(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus atá curtha ar liosta an Aontais a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta an Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Ar liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470, áirítear ola Calanus finmarchicus mar bhia núíosach údaraithe.

(4)

Le Rialachán Cur Chun Feidhme (AE) 2022/966 ón gCoimisiún (3) údaraíodh ola Calanus finmarchicus a chur ar an margadh lena húsáid i bhforbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (4), suas le huasleibhéal 1,0 g/lá (< 0,1 % eistir astaxaintine a bhfuil < 1,0 mg d’astaxaintin in aghaidh an lae ina thoradh air) don phobal i gcoitinne, seachas naíonáin agus leanaí óga, agus suas le huasleibhéal 2,3 g/lá (ó 0,1 % go ≤ 0,25 % eistir astaxaintine, a bhfuil ≤ 5,75 mg d’astaxaintin in aghaidh an lae ina thoradh air) don phobal i gcoitinne atá níos sine ná 14 bliana d’aois.

(5)

An 16 Nollaig 2024 chuir an chuideachta Calanus A/S (‘an t-iarratasóir’) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 ar athrú ar choinníollacha úsáide an bhia núíosaigh ‘ola Calanus finmarchicus’. Mhol an t-iarratasóir na coinníollacha úsáide maidir le heistir astaxaintine a athrú go leibhéal suas le 0,25 % i gcás gach grúpa daonra. D’iarr siad uasleibhéal méadaithe suas le 0,25 % eistir astaxaintine atá in ola Calanus finmarchicus do leanaí idir 3 bliana d’aois agus 14 bliana d’aois. Maidir le forbhianna atá ceaptha don phobal i gcoitinne ina bhfuil an leibhéal d’eistir astaxaintine atá údaraithe faoi láthair, is é sin < 0,1 %, mhol an t-iarratasóir na leibhéil úsáide d’ola Calanus finmarchicus atá údaraithe faoi láthair a laghdú ó 1,0 g/lá go 0,9 g/lá, (≤ 0,25 % eistir astaxaintine, a bhfuil ≤ 2,25 mg d’astaxaintin in aghaidh an lae ina thoradh air) agus mhol sé naíonáin agus leanaí óga a eisiamh. Maidir le forbhianna atá ceaptha don phobal i gcoitinne atá níos sine ná 10 mbliana d’aois, mhol an t-iarratasóir uasleibhéal úsáide de 2,2 g/lá (≤ 0,25 % eistir astaxaintine, a bhfuil ≤ 5,5 mg d’astaxaintin in aghaidh an lae ina thoradh air). Maidir le forbhianna atá beartaithe don phobal i gcoitinne atá níos sine ná 14 bliana d’aois, ina bhfuil an leibhéal d’eistir astaxaintine atá údaraithe faoi láthair, is é sin ≤ 0,25 %, mhol an t-iarratasóir freisin na leibhéil úsáide d’ola Calanus finmarchicus atá údaraithe faoi láthair a mhéadú ó 2,3 g/lá go 3,1 g/lá (≤ 0,25 % eistir astaxaintine, a bhfuil ≤ 7,75 mg d’astaxaintin in aghaidh an lae mar thoradh air). Ar deireadh, d’iarr an t-iarratasóir na ceanglais lipéadaithe bhreise a leasú, ós rud é nach iomchuí a thuilleadh an ráiteas ina léirítear nár cheart do leanaí níos óige ná 14 bliana d’aois forbhianna ina bhfuil ola Calanus finmarchicus a thomhailt má tá ≥ 0,1 % astaxaintine sa chomhábhar toisc go ndéanfar cion astaxaintine ola Calanus finmarchicus oil a chomhchuibhiú ar fud na ngrúpaí daonra uile.

(6)

Maidir leis an nuashonrú a iarradh ar liosta an Aontais d’ola Calanus finmarchicus a mhéid a bhaineann leis na hathruithe ar a choinníollacha úsáide do leanaí ó 3 bliana d’aois go dtí níos óige ná 10 mbliana d’aois, do dhéagóirí ó 10 mbliana d’aois go dtí níos óige ná 14 bliana d’aois agus don phobal i gcoitinne atá níos sine ná 14 bliana d’aois, measann an Coimisiún nach dócha go mbeidh tionchar ag an nuashonrú sin ar shláinte an duine, agus nach gá don Údarás Eorpach um Shábháilteacht Bia (‘an tÚdarás’) meastóireacht sábháilteachta a dhéanamh i gcomhréir le hAirteagal 10(3) de Rialachán (AE) 2015/2283. An toradh a bhfuil coinne leis mar geall ar an méadú atá beartaithe ar eistir astaxaintine in ola ó Calanus finmarchicus, go mbeidh iontógálacha astaxaintine ann, in éineacht le hiontógáil astaxaintine ón ngnáthaiste bia, nach sáróidh an iontógáil laethúil inghlactha in aon ghrúpa daonra arna bhunú ag an Údarás, is é sin iontógáil 0,2 mg d’astaxaintin/kg de mheáchan coirp (5).

(7)

Dá bhrí sin, is iomchuí coinníollacha úsáide an bhia núíosaigh ola Calanus finmarchicus a leasú, mar a mhol an t-iarratasóir.

(8)

Is iomchuí freisin ceanglais lipéadaithe ola Calanus finmarchicus a leasú, i gcomhréir leis na coinníollacha úsáide atá beartaithe, toisc nach bhfuil feidhm a thuilleadh ag an ráiteas nár cheart do leanaí atá níos óige ná 14 bliana d’aois forbhianna ina bhfuil ola Calanus finmarchicus a thomhailt má tá ≥ 0,1 % astaxaintine sa chomhábhar.

(9)

An fhaisnéis a sholáthraítear san iarratas, is faisnéis í lena ngabhann forais leordhóthanacha chun a shuí go bhfuil na hathruithe ar choinníollacha úsáide agus ceanglais shonracha lipéadaithe an bhia núíosaigh ola Calanus finmarchicus i gcomhréir le coinníollacha Airteagal 12 de Rialachán (AE) 2015/2283 agus gur cheart iad a fhormheas.

(10)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir sin.

(11)

Ionas go mbeidh a ndóthain ama ag oibreoirí gnó a gcuid cleachtas a choigeartú ar mhaithe le ceanglais an Rialacháin seo a chomhlíonadh, ba cheart bearta idirthréimhseacha a leagan síos maidir le forbhianna ina bhfuil ola Calanus finmarchicus, forbhianna a ndearnadh iad a chur ar mhargadh an Aontais go dleathach nó a sheoladh ó thríú tíortha chun an Aontais go dleathach roimh dháta theacht i bhfeidhm an Rialacháin seo.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,