(1)

Tá deimhnithe cáilithe le haghaidh fíordheimhniú suíomhanna gréasáin fíor-riachtanach chun muinín agus trédhearcacht a áirithiú in idirghníomhaíochtaí ar líne. Fágann siad gur féidir suíomh gréasáin a fhíordheimhniú agus an suíomh gréasáin a nascadh leis an duine nádúrtha nó dlítheanach a n-eisítear an deimhniú dó. Bunóidh an Coimisiún liosta caighdeán tagartha le haghaidh deimhnithe den sórt sin.

(2)

Leis na caighdeáin tagartha, ba cheart a bheith in ann cineálacha éagsúla deimhnithe cáilithe le haghaidh fíordheimhniú suíomhanna gréasáin a chur chun feidhme le haghaidh cásanna úsáide éagsúla, lena n-áirítear a n-úsáid faoi Threoir (AE) 2015/2366 ó Pharlaimint na hEorpa agus ón gComhairle (2). Ba cheart dóibh a bheith ina léiriú ar chleachtais sheanbhunaithe agus ba cheart iad a aithint go forleathan laistigh de na hearnálacha ábhartha. Chun an nuálaíocht a chumasú agus chun freastal ar riachtanais éagsúla theicniúla agus oibríochtúla, ba cheart a cheadú leis na caighdeáin tagartha freisin deimhnithe cáilithe le haghaidh fíordheimhniú suíomhanna gréasáin a eisiúint ar bhealaí éagsúla, i.e. mar dheimhnithe neamhspleácha, mar dheimhnithe atá faoi cheangal deimhnithe eile, nó i gcumraíochtaí eile a chomhlíonann ceanglais Rialachán (AE) Uimh. 910/2014. Leis an tsolúbthacht sin maidir le deimhnithe cáilithe a eisiúint le haghaidh fíordheimhniú suíomhanna gréasáin, áirithítear gur féidir na deimhnithe a oiriúnú chun freastal ar riachtanais réimse leathan cásanna úsáide, lena gcoinnítear ar bun muinín agus idir-inoibritheacht ar fud na mBallstát, agus san am céanna gan difear a dhéanamh do shaoirse sholáthraithe brabhsálaithe gréasáin slándáil gréasáin, fíordheimhniú fearainn agus criptiú tráchta gréasáin a áirithiú ar bhealach agus tríd an modh teicneolaíochta is iomchuí dar leo.

(3)

D’fhonn a áirithiú go mbeidh dóthain ama ann chun iniúchadh a dhéanamh ar sholáthraithe cáilithe seirbhísí iontaoibhe maidir le comhlíonadh cheanglais an Rialacháin seo, ba cheart feidhm a bheith ag an Rialachán seo ó 12 mhí tar éis a theacht i bhfeidhm.

(4)

Déanann an Coimisiún measúnú tráthrialta ar theicneolaíochtaí, cleachtais, caighdeáin nó sonraíochtaí teicniúla nua. I gcomhréir le hAithris 75 de Rialachán (AE) 2024/1183 ó Pharlaimint na hEorpa agus ón gComhairle (3), ba cheart don Choimisiún an Rialachán seo a athbhreithniú agus, más gá, a thabhairt cothrom le dáta, chun é a choinneáil i gcomhréir le forbairtí domhanda, teicneolaíochtaí nua, cleachtais nua, caighdeáin nua nó sonraíochtaí teicniúla nua agus chun na dea-chleachtais ar an margadh inmheánach a leanúint.

(5)

Tá feidhm ag Rialachán (AE) 2016/679 ó Pharlaimint na hEorpa agus ón gComhairle (4) agus, i gcás inarb ábhartha, ag Treoir 2002/58/CE ó Pharlaimint na hEorpa agus ón gComhairle (5) maidir leis na gníomhaíochtaí próiseála sonraí pearsanta faoin Rialachán seo.

(6)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (6) agus thug an Maoirseoir tuairim an 21 Deireadh Fómhair 2025 (7).

(7)

Tá na bearta dá bhforáiltear sa Rialachán seo i gcomhréir le tuairim an choiste a bunaíodh le hAirteagal 48 de Rialachán (AE) Uimh. 910/2014,