European flag

Iris Oifigiúil
an Aontais Eorpaigh

GA

Sraith L

2024/2665

9.10.2024

CINNEADH (CBES) 2024/2665 ÓN gCOMHAIRLE

an 8 Deireadh Fómhair 2024

lena leasaítear Cinneadh (CBES) 2019/1720 a bhaineann le bearta sriantacha i bhfianaise na staide i Nicearagua

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 29 de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

An 14 Deireadh Fómhair 2019, ghlac an Chomhairle Cinneadh (CBES) 2019/1720 (1) a bhaineann le bearta sriantacha i bhfianaise na staide i Nicearagua.

(2)

Beidh feidhm ag Cinneadh (CBES) 2019/1720 go dtí an 15 Deireadh Fómhair 2024. Ar bhonn athbhreithniú ar an gCinneadh sin, ba cheart síneadh a chur leis na bearta sriantacha a leagtar amach ann go dtí an 15 Deireadh Fómhair 2025, agus an ráiteas ar chúiseanna maidir le beirt daoine nádúrtha agus eintiteas amháin a liostaítear san Iarscríbhinn a ghabhann leis a thabhairt cothrom le dáta.

(3)

Ba cheart, dá bhrí sin, Cinneadh (CBES) 2019/1720 a leasú dá réir,

TAR ÉIS AN CINNEADH SEO A GHLACADH:

Airteagal 1

Leasaítear Cinneadh (CBES) 2019/1720 mar a leanas:

(1)

in Airteagal 9, cuirtear ‘15 Deireadh Fómhair 2025’ in ionad an dáta ‘15 Deireadh Fómhair 2024’;

(2)

leasaítear an Iarscríbhinn mar a leagtar amach san Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Arna dhéanamh i Lucsamburg, an 8 Deireadh Fómhair 2024.

Thar ceann na Comhairle

An tUachtarán

VARGA M.

(1)  Cinneadh (CBES) 2019/1720 ón gComhairle an 14 Deireadh Fómhair 2019 a bhaineann le bearta sriantacha i bhfianaise na staide i Nicearagua (IO L 262, 15.10.2019, lch. 58).

IARSCRÍBHINN

Leasaítear an Iarscríbhinn a ghabhann le Cinneadh (CBES) 2019/1720 mar seo a leanas:

(1)

Faoin gceannteideal ‘A. Daoine nádúrtha dá dtagraítear in Airteagail 1(1) agus 2(1)’, cuirtear an méid seo a leanas in ionad iontrálacha 5 agus 12:

 

Ainm

Faisnéis aitheantais

Cúiseanna

Dáta an liostaithe

‘5.

Luís PÉREZ OLIVAS

Dáta breithe: 8.1.1956

Inscne: fireann

Ceann Stáisiún Póilíneachta Cheantar a Trí in Managua ó 2023 i leith. IarArd-Choimisinéir agus iarPhríomhoifigeach Cúnaimh Dhlíthiúil (DAEJ) i bpeannadlann “El Chipote”. Freagrach as sáruithe tromchúiseacha ar chearta an duine, lena n-áirítear céastóireacht, úsáid iomarcach an fhornirt, drochíde a thabhairt do dhaoine atá á gcoinneáil agus cineálacha íde táirí eile.

4.5.2020

12.

Alba Luz RAMOS

VANEGAS

Dáta breithe: 3.6.1949

Inscne: baineann

Náisiúntacht: Nicearaguach

Pas uimhir: A0009864 (Nicearagua)

IarUachtarán Chúirt Bhreithiúnais Uachtarach Phoblacht Nicearagua. Freagrach as na breithiúna a ionstraimiú ar mhaithe le leasanna réimeas Ortega, trí ghníomhaíochtaí freasúra a choiriúlú go roghnaíoch, trí phatrún na sáruithe ar chearta an phróisis chuí, gabhálacha treallacha, agus dícháiliú páirtithe polaitiúla agus iarrthóirí freasúra a bhuanú.

Tá sí freagrach, dá bhrí sin, as sáruithe tromchúiseacha ar chearta an duine agus as an tsochaí shibhialta agus as an bhfreasúra daonlathach a bhrú faoi chois, agus as an mbonn a bhaint go mór den smacht reachta i Nicearagua.

2.8.2021’

(2)

Faoin gceannteideal ‘B. Daoine dlítheanacha, eintitis agus comhlachtaí dá dtagraítear in Airteagal 2(1)’ cuirtear an méid seo a leanas in ionad iontráil 2:

 

Ainm

Faisnéis aitheantais

Cúiseanna

Dáta an liostaithe

‘2.

An Chomhairle Uachtarach um Thoghcháin

Consejo Supremo Electoral

Seoladh: Pista Juan Pablo II, Managua 14005, Nicearagua

Suíomh: https://www.cse.gob.ni/

R-phost: info@cse.gob.ni

Is í an Chomhairle Uachtarach um Thoghcháin an comhlacht atá freagrach as olltoghcháin an 7 Samhain 2021 a ullmhú, a reáchtáil agus a dheimhniú, olltoghcháin a bhain an bonn ó institiúidí daonlathacha agus próisis dhaonlathacha i ngeall ar a n-easpa trédhearcachta, chomh maith le fíor-fhreasúra agus díospóireacht dhaonlathach a bheith in easnamh. Cheil an Chomhairle Uachtarach um Thoghcháin an deis ar an bhfreasúra seasamh i saorthoghcháin agus d’áirithigh sí eagrú na vótála i ndálaí nach dálaí daonlathacha iad.

An 3 Deireadh Fómhair 2023, chuir an Chomhairle Uachtarach um Thoghcháin stádas dlíthiúil Yatama, an príomhpháirtí polaitiúil dúchasach i Nicearagua, ar ceal, rud a chuir bac ar a rannpháirtíocht i dtoghcháin mhí an Mhárta 2024 in dhá réigiún fhéinrialaitheacha den tír (Costa Caribe agus Costa Caribe Norte).

Tá an Chomhairle Uachtarach um Thoghcháin freagrach, dá bhrí sin, as cos ar bolg a imirt ar an bhfreasúra daonlathach, agus as an mbonn a bhaint ón daonlathas agus ón smacht reachta i Nicearagua.

10.1.2022’

ELI: http://data.europa.eu/eli/dec/2024/2665/oj

ISSN 1977-0839 (electronic edition)