CÉ MUID FÉIN

Bunaíodh Cúirt Iniúchóirí na hEorpa (CIE) in 1975 mar iniúchóir seachtrach an Aontais Eorpaigh. Is ceann de sheacht n-institiúid an Aontais Eorpaigh í an Chúirt, atá lonnaithe i Lucsamburg agus tá thart ar 1 000 duine, de gach náisiúntacht den Aontas, fostaithe ar an bhfoireann iniúchóireachta, tacaíochta agus riaracháin (1).

Feidhmíonn an Chúirt Iniúchóirí mar chomhlacht coláisteach ina bhfuil 27 gComhalta, le comhalta amháin ann as gach Ballstát den Aontas. Seiceálann ár n-iniúchóirí go bhfuil cuntais mhaithe á gcoinneáil ag an Aontas, go bhfuil na rialacha airgeadais á gcur i bhfeidhm i gceart aige agus go bhfuil beartais agus cláir an Aontais ag baint amach na gcuspóirí atá beartaithe leo agus go dtugann siad luach ar airgead i gcrích.

Trínár gcuid oibre, bímid ag rannchuidiú le feabhas a chur ar rialachas, cuntasacht, trédhearcacht agus bainistíocht fhónta airgeadais ghníomhaíocht an Aontais. Tugaimid rabhadh i dtaobh rioscaí, soláthraímid dearbhú iniúchóireachta, sainaithnímid easnaimh agus scéalta rathúla agus tugaimid treoraíocht do lucht déanta beartais agus reachtóirí an Aontais. Cuirimid ár mbarúlacha agus moltaí faoi bhráid Pharlaimint na hEorpa, Chomhairle an Aontais Eorpaigh agus na rialtais agus parlaimintí náisiúnta, chomh maith leis an bpobal i gcoitinne.

Tá an Chúirt roinnte i 10 stiúrthóireacht iniúchóireachta agus riaracháin a fheidhmíonn le foirne atá solúbtha agus a bhfuil a gcuid oibre bunaithe ar thascanna. Pléann na stiúrthóireachtaí iniúchóireachta le réimsí éagsúla beartais dá sanntar baill foirne de réir na dtosaíochtaí a eascraíonn as an gclár oibre.

Déanann Seomra V comhordú ar an ráiteas dearbhaithe bliantúil ón gCúirt Iniúchóirí maidir le hioncam buiséadach (idir acmhainní dílse agus mhaoiniú eile) agus caiteachas an Aontais. Déanann sé iniúchóireacht freisin ar dhlíthiúlacht agus rialtacht an chaiteachais ón tSaoráid Téarnaimh agus Athléimneachta, an phríomh-chomhchuid de phlean téarnaimh NextGenerationEU, agus tugann sé treoraíocht le haghaidh iniúchtaí comhlíontachta agus airgeadais eile.

A BHFUIL Á THAIRISCINT AGAINN

Tá an fógra folúntais seo á eisiúint ar bhonn Airteagal 29(1) agus (2) de Rialacháin Foirne Oifigigh an Aontais Eorpaigh (2).

Is ag grád AD14 a earcófar an t-iarrthóir rathúil. Is é €18 695,13 atá sa bhuntuarastal míosúil ag an ngrád sin i láthair na huaire. De réir na Rialachán Foirne, d’fhéadfaí sochair áirithe a chur leis an mbuntuarastal, atá faoi réir cháin AE agus atá díolmhaithe ó cháin náisiúnta.

I measc na bpríomhfhreagrachtaí a ghabhann leis an bpost seo, beidh:

—	treo straitéiseach foriomlán a chur ar fáil do stiúrthóireacht Sheomra V i gcomhréir leis na rialacha inmheánacha, leis na cuspóirí straitéiseacha agus leis an gclár oibre bliantúil atá ag an gCúirt;

—	formhaoirseacht a dhéanamh ar bhainistiú foirne agus acmhainní airgeadais na stiúrthóireachta;

—	rannchuidiú le hullmhú agus cur chun feidhme chláir oibre bhliantúla na Cúirte, agus tuairisciú ar na hiniúchtaí a dhéanfar faoi réimse sainchúraim na stiúrthóireachta;

—	formhaoirseacht a dhéanamh ar cheapadh agus cur chun feidhme na bainistíochta eolais le haghaidh na réimsí atá faoi fhreagracht na stiúrthóireachta;

—	maoirseacht agus rialú iniúchóireachta a dhéanamh i gcomhréir le ceanglais cháilíochta na Cúirte agus le cleachtais agus caighdeáin iniúchóireachta na Cúirte;

—	treoraíocht agus teagasc a mholadh le haghaidh obair na Cúirte ar an ráiteas dearbhaithe agus le haghaidh na tuarascála bliantúla;

—	rannchuidiú le tascanna trasrannóige ar fud na Cúirte.

A BHFUIL Á LORG AGAINN

I.   CRITÉIR INCHÁILITHEACHTA

Tá an post atá fógartha ar oscailt d’iarrthóirí a chomhlíonann na critéir incháilitheachta seo a leanas faoin sprioc-am d’iarratais:

1.   Riachtanais ghinearálta

I gcomhréir le hAirteagal 28 de na Rialacháin Foirne, ní foláir do na hiarrthóirí, ar dháta a n-iarratais:

—	bheith ina náisiúnach de Bhallstát de chuid an Aontais Eorpaigh;

—	a gcearta iomlána mar shaoránach a bheith á dteachtadh acu;

—	aon oibleagáid a chuirtear orthu leis na dlíthe earcaíochta a bhaineann leis an tseirbhís mhíleata a bheith comhlíonta acu; agus

—	na riachtanais charachtair a theastaíonn do na dualgais atá i gceist a shásamh.

2.   Cáilíochtaí

I gcomhréir le hAirteagal 5 de na Rialacháin Foirne:

(i)	leibhéal oideachais arb ionann é agus cúrsa ollscoile a bheith críochnaithe agus é sin á fhianú le dioplóma nuair is ceithre bliana nó níos mó atá sa ghnáth-thréimhse oideachais ollscoile, nó

(ii)

leibhéal oideachais arb ionann é agus cúrsa ollscoile a bheith críochnaithe agus é sin á fhianú le dioplóma mar aon le taithí ghairmiúil iomchuí d’aon bhliain amháin ar a laghad nuair is trí bliana ar a laghad atá sa ghnáth-thréimhse oideachais ollscoile (ní féidir an taithí ghairmiúil sin a chomhaireamh mar chuid den taithí ghairmiúil iarcháilíochta a éilítear anseo thíos).

3.   Eolas ar theangacha

—	Sáreolas (máthairtheanga nó leibhéal C2 ar a laghad i dtuiscint, labhairt agus scríobh) ar cheann amháin de theangacha oifigiúla an Aontais, agus eolas sásúil (leibhéal B2 ar a laghad i dtuiscint, labhairt agus scríobh) ar theanga eile de chuid an Aontais.

—

Ós rud é gurb iad an Béarla agus an Fhraincis teangacha oifigiúla oibre na Cúirte, tá eolas fuaimintiúil ar cheann de na teangacha sin ag teastáil (leibhéal C1 ar a laghad sa tuiscint, sa labhairt agus sa scríobh), chomh maith le heolas maith ar an teanga eile (leibhéal B2 ar a laghad sna catagóirí céanna).

—	Sa chás go bhfuil an Béarla nó an Fhraincis mar mháthairtheanga ag an iarrthóir, ní mór eolas fuaimintiúil a bheith ag an duine sin ar an teanga oibre eile (leibhéal C1 ar a laghad sa tuiscint, sa labhairt agus sa scríobh).

Is féidir leat do chuid scileanna teanga iasachta a mheasúnú ag:

https://europa.eu/europass/ga/common-european-framework-reference.

I do CV, inis le do thoil cad iad na scileanna teanga atá agat bunaithe ar an múnla measúnaithe sin.

4.   Taithí ghairmiúil

Taithí ghairmiúil chruthaithe de 18 mbliana ar a laghad a fuarthas i ndiaidh na cáilíochta thuasluaite a bheith bainte amach, lena n-áirítear 10 mbliana ar a laghad san iniúchóireacht.

De na 18 mbliana sin, caithfidh ar a laghad 4 bliana díobh a bheith caite i bpost bainistíochta le freagracht as bainistiú acmhainní daonna agus as bainistiú acmhainní buiséadacha (3) (i gcomhthéacs an Aontais Eorpaigh: ceann aonaid nó a choibhéis, ar a laghad).

5.   Teorainn aoise

Ní fhéadfaidh an ghnáth-aois scoir a bheith slánaithe ag na hiarrthóirí. Is í an ghnáth-aois scoir d’oifigigh an Aontais Eorpaigh ná deireadh na míosa ina slánaíonn siad 66 bliana d’aois (féach Airteagal 52(a) de na Rialacháin Foirne).

II.   CRITÉIR ROGHNÚCHÁIN

Beidh ar na hiarrthóirí an méid seo a leanas a léiriú:

1.	Eolas fuaimintiúil ar chaighdeáin agus modheolaíocht na hiniúchóireachta i réimsí na hiniúchóireachta airgeadais, feidhmíochta agus comhlíontachta, lena n-áirítear an cur chuige iniúchóireachta i leith an ráitis dearbhaithe.

2.	Eolas fuaimintiúil ar airgeadas poiblí an Aontais Eorpaigh agus ar iniúchóireacht na hearnála poiblí.

3.	Scileanna sa bhainistíocht straitéiseach – a bheith in ann straitéis a dhearadh agus a chur chun feidhme go rathúil agus a bheith in ann cuspóirí todhchaíocha na stiúrthóireachta a mhúnlú.

4.	Taithí i mbainistiú acmhainní daonna agus airgeadais, lena n-áirítear pleanáil agus leithdháileadh éifeachtúil agus éifeachtach acmhainní.

5.	Sárchumas ó thaobh foirne ilteangacha agus ilchultúrtha a stiúradh agus a spreagadh.

6.	Scileanna cumarsáide – a bheith in ann cumarsáid a dhéanamh go soiléir, ó bhéal agus i scríbhinn; labhairt go poiblí; daoine a thabhairt leo i bplé; agus idirbheartaíocht a dhéanamh.

7.	Scileanna idirphearsanta den scoth.

8.	Measfar gur buntáiste a bheidh in eolas ar Rialachán Airgeadais (4) an Aontais Eorpaigh.

NÓS IMEACHTA ROGHNÚCHÁIN

I.   INCHÁILITHEACHT AGUS RÉAMH-ROGHNÚ

Beidh an coiste roghnúcháin (5) comhdhéanta de cheathrar de Chomhaltaí na Cúirte Iniúchóirí agus d’Ard-Rúnaí na Cúirte Iniúchóirí.

Ar an gcéad dul síos, cinnfidh an coiste an bhfuil na critéir incháilitheachta atá leagtha amach anseo thuas á gcomhlíonadh ag na hiarrthóirí.

Ansin, déanfaidh sé measúnú agus comparáid ar an taithí ghairmiúil agus an taithí bhainistíochta atá ag gach duine de na hiarrthóirí incháilithe bunaithe ar an bhfaisnéis a bheidh tugtha acu ina n-iarratais, agus beidh aird freisin aige ar na critéir roghnúcháin shonracha dar n-uimhriú 1 go 4, 6 agus 8.

II.   IONAD MEASÚNAITHE AGUS AGALLAMH/AGALLAIMH

An ceathrar  (6) iarrthóirí a mbeidh an marc is airde faighte acu sa mheasúnú comparáideach, tabharfar cuireadh dóibh teacht i láthair (mar chéim éigeantach den phróiseas) chuig ionad measúnaithe, agus chuig agallamh leis an gcoiste roghnúcháin i Lucsamburg. Sa litir/sna litreacha a sheolfar amach mar chuireadh, tabharfar an fhaisnéis riachtanach go léir faoi eagrú an ionaid measúnaithe do na hiarrthóirí a bheidh ar an ngearrliosta.

San ionad measúnaithe, agus de réir na gcritéar roghnúcháin atá leagtha amach anseo thuas, díreofar isteach ar na scileanna bainistíochta straitéisí, na scileanna cumarsáide agus na scileanna idirphearsanta atá ag na hiarrthóirí atá ar an ngearrliosta. Ag éirí as an ionad measúnuithe, cuirfear tuarascáil i dtoll a chéile a chuirfear ar fáil don choiste roghnúcháin sula mbeidh céim na n-agallamh ann.

San agallamh, díreofar isteach ar an inspreagadh atá ag gach aon iarrthóir, agus déanfar measúnú ar cé chomh maith is atá a bpróifíl ag teacht leis na critéir roghnúcháin.

Más gá, féadfaidh an coiste roghnúcháin a chinneadh agallaimh bhreise a eagrú leis an gceathrar iarrthóirí a bheidh ar an ngearrliosta, agus féadfaidh an coiste sin freisin a iarraidh ar na hiarrthóirí litreacha molta agus/nó tuarascálacha maidir leis an mbreithmheas feidhmíochta bliantúil a chur ar fáil.

III.   CEAPACHÁN

Nuair a bheidh a mheasúnú déanta ag an gcoiste roghnúcháin, cuirfidh sé tuarascáil réasúnaithe faoi bhráid choláiste na gComhaltaí ina sainaithneofar an t-iarrthóir/na hiarrthóirí a mheasann sé is fearr atá cáilithe don phost.

Ina gcáil chomhpháirteach mar Údarás Ceapacháin, féadfaidh na Comhaltaí cinneadh a ghlacadh ansin i dtaobh ceapadh iarrthóra.

IARRATAIS

Seo é an sprioc-am le haghaidh iarratais: 12:00 (meán lae) de réir am Lucsamburg ar an 20 Eanáir 2026.

Ní foláir an t-iarratas a dhréachtú i mBéarla nó i bhFraincis agus is é an t-aon bhealach lena chur isteach ná tríd an bhfoirm ar líne atá ar fáil ag bun an fhógra folúntais (EN nó FR) ar an leathanach Deiseanna Fostaíochta ar shuíomh gréasáin na Cúirte Iniúchóirí (faoi ‘ Open positions ’ [Poist oscailte]): https://www.eca.europa.eu/ga/Pages/JobOpportunities.aspx.

Caithfidh na doiciméid seo a leanas, arna ndréachtú i mBéarla nó i bhFraincis, a bheith san iarratas:

—	litir chumhdaigh (4 leathanach ar a mhéad);

—	CV atá cothrom le dáta (seacht leathanach ar a mhéad), agus b’fhearr dá mbeadh sé leagtha amach i bhformáid Europass (féach https://europa.eu/europass/).

Aon iarratas a fhaightear i ndiaidh an sprioc-ama, nó nach gcuirtear isteach trí bhíthin na foirme ar líne, diúltófar iad.

Trí iarratas a chur isteach, tá na hiarrthóirí ag dearbhú go bhfuil an fhaisnéis atá tugtha acu sa litir chumhdaigh agus sa CV i gcomhréir leis na ceanglais incháilitheachta. Más rud é, ag céim ar bith den phróiseas roghnúcháin, go dtugann an coiste roghnúcháin faoi deara go bhfuil ráitis bhréagacha nó neamhiomlána déanta, diúltófar an t-iarratas agus déanfar an t-iarrthóir a dhícháiliú.

Is ar bhonn na faisnéise a thugtar sna doiciméid a éilítear, agus ar an mbonn sin amháin, a dhéanfaidh an coiste roghnúcháin na hiarratais a mheas. Ag céim ar bith den nós imeachta, féadfaidh an coiste a iarraidh ar iarrthóirí fianaise thacaíochta a sholáthar do na ráitis atá déanta ina n-iarratais acu. Féadfaidh sé an fhaisnéis atá tugtha a fhiosrú tuilleadh am ar bith le linn an phróisis. Más rud é nach gcuireann iarrthóir an fhianaise sin ar fáil nuair a iarrtar é sin, diúltófar a n-iarratas agus déanfar iad a dhícháiliú.

Chun a chinntiú go bhfuil d’iarratas déanta in am, molaimid go láidir duit gan cur isteach an iarratais a fhágáil go dtí cúpla uair an chloig roimh an sprioc-am. Tarlaíonn sé uaireanta go gcuirtear ró-ualach ar an gcóras de réir mar a bhítear ag teannadh leis an sprioc-am.

BEARTAS EARCAÍOCHTA

COMHDHEISEANNA AGUS CÓIRITHE RÉASÚNTA

I gcomhréir le beartas na Cúirte maidir le hÉagsúlacht agus Cuimsiú agus le hAirteagal 1d de na Rialacháin Foirne, is mór ag an gCúirt an éagsúlacht agus cuireann sí comhionannas deiseanna chun cinn. Faoi mar a cheanglaítear le hAirteagal 23 de Chairt um Chearta Bunúsacha an Aontais Eorpaigh, glacaimid le hiarratais gan idirdhealú ar fhoras ar bith agus tá bearta déanta lena chinntiú go bhfuil cóimheá chothrom ann idir mná agus fir ó thaobh na hearcaíochta de.

Má theastaíonn aon socruithe speisialta uait le haghaidh míchumas sonrach chun gur féidir leat páirt a ghlacadh sa nós imeachta roghnúcháin seo, seol ríomhphost luath go maith, le do thoil, chuig ECA-Selection@eca.europa.eu.

COSAINT SONRAÍ

Tá an Chúirt tiomanta dá chinntiú go ndéanfar sonraí pearsanta na n-iarrthóirí a phróiseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle (7).

Chun tuilleadh eolais a fháil, féach an ráiteas príobháideachais ar leith atá againn don earcaíocht ag an seoladh seo a leanas:

https://www.eca.europa.eu/Lists/ECADocuments/Specific_Privacy_Statement_vacancies/Specific_Privacy_Statement_vacancies_EN.PDF.

IARRATAÍ AR ATHMHACHNAMH — GEARÁIN AGUS ACHOMHAIRC — GEARÁIN CHUIG AN OMBUDSMAN EORPACH

Má mheasann tú, tráth ar bith le linn an nós imeachta roghnúcháin, gur glacadh cinneadh i do leith atá mícheart, tá na roghanna seo a leanas ar fáil duit:

I.   A IARRAIDH AR AN gCoiste ROGHNÚCHÁIN ATHMHACHNAMH A DHÉANAMH AR AN gCinneadh

Féadfaidh tú iarraidh réasúnaithe i scríbhinn a chur isteach ina n-iarrtar athmhachnamh a dhéanamh ar chinneadh atá déanta ag an gcoiste roghnúcháin. Ní foláir an iarraidh sin a sheoladh, laistigh de 10 lá féilire ó fhógairt an chinnidh, chuig ECA-Recours@eca.europa.eu. I gcás inar lá saoire poiblí, Satharn nó Domhnach é an lá deireanach, críochnóidh an tréimhse nuair a bheidh an uair an chloig dheireanach den lá oibre ina dhiaidh sin caite.

II.   GEARÁIN

Faoi Airteagal 90(2) de na Rialacháin Foirne, féadfaidh tú gearán i scríbhinn a chur isteach in aghaidh chinneadh na Cúirte diúltú do d’iarratas. Ní foláir é sin a dhéanamh laistigh de thrí mhí ó fhógra a fháil faoin gcinneadh sin, agus an gearán a chur chuig an seoladh seo:

An tArd-Rúnaí

Cúirt Iniúchóirí na hEorpa

12, rue Alcide De Gasperi

L-1615 Luxembourg

LUCSAMBURG

III.   ACHOMHAIRC BHREITHIÚNACHA

Faoi Airteagal 91 de na Rialacháin Foirne, féadfaidh tú achomharc in aghaidh cinneadh diúltú do do ghearán, sa mhéid go ndéanann an cinneadh sin dochar duit, a chur chuig Cúirt Bhreithiúnais an Aontais Eorpaigh. Is dlíodóir a chaithfidh caingean den sórt sin a thionscnamh, agus beidh sé sin le déanamh laistigh de thrí mhí ó fhógra a fháil faoin gcinneadh diúltú don ghearán.

IV.   GEARÁIN CHUIG AN OMBUDSMAN EORPACH

Má chreideann tú go raibh drochriarachán i gceist leis an gcaoi ar dhéileáil Cúirt Iniúchóirí na hEorpa le d’iarratas, féadfaidh tú gearán a thaisceadh leis an Ombudsman Eorpach, ach teagmháil a bheith déanta ar dtús leis an gCúirt agat d’fhonn an díospóid a réiteach. Beidh ort do ghearán a chur isteach i scríbhinn, agus é sin a dhéanamh laistigh de dhá bhliain tar éis duit eolas a fháil ar na fíorais ábhartha. Tá foirm ghearáin ar líne le fáil ar shuíomh gréasáin an Ombudsman Eorpaigh. Fiú má dhéantar gearán leis an Ombudsman Eorpach, ní dhéanfar na sprioc-amanna don achomharc atá luaite thuas a chur ar fionraí.

---

(1)  Le haghaidh tuilleadh eolais faoin gCúirt Iniúchóirí, féach www.eca.europa.eu.

(2)   https://eur-lex.europa.eu/legal-content/EN/TXT/PDF/?uri=CELEX:01962R0031-20250513.

(3)  Maidir leis an taithí bhainistíochta in Acmhainní Daonna, ní foláir go raibh na nithe seo a leanas i gceist léi: aonaid/ranna a bhainistiú; measúnú foirne; agus tacú le forbairt ghairmiúil na foirne. Ciallaíonn taithí i mbainistiú acmhainní buiséadacha go raibh duine ceaptha go foirmiúil chun buiséad a bhainistiú, lena n-áirítear pleanáil agus cur chun feidhme an bhuiséid chomh maith le tuairisciú ar úsáid an bhuiséid. Ba cheart do na hiarrthóirí fianaise a thabhairt go raibh siad ag bainistiú acmhainní daonna agus ag bainistiú acmhainní airgeadais ar feadh 4 bliana ar a laghad do gach aon cheann acu, is cuma más ar bhonn leithligh nó ag an am céanna a bhí sé sin ar siúl acu.

(4)   https://eur-lex.europa.eu/legal-content/GA/TXT/HTML/?uri=OJ:L_202402509.

(5)  Cuirfear na hiarrthóirí ar an eolas luath go maith sa phróiseas faoi na daoine atá ar an gcoiste roghnúcháin.

(6)  Nó líon is mó ná sin sa chás go mbeidh an marc céanna ag daoine.

(7)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).