BREITHIÚNAS NA CÚIRTE (an Séú Dlísheomra)

18 Nollaig 2025 ( *1 )

(Tarchur chun réamhrialú – Oifigigh – Rialacháin Foirne Oifigigh an Aontais Eorpaigh – Iarscríbhinn VIII – Pinsin – Cearta pinsin a fuarthas roimh dhul isteach i seirbhís an Aontais Eorpaigh – Aistriú chuig scéim pinsin institiúidí an Aontais Eorpaigh – Iarraidh ón oibrí aistriú a dhéanamh – Aistriú do-chúlghairthe – Saibhriú éagórach)

I gCás C‑776/24 [Bopuis] ( i ),

IARRAIDH ar réamhrialú de bhun Airteagal 267 CFAE, ón tribunal du travail francophone de Bruxelles (Cúirt Oibreachais (ina labhraítear Fraincis), an Bhruiséil, an Bheilg), trí bhreith an 5 Samhain 2024, a fuarthas ag an gCúirt an 12 Samhain 2024, sna himeachtaí

CJ

v

Service fédéral des Pensions (SFP),

tugann AN CHÚIRT (an Séú Dlísheomra),

agus í comhdhéanta mar seo a leanas: F. Biltgen (Rapóirtéir), Uachtarán an Chéad Dlísheomra, ag feidhmiú mar Uachtarán an Séú Dlísheomra, A. Kumin agus S. Gervasoni, Breithiúna,

Abhcóide Ginearálta: L. Medina,

Cláraitheoir: A. Calot Escobar,

ag féachaint don nós imeachta i scríbhinn,

tar éis breithniú a dhéanamh ar na barúlacha a tíolacadh thar ceann na bpáirtithe seo a leanas:

–

CJ, ag J.-F. Neven, avocat,

–

Rialtas na Beilge, ag C. Jacob, C. Pochet agus M. Van Regemorter, i gcáil Gníomhairí,

–

an Coimisiún Eorpach, A. Baeckelmans agus J.-F. Brakeland, i gcáil Gníomhairí,

tar éis cinneadh a dhéanamh, tar éis an tAbhcóide Ginearálta a éisteacht, breithiúnas a thabhairt ar an gcás gan Tuairim,

an Breithiúnas seo a leanas:

Breithiúnas

1

Baineann an iarraidh ar réamhrialú le léiriú Airteagal 11(2) d’Iarscríbhinn VIII le Rialacháin Foirne Oifigigh an Aontais Eorpaigh, arna leasú le Rialachán (CEE, Euratom, CEGC) Uimh. 571/92 ón gComhairle an 2 Márta 1992 (IO 1992 L 62, lch. 1) (‘na Rialacháin Foirne’), arna léamh i bhfianaise phrionsabal an chomhair dhílis, a chumhdaítear in Airteagal 4(3) CAE.

2

Rinneadh an iarraidh seo in imeachtaí idir CJ agus an service fédéral des Pensions (SFP) (an tSeirbhís Fheidearálach Pinsean, an Bheilg) maidir le hiarraidh ó CJ na cearta pinsin a fuair sé sula ndeachaigh sé isteach i seirbhís an Aontais Eorpaigh a aistriú chuig scéim pinsin institiúidí an Aontais Eorpaigh (‘SPIAE’).

An dlí lena mbaineann

Na Rialacháin Foirne

3

Foráiltear an méid seo a leanas in Airteagal 77 de na Rialacháin Foirne:

‘Aon oifigeach a bhfuil deich mbliana seirbhíse críochnaithe aige, beidh sé i dteideal pinsean scoir a fháil. [...]

Is é an t‑uasphinsean scoir a bheidh ann 70 % den bhuntuarastal deiridh a ghabhann leis an ngrád deiridh inar aicmíodh an t‑oifigeach ar feadh tréimhse nach lú ná bliain amháin ar a laghad. Beidh 1.80 % den bhuntuarastal deiridh sin iníoctha le hoifigeach le haghaidh gach bliana seirbhíse a dhéanfar a ríomh i gcomhréir le hAirteagal 3 d’Iarscríbhinn VIII.’

[Aistriúchán neamhoifigiúil]

4

Faoi Airteagal 2 d’Iarscríbhinn VIII a ghabhann leis na Rialacháin Foirne:

‘Beidh pinsean scoir iníoctha ar bhonn líon iomlán na mblianta seirbhíse inphinsin a bheidh gnóthaithe ag an oifigeach. Beidh oifigeach i dteideal bliain seirbhíse inphinsin as gach bliain a chaithfidh sé i mbun seirbhíse mar a fhoráiltear dó in Airteagal 3 agus beidh sé i dteideal an dóú cuid déag cuid de bhliain seirbhíse inphinsin as gach mí iomlán a bheith curtha isteach aige.

Is é uasmhéid na mblianta seirbhíse inphinsin a fhéadfar a chur san áireamh chun cearta maidir le pinsean scoir a ríomh líon na mblianta a bheidh riachtanach leis an bpinsean uasta a bhaint amach, de réir bhrí an dara mír d'Airteagal 77 de na Rialacháin Foirne.’

[Aistriúchán neamhoifigiúil]

5

Foráiltear an méid seo a leanas in Airteagal 11 d’Iarscríbhinn VIII a ghabhann leis na Rialacháin Foirne:

‘1.   Oifigeach a fhágfaidh seirbhís an Aontais le ceachtar den dá ní seo a leanas a dhéanamh:

–

chun dul isteach i seirbhís rialtais nó i seirbhís eagraíochta náisiúnta nó idirnáisiúnta a mbeidh comhaontú tugtha i gcrích acu leis na Comhphobail,

–

dul i mbun gníomhaíochta i gcáil duine fostaithe nó féinfhostaithe, agus dá bhua sin cearta pinsin a bheith aige faoi scéim a mbeadh comhaontú tugtha i gcrích ag comhlachtaí riaracháin na scéime sin leis an Aontas,

beidh sé i dteideal go n‑aistreofar coibhéis achtúireach a chuid cearta pinsin a fuair sé ó na Comhphobail, isteach i gciste pinsin an riaracháin, nó sa chiste pinsin óna bhfuil na cearta pinsin faighte aige de bhua na gníomhaíochta a raibh sé ag gabháil dó i gcáil duine fostaithe nó féinfhostaithe.

2.   Oifigeach a théann isteach i seirbhís an Chomhphobail, i ndiaidh:

–

scor dá ghníomhaíocht le riarachán, eagraíocht náisiúnta nó idirnáisiúnta

– nó

–

gabháil do ghníomhaíocht fhostaithe nó fhéinfhostaithe,

beidh sé i dteideal, tráth a cheapfar ina oifigeach buan é, go n‑aistreofar chuig gComhphobal an choibhéis achtúireach nó luach fuascailte cothromráta na gceart pinsin scoir atá gnóthaithe aige de bhua na ngníomhaíochtaí thuasluaite. Sa chás sin, cinnfidh an institiúid ina bhfuil an t‑oifigeach ag obair, i bhfianaise an ghráid ar ar ceapadh é ina oifigeach buan, líon na mblianta seirbhíse inphinsin a chuirfidh sí san áireamh de réir a rialacha féin mar thréimhse seirbhíse roimhe sin ar bhonn mhéid na coibhéise actúirí nó an luach fuascailte cothromráta.’

[Aistriúchán neamhoifigiúil]

Dlí na Beilge

6

Leis an dlí lena mbunaítear ceangail áirithe idir scéimeanna pinsin na Beilge agus scéimeanna pinsin institiúidí faoin dlí idirnáisiúnta poiblí an 21 Bealtaine 1991 (Moniteur belge an 20 Meitheamh 1991, ‘Dlí an 21 Bealtaine 1991’), cuireadh ar bun córas aistrithe speisialta, ar a gcuirtear ‘seachaíocht’ bunaithe ar fhoirmle aistrithe na coibhéise actúirí dá bhforáiltear in Airteagal 11(2) d’Iarscríbhinn VIII de na Rialacháin Foirne.

7

De réir Airteagal 3 de Dhlí an 21 Bealtaine 1991:

‘Féadfaidh gach oifigeach, le comhaontú na hinstitiúide, a iarraidh go n‑íocfar leis an institiúid méid an phinsin scoir a bhaineann le seirbhísí agus tréimhsí sula ndeachaigh sé isteach i seirbhís na hinstitiúide.’

8

Foráiltear leis an gcéad mhír d’Airteagal 6 den Dlí sin:

‘A luaithe a chinnfidh an riarachán iad, cuirfear in iúl méid bliantúil an phinsin scoir atá le haistriú agus na codanna éagsúla arna gcur san áireamh lena chinneadh, don duine lena mbaineann trí litir chláraithe.’

9

Foráiltear mar a leanas le hAirteagal 7 den Dlí sin:

‘A luaithe a bheidh méid an phinsin scoir cinntitheach:

1

ní fhéadfar é a leasú ar chúis ar bith [...]’

An díospóid sna príomhimeachtaí agus na ceisteanna a tharchuirtear

10

Idir an bhliain 1972 agus 1993, bhí CJ ag obair sa Bheilg mar fhostaí go príomha. Le linn na tréimhse sin, rinne sé ranníocaíochtaí le SFP.

11

Chuaigh CJ isteach i seirbhís an Aontais Eorpaigh an 1 Aibreán 1994 agus ceapadh é ina oifigeach buan an 1 Eanáir 1995.

12

An 29 Bealtaine 1995, d’iarr CJ go n‑aistreofaí na cearta pinsin a fuair sé mar fhostaí sa Bheilg chuig SPIAE.

13

Le cinneadh an 15 Iúil 1996, chuir SFP in iúl do CJ, trí litir chláraithe, méid na gceart pinsin inaistrithe.

14

An 4 Samhain 1996, chuir SPF an méid sin in iúl don Choimisiún Eorpach.

15

An 14 Meán Fómhair 2007, chuir seirbhísí an Aontais in iúl do CJ go ndearnadh athríomh a chearta pinsin aistrithe mar gheall ar an athchóiriú ar na Rialacháin Foirne, in 2004, a d’fhág gurbh ionann na blianta seirbhíse inphinsin a d’fhéadfaí a aithint in SPIAE agus 4 bliana, 4 mhí agus 24 lá.

16

An 1 Iúil 2020, agus 63 bliana agus 11 mhí d’aois, i ndiaidh athríomh a chearta pinsin an 14 Meán Fómhair 2007, bhain CJ amach an t‑uasmhéid 70 % den ráta pinsin. Mar sin féin, lean sé ar aghaidh ag obair go dtí an 31 Iúil 2022.

17

An 8 Márta 2022, d’iarr CJ pinsean scoir ó SFP a fhreagraíonn do na cearta a fuair sé sula ndeachaigh sé isteach i seirbhís an Aontais.

18

Le dhá chinneadh an 25 Bealtaine 2022, dheonaigh SFP do CJ, faoi seach, pinsean scoir de mhéid míosúil comhlán EUR 533.85 ón 1 Lúnasa 2021 agus pinsean scoir de mhéid míosúil comhlán de EUR 577.85 ón 1 Lúnasa 2022, arb é an dáta a chuireann SPF san áireamh mar an dáta a d’éirigh CJ as a ghníomhaíochtaí mar oifigeach.

19

An 5 Iúil 2022, chuir údarás an Aontais atá freagrach as cearta pinsin CJ a íoc fógra in iúl dó lenar socraíodh a chearta pinsin agus é ag dul ar scor tráthnóna an 31 Iúil 2022, an lá deireanach den mhí inar shroich sé 66 bliana d’aois. Sonraíodh san fhógra sin gur cuireadh san áireamh 4 bliana, 4 mhí agus 24 lá mar gheall ar aistriú a chearta pinsin de chuid na Beilge agus luadh go raibh 79.21667 % san iomlán gnóthaithe ag CJ, lena n‑áirítear mar gheall ar bhónas 13.75 % a fuair sé as bheith ag obair 5 bliana agus 6 mhí níos faide ná an ghnáthaois scoir. Cuireadh na cearta sin faoi réir na huasteorann 70% mar a fhoráiltear leis na Rialacháin Foirne.

20

An 6 Iúil 2022, chuir CJ in iúl do SFP, in éagmais méid bliantúil an phinsin scoir inaistrithe a bheith curtha in iúl dó in 1995, in 1996 nó in 1997, nach bhféadfaí a mheas gur socraíodh méid cinntitheach an phinsin sin agus ba cheart a mheas go bhfuil an iarraidh go n‑aistreofaí é in‑chúlghairthe. Dá réir sin, chuir sé in iúl a mhian gan dul ar aghaidh le haistriú chuig SPIAE a cheart pinsin a fuarthas roimh dhul isteach i seirbhís an Aontais Eorpaigh.

21

Leis na fógraí dar dáta mhí na Samhna agus mhí na Nollag 2022, dheimhnigh SFP go raibh CJ i dteideal pinsean scoir de bhun na gceart a fuair sé mar oibrí sa Bheilg, agus sin ón 1 Lúnasa 2021.

22

Arna iarraidh sin ag SFP, chuir an Coimisiún in iúl don tseirbhís sin, trí ríomhphost an 23 Márta 2023 go raibh pinsean scoir ag CJ de bhun SPIAE, agus sin ón 1 Lúnasa 2022. Dheimhnigh an institiúid sin do SFP, trí ríomhphost an 31 Márta 2023, gur cuireadh san áireamh leis an bpinsean sin na blianta seirbhíse inphinsin a eascraíonn as aistriú na gceart pinsin arna dhéanamh ag SFP.

23

Dá thoradh sin, chuir SFP in iúl do CJ gur cuireadh ar fionraí na híocaíochtaí óna phinsean scoir faoin scéim náisiúnta de chuid na Beilge. Le cinneadh na 17 Aibreán 2023, tharraing SFP siar a chinntí an 25 Bealtaine 2022 dá dtagraítear i mír 18 den bhreithiúnas seo. Ag aithint go ndearna sé earráid riaracháin, níor iarr SFP aisíocaíocht an mhéid neamhdhlite ó CJ, ach chuir sé in iúl dó nach bhféadfadh sé pinsean scoir a éileamh faoin scéim náisiúnta de chuid na Beilge ón 1 Lúnasa 2021.

24

Thug CJ caingean os comhair an tribunal du travail francophone de Bruxelles (Cúirt Oibreachais (ina labhraítear Fraincis), an Bhruiséil, an Bheilg), arb í an chúirt a rinne an tarchur chun cinneadh an 17 Aibreán 2023 a chur ar neamhní ionas go n‑athbhunófar aistriú a phinsin scoir de bhun na scéime náisiúnta de chuid na Beilge.

25

D’áitigh CJ, más rud é go bhfuil an t‑aistriú ar na cearta pinsin a fuarthas roimh dhul isteach i seirbhís an Aontais do-chúlghairthe, go gcailltear a chearta pinsin a gnóthaíodh de bhun a ghníomhaíochtaí gairmiúla sa Bheilg idir an bhliain 1972 agus an bhliain 1992, go bunúsach, ós rud é nach gá na cearta pinsin sin a chur san áireamh chun a phinsean scoir faoi SPIAE a ríomh. I gcomhthéacs an tsásra seachaíochta, íocann Stát na Beilge méid an phinsin scoir le hinstitiúidí an Aontais ar bhonn míosúil, a fhreagraíonn do na cearta arna bhfáil ag CJ, ach ní chuirtear san áireamh sa phinsean scoir a dheonaítear dó de bhun SPIAE na blianta seirbhíse inphinsin sula ndeachaigh sé isteach i seirbhís an Aontais, rud a d’fhág go bhféadfaí an tAontas a shaibhriú chun dochar do CJ.

26

Maíonn CJ nach bhfuair sé na fógraí, trí litreacha cláraithe, de na méideanna bliantúla den phinsean scoir a bhí le haistriú agus faoi na nithe a chuirtear san áireamh chun na méideanna sin a ríomh, rud a d’fhág nárbh fhéidir leis agóid a dhéanamh ina gcoinne ná iad a dheimhniú, agus, dá réir sin, áitíonn sé go gcaithfear a mheas nach bhfuil na méideanna sin cinntitheach. Measann sé, dá thoradh sin, gur féidir a iarraidh chun na cearta pinsin a fuair sé de bhun na scéime náisiúnta pinsin de chuid na Beilge a aistriú a chúlghairm go dtí go dtiocfaidh an tseachaíocht i bhfeidhm go héifeachtach.

27

Áitíonn SFP nach bhfuil cruthúnas aige a thuilleadh gur seoladh na fógraí sin trí litir chláraithe agus áitíonn sé, go bunúsach, go ndearna CJ an rogha chun aistriú a chearta pinsin a gnóthaíodh faoin scéim náisiúnta de chuid na Beilge chuig SPIAE, rud nach mór dó freagracht a ghlacadh as.

28

Tá an chúirt a rinne an tarchur in amhras an bhfuil cineál do-chúlghairthe an tsásra seachaíochta ar neamhréir leis an gcuspóir a shaothraítear le hAirteagal 11(2) d’Iarscríbhinn VIII de na Rialacháin Foirne. Is amhlaidh go bhfuil an sásra sin de chineál go ndíspreagtar oibrí ó dhul isteach i seirbhís na n‑institiúidí Eorpacha, i bhfianaise an riosca go gcaillfear an pinsean scoir a d’fhéadfadh sé a éileamh mura raibh sé tar éis dul isteach i seirbhís an Aontais, ar riosca é a thagann chun cinn más amhlaidh, mar a tharla sa chás seo, go bhfuil an t‑oifigeach i dteideal mhéid iomlán an phinsin faoi SPIAE, gan na cearta pinsin aistrithe a chur san áireamh. Dá bhrí sin, fiafraíonn an chúirt sin an féidir méid a phinsin scoir a dhíospóid go dtí go ndéantar an t‑aistriú ceart pinsin, tríd an tseachaíocht, go huathoibríoch. I ndáil leis sin, thagair an chúirt a rinne an tarchur do bhreithiúnas an 10 Samhain 1999, Kristensen agus páirtithe eile v an Chomhairle (T‑103/98, T‑104/98, T‑107/98, T‑113/98 agus T‑118/98, EU:T:1999:289), ar dá réir nach mór na cearta pinsin aistrithe nach gcuirtear san áireamh le linn chur i bhfeidhm Airteagal 11(2) d’Iarscríbhinn VIII a aisíoc leis an oifigeach.

29

Tá an chúirt a rinne an tarchur in amhras freisin an ionann aistriú na gceart pinsin sin, a fuarthas roimh dhul isteach i seirbhís an Aontais, tríd an sásra seachaíochta, agus saibhriú éagórach na n‑institiúidí Eorpacha.

30

Sna himthosca sin, chinn tribunal du travail francophone de Bruxelles (Cúirt Oibreachais (ina labhraítear Fraincis), an Bhruiséil) bac a chur ar na príomhimeachtaí agus an cheist seo a leanas a tharchur chuig an gCúirt Bhreithiúnais le haghaidh réamhrialú:

‘I gcás ina bhforáiltear le reachtaíocht Bhallstáit go n‑aistreofar na cearta dá bhforáiltear le hAirteagal 11(2) [de na Rialacháin Foirne], ní trí na ranníocaíochtaí a aistriú tráth bhunú oifigeach an Aontais Eorpaigh, ach trí sheachaíocht na n‑institiúidí Eorpacha maidir leis na cearta pinsin a fabhraíodh sa Bhallstát sin ón dáta a mbeadh rochtain ag an oifigeach ar an bpinsean sin, an bhfuil Airteagal 11(2) agus prionsabal an chomhair dhílis a chumhdaítear in Airteagal 4(3) [CAE] le léiriú, i bhfianaise chuspóirí an aistrithe, lena bhféadfar na cearta a fuair oifigeach de chuid an Aontais Eorpaigh i mBallstát a choinneáil chun tairbhe an oifigigh sin agus chun tarraingteacht na seirbhíse sibhialta Eorpaí a ráthú, sa chaoi go gceadófar leis an reachtaíocht sin cúlghairm na hiarrata ar aistriú go dtí an dáta a dtiocfaidh an tseachaíocht i bhfeidhm agus go bhfaighidh an t‑oifigeach eolas iarbhír faoin riosca nach bhfaigheadh sé tairbhe do chuid de na cearta is iníoctha ag an mBallstát sin?’

Breithniú ar an gceist a tharchuirtear

31

Lena ceist, fiafraíonn an chúirt a rinne an tarchur, go bunúsach, an bhfuil Airteagal 11(2) d’Iarscríbhinn VIII de na Rialacháin Foirne agus prionsabal an chomhair dhílis a chumhdaítear in Airteagal 4(3) CAE le léiriú sa chaoi go gcuirtear cosc leo ar reachtaíocht náisiúnta ar dá réir atá cinneadh a dhéanann oifigeach an Aontais na cearta pinsin a ghnóthaigh sé faoi scéim náisiúnta pinsin sula ndeachaigh sé isteach i seirbhís an Aontais a aistriú chuig SPIAE do-chúlghairthe, i gcás ina bhforáiltear sa reachtaíocht sin ní go ndéanfar na cearta sin chun pinsin a aistriú ar dháta an chinnidh sin, ach iad a aistriú trí sheachaíocht institiúidí an Aontais maidir leis na cearta a fuarthas ón dáta óna bhfuil an t‑oifigeach i dteideal a phinsin scoir, leis an riosca go ndéanfaí institiúidí an Aontais a shaibhriú go héagórach.

32

Mar réamhphointe, ní mór a thabhairt faoi deara, maidir leis na Rialachán Foirne, a bhfuil feidhm ghinearálta acu, go bhfuil gach gné díobh éigeantach agus go bhfuil siad infheidhme go díreach i ngach Ballstát. Dá thoradh sin, taobh amuigh de na héifeachtaí atá acu go hinmheánach i riarachán an Aontais, tá na Ballstáit faoi réir na Rialachán Foirne a mhéid atá a gcomhoibriú ag teastáil chun iad a chur i bhfeidhm (féach, chuige sin, breithiúnas an 4 Feabhra 2021, Ministre de la Transition écologique et solidaire agus Ministre de l’Action et des Comptes publics, C‑903/19, EU:C:2021:95, míreanna 36 agus 37 agus an cásdlí dá dtagraítear).

33

De bhun Airteagal 11(2) d’Iarscríbhinn VIII den Reacht, féadfaidh aon oifigeach nó ball foirne a théann isteach i seirbhís an Aontais i ndiaidh dó riarachán, eagraíocht náisiúnta nó idirnáisiúnta nó gnóthas a fhágáil, tráth a cheapfar é ina oifigeach buan, coibhéis achtúireach cheart an phinsin scoir a ghnóthaigh sé sa riarachán, eagraíocht náisiúnta nó idirnáisiúnta nó sa ghnóthas ina raibh sé a aistriú chuig an Aontas.

34

Ar an gcéad dul síos, tá sé de chuspóir ag an gcóras aistrithe ceart pinsin, mar a fhoráiltear le hAirteagal 11(2) d’Iarscríbhinn VIII de na Rialacháin Foirne, trí chomhordú idir na scéimeanna náisiúnta agus scéim pinsin an Aontais aistriú ó phoist náisiúnta phoiblí nó phríobháideacha chuig riaracháin an Aontais a éascú agus a áirithiú dá réir sin na féidearthachtaí is fearr maidir le baill foirne cáilithe a earcú a bhfuil taithí ghairmiúil iomchuí acu cheana (breithiúnas an 16 Nollaig 2004, My, C‑293/03, EU:C:2004:821, mír 44 agus an cásdlí dá dtagraítear).

35

Má dhiúltaíonn sé na bearta is gá a ghlacadh chun coibhéis achtúireach nó luach fuascailte cothromráta na gceart pinsin a fuarthas faoin scéim pinsin náisiúnta a aistriú chuig SPIAE, dá bhforáiltear le hAirteagal 11(2) d’Iarscríbhinn VIII de na Rialachán Foirne, d’fhéadfadh Ballstát é a dhéanamh níos deacra, státseirbhísigh náisiúnta le leibhéal sinsearachta áirithe a earcú don Aontas, ós rud é go mbeadh sé d’éifeacht ag an aistriú ó sheirbhís náisiúnta go seirbhís an Aontais go mbainfí na cearta pinsin dá mbeadh siad i dteideal murar aontaigh siad dul isteach i seirbhís an Aontais (breithiúnas an 4 Feabhra 2021, Ministre de la Transition écologique et solidaire agus Ministre de l’Action et des Comptes publics, C‑903/19, EU:C:2021:95, mír 34 agus an cásdlí dá dtagraítear).

36

Ní fhéadfar glacadh le hiarmhairtí den sórt sin i bhfianaise an dualgais comhair agus cúnaimh dhílis atá ar na Ballstáit i ndáil leis an Aontas agus a léirítear san oibleagáid, dá bhforáiltear in Airteagal 4(3) CAE, chun a cur i gcrích a chúraimí a éascú (breithiúnas an 4 Feabhra 2021, Ministre de la Transition écologique et solidaire agus Ministre de l’Action et des Comptes publics, C‑903/19, EU:C:2021:95, mír 35 agus an cásdlí dá dtagraítear).

37

Ar an dara dul síos, tá Airteagal 11(2) d’Iarscríbhinn VIII leis na Rialacháin Foirne ceaptha chun gur féidir na cearta arna bhfáil ag oifigigh i mBallstát, fiú más cearta teoranta iad, nó fiú más cearta coinníollacha nó todhchaí aid, nó nach leor iad chun go mbeidh an duine i dteideal pinsin láithreach, a choimeád ar mhaithe leis an oifigeach atá i gceist agus a bheith curtha san áireamh ag an scéim pinsin a bhfuil sé mar bhall de ag deireadh a ghairme réime (breithiúnas an 20 Deireadh Fómhair 1981, an Coimisiún v an Bheilg, 137/80, EU:C:1981:237, mír 12).

38

Is léir ó na breithnithe sin go bhfuil an rogha dá bhforáiltear in Airteagal 11(2) d’Iarscríbhinn VIII ceaptha chun ceart a bhunú ar mhaithe le hoifigigh a bhfuil a fheidhmiú ag brath ar a rogha féin amháin (féach, chuige sin, breithiúnais an 20 Deireadh Fómhair 1981, an Coimisiún v an Bheilg, 137/80, EU:C:1981:237, mír 13, agus 10 Meán Fómhair 2015, Wojciechowski, C‑408/14, EU:C:2015:591, mír 52).

39

Ós rud é nach bhforáiltear le hAirteagal 11(2) d’Iarscríbhinn VIII de na Rialacháin Foirne do chúlghairm fheidhmiú na rogha dá dtagraítear san fhoráil sin, tá aistriú ceart pinsin chuig SPIAE cinntitheach agus do-chúlghairthe. Deimhnítear sin leis an bhfíoras nach féidir cearta pinsin a aistriú in athuair ach sna cásanna dá dtagraítear in Airteagal 11(1), faoina bhfuil an duine atá i gceist ag fágáil na seirbhíse.

40

Mar sin féin, ní thagann cineál cinntitheach agus do-chúlghairthe an chinnidh chun na cearta pinsin a fuarthas sula ndeachaigh an duine isteach i seirbhís an Aontais a aistriú i gcoimhlint leis na cuspóirí arna saothrú le hAirteagal 11(2) d’Iarscríbhinn VIII de na Rialacháin Foirne, eadhon cearta faighte agus tarraingteacht na seirbhíse sibhialta Eorpaí.

41

Go deimhin, maidir le cearta faighte a choimeád, ní mór a thabhairt faoi deara gur féidir, ar bhonn na mblianta seirbhíse inphinsin roimh dhul isteach i seirbhís an Aontais, líon na mblianta seirbhíse inphinsin arna gcur san áireamh chun céatadán an tuarastail dheireanaigh a bheidh mar bhonn don phinsean scoir a chinneadh a mhéadú agus, ar an gcaoi sin an t‑uasmhéid 70 % den tuarastal deireanach arna shocrú leis an dara mír d’Airteagal 77 de na Rialacháin Foirne a bhaint amach níos luaithe. Dá bhrí sin, ní fhéadfaí a bhaint de thátal as sin go gcailltear cearta faighte.

42

I ndáil leis sin, ní mór a shonrú, cé gurb amhlaidh, tríd an bhféidearthacht na cearta pinsin a fuarthas roimh dhul isteach i seirbhís an Aontais a aistriú, go ráthaítear don oifigeach lena mbaineann go gcuirfear na cearta sin san áireamh faoi SPIAE, ní thugtar aon chinntitheacht dó leis an bhféidearthacht sin go mbeidh sé de thoradh ar an méid sin a chur san áireamh go mbeidh méadú ar mhéid a phinsin a fhreagraíonn go hiomlán don chaipiteal aistrithe (féach, chuige sin, breithiúnas an 4 Bealtaine 2023, KY v Cúirt Bhreithiúnais an Aontais Eorpaigh, C‑100/22 P, EU:C:2023:377, mír 69).

43

Maidir le tarraingteacht na seirbhíse sibhialta, ní mór a choinneáil i gcuimhne gur rogha é na cearta pinsin a aistriú a thugtar don oifigeach, nach mór don oifigeach a dhéanamh go feasach.

44

Dá bhrí sin, gan beann ar an gceist an bhforáiltear leis an reachtaíocht náisiúnta atá i gceist d’aistriú na gceart pinsin trí sheachaíocht na n‑institiúidí Eorpacha maidir leis na cearta ar an dáta a théann an t‑oifigeach ar scor nó an aistrítear na cearta pinsin chuig SPIAE ar an dáta a chinn an t‑oifigeach an t‑aistriú sin a dhéanamh, sa dá chás, cuirtear na cearta sin san áireamh agus ní dhéantar dochar do tharraingteacht na seirbhís sibhialta Eorpaí ar chaoi ar bith i gceachtar den dá chás.

45

Dá thoradh sin, ní cheanglaítear, chun na hoibleagáidí dá bhforáiltear in Airteagal 11(2) d’Iarscríbhinnn VIII de na Rialacháin Foirne a chomhlíonadh, foráil a dhéanamh do cheart chun an iarraidh na cearta pinsin a fuarthas roimh dhul isteach i seirbhís an Aontais a chúlghairm go dtí an dáta teacht i bhfeidhm de sheachaíocht na n‑institiúidí Eorpacha maidir leis na cearta sin.

46

Ní fhéadfadh an léiriú sin a bheith difriúil i bhfianaise phrionsabal an chomhair dhílis a léirítear san oibleagáid, dá bhforáiltear in Airteagal 4 CAE, cúnamh a thabhairt don Aontas chun a cúraimí a chur i gcrích.

47

Go deimhin, mar a thug an Coimisiún faoi deara, is é an tsainghné a bhaineann leis an tarchur chun réamhrialú seo an bealach ina raibh sé i gceist ag Ríocht na Beilge a hoibleagáidí a chomhlíonadh i bhfianaise na Rialachán Foirne trí shásra seachaíochta a bhunú, le Dlí an 21 Bealtaine 1991, faoina bhfaigheann na hinstitiúidí Eorpacha méideanna na bpinsean scoir de bhun scéim náisiúnta a n‑oifigeach atá ar scor, seachas trína gcearta pinsin a aistriú tráth a d’iarr na hoifigigh sin a gcearta a aistriú. Is é an cuspóir leis an dlí sin deireadh a chur leis na himeachtaí um shárú arna dtionscnamh ag an gCoimisiún as neamh-chomhlíonadh oibleagáidí Ríocht na Beilge de bhun Airteagal 11(2) d’Iarscríbhinn VIII de na Rialacháin Foirne, imeachtaí a bhí mar thoradh orthu gur tugadh breithiúnas i gcoinne Ríocht na Beilge i mbreithiúnais an 20 Deireadh Fómhair 1981, an Coimisiún v an Bheilg (137/80, EU:C:1981:237), agus an 3 Deireadh Fómhair 1989, an Coimisiún v an Bheilg (383/85, EU:C:1989:356). Ós rud é go bhfágann an sásra seachaíochta dá bhforáiltear le Dlí an 21 Bealtaine 1991 gur féidir na cearta a fuarthas le SPF a choinneáil i ndiaidh iad a aistriú chuig SPIAE, is léir gur chomhlíon Ríocht na Beilge prionsabal an chomhair dhílis.

48

Maidir leis an argóint a bhaineann le saibhriú éagórach, ní mór a thabhairt faoi deara go ríomhtar an pinsean scoir dá bhforáiltear in Airteagal 77 de na Rialacháin Foirne, mar is léir ón gcéad mhír d’Airteagal 77 agus ó Airteagal 2 d’Iarscríbhinn VIII a ghabhann leis an Reacht, ar bhonn líon iomlán na mblianta seirbhíse inphinsin atá gnóthaithe ag an oifigeach, a gcuirtear an céatadán dá bhforáiltear sa dara mír d’Airteagal 77 de na Rialacháin Foirne i bhfeidhm air agus, i gcás inarb iomchuí, suas chuig an teorainn a shocraítear san fhoráil sin.

49

Freagraíonn na blianta seirbhíse inphinsin sin don tréimhse ina raibh an t‑oifigeach lena mbaineann i seirbhís an Aontais agus le hAirteagal 11(2) d’Iarscríbhinn VIII de na Rialacháin Foirne, tugtar an fhéidearthacht don oifigeach na cearta pinsin a bhí aige sula ndeachaigh sé isteach i seirbhís an Aontais a aistriú chuig SPIAE ionas gur féidir na cearta sin, móide na blianta seirbhíse inphinsin comhfhreagracha, a chur san áireamh chun méid an phinsin atá le dáileadh a ríomh (féach, chuige sin, breithiúnas an 4 Bealtaine 2023, KY v Cúirt Bhreithiúnais an Aontais Eorpaigh, C‑100/22 P, EU:C:2023:377, mír 60).

50

Ní mór a lua freisin go bhfuil modh ríofa líon na mblianta seirbhíse inphinsin atá le cur san áireamh de bhun SPIAE, i ndiaidh na cearta pinsin a fuarthas faoi scéim náisiúnta a aistriú, bunaithe ar na critéir dá dtagraítear in Airteagal 11(2) d’Iarscríbhinn VIII de na Rialacháin Foirne.

51

I gcomhréir leis an gcásdlí dá dtagraítear i mír 42 den bhreithiúnas seo, cé gurb amhlaidh, tríd an bhféidearthacht na cearta pinsin a fuarthas roimh dhul isteach i seirbhís an Aontais a aistriú, go dtugtar ráthaíocht don oifigeach lena mbaineann go gcuirfear na cearta sin san áireamh faoi SPIAE, ní thugtar aon chinntitheacht dó leis an bhféidearthacht sin go mbeidh sé de thoradh ar an méid sin a chur san áireamh go mbeidh méadú ar mhéid a phinsin a fhreagraíonn go hiomlán don chaipiteal aistrithe (féach, chuige sin, breithiúnas an 4 Bealtaine 2023, KY v Cúirt Bhreithiúnais an Aontais Eorpaigh, C‑100/22 P, EU:C:2023:377, mír 69).

52

Níl nasc comhréireach idir méid na ranníocaíochtaí a íoctar agus méid an phinsin a fhaightear, ós rud é go ríomhtar an méid sin ar bhonn líon iomlán na mblianta seirbhíse inphinsin, lena n‑áirítear iad siúd a fuarthas roimh dhul isteach i seirbhís na n‑institiúidí Eorpacha, a gcuirtear céatadán i bhfeidhm ina leith agus, i gcás inarb iomchuí, suas chuig an teorainn, i gcomhréir le hAirteagal 77 de na Rialacháin Foirne (breithiúnas an 27 Feabhra 2025, OA v an Pharlaimint, C‑32/24 P, EU:C:2025:118, mír 50). Eagraítear SPIAE ar bhonn phrionsabal na dlúthpháirtíochta agus ní cheaptar é sa chaoi go mbeadh an pinsean a fhaigheann oifigeach nó ball foirne ag freagairt go baileach do mhéid na ranníocaíochtaí leis an scéim sin.

53

I ndáil leis sin, ní fhéadfaí breathnú ar an sásra seachaíochta do SPIAE, dá bhforáiltear le Dlí an 21 Bealtaine 1991 sa chaoi gur saibhriú éagórach na n‑institiúidí Eorpacha é go díreach toisc go n‑aistrítear na cearta pinsin a fuarthas roimh dhul isteach i seirbhís institiúid an Aontais chuig SPIAE i bhfoirm íocaíochtaí tréimhsiúla seachas i bhfoirm caipitil tráth an chinnidh a rinne an t‑oifigeach a chearta pinsin a aistriú. Níl aon tionchar ag an imthoisc sin ar chearta pinsin an iarratasóra agus ríomh an phinsin a íocann SPIAE leis.

54

Ní mór a shonrú freisin go mbaineann breithiúnas an 10 Samhain 1999, Kristensen agus páirtithe eile v an Chomhairle (T‑103/98, T‑104/98, T‑107/98, T‑113/98 agus T‑118/98, EU:T:1999:289), a luaigh an chúirt a rinne an tarchur, le ceist atá difriúil ón gceist sa chás seo. Baineann an breithiúnas sin le forálacha ginearálta cur chun feidhme arna nglacadh ag Comhairle an Aontais Eorpaigh, ar dá réir a ríomhadh líon na mblianta seirbhíse inphinsin a bhí le cur san áireamh chun pinsean scoir a chinneadh ar bhonn an mhéid iomláin a aistríodh gan an méid sin a bheith níos airde ná líon na mblianta ar lena linn a bhí an duine lena mbaineann ina bhall de scéimeanna eile pinsin sula ndeachaigh sé isteach i seirbhís an Aontais. Sa chás inar tugadh an breithiúnas sin, a bhain le hoifigeach de chuid na Comhairle, cuireadh teorainn le líon na mblianta seirbhíse inphinsin a bhí le cur san áireamh mar thréimhse roimh dhul isteach sa tseirbhís ar bhonn an chaipitil aistrithe, i gcomhréir leis na forálacha ginearálta cur chun feidhme arna nglacadh ag an institiúid sin, do líon na mblianta ar lena linn a bhí an duine lena mbaineann ina bhall de scéimeanna pinsin sula ndeachaigh sé isteach i seirbhís an Aontais (féach, chuige sin, breithiúnas an 4 Bealtaine 2023, KY v Cúirt Bhreithiúnais an Aontais Eorpaigh, C‑100/22 P, EU:C:2023:377, mír 70). Sa chás sna príomhimeachtaí, áfach, cuireadh san áireamh na cearta pinsin a bhí mar ábhar don aistriú ina n‑iomláine. Dá bhrí sin, níl an breithiúnas sin ón gCúirt Ghinearálta ábhartha don fhreagra atá le tabhairt ar an gceist a chuirtear.

55

I bhfianaise na mbreithnithe thuasluaite, is é an freagra ar an gceist a chuirtear go bhfuil Airteagal 11(2) d’Iarscríbhinn VIII de na Rialacháin Foirne agus prionsabal an chomhair dhílis a chumhdaítear in Airteagal 4(3) CAE a léiriú sa chaoi nach gcuirtear cosc leo ar reachtaíocht náisiúnta ar dá réir atá cinneadh a dhéanann oifigeach an Aontais na cearta pinsin a ghnóthaigh sé faoi scéim náisiúnta pinsin sula ndeachaigh sé isteach i seirbhís an Aontais a aistriú chuig SPIAE do-chúlghairthe, i gcás ina bhforáiltear sa reachtaíocht sin ní go ndéanfar na cearta sin chun pinsin a aistriú ar dháta an chinnidh sin, ach iad a aistriú trí sheachaíocht institiúidí an Aontais maidir leis na cearta sin a fuarthas ón dáta óna bhfuil an t‑oifigeach i dteideal a phinsin scoir, ar choinníoll gurb amhlaidh go gcuirtear na cearta pinsin aistrithe san áireamh chun méid an phinsin atá le deonú a chinneadh.

Costais

56

Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas na bpáirtithe sin, inghnóthaithe.

 

Ar na forais sin, rialaíonn an Chúirt (an Séú Dlísheomra) mar seo a leanas:

 

Maidir le hAirteagal 11(2) d’Iarscríbhinn VIII le Rialacháin Foirne Oifigigh an Aontais Eorpaigh, arna leasú le Rialachán (CEE, Euratom, CEGC) Uimh. 571/92 ón gComhairle an 2 Márta 1992 agus prionsabal an chomhair dhílis, a chumhdaítear in Airteagal 4(3) CAE

 

ní mór léiriú a dhéanamh mar seo a leanas:

 

ní chuirtear cosc leo ar reachtaíocht náisiúnta ar dá réir atá cinneadh a dhéanann oifigeach an Aontais Eorpaigh na cearta pinsin a ghnóthaigh sé faoi scéim náisiúnta pinsin sula ndeachaigh sé isteach i seirbhís an Aontais Eorpaigh a aistriú chuig SPIAE do-chúlghairthe, i gcás ina bhforáiltear sa reachtaíocht sin ní go ndéanfar na cearta sin chun pinsin a aistriú ar dháta an chinnidh sin, ach iad a aistriú trí sheachaíocht institiúidí an Aontais maidir leis na cearta sin a fuarthas ón dáta óna bhfuil an t‑oifigeach i dteideal a phinsin scoir, ar choinníoll gurb amhlaidh go gcuirtear na cearta pinsin aistrithe san áireamh chun méid an phinsin atá le deonú a chinneadh.

 

Sínithe


( *1 ) Teanga an cháis: an Fhraincis.

( i ) Is ainm bréagach é ainm an cháis seo. Ní thagraíonn sé d’fhíorainm aon pháirtí sna himeachtaí.