(1)

Ir-Regolament (KE) Nru 66/2010 jipprevedi li l-Ekotikketta tal-UE tista’ tingħata lill-prodotti b’impatt ambjentali mnaqqas tul iċ-ċiklu kollu ta’ ħajjithom. Għandhom jiġu stabbiliti kriterji speċifiċi tal-Ekotikketta tal-UE għal kull grupp ta’ prodotti.

(2)

Bid-Deċiżjoni tal-Kummissjoni 2014/350/UE (2), il-kriterji tal-Ekotikketta tal-UE ġew stabbiliti għall-grupp ta’ prodotti “prodotti tessili”. Il-validità ta’ dawk il-kriterji u tar-rekwiżiti ta’ valutazzjoni u ta’ verifika relatati se tiskadi fil-31 ta’ Diċembru 2025.

(3)

Bid-Deċiżjoni tal-Kummissjoni 2014/391/UE (3), il-kriterji tal-Ekotikketta tal-UE ġew stabbiliti għall-grupp ta’ prodotti “saqqijiet tas-sodda”. Il-validità ta’ dawk il-kriterji u tar-rekwiżiti ta’ valutazzjoni u ta’ verifika relatati se tiskadi fil-31 ta’ Diċembru 2026.

(4)

Bid-Deċiżjoni tal-Kummissjoni (UE) 2016/1332 (4), il-kriterji tal-Ekotikketta tal-UE ġew stabbiliti għall-grupp ta’ prodotti “għamara”. Il-validità ta’ dawk il-kriterji u tar-rekwiżiti ta’ valutazzjoni u ta’ verifika relatati se tiskadi fil-31 ta’ Diċembru 2026.

(5)

Bid-Deċiżjoni tal-Kummissjoni (UE) 2016/1349 (5), il-kriterji tal-Ekotikketta tal-UE ġew stabbiliti għall-grupp ta’ prodotti “xedd tas-saqajn”. Il-validità ta’ dawk il-kriterji u tar-rekwiżiti ta’ valutazzjoni u ta’ verifika relatati se tiskadi fil-31 ta’ Diċembru 2025.

(6)

Bid-Deċiżjoni tal-Kummissjoni (UE) 2017/176 (6), il-kriterji tal-Ekotikketta tal-UE ġew stabbiliti għall-grupp ta’ prodotti “kisi tal-art b’bażi tal-injam, tas-sufra u tal-bambù”. Il-validità ta’ dawk il-kriterji u tar-rekwiżiti ta’ valutazzjoni u ta’ verifika relatati se tiskadi fil-31 ta’ Diċembru 2026.

(7)

F’konformità mal-konklużjonijiet tal-Kontroll tal-Idoneità tal-Ekotikketta tal-UE (REFIT) tat-30 ta’ Ġunju 2017 (7), il-Kummissjoni, flimkien mal-Bord tal-Ekotikkettar tal-UE, ivvalutat u kkonfermat ir-rilevanza tal-kriterji tal-Ekotikketta tal-UE għall-gruppi ta’ prodotti msemmija hawn fuq għall-iskema tal-Ekotikketta tal-UE, filwaqt li implimentat soluzzjonijiet biex jittejbu s-sinerġiji bejn il-gruppi ta’ prodotti u biex jiżdied l-użu tal-Ekotikketta tal-UE.

(8)

Il-kunsiderazzjonijiet imsemmija hawn fuq żvelaw li, għas-saqqijiet tas-sodda, għall-għamara, għax-xedd tas-saqajn u għall-kisi tal-art b’bażi tal-injam, tas-sufra u tal-bambù, il-kriterji tqiesu li kienu għadhom aġġornati u li x’aktarx se jibqgħu hekk fil-futur qrib. Konsegwentement, jenħtieġ li r-reviżjonijiet tal-kriterji u tar-rekwiżit ta’ valutazzjoni u ta’ verifika relatat għal dawk il-gruppi ta’ prodotti jiġu differiti, biex il-leġiżlazzjoni settorjali li qed tevolvi tkun tista’ tiġi integrata u biex jiġi żgurat li ikun hemm allinjament u koerenza ma’ politiki oħra għall-prodotti li qed twettaq l-UE bħalissa. Għall-prodotti tessili, ir-reviżjoni li għaddejja jeħtieġ li tiġi ffinalizzata wara li jinħareġ l-att delegat relatat skont ir-Regolament (UE) 2024/1781 tal-Parlament Ewropew u tal-Kunsill (8), biex tiġi żgurata l-konsistenza bejn ir-rekwiżiti stabbiliti f’tali att delegat u l-kriterji tal-Ekotikketta tal-UE, filwaqt li titqies il-possibbiltà li l-Ekotikketta tal-UE tintuża fil-futur bħala prova ta’ konformità mar-rekwiżiti tal-ekodisinn stabbiliti f’dak l-att delegat sa fejn dawk ir-rekwiżiti jkunu koperti tal-Ekotikketta tal-UE. Sa dak iż-żmien, jenħtieġ li l-kriterji u r-rekwiżit ta’ valutazzjoni u ta’ verifika relatat għall-prodotti tessili jibqgħu validi.

(9)

Sabiex tiġi ffaċilitata l-koordinazzjoni tal-Kummissjoni tal-proċess ta’ reviżjoni flimkien mal-inizjattivi leġiżlattivi li ġejjin, u biex jiġu kkonsolidati l-isforzi kull meta jkun fattibbli, jeħtieġ li tiġi estiża l-validità tal-kriterji tal-Ekotikketta tal-UE, kif ukoll tar-rekwiżiti ta’ valutazzjoni u ta’ verifika stabbiliti fid-Deċiżjonijiet 2014/350/UE, 2014/391/UE, (UE) 2016/1332, (UE) 2016/1349 u (UE) 2017/176.

(10)

Sabiex ikun hemm biżżejjed żmien biex jiġu ffinalizzati l-proċessi ta’ reviżjoni, is-sett ta’ kriterji maħruġ fl-istess sena f’Deċiżjoni unika tal-Kummissjoni u biex tiġi żgurata l-kontinwità tas-suq għad-detenturi tal-liċenzji bejn il-verżjonijiet attwali u l-verżjonijiet riveduti tal-kriterji, jenħtieġ li l-perjodu ta’ validità tal-kriterji attwali u tar-rekwiżiti ta’ valutazzjoni u ta’ verifika relatati jiġi estiż sal-31 ta’ Diċembru 2028 għall-prodotti tessili u għax-xedd tas-saqajn, sal-31 ta’ Diċembru 2029 għall-għamara u għall-kisi tal-art b’bażi tal-injam, tas-sufra u tal-bambù u sal-31 ta’ Diċembru 2030 għas-saqqijiet tas-sodda.

(11)

Għalhekk, jenħtieġ li d-Deċiżjonijiet 2014/350/UE, 2014/391/UE, (UE) 2016/1332, (UE) 2016/1349 u (UE) 2017/176 jiġu emendati kif xieraq.

(12)

Il-miżuri previsti f’din id-Deċiżjoni huma f’konformità mal-opinjoni tal-Kumitat stabbilit bl-Artikolu 16 tar-Regolament (KE) Nru 66/2010,