European flag

Iris Oifigiúil
an Aontais Eorpaigh

GA

Sraith L


2024/2986

3.12.2024

CINNEADH TARMLIGTHE (AE) 2024/2986 ÓN gCOIMISIÚN

an 24 Meán Fómhair 2024

maidir le hearnálacha a chuir an Ostair san áireamh go haontaobhach sa chóras trádála astaíochtaí laistigh den Aontas le haghaidh foirgneamh, iompar de bhóthar agus earnálacha breise de bhun Airteagal 30j de Threoir 2003/87/CE ó Pharlaimint na hEorpa agus ón gComhairle

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir 2003/87/CE ó Pharlaimint na hEorpa agus ón gComhairle an 13 Deireadh Fómhair 2003 lena mbunaítear córas maidir le trádáil lamháltas astaíochtaí gás ceaptha teasa laistigh den Aontas agus lena leasaítear Treoir 96/61/CE ón gComhairle (1), agus go háirithe Airteagal 30j de,

De bharr an mhéid seo a leanas:

(1)

Le hAirteagal 30j(1) de Threoir 2003/87/CE, tugtar an deis do na Ballstáit, ó 2027 ar aghaidh, leathnú a dhéanamh, go haontaobhach, ar chur i bhfeidhm an chórais trádála astaíochtaí laistigh den Aontas (‘CTA AE’) le haghaidh foirgneamh, iompar de bhóthar agus earnálacha breise chun earnálacha a chumhdach nach liostaítear in Iarscríbhinn III a ghabhann le Treoir 2003/87/CE.

(2)

Agus leas á bhaint ag na Ballstáit as an bhféidearthacht sin, cuirfidh siad san áireamh go háirithe na héifeachtaí ar an margadh inmheánach, saobhadh iomaíochta féideartha, sláine comhshaoil an chórais trádála astaíochtaí agus iontaofacht an chórais faireacháin agus tuairiscithe atá beartaithe.

(3)

An 31 Bealtaine 2024, thug an Ostair fógra faoi iarraidh ar chur i bhfeidhm an chórais trádála astaíochtaí le haghaidh foirgneamh, iompar de bhóthar agus earnálacha breise a leathnú chun liosta earnálacha a chumhdach nach gcumhdaítear go fóill le hIarscríbhinn III a ghabhann le Treoir 2003/87/CE ná le Caibidlí II agus III di.

(4)

Mhínigh údaráis na hOstaire go n-éascódh an leathnú aontaobhach sin aistriú an chórais praghsála náisiúnta CO2 chuig an gcóras nua trádála astaíochtaí le haghaidh foirgneamh, iompar de bhóthar agus earnálacha breise. Ina theannta sin, laghdóidh sé na costais riaracháin agus éascóidh sé na próisis tuairiscithe agus faireacháin le haghaidh na n-eintiteas rialáilte agus an údaráis inniúil náisiúnta.

(5)

I dtuairim an Choimisiúin, dá leathnófaí raon feidhme CTA AE thar an liosta gníomhaíochtaí a liostaítear faoi Iarscríbhinn III a ghabhann le Treoir 2003/87/CE, mar a d’iarr an Ostair, bheadh tairbhí comhshaoil ann go deimhin, agus bheadh simpliú riaracháin ann do sholáthróirí breosla atá ag gníomhú mar eintitis rialáilte san Ostair.

(6)

Ar bhonn na sonraí athbhreithnithe maidir le hastaíochtaí gás ceaptha teasa le haghaidh na mblianta 2016, 2017 agus 2018 a rinneadh in 2020, i gcomhréir le hAirteagal 4(3) de Rialachán (AE) 2018/842 ó Pharlaimint na hEorpa agus ón gComhairle (2), is é 1 034 563 tCO2 meánmhéid iomlán na n-astaíochtaí a chomhfhreagraíonn do na hearnálacha ar thug an Ostair fógra ina leith i gcomhthéacs na hiarrata sin ar leathnú aontaobhach. Úsáidfear an méid sin mar bhonn chun méid na lamháltas breise a bheidh le heisiúint amach anseo ó 2027 ar aghaidh a ríomh.

(7)

Rinne an Coimisiún measúnú ar na modheolaíochtaí tuairiscithe agus faireacháin atá beartaithe ag an Ostair agus tháinig sé ar an gconclúid go bhfuil siad iontaofa agus i gcomhréir le ceanglais Airteagal 30j de Threoir 2003/87/CE.

(8)

Leis an gcóras dleachta máil atá i bhfeidhm san Ostair, go háirithe na bonneagair dháileacháin, ní chuirtear ar a gcumas go héifeachtach d’eintitis rialáilte úsáid deiridh breoslaí a idirdhealú idir earnálacha a chumhdaítear cheana féin le hIarscríbhinn III a ghabhann le Treoir 2003/87/CE ar thaobh amháin, agus na hearnálacha lena mbaineann an leathnú raon feidhme seo ar an taobh eile. Chun faireachán, tuairisciú agus fíorú costéifeachtach ar astaíochtaí a éascú agus chun an t-ualach riaracháin a laghdú a bhaineann le tuairisciú atá bainteach leis an bhfachtóir raoin sna tuarascálacha astaíochtaí bliantúla agus sna pleananna faireacháin, níor cheart a cheangal ar eintitis rialáilte idirdhealú a dhéanamh idir tuairisciú astaíochtaí in earnálacha lena mbaineann leathnú an raoin feidhme agus astaíochtaí in earnálacha a chumhdaítear cheana le hIarscríbhinn III a ghabhann le Treoir 2003/87/CE.

(9)

Chun an timthriall bliantúil tráthrialta a chomhlíonadh maidir le faireachán, tuairisciú agus fíorú a dhéanamh ar astaíochtaí sa chóras nua trádála astaíochtaí le haghaidh foirgneamh, iompar de bhóthar agus earnálacha breise, is iomchuí d’eintitis rialáilte astaíochtaí fíoraithe don raon feidhme leathnaithe dar tús an 1 Eanáir 2025 a thuairisciú, i gcomhréir le hAirteagal 30f(2) de Threoir 2003/87/CE,

TAR ÉIS AN CINNEADH SEO A GHLACADH:

Airteagal 1

Raon feidhme fhormheas an leathnaithe aontaobhaigh

An leathnú, san Ostair, ar an ngníomhaíocht dá dtagraítear in Iarscríbhinn III a ghabhann le Treoir 2003/87/CE chun na hearnálacha a liostaítear san Iarscríbhinn a ghabhann leis an gCinneadh seo a chumhdach, formheastar an leathnú sin faoi réir na gcoinníollacha a liostaítear in Airteagal 3.

Airteagal 2

Eisiúint liúntas breise a údarú

Eiseofar lamháltais bhreise in 2027 ar bhonn mheánmhéid na n-astaíochtaí iomlána de 1 034 563 tCO2 arna thuairisciú ag an Ostair i dtaobh na n-earnálacha a liostaítear san Iarscríbhinn a ghabhann leis an gCinneadh seo le haghaidh na mblianta 2016, 2017 agus 2018 i gcomhréir leis na rialacha a leagtar síos in Airteagal 30c(1) de Threoir 2003/87/CE.

Airteagal 3

Oibleagáidí faireacháin agus tuairiscithe

Áiritheoidh an Ostair go ndéanfaidh gach eintiteas rialáilte faireachán agus tuairisciú, i gcomhréir le hAirteagal 30f(2) de Threoir 2003/87/CE, don údarás inniúil, le haghaidh gach bliana féilire, ar na hastaíochtaí a chomhfhreagraíonn do na cainníochtaí breoslaí a scaoileadh lena dtomhailt sna hearnálacha a liostaítear san Iarscríbhinn a ghabhann leis an gCinneadh seo agus a tharla ón 1 Eanáir 2025.

Airteagal 4

Teacht i bhfeidhm agus cur i bhfeidhm

Tiocfaidh an Cinneadh seo i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil, an 24 Meán Fómhair 2024.

Thar ceann an Choimisiúin

An tUachtarán

Ursula VON DER LEYEN


(1)   IO L 275, 25.10.2003, lch. 32, ELI: http://data.europa.eu/eli/dir/2003/87/oj.

(2)  Rialachán (AE) 2018/842 ó Pharlaimint na hEorpa agus ón gComhairle an 30 Bealtaine 2018 maidir le laghduithe bliantúla ceangailteacha ar astaíochtaí gás ceaptha teasa ag na Ballstáit ó 2021 go 2030 lena rannchuidítear leis an ngníomhú ar son na haeráide agus chun gealltanais a tugadh faoi Chomhaontú Pháras a chomhlíonadh, agus lena leasaítear Rialachán (AE) Uimh. 525/2013 (IO L 156, 19.6.2018, lch. 26, ELI: http://data.europa.eu/eli/reg/2018/842/oj).


IARSCRÍBHINN

An liosta earnálacha breise atá faoi réir CTA AE san Ostair de bhun Airteagal 30j de Threoir 2003/87/CE

Cód IPCC

Earnáil

Ábhar

1 A 3 a

Eitlíocht Shibhialta

Astaíochtaí ón eitlíocht shibhialta idirnáisiúnta agus intíre, lena n-áirítear éirí de thalamh agus tuirlingtí

1 A 3 c

Iarnróid

Astaíochtaí ó iompar d’iarnród le haghaidh bealaí tráchta lasta agus paisinéirí araon

1 A 3 d

(fothacar)

Loingseoireacht Uisce-iompartha

Astaíochtaí ó bhreoslaí a úsáidtear chun soithí uisce-iompartha a thiomáint, lena n-áirítear sciorrárthaí agus duillárthaigh, ach gan gníomhaíochtaí tráchtála ar an Danóib agus ar na lochanna idirnáisiúnta a chur san áireamh (Constance agus Neusiedl)

1 A 4 c i

Dóchán seasta le haghaidh talmhaíochta/foraoiseachta/iascaireachta

Astaíochtaí ó bhreoslaí a dhóitear i gcaidéil, triomú gráin, tithe gloine gairneoireachta agus dóchán eile talmhaíochta, foraoiseachta nó dóchán seasta i dtionscal na hiascaireachta

1 A 4 c ii

Feithiclí eisbhóthair agus dóchán soghluaiste innealra eile

Astaíochtaí ó bhreoslaí a dhóitear i bhfeithiclí tarraingthe ar thalamh feirme agus i bhforaoisí, lena n-áirítear úsáid feithiclí talmhaíochta ar bhóithre pábháilte

1 A 4 c iii

(fothacar)

Iascaireacht

(dóchán soghluaiste)

Astaíochtaí ó bhreoslaí a dhóitear le haghaidh iascaireachta

1 A 5 b

(fothacar)

Dóchán soghluaiste - míleata

Astaíochtaí ó fheithiclí, dóchán breosla innealra eisbhóthair le haghaidh úsáid mhíleata agus eitlíocht mhíleata, seachas breosla a úsáidtear in oibríochtaí iltaobhacha


ELI: http://data.europa.eu/eli/dec_del/2024/2986/oj

ISSN 1977-0839 (electronic edition)