(1)

Ir-Regolament Delegat tal-Kummissjoni (UE) 2022/127 (2) jissupplimenta r-Regolament (UE) 2021/2116 b’regoli dwar l-aġenziji tal-pagamenti u korpi oħrajn, il-ġestjoni finanzjarja, l-approvazzjoni tal-kontijiet, il-garanziji u l-użu tal-euro.

(2)

L-esperjenza miksuba mill-ewwel sena ta’ implimentazzjoni tal-eżerċizzju tal-approvazzjoni annwali tal-prestazzjoni msemmi fl-Artikolu 54 tar-Regolament (UE) 2021/2116, u mit-tħejjija tal-eżerċizzju tat-tieni sena, juri li l-Istati Membri jġorru piż amministrattiv sproprzjonat meta jipprovdu l-ġustifikazzjonijiet għall-finijiet tal-approvazzjoni annwali tal-prestazzjoni għad-devjazzjonijiet tal-ammonti unitarji realizzati mill-ammonti unitarji ppjanati.

(3)

Skont l-Artikolu 37 tar-Regolament (UE) 2021/2116, in-nefqa relatata mal-interventi msemmija fir-Regolament (UE) 2021/2115 tal-Parlament Ewropew u tal-Kunsill (3) hija eliġibbli biss għall-finanzjament tal-Unjoni jekk tkun saret mill-aġenziji tal-pagamenti akkreditati f’konformità mar-regoli applikabbli tal-Unjoni u mas-sistemi ta’ governanza applikabbli u jekk tkun akkumpanjata minn output korrispondenti. Il-konformità ma’ dawk ir-rekwiżiti hija żgurata mill-aġenziji tal-pagamenti msemmija fl-Artikolu 9 tar-Regolament (UE) 2021/2116, il-korpi taċ-ċertifikazzjoni msemmija fl-Artikolu 12 ta’ dak ir-Regolament u mill-Kummissjoni fil-qafas tal-proċedura tal-konformità msemmija fl-Artikolu 55 ta’ dak ir-Regolament. Dan jipprovdi aċċertament li l-outputs realizzati jinkisbu skont il-leġiżlazzjoni tal-Unjoni u li l-Pjanijiet Strateġiċi tal-PAK jilħqu l-istadji importanti u l-miri stabbiliti mill-Istati Membri fil-Pjanijiet Strateġiċi tal-PAK tagħhom bħala parti mis-sistemi ta’ prestazzjoni tagħhom.

(4)

Barra minn hekk, b’riżultat tal-emenda tar-Regolamenti (UE) 2021/2115 u (UE) 2021/2116 li saret bir-Regolament (UE) 2024/1468 tal-Parlament Ewropew u tal-Kunsill (4), l-Istati Membri jistgħu jippreżentaw lill-Kummissjoni żewġ talbiet għal emenda fis-sena, u dan dwar elementi bħall-ammonti unitarji ppjanati, l-outputs u l-allokazzjonijiet finanzjarji għall-interventi li huma l-bażi għall-approvazzjoni annwali tal-prestazzjoni. L-Istati Membri qed jużaw dejjem iktar il-possibbiltà stabbilita fl-Artikolu 119(9) tar-Regolament (UE) 2021/2115 biex jagħmlu l-modifiki ta’ dawn l-elementi tal-Pjanijiet Strateġiċi tal-PAK tagħhom relatati mal-interventi skont it-Titolu III, il-Kapitolu IV, ta’ dak ir-Regolament, u japplikawhom. Dan jolqot l-approvazzjoni annwali tal-prestazzjoni u jżid il-piż amministrattiv marbut magħha.

(5)

Sabiex jittaffa l-piż amministrattiv u tittejjeb il-kosteffiċjenza tal-approvazzjoni annwali tal-prestazzjoni, jenħtieġ li l-Istati Membri ma jkunux meħtieġa jipprovdu l-ġustifikazzjonijiet għall-finijiet tal-approvazzjoni annwali tal-prestazzjoni għad-devjazzjonijiet tal-ammonti unitarji realizzati mill-ammonti unitarji ppjanati meta l-ammont totali tan-nefqa li jikkorrispondi għal dawn id-devjazzjonijiet ma jaqbiżx livell limitu de minimis espress bħala perċentwal tan-nefqa ddikjarat fir-rapport annwali dwar il-prestazzjoni skont l-Artikolu 134(5), il-punt (b), tar-Regolament (UE) 2021/2115. Dak l-ammont totali jiġi kkalkulat billi d-devjazzjoni għal kull ammont unitarju tiġi mmultiplikata bl-għadd korrispondenti ta’ outputs u l-ammonti li jirriżultaw jingħaddu flimkien. Għall-finijiet ta’ dan il-kalkolu, jenħtieġ li jitqiesu biss id-devjazzjonijiet li jirriżultaw f’nefqa eċċessiva. Sabiex jiġi evitat impatt detrimentali fuq il-fondi tal-Unjoni u tiġi żgurata l-proporzjonalità, jixraq li l-livell limitu de minimis jiġi stabbilit għal 2 %. Dan il-perċentwal huwa allinjat mal-livell limitu ġeneralment aċċettat fir-rigward tal-assigurazzjoni raġonevoli applikata fl-awditi fuq il-politiki u l-baġit tal-Unjoni.

(6)

Madankollu, jenħtieġ li l-livell limitu de minimis għall-preżentazzjoni tal-ġustifikazzjonijiet għall-finijiet tal-approvazzjoni annwali tal-prestazzjoni ma japplikax għad-devjazzjonijiet tal-ammonti unitarji realizzati mill-ammonti unitarji massimi msemmija fl-Artikolu 102 tar-Regolament (UE) 2021/2115, peress li l-ammonti unitarji ppjanati ġew stabbiliti biex tiġi żgurata l-flessibbiltà ħalli jiġu evitati l-fondi mhux użati filwaqt li jiġi evitat il-kumpens żejjed lill-bdiewa.

(7)

Ir-rekwiżit li għal kwalunkwe eċċess ta’ ammont unitarju realizzat minn ammont unitarju ppjanat akbar minn 50 %, jiġu pprovduti l-ġustifikazzjonijiet fir-rapport annwali dwar il-prestazzjoni skont l-Artikolu 134(9) tar-Regolament (UE) 2021/2115 għall-fini tal-Artikolu 40(2) tar-Regolament (UE) 2021/2116, mhuwiex affettwat minn dan ir-Regolament.

(8)

Jeħtieġ jiġi ċċarat it-test tal-Artikolu 14(8) u tal-Artikolu 15(4) tar-Regolament Delegat (UE) 2022/127 peress li l-formulazzjoni tista’ twassal b’mod involontarju lill-Kummissjoni biex tapplika livell ta’ korrezzjoni b’rata fissa li jkun iktar baxx mir-riskju għall-baġit tal-Unjoni. Għalhekk, jenħtieġ li dawk id-dispożizzjonijiet jiġu riformulati biex jindikaw b’mod ċar li meta l-elementi oġġettivi juru li l-ikbar telf għall-fondi huwa aktar baxx minn dak tat-telf li kieku jirriżulta mill-applikazzjoni ta’ rata fissa aktar baxxa minn dik proposta mill-Kummissjoni, jew daqsu, il-Kummissjoni trid tapplika dik ir-rata fissa aktar baxxa meta tiddeċiedi dwar l-ammonti li jridu jiġu esklużi mill-finanzjament tal-Unjoni.

(9)

Peress li r-rapporti annwali dwar il-prestazzjoni għas-sena finanzjarja 2024 jridu jiġu ppreżentati sal-15 ta’ Frar 2025, dan ir-Regolament jenħtieġ li jidħol fis-seħħ malajr kemm jista’ jkun u l-livell limitu de minimis jenħtieġ li japplika għall-proċeduri annwali tal-prestazzjoni mis-sena finanzjarja 2024.

(10)

Għalhekk, ir-Regolament Delegat (UE) 2022/127 jenħtieġ li jiġi emendat kif xieraq,

1.

fl-Artikolu 13, fil-paragrafu 2, jiddaħħal it-tieni subparagrafu li ġej:

“B’deroga mill-ewwel subparagrafu, l-Istati Membri mhumiex meħtieġa jipprovdu l-ġustifikazzjonijiet għall-fini tal-approvazzjoni annwali tal-prestazzjoni għad-devjazzjonijiet tal-ammonti unitarji realizzati mill-ammonti unitarji ppjanati meta n-nefqa totali li tikkorrispondi għal dawn id-devjazzjonijiet ma taqbiżx it-2 % tan-nefqa totali ddikjarata fir-rapport annwali dwar il-prestazzjoni f’konformità mal-Artikolu 134(5), il-punt (b), tar-Regolament (UE) 2021/2115 għas-sena finanzjarja kkonċernata. Għall-kalkolu ta’ dan il-livell limitu, jenħtieġ li jitqiesu biss id-devjazzjonijiet li jirriżultaw f’nefqa eċċessiva.

Madankollu, l-Istati Membri għandhom jipprovdu l-ġustifikazzjonijiet għall-finijiet tal-approvazzjoni annwali tal-prestazzjoni għall-eċċessi kollha tal-ammonti unitarji realizzati mill-ammonti unitarji massimi ppjanati.”;

2.

fl-Artikolu 14, il-paragrafu 8 huwa sostitwit b’dan li ġej:

3.

fl-Artikolu 15, il-paragrafu 4 huwa sostitwit b’dan li ġej: