo a leanas: (a)na modhanna meastóireachta agus measúnaithe riosca; (b)na modhanna chun measúnú a dhéanamh ar an gcomhréireacht leis na ceanglais atá sna deimhnithe sábháilteachta agus sna húdaruithe sábháilteachta arna n-eisiúint i gcomhréir le hAirteagail 10 agus 12; (c)na modhanna maoirseachta a bheidh le cur i bhfeidhm ag na húdaráis náisiúnta sábháilteachta agus na modhanna faireacháin a bheidh le cur i bhfeidhm ag na gnóthais iarnróid, ag na bainisteoirí bonneagair agus ag na heintitis a bhfuil cúraim na cothabhála orthu; (d)na modhanna chun measúnú a dhéanamh ar leibhéal sábháilteachta agus ar fheidhmiú sábháilteachta na n-oibreoirí iarnróid ar an leibhéal náisiúnta agus ar leibhéal an Aontais; (e)na modhanna chun measúnú a dhéanamh ar bhaint amach na spriocanna sábháilteachta ar an leibhéal náisiúnta agus ar leibhéal an Aontais; agus (f)aon mhodh eile a chumhdaíonn próiseas de chuid an chórais bainistíochta sábháilteachta is gá a chomhchuibhiú ar leibhéal an Aontais. |
|
Airteagal 6(6) i gcomhar le hAirteagal 7(1) |
Tugtar de chumhacht don Choimisiún gníomhartha tarmligthe a ghlacadh, i gcomhréir le hAirteagal 27, a bhaineann le hinneachar na Spriocanna Comhchoiteanna Sábháilteachta agus go háirithe leis an méid seo a leanas: (a)rioscaí aonair a bhaineann le paisinéirí, le baill foirne lena n-áirítear fostaithe agus conraitheoirí, le húsáideoirí crosairí comhréidhe agus le daoine eile, agus, gan dochar do rialacha dliteanais náisiúnta agus idirnáisiúnta atá ann cheana féin, rioscaí aonair a bhaineann le treaspásóirí; (b)rioscaí sochaíocha. |
Sa tréimhse a chumhdaítear leis an tuarascáil seo, níor fheidhmigh an Coimisiún a chumhachtuithe faoi Airteagal 6(6) agus Airteagal 7(6) de Threoir (AE) 2016/798. Measann an Coimisiún gur leor an creat rialála atá ann cheana chun cobhsaíocht agus éifeachtúlacht chóras iarnróid na hEorpa a áirithiú.
Sa tréimhse roimhe seo agus atá fós i bhfeidhm, d’fheidhmigh an Coimisiún a chumhachtú faoi Airteagal 6(6) de Threoir (AE) 2016/798 chun an méid seo a leanas a ghlacadh:
(1)Rialachán Tarmligthe (AE) 2018/761 ón gCoimisiún an 16 Feabhra 2018 lena mbunaítear modhanna comhchoiteanna sábháilteachta maidir le maoirseacht a dhéanann údaráis náisiúnta sábháilteachta tar éis deimhniú aonair sábháilteachta nó údarú sábháilteachta a eisiúint de bhun Threoir (AE) 2016/798 ó Pharlaimint na hEorpa agus ón gComhairle agus lena n-aisghairtear Rialachán (AE) Uimh. 1077/2012 ón gCoimisiún ( 3 );
(2)Rialachán Tarmligthe (AE) 2018/762 ón gCoimisiún an 8 Márta 2018 lena mbunaítear modhanna comhchoiteanna sábháilteachta maidir le ceanglais i ndáil le córas bainistíochta sábháilteachta de bhun Threoir (AE) 2016/798 ó Pharlaimint na hEorpa agus ón gComhairle agus lena n-aisghairtear Rialacháin (AE) Uimh. 1158/2010 ón gCoimisiún agus (AE) Uimh. 1169/2010 ón gCoimisiún ( 4 ).
Leis na rialacháin tharmligthe seo leagtar amach modhanna comhleanúnacha chun an tsábháilteacht a ráthú agus a fheabhsú tríd an maoirseacht a dhéanann na húdaráis náisiúnta sábháilteachta agus trí leagan síos na gceanglas i ndáil le córais bhainistíochta sábháilteachta.
4.Conclúidí
Leis an tuarascáil seo, comhlíonann an Coimisiún na ceanglais tuairiscithe a leagtar amach in Airteagal 27(2) de Threoir (AE) 2016/798.
Iarrann an Coimisiún ar Pharlaimint na hEorpa agus ar an gComhairle an tuarascáil seo a thabhairt dá n-aire.