(1)

Il-linji gwida li jinsabu fl-Arranġament dwar il-Krediti għall-Esportazzjoni Uffiċjalment Appoġġati (l-“Arranġament”), żviluppati fil-qafas tal-Organizzazzjoni għall-Kooperazzjoni u l-Iżvilupp Ekonomiċi (OECD), ġew trasposti, u b’hekk magħmula legalment vinkolanti fl-Unjoni bis-saħħa tar-Regolament (UE) Nru 1233/2011 tal-Parlament Ewropew u tal-Kunsill (1).

(2)

F’konformità mal-Anness XII tal-Arranġament, Rata ta’ Referenza tal-Imgħax Kummerċjali (“CIRR”) hija stabbilita għall-munita ta’ kull Parteċipant fl-Arranġament. CIRR, li hija rata tal-imgħax minima fissa li tista’ tiġi offruta bħala parti minn kuntratt ta’ finanzjament tal-esportazzjoni appoġġat mill-gvern, hija magħmula minn rata bażi u marġini.

(3)

Il-Parteċipanti fl-Arranġament (il-“Parteċipanti”) użaw il-London InterBank Offered Rate (“LIBOR”) bħala l-parametru referenzjarju biex jiġi kkalkolat il-marġini tas-CIRR. Wara li l-LIBOR ma tkomplietx fl-2021, il-Parteċipanti qablu dwar soluzzjonijiet temporanji għall-istabbiliment tal-marġini tas-CIRR.

(4)

Il-Parteċipanti għandhom jaqblu bi proċedura bil-miktub dwar emendi għad-dispożizzjonijiet tal-Arranġament dwar l-istabbiliment tal-marġini tas-CIRR.

(5)

Jixraq li tiġi stabbilita l-pożizzjoni li trid tittieħed f’isem l-Unjoni fil-proċedura bil-miktub tal-Parteċipanti, peress li d-deċiżjoni tal-Parteċipanti ser tkun vinkolanti fuq l-Unjoni u tista’ tinfluwenza b’mod determinanti l-kontenut tad-dritt tal-Unjoni, bis-saħħa tal-Artikolu 1 tar-Regolament (UE) Nru 1233/2011,