(1)

Maidir leis na treoirlínte atá sa Socrú maidir leis na Creidmheasanna Onnmhairiúcháin arna dTacú go hOifigiúil (‘an Socrú’), a forbraíodh faoi chuimsiú na hEagraíochta um Chomhar agus Forbairt Eacnamaíochta (ECFE), rinneadh iad a thrasuí de bhua Rialachán (AE) Uimh. 1233/2011 ó Pharlaimint na hEorpa agus ón gComhairle (1) agus dá bhrí sin tá siad ceangailteach ó thaobh dlí de san Aontas.

(2)

I gcomhréir le hIarscríbhinn XII a ghabhann leis an Socrú, bunaítear Ráta Tagartha don Ús Tráchtála (‘CIRR’) le haghaidh airgeadra gach Rannpháirtí sa Socrú. Is éard atá i CIRR, ar íosráta seasta úis é is féidir a thairiscint mar chuid de chonradh maoinithe onnmhairiúcháin le taca rialtais, bonnráta agus corrlach.

(3)

D’úsáid na Rannpháirtithe sa Socrú (‘na Rannpháirtithe’) Ráta Tairgthe Idirbhainc Londan mar thagarmharc chun corrlach CIRR a ríomh. Tar éis deireadh a bheith curtha le Ráta Tairgthe Idirbhainc Londan in 2021, tháinig na Rannpháirtithe ar chomhaontú maidir le réitigh shealadacha chun corrlaigh CIRR a bhunú.

(4)

Tá na Rannpháirtithe le teacht ar chomhaontú trí nós imeachta i scríbhinn maidir le leasuithe ar fhorálacha an tSocraithe i ndáil le corrlaigh CIRR a bhunú.

(5)

An seasamh atá le glacadh thar ceann an Aontais, is iomchuí é a bhunú i nós imeachta i scríbhinn na Rannpháirtithe, ós rud é go mbeidh cinneadh na Rannpháirtithe ina cheangal ar an Aontas agus go mbeidh sé in ann tionchar cinntitheach a bheith aige ar ábhar dhlí an Aontais, de bhua Airteagal 1 de Rialachán (AE) Uimh. 1233/2011,