|
Il-Ġurnal Uffiċjali |
MT Is-serje C |
|
C/2025/623 |
28.1.2025 |
Pubblikazzjoni ta’ applikazzjoni għall-approvazzjoni ta’ emenda tal-Unjoni tal-Ispeċifikazzjoni tal-Prodott għal Denominazzjoni ta’ Oriġini Protetta fis-settur tal-inbid skont l-Artikolu 97(3), l-ewwel subparagrafu flimkien mal-Artikolu 105 tar-Regolament (UE) Nru 1308/2013 tal-Parlament Ewropew u tal-Kunsill
(C/2025/623)
Fi żmien 3 xhur mid-data ta’ din il-pubblikazzjoni, l-awtoritajiet ta’ Stat Membru jew ta’ pajjiż terz, jew persuna fiżika jew ġuridika li jkollha interess leġittimu u li tkun stabbilita jew residenti f’pajjiż terz, jistgħu jippreżentaw, f’konformità mal-Artikolu 17 tar-Regolament (UE) 2024/1143 tal-Parlament Ewropew u tal-Kunsill (1), proċedura ta’ oppożizzjoni lill-Kummissjoni.
APPLIKAZZJONI GĦAL EMENDA TAL-UNJONI TAL-ISPEĊIFIKAZZJONI TAL-PRODOTT
“Bohotin”
PDO-RO-A0138-AM02
Data tal-applikazzjoni: 20.7.2021
1. Applikant u interess leġittimu
Assoċjazzjoni tal-Produtturi u l-Proċessuri tal-Għeneb PROBOTA IAȘI
L-Assoċjazzjoni tal-Produtturi u l-Proċessuri tal-Għeneb Probota Iași hija persuna ġuridika taħt id-dritt privat mingħajr skop ta’ qligħ, b’kunsens u statut approvati fl-2014, stabbilita f’konformità mal-Ordni tal-Gvern Nru 26/2000 dwar l-assoċjazzjonijiet u l-fondazzjonijiet.
L-għan tal-Assoċjazzjoni huwa li tippromwovi u tipproteġi l-interessi ekonomiċi, kummerċjali, professjonali u legali tal-membri tagħha, li huma kumpaniji kummerċjali u kummerċjanti uniċi li jipproduċu u jipproċessaw l-għeneb. Hija tiġġestixxi l-produzzjoni relatata taħt id-DOP Iași u tappoġġa lill-produtturi tad-DOP Bohotin fil-produzzjoni tal-inbid taħt dan l-isem, peress li ma hemm l-ebda assoċjazzjoni awtonoma maħluqa għal din id-denominazzjoni f’din iż-żona u l-Assoċjazzjoni Probota hija waħda mill-aktar assoċjazzjonijiet importanti għar-reġjun tal-vitikultura Dealurile Moldovei stabbilita skont id-dispożizzjonijiet nazzjonali li jippermettu li jingħata appoġġ lill-produtturi għall-ġestjoni tajba tal-produzzjoni tal-għeneb/tal-inbid ta’ kwalità.
Il-kwartieri ġenerali tal-Assoċjazzjoni jinsabu fil-bini tal-kumpanija Agroindustrial Ceres SRL, il-bini C1, il-kamra 1, kodiċi postali 707 055, il-komun ta’ Bivolari, il-Kontea ta’ Iași, www.cramahermeziu.ro.
2. Intestatura fl-Ispeċifikazzjoni tal-Prodott affettwata mill-emenda/i
|
☐ |
Isem il-prodott |
|
☒ |
Kategorija tal-prodott tad-dwieli |
|
☒ |
Rabta |
|
☒ |
Restrizzjonijiet fuq il-kummerċjalizzazzjoni |
3. Deskrizzjoni u raġunijiet għall-emenda
1. Introduzzjoni ta’ kategoriji ġodda ta’ nbejjed fil-produzzjoni
L-ispeċifikazzjoni tal-inbid ġiet emendata bl-introduzzjoni ta’ tliet kategoriji ġodda ta’ nbid permessi għall-produzzjoni kif definiti fil-Parti II tal-Anness VII tar-Regolament (UE) Nru 1308/2013: inbid spumanti ta’ kwalità, inbid spumanti aromatiku ta’ kwalità u nbid semifrizzanti, li huma magħmula minn għeneb maqtugħ fiż-żona demarkata tad-denominazzjoni ta’ oriġini protetta tad-DOP Bohotin u jistgħu jużaw l-isem tad-DOP.
L-emenda tirriżulta mit-talba ta’ ħafna vitikulturi stabbiliti fiż-żona ta’ Bohotin biex jiddiversifikaw il-produzzjoni tal-inbejjed biex jinkludu nbejjed effervexxenti flimkien mal-inbid bla gass li jipproduċu llum, sabiex jiżdied l-introjtu tagħhom minn dawn il-prodotti, jissaħħaħ l-isem protett tagħhom billi jiġu pproċessati kategoriji ġodda ta’ prodotti u jiġu attirati konsumaturi iżgħar.
Il-Kapitolu I tal-Ispeċifikazzjoni tal-Prodott u l-punt 3 tad-Dokument Uniku huma emendati.
2. Dettalji tar-rabta bejn iż-żona u l-prodott għal kategoriji ġodda tal-inbid
Huwa meħtieġ li l-Ispeċifikazzjoni tal-Prodott tiġi emendata billi jiġu indikati d-dettalji tar-rabta bejn iż-żona ġeografika u l-prodott spjegat għall-kategoriji l-ġodda ta’ nbejjed fil-produzzjoni sabiex ikun hemm konformità mal-leġiżlazzjoni speċifika għal denominazzjoni ta' oriġini protetta u biex tiġi ppreżentata l-ispeċifiċità taż-żona tad-DOP permezz tal-fatturi speċifiċi involuti.
Il-Kapitolu II tal-Ispeċifikazzjoni tal-Prodott u l-punt 8 tad-Dokument Uniku huma emendati.
3. Indikazzjoni tal-varjetajiet ta’ nbid permessi għall-inbid spumanti aromatiku
L-ispeċifikazzjoni tal-inbid ġiet emendata billi jissemmew il-varjetajiet ta’ għeneb tal-inbid li minnhom jinkisbu l-inbejjed spumanti aromatiċi ta’ kwalità (il-varjetajiet Tămâioasă românească, Traminer roz, Muscat Ottonel u Busuioacă de Bohotin).
Il-Kapitolu IV tal-Ispeċifikazzjoni tal-Prodott ġie emendat, mingħajr tibdil fid-Dokument Uniku.
4. Indikazzjoni tar-rendimenti tad-dwieli għall-inbid spumanti aromatiku
Jeħtieġ li l-Ispeċifikazzjoni tal-Prodott tiġi emendata billi jiġu indikati r-rendimenti tad-dwieli għall-varjetajiet li minnhom jinkisbu l-inbejjed spumanti aromatiċi ta’ kwalità sabiex jiġu stabbiliti b’mod ċar ir-rendimenti speċifiċi ta’ din il-kategorija.
Il-Kapitoli IV u V tal-Ispeċifikazzjoni tal-Prodott u l-punt 5.2 tad-Dokument Uniku huma emendati.
5. Preżentazzjoni ta’ prattiki teknoloġiċi speċifiċi għall-kategoriji tal-inbid
L-Ispeċifikazzjoni tal-Prodott ġiet emendata billi ġew introdotti dettalji tal-prattiki teknoloġiċi speċifiċi għall-produzzjoni ta’ kategoriji ġodda ta’ nbid (inbid spumanti, inbid spumanti aromatiku ta’ kwalità, inbid semifrizzanti), bħall-fermentazzjoni f’tankijiet bil-pressjoni, il-fermentazzjoni fi fliexken tal-ħġieġ, l-istabbilizzazzjoni tal-inbid spumanti aromatiku.
Il-Kapitolu X tal-Ispeċifikazzjoni tal-Prodott ġie emendat, ma kien hemm l-ebda tibdil fid-Dokument Uniku.
6. Indikazzjoni tal-karatteristiċi analitiċi tal-kategoriji tal-inbid mitluba
Huwa meħtieġ li l-Ispeċifikazzjoni tal-Prodott tiġi emendata billi jiġu indikati l-parametri fiżikokimiċi speċifiċi ta’ dawn il-kategoriji l-ġodda minħabba li l-leġiżlazzjoni tirrikjedi dan għal prodott ta’ DOP, bħala informazzjoni li għandha tiġi pprovduta għall-ispeċifiċità ta’ dawn il-kategoriji ta’ kwalità.
Il-Kapitolu XI tal-Ispeċifikazzjoni tal-Prodott u l-punti 4.3, 4.4 u 4.5 tad-Dokument Uniku huma emendati.
7. Indikazzjoni tal-karatteristiċi organolettiċi tal-kategoriji l-ġodda tal-inbid mitluba
L-Ispeċifikazzjoni tal-Prodott ġiet emendata biż-żieda tal-karatteristiċi organolettiċi tal-kategoriji l-ġodda tal-inbid mitluba għall-produzzjoni, peress li l-leġiżlazzjoni tirrikjedi li din l-informazzjoni tiġi pprovduta fil-każ ta’ DOP.
Il-Kapitolu XI tal-Ispeċifikazzjoni tal-Prodott u l-punti 4.3, 4.4 u 4.5 tad-Dokument Uniku huma emendati.
8. Inklużjoni fit-tikkettar/il-preżentazzjoni ta’ dettalji obbligatorji għall-inbid spumanti ta’ kwalità
Huwa meħtieġ li l-Ispeċifikazzjoni tal-Prodott tiġi emendata billi jiġu introdotti dispożizzjonijiet dwar it-tikkettar tal-kategorija tal-inbid spumanti ta’ kwalità sabiex it-tikkettar għal din il-kategorija jkun fih informazzjoni dwar il-metodu li bih inkiseb l-inbid spumanti ta’ kwalità u l-isem tal-varjetà li jinkiseb minnha.
Il-Kapitolu XII tal-Ispeċifikazzjoni tal-Prodott u l-punt 9 tad-Dokument Uniku ġew emendati.
DOKUMENT UNIKU
1. Isem/ismijiet għar-reġistrazzjoni
Bohotin
2. Tip ta’ indikazzjoni ġeografika
DOP – Denominazzjoni ta’ Oriġini Protetta
3. Kategoriji tal-prodotti tad-dwieli
|
1. |
Inbid |
|
5. |
Inbid spumanti ta’ kwalità |
|
6. |
Inbid spumanti aromatiku ta’ kwalità |
|
8. |
Inbid semifrizzanti |
3.1. Kodiċi tan-Nomenklatura Magħquda
|
— |
22 – XARBIET, SPIRTI U ĦALL 2204 – Inbid tal-għeneb frisk, inkluż l-inbejjed imqawwija; most tal-għeneb għajr dak tal-intestatura 2009 |
4. Deskrizzjoni tal-inbid/inbejjed
1. Karatteristiċi organolettiċi - inbejjed bojod u rożè
Inbejjed bojod
Dehra viżiva – isfar lewn it-tiben, isfar qawwi, isfar lewn il-kanarin, bi sfumaturi li jagħtu fl-aħdar, isfar lewn il-lumi għal ħadrani, isfar fl-aħdar, isfar lewn id-deheb, isfar lewn it-tiben, isfar fl-aħdar, isfar fl-aħdar għal isfar lewn it-tiben.
Riħa – aroma tipika ta’ muscat, fjura tas-sebuqa, ċitru aħdar, friska, aroma ta’ tuffieħ tas-sajf maqtugħ frisk, aroma ta’ fjuri tal-għelieqi, sottili, bi tqaddim ħafif tfakkar fil-ħuxlief maħsud frisk, aroma tipika ta’ fjuri tad-dielja, fjuri tal-akaċja, ħuxlief maħsud frisk, riħa ta’ art niedja, fjuri tal-għelieqi.
Togħma – togħma tal-qoxra tal-ħobż tas-segala, għasel, togħma kemxejn morra, aċidità għolja, aromi taċ-ċitru.
Inbejjed rożè – kulur fi sfumaturi rożè jew kulur ta’ weraq tal-basal imnixxef jew petali tal-ward, aromi ta’ ħabaq, frott tal-foresta, noti fini ta’ vanilla bi tqaddim ħafif, xamm b’riħa ta’ lampun, frawli selvaġġ, xi drabi ċirasa u ċirasa qarsa.
Il-valuri għall-aċidità totali massima huma soġġetti għal-limiti stabbiliti fil-liġi rilevanti tal-Unjoni Ewropea.
Karatteristiċi analitiċi
|
— |
Qawwa alkoħolika totali massima (f’% tal-volum): 15 |
|
— |
Qawwa alkoħolika proprja minima (f’% tal-volum): 11,00 |
|
— |
Aċidità totali minima: 4,5 fi grammi għal kull litru espressi bħala aċidu tartariku |
|
— |
Aċidità volatili massima (f’milliekwivalenti għal kull litru): 18 |
|
— |
Total massimu ta’ diossidu tal-kubrit (f’milligrammi għal kull litru): 200 |
2. Karatteristiċi organolettiċi - inbejjed ħomor
Inbejjed ħomor
Dehra viżiva – aħmar skur lewn ir-rubin li, meta jimmatura, isir aħmar lewn il-briks, aħmar lewn ir-rubin, aħmar fil-kannella, aħmar lewn il-granata moderat jew intens jew bi sfumaturi vjola.
Riħa – ħabaq, frott aħmar tal-foresta, bit-tqaddim jiżviluppa ħjiel ta’ vjola, tannin, tabakk, ġilda, meta jiġi mmaturat fil-bettija jiżviluppa ħjiel ta’ vanilla, għeneb li qed jimmatura, lampun u frawli selvaġġ.
Togħma – noti ta’ vanilla meta jitqaddem, frott tal-foresta misjur, aromi erbaċej, frawli selvaġġ, ċirasa morra, ċirasa qarsa, astrinġenza moderata, noti oriġinali ta’ pruna, injam, palat qawwi, aromi ta’ frott frisk, bellusija.
Il-valuri għall-aċidità totali massima huma soġġetti għal-limiti stabbiliti fil-liġi rilevanti tal-Unjoni Ewropea.
Karatteristiċi analitiċi
|
— |
Qawwa alkoħolika totali massima (f’% tal-volum): 15 |
|
— |
Qawwa alkoħolika proprja minima (f’% tal-volum): 11 |
|
— |
Aċidità totali minima: 4,5 fi grammi għal kull litru espressi bħala aċidu tartariku |
|
— |
Aċidità volatili massima (f’milliekwivalenti għal kull litru): 20 |
|
— |
Total massimu ta’ diossidu tal-kubrit (f’milligrammi għal kull litru): 150 |
3. Inbid spumanti ta’ kwalità
L-inbejjed spumanti ta’ kwalità huma distinti mill-finezza, il-freskezza, in-naturalezza tagħhom, l-aromi ta’ fermentazzjoni bi ħjiel ta’ berquq misjur, frawli, ġamm tal-ward, amplifikati permezz ta’ bżieżaq fini u persistenti bi bżieżaq żgħar sal-għoli sħiħ tat-tazza, spumanti b’mod abbundanti.
Dehra viżiva: abjad fl-aħdar jew aħdar fl-isfar għall-inbejjed bojod, li jvarja għal roża ċar bi sfumaturi ħfief ta’ rubin fl-inbejjed rożè jew ħomor;
Riħa: friska, karatteristika tal-prodott, aromi ta’ fermentazzjoni bi ħjiel ta’ fjuri;
Togħma: togħma ta’ frott (berquq, frawli, grapefruit), karatteristiċi fini u sensorjali ħelwin bit-togħma, punġenti minħabba l-preżenza tad-diossidu tal-karbonju, b’togħma speċifika.
Bżieżaq abbundanti, arjazzjoni persistenti bi bżieżaq żgħar sal-għoli sħiħ tat-tazza.
Pressjoni eċċessiva f’temperatura ta’ 20°C: minimu ta’ 3,5 bar.
L-aċidità volatili massima hija differenzjata: għal inbejjed bojod/rożè b’valur ta’ 18-il milliekwivalent għal kull litru u għal inbejjed ħomor b’ 20 milliekwivalent għal kull litru.
Karatteristiċi analitiċi
|
— |
Qawwa alkoħolika totali massima (f’% tal-volum): 15 |
|
— |
Qawwa alkoħolika proprja minima (f’% tal-volum): 10,00 |
|
— |
Aċidità totali minima: 6,00 fi grammi għal kull litru espressi bħala aċidu tartariku |
|
— |
Total massimu ta’ diossidu tal-kubrit (f’milligrammi għal kull litru): 185 |
4. Inbejjed spumanti aromatiċi ta’ kwalità
L-inbejjed spumanti aromatiċi ta’ kwalità għandhom: kulur isfar lewn it-tiben bi sfumaturi sofor fl-aħdar jew bi sfumaturi fl-aħdar (Tămâioasă românească, Muscat Ottonel), jew roża bi sfumaturi vjolaċji (Busuioacă de Bohotin, Traminer roz), b’mousse abbundanti u bżieżaq fini u persistenti.
Aroma speċifika li tippreżerva l-aromi terpeniċi tal-għeneb li miegħu jiżdiedu komposti aromatiċi volatili mill-fermentazzjoni alkoħolika, fina u wiesgħa, b’aromi taċ-ċitru, tal-fjuri tal-larinġ, tal-ħabaq u tal-petali tal-ward, fl-aħħar nett aromi ħfief ta’ frott aħmar frisk. L-inbid spumanti huwa pjaċevoli ħafna minħabba l-bilanċ bejn il-livell tal-aċidità u l-kontenut taz-zokkor, b’persistenza tajba.
B’aroma fina ta’ Muscat, bi ħjiel ta’ ħabaq, ward u ħuxlief maħsud frisk, it-togħma hija pjaċevoli u vivaċi minħabba l-bilanċ bejn il-ħlewwa u l-aċidità. Bżieżaq abbundanti, arjazzjoni fina bi bżieżaq żgħar sal-għoli sħiħ tat-tazza.
Pressjoni eċċessiva f’temperatura ta’ 20°C: minimu ta’ 3 bar.
L-aċidità volatili massima għall-inbejjed bojod/rożè hija ta’ 18-il milliekwivalenti għal kull litru.
Karatteristiċi analitiċi
|
— |
Qawwa alkoħolika totali massima (f’% tal-volum): 15,00 |
|
— |
Qawwa alkoħolika proprja minima (f’% tal-volum): 6,00 |
|
— |
Aċidità totali minima: 6,0 fi grammi għal kull litru espressi bħala aċidu tartariku |
|
— |
Total massimu ta’ diossidu tal-kubrit (f’milligrammi għal kull litru): 185 |
5. Inbejjed semifrizzanti
Dehra viżiva: abjad fl-aħdar jew aħdar fl-isfar għall-inbejjed bojod, li jvarja għal roża ċar jew sfumaturi ħfief ta’ rubin fl-inbejjed rożè jew ħomor;
Riħa: bi freskezza, noti friski ta’ frawli, ċitriċi – grapefruit, berquq misjur, fjuri tas-sebuqa, ħabaq;
Togħma: karatteristiċi sensorji ta’ frott, fini, ibbilanċjati u sensorji b’noti ta’ ħmira mħawra, qawwija minħabba l-preżenza tad-diossidu tal-karbonju, b’togħma speċifika ta’ frott taċ-ċitru frisk u frott tal-foresta.
Arjazzjoni fina u persistenti bi bżieżaq żgħar sal-għoli sħiħ tat-tazza.
Pressjoni eċċessiva f’temperatura ta’ 20°C: minimu ta’ 1,0 bar u massimu ta’ 2,5 bar.
L-aċidità volatili massima hija differenzjata: għal inbejjed bojod/rożè b’valur ta’ 18-il milliekwivalent għal kull litru u għal inbejjed ħomor b’ 20 milliekwivalent għal kull litru.
Karatteristiċi analitiċi
|
— |
Qawwa alkoħolika totali massima (f’% tal-volum): 15,00 |
|
— |
Qawwa alkoħolika proprja minima (f’% tal-volum): 7,00 |
|
— |
Aċidità totali minima: 5,00 fi grammi għal kull litru espressi bħala aċidu tartariku |
|
— |
Total massimu ta’ diossidu tal-kubrit (f’milligrammi għal kull litru): 235 |
5. Prattiki tal-produzzjoni tal-inbid
a. Prattiki enoloġiċi speċifiċi użati biex isir l-inbid jew biex isiru l-inbejjed, u r-restrizzjonijiet rilevanti fuq il-produzzjoni tagħhom
Prattika ta’ kultivazzjoni
L-irrigazzjoni hija permessa biss matul snin ta’ nixfa, soġġetta għan-notifika tal-Uffiċċju Nazzjonali tad-Dielja u l-Inbid (ONVPV, National Office of Vine and Wine), meta l-kontenut tal-ilma fil-ħamrija f’fond ta’ 0-100 cm jonqos għal 50 % tal-intervall ta’ umdità attiva (AHI, active humidity interval), bl-applikazzjoni ta’ standards raġonevoli ta’ irrigazzjoni (400-600 m3/ha).
Qtugħ bikri – it-tnaqqis tal-għadd ta’ għenieqed ta’ għeneb f’maturazzjoni bikrija meta l-produzzjoni potenzjali taqbeż il-limiti massimi permessi skont l-Ispeċifikazzjoni tal-Prodott.
b. Rendimenti massimi għal kull ettraru
|
1. |
maħsuda meta jkunu mmaturaw għalkollox, il-varjetajiet Sauvignon, Muscat Ottonel, Pinot gris, Chardonnay, Busuioacă de Bohotin 11 500 kilogramma ta’ għeneb għal kull ettaru |
|
2. |
maħsuda meta jkunu mmaturaw għalkollox, il-varjetajiet Cabernet Sauvignon, Fetească neagră, Pinot noir 11 500 kilogramma ta’ għeneb għal kull ettaru |
|
3. |
maħsuda meta jkunu mmaturaw għalkollox, il-varjetajiet Merlot, Băbească neagră 12 000 kilogramma ta’ għeneb għal kull ettaru |
|
4. |
maħsuda meta jkunu mmaturaw għalkollox, il-varjetajiet Fetească regală, Aligote, Fetească albă, Riesling Italian 12 500 kilogramma ta’ għeneb għal kull ettaru |
|
5. |
maħsuda tard, il-varjetajiet Muscat Ottonel, Sauvignon, Pinot gris, Chardonnay, Busuioacă de Bohotin 10 000 kilogramma ta’ għeneb għal kull ettaru |
|
6. |
maħsuda tard, il-varjetajiet Cabernet Sauvignon, Pinot noir, Fetească neagră, Merlot, Fetească albă, Merlot, Riesling Italian 10 000 kilogramma ta’ għeneb għal kull ettaru |
|
7. |
maħsuda meta l-għeneb ikollu taħsir ta’ kwalità għolja, il-varjetajiet Busuioacă de Bohotin, Muscat Ottonel, Pinot gris 8 000 kilogramma ta’ għeneb għal kull ettaru |
|
8. |
maħsuda meta jkunu mmaturaw għalkollox, il-varjetajiet Muscat Ottonel, Sauvignon, Pinot gris, Chardonnay, Busuioacă de Bohotin 86 ettolitru għal kull ettaru |
|
9. |
maħsuda meta jkunu mmaturaw għalkollox, il-varjetajiet Cabernet Sauvignon, Pinot noir, Fetească neagră 86 ettolitru għal kull ettaru |
|
10. |
maħsuda meta jkunu mmaturaw għalkollox, il-varjetajiet Merlot, Băbească neagră 90 ettolitru għal kull ettaru |
|
11. |
maħsuda meta jkunu mmaturaw għalkollox, il-varjetajiet Fetească regală, Aligote, Riesling Italian, Fetească albă 94 ettolitru għal kull ettaru |
|
12. |
maħsuda tard, il-varjetajiet Muscat Ottonel, Sauvignon, Pinot gris, Chardonnay, Busuioacă de Bohotin 65 ettolitru għal kull ettaru |
|
13. |
maħsuda tard, il-varjetajiet Cabernet Sauvignon, Pinot noir, Fetească neagră, Merlot, Fetească albă, Riesling Italian 65 ettolitru għal kull ettaru |
|
14. |
maħsuda meta l-għeneb ikollu taħsir ta’ kwalità għolja, il-varjetajiet Busuioacă de Bohotin, Muscat Ottonel, Pinot gris 52 ettolitru għal kull ettaru |
|
15. |
inbejjed spumanti aromatiċi ta’ kwalità, Tămâioasă românească, Busuioacă de Bohotin 12 500 kilogramma ta’ għeneb għal kull ettaru |
|
16. |
inbejjed spumanti aromatiċi ta’ kwalità, Traminer roz 11 500 kilogramma ta’ għeneb għal kull ettaru |
|
17. |
inbejjed spumanti aromatiċi ta’ kwalità, Muscat Ottonel 11 000 kilogramma ta’ għeneb għal kull ettaru |
|
18. |
inbejjed spumanti aromatiċi ta’ kwalità, Tămâioasă românească, Busuioacă de Bohotin 92,5 ettolitru għal kull ettaru |
|
19. |
inbejjed spumanti aromatiċi ta’ kwalità, Traminer roz 86 ettolitru għal kull ettaru |
|
20. |
inbejjed spumanti aromatiċi ta’ kwalità, Muscat Ottonel 81,40 ettolitru għal kull ettaru |
6. Definizzjoni taż-żona demarkata
Iż-żona demarkata għall-produzzjoni tal-inbejjed bid-denominazzjoni ta’ oriġini kkontrollata Bohotin tinsab fiż-żoni li ġejjin tal-Kontea ta’ Iași:
|
— |
Il-Muniċipalità ta’ Răducăneni, il-villaġġi ta’ Răducăneni, Isaiia, Bohotin, Roșu; |
|
— |
Il-Muniċipalità ta’ Moșna, il-villaġġ ta’ Moșna; |
|
— |
Il-Muniċipalità ta’ Cozmești, il-villaġġi ta’ Cozmești, Podolenii de Sus, Podolenii de Jos; |
|
— |
Il-Muniċipalità ta’ Dolhești, il-villaġġi ta’ Dolhești, Pietriș u Brădiceşti; |
|
— |
Il-Muniċipalità ta’ Gorban, il-villaġġi ta’ Gorban, Gura Bohotin, Podu Hagiului; |
|
— |
Il-Muniċipalità ta’ Ciortești, il-villaġġi ta’ Ciortești, Coropceni, Deleni, Șerbești. |
7. Varjetà jew varjetajiet tad-dwieli li minnhom jinkiseb l-inbid / jinkisbu l-inbejjed
Aligoté B - Plant de trois, Plant gris, Vert blanc, Troyen blanc
Busuioacă de Bohotin Rs – Schwarzer Muscat, Muscat fioletovii, Muscat violet cyperus, Muscat rouge de Frontignan
Băbească neagră N - Grossmuttertraube, Hexentraube, Crăcana, Rară neagră, Căldărușă, Serecsia
Cabernet Sauvignon N - Petit Vidure, Burdeos tinto
Chardonnay B - Gentil blanc, Pinot blanc Chardonnay
Fetească albă B – Păsărească albă, Poama fetei, Mädchentraube, Leanyka, Leanka
Fetească neagră N – Schwarze Mädchentraube, Poama fetei neagră, Păsărească neagră, Coada rândunicii
Fetească regală B - Königliche Mädchentraube, Königsast, Kiralyleanka, Dănășană, Galbenă de Ardeal
Merlot N – Bigney rouge, Plant Medoc
Muscat Ottonel B - Muscat Ottonel blanc
Pinot Gris G - Affumé, Grauer Burgunder, Grauburgunder, Grauer Mönch, Pinot cendré, Pinot Grigio, Ruländer
Pinot noir N - Blauer Spätburgunder, Blauer Burgunder, Burgund mic, Burgunder roter, Klăvner Morillon Noir
Pinot noir N - Spätburgunder, Pinot nero
Riesling italian B - Olasz Riesling, Olaszriesling, Welschriesling
Sauvignon B - Sauvignon blanc
Traminer Rose Rs - Rosetraminer, Savagnin Rose, Gewürztraminer
Tămâioasă românească B - Busuioacă de Moldova, Muscat blanc à petit grains
Tămâioasă românească B - Rumänische Weihrauchtraube, Tamianka, Tămâioasă albă de Drăgășani
8. Deskrizzjoni tar-rabta/rabtiet
8.1. Dettalji taż-żona ġeografika
Ir-riżalt huwa magħmul minn interfluvi skulturali, kemxejn ikkurvati, kemxejn inklinati lejn il-Lbiċ. L-għoljiet huma mtawla, relattivament uniformi, b’inklinazzjoni medja ta’ 10-15 %. L-ewwel pass ta’ riżalt b’altitudnijiet sa 30 m jinsab fil-Punent tal-wied tax-xmajra ta’ Moșna; it-tieni pass ta’ riżalt b’altitudni ta’ 50-100 m huwa rappreżentat minn inklinazzjoni twila ta’ 7-8 km u 1,5-2 km wiesgħa; it-tielet pass ta’ riżalt b’altitudni li ma taqbiżx il-200 m jokkupa n-nofs tal-Lvant tal-baċir tax-xmajra ta’ Moșna.
Il-fatturi ġeoloġiċi jappartjenu għal: Bessarabian (tafal, ġebel ramli kalkaruż, ramel) li fuqu hemm depożiti ta’ loess bi ħxuna ta’ 3-4 m; Kerssonian (trab tafli ramli, ramel imħallat ma’ ġebel tar-ramel tal-konkrit), li jifforma l-parti ta’ fuq tar-riżalt f’altitudnijiet ta’ aktar minn 200 m; Meotian (ċinerit ramli oħxon 10-20 m) li jidher f’partijiet individwali tal-ogħla żoni, kwaternarju t’isfel (depożiti tax-xmajjar) fil-Lvant ta’ Cozmești fit-terrazzi tal-Prut.
In-network tal-ilma huwa rrappreżentat ftit li xejn mix-xmajra Moșnișoara fil-parti tal-Lvant tat-territorju u minn xmajriet iżgħar ħdejn xulxin li jbattlu n-naħa tal-lemin tat-territorju.
Il-klima — tat-tip kontinentali — hija eċċessiva, bi xtiewi ħorox u sjuf xotti, influwenzati mill-fluss tal-arja lejn il-wied miftuħ tal-Prut. Karatteristiċi: it-temperatura medja annwali ta’ 9,6 °C, id-durata tal-istaġun tat-tkabbir bħala medja ta’ 183 jum, il-bilanċ globali tas-sħana ta’ 3 693-4 309 °C, il-bilanċ tas-sħana attiva 3 223–3 879 °C u l-bilanċ tas-sħana utli għad-dwieli 1 330-1 739 °C.
L-aktar xahar kiesaħ tas-sena huwa Jannar (–3,6 °C) meta jiġu rreġistrati temperaturi minimi assoluti sa –26,8 °C, li jpoġġu f’riskju d-dwieli mhux protetti, u l-aktar xahar sħun tas-sena huwa Lulju (+ 21,3 °C), b’temperaturi massimi assoluti sa + 41,6 °C li spiss jikkoinċidu ma’ perjodi ta’ nixfa.
Is-solarizzazzjoni annwali totali tammonta għal 2 137 siegħa, li minnhom 1 348 siegħa huma fil-perjodu tat-tkabbir tad-dwieli. Ix-xita totali annwali tammonta għal 517,8 mm, li minnhom 320,5 mm huma fil-perjodu tat-tkabbir tad-dwieli.
L-akbar ammont ta’ xita jinżel matul is-sajf (minn Ġunju sa Lulju) u l-inqas ammont ta’ xita jinżel matul ix-xitwa (minn Jannar sa Frar).
Il-ħamrija — Il-molysols/chernozem kambiċi jippredominaw (30-35 %), segwiti minn ħamrija taflija f’żoni għoljin (altitudni ta’ 250-300 m). Fiż-żona tal-plateau, il-blat tal-ħamrija huwa rrappreżentat minn sedimenti tal-loess, u fiż-żona tat-Tramuntana Ċentrali, minn ġebel ramli kalkarju.
8.2. Dettalji tal-prodott
L-inbejjed bla gass miksuba f’din iż-żona huma ġeneralment ħfief, l-inbejjed bojod għandhom aċidità miżjuda, mhux estrattiva ħafna iżda tipika tal-varjetajiet li joriġinaw minnhom. Il-varjetajiet tad-dwieli ħomor għall-produzzjoni tal-inbejjed ta’ kwalità f’din iż-żona għandhom kapaċità għolja li jakkumulaw l-antoċjanini (inbejjed tanniċi b’akkumulazzjoni tal-kulur), b’mod ġenerali l-maturazzjoni fenolika sseħħ ġimagħtejn wara l-maturazzjoni teknoloġika.
Il-Busuioacă de Bohotin għandu karattru speċjali, li f’xi snin b’ħarifa twila u sħuna jista’ jipproduċi nbejjed rożè ħelwin b’mod naturali b’zokkor residwu. Dan l-inbid huwa żejtni, b’kulur ambra, mimli aromi li jfakkru fil-petali tal-ward, il-ħabaq u l-inċens fl-istess ħin, peress li fil-fatt din hija l-varjetà speċifika taż-żona li minnha l-inbid ħa l-isem.
Inbejjed spumanti ta’ kwalità
Finezza, freskezza, naturalità, aromi ta’ fermentazzjoni bi ħjiel ta’ berquq misjur, frawli, ġamm tal-ward, amplifikati permezz ta’ bżieżaq fini u persistenti bi bżieżaq żgħar sal-għoli sħiħ tat-tazza, spumanti b’mod abbundanti;
Kulur abjad fl-aħdar jew aħdar fl-isfar għall-inbejjed bojod, li jvarja għal roża ċar bi sfumaturi ħfief ta’ rubin fl-inbejjed rożè jew ħomor;
Aroma friska, aromi ta’ fermentazzjoni bi ħjiel ta’ fjuri;
Togħma ta’ frott (berquq, frawli, grapefruit), karatteristiċi fini u sensorjali ħelwin bit-togħma, punġenti minħabba l-preżenza tad-diossidu tal-karbonju, b’togħma speċifika.
Inbejjed spumanti aromatiċi ta’ kwalità
Kulur isfar lewn it-tiben bi sfumaturi sofor fl-aħdar u bi sfumaturi ħodor (Tămâioasă românească, Muscat Ottonel), jew roża bi sfumaturi vjolaċji (Busuioacă de Bohotin, Traminer roz), b’mousse abbundanti u bżieżaq fini u persistenti.
Aroma speċifika li tippreżerva l-aromi terpeniċi tal-għeneb li miegħu jiżdiedu komposti aromatiċi volatili mill-fermentazzjoni alkoħolika, fina u wiesgħa, b’aromi taċ-ċitru, tal-fjuri tal-larinġ, tal-ħabaq u tal-petali tal-ward, fl-aħħar nett aromi ħfief ta’ frott aħmar frisk. B’bilanċ bejn il-livell tal-aċidità u l-kontenut taz-zokkor, b’persistenza tajba. B’aroma fina ta’ Muscat, ħjiel ta’ ħabaq, ward u ħuxlief maħsud frisk, it-togħma hija vivaċi minħabba l-bilanċ bejn il-ħlewwa u l-aċidità.
Inbejjed semifrizzanti
Kulur abjad fl-aħdar jew fl-aħdar fl-isfar għall-inbejjed bojod, li jvarja għal roża ċar jew sfumaturi ħfief ta’ rubin fl-inbejjed rożè jew ħomor;
Aroma bi freskezza, noti friski ta’ frawli, ċitriċi – grapefruit, berquq misjur, fjuri tas-sebuqa, ħabaq;
Togħma ta’ frott, fina, ibbilanċjata u karatteristiċi sensorjali ta’ ħmira b’togħma, qawwija minħabba l-preżenza tad-diossidu tal-karbonju, b’togħma speċifika ta’ frott taċ-ċitru frisk u frott tal-foresta. bżieżaq abbundanti, arjazzjoni persistenti bi bżieżaq żgħar sal-għoli kollu tat-tazza.
8.3. Dettalji dwar il-fatturi umani
Sabiex jinkisbu l-inbejjed, proporzjon kbir tal-vitikulturi jaħsdu l-għeneb billejl sabiex jitnaqqas iż-żmien tal-ipproċessar teknoloġiku, filwaqt li jiġi evitat it-tkessiħ tal-massa taċ-ċereali maħsuda, segwit minn ipproċessar rapidu u ħafif tal-most biex jiġi evitat it-tnaqqis tan-nutrijenti meħtieġa għall-fermentazzjoni. F’xi każijiet, il-produtturi jużaw ukoll għal skopijiet ta’ ħżin ċerti kantini qodma jew bini modern biex jiżguraw l-aħjar klima tal-ħżin għall-inbejjed biex jippreservaw il-freskezza tagħhom għal aktar żmien, speċjalment għall-inbejjed spumanti bojod ta’ kwalità, iżda wkoll biex jgħinu fil-maturazzjoni (fil-kantini, hemm imwejjed tat-tgħarbil użati għall-kisba ta’ nbejjed spumanti ta’ kwalità).
Il-ġestjoni tal-istruttura tad-dwieli tiġi pprattikata wkoll, permezz ta’ xogħlijiet ekoloġiċi skont il-pożizzjonament tal-plott fuq l-inklinazzjoni u skont il-fruttifikazzjoni speċifika tal-varjetà. Iż-żbir tar-rimjiet qabel il-fjoritura jitwettaq ukoll sabiex tiġi promossa l-formazzjoni tal-frott f’perċentwal ħafna ogħla u biex jiżdied il-piż medju ta’ għanqud u l-produzzjoni għal kull unità taż-żona tas-superfiċje tal-varjetajiet bħal Fetească regală, Tămâioasă românească u Muscat Ottonel. Il-kontroll tal-ħaxix ħażin jitwettaq permezz tal-ħsad u l-mobilizzazzjoni tal-ħamrija bl-użu ta’ kultivaturi bil-feelers.
Il-vitikulturi jiżguraw ġestjoni ottimali tal-pjanta u kontroll tas-saħħa u l-potenzjal tal-produzzjoni riflessi fi prattiki ta’ rendiment ikkontrollati.
L-użu tal-għeneb sħiħ, it-tneħħija tal-most prodott matul it-trasport, it-trattament bir-reqqa, it-tagħsir f’ambjent nadif b’tagħmir xieraq u skont ir-regoli li jiddefinixxu proporzjon preċiż bejn il-piż tal-ħsad ipproċessat u l-volum tal-most estratt jiggarantixxu l-kwalità u ċ-ċarezza tal-most miksub, jiżguraw estrazzjoni ħafifa li tippreserva s-sottilità tal-aromi tal-frott, u joħolqu nbejjed b’intensità tajba u aromi bbilanċjati. It-tqaddim tal-inbejjed fuq in-naqal jagħtihom aromi terzjarji li jtejbu l-kumplessità tagħhom.
8.4. Interazzjoni kawżali
Peress li din iż-żona ġeneralment ma tikkoinċidix ma’ widien fondi li jinfetħu għall-mergħa ta’ Prut, li tattira ħafna kurrenti kesħin u fejn id-dwieli fil-biċċa l-kbira ma jitkabbrux fit-terz t’isfel tal-inklinazzjonijiet, l-influwenza tat-temperaturi minimi assoluti fix-xitwa hija għalhekk baxxa u din iż-żona tista’ titqies li tiffavorixxi l-kultivazzjoni tad-dwieli.
Fil-Bohotin, id-dwieli ilhom jitkabbru minn żmien il-qedem, u l-varjetà Busuioacă de Bohotin hija saħansitra meqjusa minn xi awturi li tfaċċat f’din iż-żona. L-insedjament ta’ Bohotin jieħu ismu jew mix-xmajra ta’ Bohotin li tgħaddi miż-żona jew minn wieħed mill-vitikulturi tal-inbid il-qodma msejħa Bohotinean, skont verżjonijiet differenti. Il-varjetà Busuioacă de Bohotin saret famuża minħabba l-ispeċifiċità tagħha, peress li hija l-unika varjetà Rumena għall-inbejjed aromatiċi ta’ kulur rożè sa aħmar, li għamlitha unika fil-firxa ta’ nbejjed prodotti fir-Rumanija.
Il-karattru uniku tal-varjetà Busuioacă de Bohotin bħala varjetà Rumena madwar id-dinja huwa rikonoxxut fix-xogħol ippubblikat minn Hachette: Id-Dictionnaire Encyclopédique des Cépages, li jinkludi madwar 10 000 varjetà ta’ dwieli eżistenti fid-dinja, jindika b’mod ċar li l-“Busuioaca de Bohotin huwa varjetà ta’ nbid aħmar aromatiku mir-Rumanija”.
Il-preżenza fiż-żona ta’ ħamrija skeletali b’kontenut għoli ta’ karbonat tal-kalċju hija sfruttata biex jiġu kkultivati l-varjetajiet aromatiċi tipiċi li jagħmlu l-inbejjed bla gass, li huma estrattivi, friski, b’karattru minerali u aromi kumplessi ta’ fjuri definiti sew (akaċja, ħabaq, frott tas-sebuqa, għasel).
Iż-żona fl-ogħla altitudni (300 - 340 m) għandha riżorsi eljotermali rikki u potenzjal kbir, bl-inqas ħamrija fertili u b’kontenut għoli ta’ ġebla tal-ġir skeletali, u b’esponiment lejn in-Nofsinhar favorevoli għall-varjetajiet ħomor.
L-inbejjed bojod prodotti hemmhekk għandhom togħma ta’ frott b’karattru minerali evidenti. L-esponiment lejn il-Punent tal-vinji jipproteġihom minn esponiment qawwi għax-xemx u, flimkien mat-temperaturi aktar moderati kkawżati mill-kurrenti tal-arja fil-kuritur tax-xmara Prut, jippreservaw aħjar l-aċidità tal-għeneb u n-noti botaniċi u tal-fjuri aromatiċi. Fl-istess ħin, minħabba t-tnaqqis fis-saħħa li jirriżulta mill-ħamrija inqas fertili, l-inbejjed ħomor f’din iż-żona huma intensi, robusti, rikki fit-tannini, b’potenzjal għoli ta’ tqaddim (aromi ta’ frott tal-foresti misjur, passolina, pruna, noti pikkanti).
In-nuqqas ta’ temperaturi estremament għoljin (mewġiet ta’ sħana) u l-influwenza tal-kurrenti tal-arja mill-wied ta’ Prut jikkontribwixxu għaż-żamma ta’ aċidi organiċi fl-għeneb, li jirriżultaw fi nbid b’aċidità totali għolja, pH baxx, vivaċi u rinfreskanti. Barra minn hekk, l-esperjenza tal-vitikulturi lokali, flimkien mat-tekniki attwali tal-vitikultura, iwasslu għall-produzzjoni ta’ nbejjed ta’ kwalità għolja. Ġeografikament, il-makroklima kkombinata mal-kwalitajiet tal-varjetajiet imkabbra għandha rwol ewlieni fid-distinzjoni tal-inbejjed ta’ din il-vinja minn inbejjed prodotti mill-istess varjetajiet f’vinji oħra.
Għall-inbejjed spumanti ta’ kwalità - chernozem lixxivjata u griża, b’konsistenza ġulġliena ramlija li ttejjeb il-proprjetajiet fiżiċi permezz tal-karatteristiċi bijokimiċi bażiċi tagħhom (intensità tal-attività bijoloġika, kontenut apprezzabbli ta’ ħumus, żieda fil-kapaċità tal-iskambju katjoniku, reazzjoni newtrali kemxejn aċiduża, saturazzjoni għolja fil-bażijiet u fin-nutrijenti, klima kontinentali moderata b’karatteristiċi moderatament kontinentali fuq għoljiet għoljin u radjazzjoni solari fuq medja ta’ 120 Kcal/cm2/sena, b’medja ta’ xita ta’ 524 mm) tiffavorixxi bilanċ tajjeb ħafna bejn l-aċidità, iz-zokkrijiet u l-komposti aromatiċi, ikkompletati bi bżieżaq fini.
Għall-inbejjed spumanti aromatiċi ta’ kwalità - klima kontinentali moderata bi xtiewi moderati, sjuf sħan u ħriefi twal tiffavorixxi l-akkumulazzjoni ta’ kwantitajiet kbar ta’ zokkrijiet u aromi distinti minn noti ta’ frott tipiku taż-żona (f’Busuioacă de Bohotin - frawli u grapefruit, f’Muscat Ottonel - berquq misjur u f’Tămâioasă Românească - fjuri tas-sebuqa u ħabaq).
Iċ-chernozem lixxivjata u griża u l-klima kontinentali moderata jiffavorixxu l-bilanċ bejn l-aċidità, iz-zokkrijiet u l-komposti aromatiċi, u ż-żamma ta’ dan il-bilanċ f’kundizzjonijiet ottimali tippreserva l-firxa aromatika tipika ta’ frott misjur u l-freskezza vivaċi tal-inbejjed semifrizzanti.
9. Rekwiżiti oħra applikabbli (imballaġġ, tikkettar, rekwiżiti addizzjonali)
Rekwiżiti tas-suq
Qafas legali:
fil-leġiżlazzjoni nazzjonali
Tip ta’ rekwiżit addizzjonali:
Dispożizzjonijiet addizzjonali dwar it-tikkettar
Deskrizzjoni tar-rekwiżit:
L-inbejjed bid-denominazzjoni ta’ oriġini kkontrollata Bohotin għandhom jiġu bbottiljati f’imballaġġ tal-ħġieġ li jesa’ sa 1,5 litru.
L-inbejjed bid-denominazzjoni ta’ oriġini kkontrollata Bohotin għandu jkollhom tikketta u kontrotikketta ewlenin (jew tikketta sekondarja) meta jiġu imballati u ttikkettati.
Fuq it-tikkettar tal-inbejjed, id-denominazzjoni ta’ oriġini protetta Bohotin tista’ tiġi ssupplimentata, skont l-interessi tal-produtturi, b’wieħed mill-ismijiet uniċi tal-vinji li ġejjin: RĂDUCĂNENI, DEALUL ROȘU, DEALUL MOȘNA, GORBAN, PODOLENI, COZMEȘTI, DEALUL ISAIIA.
Rekwiżiti relatati mal-produzzjoni fiż-żona
Qafas legali:
fil-leġiżlazzjoni tal-UE
Tip ta’ rekwiżit addizzjonali:
Deroga dwar il-produzzjoni fiż-żona ġeografika demarkata
Deskrizzjoni tar-rekwiżit:
Il-produzzjoni tal-inbejjed bid-denominazzjoni ta’ oriġini kkontrollata ta’ Bohotin minn għeneb maqtugħ fiż-żona demarkata tas-CDO Bohotin tista’ titwettaq ukoll f’faċilitajiet tal-produzzjoni tal-inbid li jinsabu f’subdiviżjonijiet amministrattivi li jmissu maż-żona demarkata, speċifikament il-Muniċipalità ta’ Iași (il-Kontea ta’ Iași) u l-Muniċipalità ta’ Huși (il-Kontea ta’ Vaslui).
Rekwiżiti tat-tikkettar
Qafas legali:
fil-leġiżlazzjoni nazzjonali
Tip ta’ rekwiżit addizzjonali:
Dispożizzjonijiet addizzjonali dwar it-tikkettar
Deskrizzjoni tar-rekwiżit:
It-tikketta trid tindika l-metodu li bih inkiseb l-inbid spumanti ta’ kwalità (tradizzjonali bil-fermentazzjoni fil-flixkun jew bil-fermentazzjoni f’tankijiet bil-pressjoni) u l-varjetà li minnha jiġi għall-inbejjed spumanti aromatiċi ta’ kwalità.
Link għall-ispeċifikazzjoni tal-prodott
(1) Ir-Regolament (UE) 2024/1143 tal-Parlament Ewropew u tal-Kunsill tal-11 ta’ April 2024 dwar indikazzjonijiet ġeografiċi għall-inbid, ix-xorb spirituż u l-prodotti agrikoli, kif ukoll l-ispeċjalitajiet tradizzjonali garantiti u t-termini tal-kwalità mhux obbligatorji għall-prodotti agrikoli, li jemenda r-Regolamenti (UE) Nru 1308/2013, (UE) 2019/787 u (UE) 2019/1753 u li jħassar ir-Regolament (UE) Nru 1151/2012 (ĠU L, 2024/1143, 23.4.2024, ELI: http://data.europa.eu/eli/reg/2024/1143/oj).
ELI: http://data.europa.eu/eli/C/2025/623/oj
ISSN 1977-0987 (electronic edition)