(1)

Iċ-ċertifikati kwalifikati għall-awtentikazzjoni tas-siti web huma essenzjali biex ikunu żgurati l-fiduċja u t-trasparenza fl-interazzjonijiet online. Permezz tagħhom ikun jista’ jiġi awtentikat sit web u jintrabat mal-persuna fiżika jew ġuridika li lilha jkun inħareġ iċ-ċertifikat. Il-Kummissjoni trid tistabbilixxi lista ta’ standards ta’ referenza għal dawk iċ-ċertifikati.

(2)

L-istandards ta’ referenza jenħtieġ li jippermettu l-implimentazzjoni ta’ tipi differenti ta’ ċertifikati kwalifikati għall-awtentikazzjoni tas-siti web għal diversi każijiet tal-użu, fosthom l-użu tagħhom skont id-Direttiva (UE) 2015/2366 tal-Parlament Ewropew u tal-Kunsill (2). Dawk l-istandards jenħtieġ li jkunu jirriflettu prattiki stabbiliti u jkunu rikonoxxuti b’mod wiesa’ fis-setturi rilevanti. Biex jippermettu l-innovazzjoni u jakkomodaw diversi ħtiġijiet tekniċi u operazzjonali, l-istandards ta’ referenza jenħtieġ li jippermettu wkoll il-ħruġ ta’ ċertifikati kwalifikati għall-awtentikazzjoni tas-siti web b’modi differenti, jiġifieri bħala ċertifikati awtonomi, bħala ċertifikati marbuta ma’ ċertifikati oħra, jew f’konfigurazzjonijiet oħra li jissodisfaw ir-rekwiżiti tar-Regolament (UE) Nru 910/2014. Din il-flessibbiltà fir-rigward tal-ħruġ ta’ ċertifikati kwalifikati għall-awtentikazzjoni tas-siti web tiżgura li ċ-ċertifikati jkunu jistgħu jiġu adattati biex jissodisfaw il-ħtiġijiet ta’ firxa wiesgħa ta’ każijiet tal-użu, li jżommu l-fiduċja u l-interoperabbiltà fost l-Istati Membri, filwaqt li ma jaffettwawx il-libertà tal-fornituri tal-browsers tal-web li jiżguraw is-sigurtà tal-web, l-awtentikazzjoni tad-dominji u l-kriptaġġ tat-traffiku tal-web bil-mod u bil-mezzi tat-teknoloġija li jqisu l-aktar adattati.

(3)

Biex ikun żgurat perjodu taż-żmien biżżejjed għall-awditjar tal-fornituri tas-servizzi fiduċjarji fir-rigward tal-konformità mar-rekwiżiti ta’ dan ir-Regolament, dan ir-Regolament jenħtieġ li japplika wara 12-il xahar mid-dħul fis-seħħ tiegħu.

(4)

Il-Kummissjoni tivvaluta regolarment teknoloġiji, prattiki, standards jew speċifikazzjonijiet tekniċi ġodda. F’konformità mal-Premessa 75 tar-Regolament (UE) 2024/1183 tal-Parlament Ewropew u tal-Kunsill (3), il-Kummissjoni jenħtieġ li tirrieżamina u, jekk ikun meħtieġ, taġġorna dan ir-Regolament ta’ Implimentazzjoni biex iżżommu konformi mal-iżviluppi globali, ma’ teknoloġiji, standards jew speċifikazzjonijiet tekniċi ġodda, u biex timxi mal-aqwa prattiki fis-suq intern.

(5)

Ir-Regolament (UE) 2016/679 tal-Parlament Ewropew u tal-Kunsill (4) u, meta rilevanti, id-Direttiva 2002/58/KE tal-Parlament Ewropew u tal-Kunsill (5) japplikaw għall-attivitajiet tal-ipproċessar tad-data personali skont dan ir-Regolament.

(6)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (6) u ta l-opinjoni tiegħu fil-21 ta’ Ottubru 2025 (7).

(7)

Il-miżuri previsti f’dan ir-Regolament huma f’konformità mal-opinjoni tal-kumitat stabbilit bl-Artikolu 48 tar-Regolament (UE) Nru 910/2014,