(1)

Permezz tal-ittra tas-7 ta’ Awwissu 2020, l-Italja talbet awtorizzazzjoni biex tapplika, għall-perijodu mill-1 ta’ Jannar 2021 sal-31 ta’ Diċembru 2026, rati mnaqqsa ta’ tassazzjoni fuq iż-żejt tal-gass użat għal skopijiet ta’ tisħin u fuq l-elettriku, fornut fil-muniċipalità ta’ Campione d’Italia skont l-Artikolu 19 tad-Direttiva 2003/96/KE. L-Italja pprovdiet aktar informazzjoni u kjarifiki b’appoġġ għat-talba fid-19 ta’ Jannar 2021.

(2)

Il-muniċipalità ta’ Campione d’Italia hija parti mit-territorju Taljan fl-Iżvizzera b’ambitu ġeografiku limitat ħafna u popolazzjoni żgħira. Iż-żona hija muntanjuża, li tillimita l-iżvilupp urban, l-attivitajiet industrijali u l-aċċessibbiltà ġenerali tagħha. Minħabba l-pożizzjoni ġeografika tagħha, in-nuqqas ta’ aċċess tagħha għan-network tal-gass naturali u l-kundizzjonijiet klimatiċi severi tagħha, il-kostijiet tal-forniment ta’ prodotti tal-enerġija lil Campione d’Italia huma għoljin, kemm jekk jiġu fornuti mill-Iżvizzera kif ukoll mill-Italja. Barra minn hekk, id-dħul ta’ Campione d’Italia fit-territorju doganali tal-Unjoni fl-1 ta’ Jannar 2020 wassal għal żieda fil-kostijiet tal-enerġija għall-unitajiet domestiċi u n-negozji. Barra minn hekk, Campione d’Italia qed tesperjenza kriżi ekonomika serja, li ġiet aggravata mill-pandemija tal-COVID-19.

(3)

Sabiex jiġi mitigat il-kost għoli tal-enerġija f’Campione d’Italia, it-tassazzjoni fuq ċerti prodotti tal-enerġija għandha titnaqqas.

(4)

Il-miżura mitluba ġiet rieżaminata mill-Kummissjoni u nstab li ma tikkawżax distorsjoni tal-kompetizzjoni u lanqas ittellef il-funzjonament tajjeb tas-suq intern, u ma tistax titqies inkompatibbli mal-politika tal-Unjoni dwar l-ambjent, l-enerġija u t-trasport. It-tassazzjoni mnaqqsa kemm għaż-żejt tal-gass kif ukoll għall-elettriku jibqgħu daqs jew ogħla mil-livelli minimi ta’ tassazzjoni stabbiliti fid-Direttiva 2003/96/KE, u jikkumpensaw parzjalment għaż-żieda fil-kostijiet tal-enerġija fil-muniċipalità ta’ Campione d’Italia. It-tnaqqis tat-taxxa m’huwiex kumulattiv ma’ xi tip ieħor ta’ tnaqqis tat-taxxa.

(5)

Jenħtieġ għalhekk li l-Italja tkun awtorizzata tapplika rati ta’ tassazzjoni mnaqqsa għaż-żejt tal-gass użat għal skopijiet ta’ tisħin u għall-elettriku fornut fil-muniċipalità ta’ Campione d’Italia.

(6)

Sabiex jiġi żgurat li jintlaħqu l-objettivi segwiti mill-miżura ta’ deroga, b’mod partikolari dawk li jiġu evitati effetti ta’ tfixkil minħabba ċ-ċirkostanzi ekonomiċi, soċjali u ġeografiċi attwali ta’ Campione d’Italia u li jiġu żgurati kondizzjonijiet ekwivalenti permezz tal-mitigazzjoni tal-ispejjeż għoljin tal-enerġija, huwa xieraq li din id-Deċiżjoni tapplika mill-1 ta’ Jannar 2021. Billi tipprevedi l-applikazzjoni minn data qabel id-dħul fis-seħħ tal-miżura ta’ deroga, l-aspettattivi leġittimi tal-operaturi tas-suq u tal-individwi huma rispettati, peress li l-miżura ta’ deroga ma taffettwax id-drittijiet u l-obbligi tagħhom.

(7)

Kull awtorizzazzjoni li tingħata f’konformità mal-Artikolu 19(2) tad-Direttiva 2003/96/KE għandha tkun għal żmien limitat b’mod strett. Sabiex tipprovdi lill-muniċipalità ta’ Campione d’Italia b’livell suffiċjenti ta’ ċertezza, jenħtieġ li l-awtorizzazzjoni tingħata għal perijodu ta’ sitt snin. Madankollu, biex ma jiddgħajfux l-iżviluppi ġenerali futuri tal-qafas legali eżistenti, jixraq li jiġi stipulat li, jekk il-Kunsill li jkun qed jaġixxi abbażi tal-Artikolu 113 tat-Trattat dwar il-Funzjonament tal-Unjoni Ewropea, jintroduċi sistema ġenerali modifikata għat-tassazzjoni tal-prodotti tal-enerġija li għalihom ma tkunx tista’ tiġi adattata din l-awtorizzazzjoni, din l-awtorizzazzjoni jenħtieġ li tieqaf tapplika fil-jum li fih dawk ir-regoli ġenerali jsiru applikabbli.

(8)

Din id-Deċiżjoni hija mingħajr preġudizzju għall-applikazzjoni tar-regoli tal-Unjoni dwar l-għajnuna mill-Istat,