L_202501566GA.000101.fmx.xml

RIALACHÁN CUR CHUN FEIDHME (AE) 2025/1566 ÓN gCOIMISIÚN

an 29 Iúil 2025

lena leagtar síos rialacha maidir le cur i bhfeidhm Rialachán (AE) Uimh. 910/2014 ó Pharlaimint na hEorpa agus ón gComhairle a mhéid a bhaineann le caighdeáin tagartha chun céannacht agus tréithe an duine a bhfuil an deimhniú cáilithe nó an ríomhdhearbhú tréithe cáilithe le heisiúint dó a fhíorú

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 910/2014 ó Pharlaimint na hEorpa agus ón gComhairle an 23 Iúil 2014 maidir le ríomh-shainaitheantas agus seirbhísí iontaoibhe le haghaidh ríomh-idirbheart sa mhargadh inmheánach agus lena n-aisghairtear Treoir 1999/93/CE (1), agus go háirithe Airteagal 24(1c) de,

De bharr an mhéid seo a leanas:

(1)

Ceanglaítear le hAirteagal 24 de Rialachán (AE) Uimh. 910/2014 go bhfíoróidh soláthraithe cáilithe seirbhísí iontaoibhe céannacht agus, más infheidhme, aon tréith sonrach a bhaineann le duine nádúrtha nó dlítheanach agus deimhnithe cáilithe nó ríomhdhearbhuithe tréithe cáilithe á n-eisiúint acu don duine sin.

(2)

Chun cóir chomhionann agus an cumas muinín a bheith acu as toradh na bpróiseas fíorúcháin a áirithiú, ba cheart do gach soláthraí cáilithe seirbhísí iontaoibhe fíoruithe a dhéanamh ar bhealach coibhéiseach agus deimhniú cáilithe nó ríomhdhearbhú tréithe cáilithe á n-eisiúint acu. I gcomhréir le cuspóirí Rialachán (AE) Uimh. 910/2014, roghnaíodh roinnt caighdeán chun na ceanglais shonracha sin a chomhlíonadh. Ba cheart na caighdeáin sin a bheith ina léiriú ar chleachtais sheanbhunaithe agus ba cheart iad a aithint go forleathan laistigh de na hearnálacha ábhartha. Ba cheart na caighdeáin sin a oiriúnú chun rialuithe breise a áireamh lena n-áirithítear slándáil agus iontaofacht na seirbhíse iontaoibhe cáilithe, agus idir-inoibritheacht trasteorann agus feidhmiú éifeachtach an mhargaidh inmheánaigh á n-éascú san am céanna.

(3)

Ba cheart idirthréimhse leordhóthanach a chur ar fáil do sholáthraithe cáilithe seirbhísí iontaoibhe ionas go mbeidh siad in ann ceanglais Rialachán (AE) Uimh. 910/2014 a chomhlíonadh. D’fhonn tréimhse ama leordhóthanach a áirithiú chun iniúchadh a dhéanamh ar sholáthraithe seirbhísí iontaoibhe maidir le ceanglais an Rialacháin seo a chomhlíonadh, ba cheart feidhm a bheith ag an Rialachán seo ó 24 mhí ón dáta a dtiocfaidh sé i bhfeidhm.

(4)

Déanann an Coimisiún measúnú tráthrialta ar theicneolaíochtaí, cleachtais, caighdeáin nó sonraíochtaí teicniúla nua. I gcomhréir le hAithris 75 de Rialachán (AE) 2024/1183 ó Pharlaimint na hEorpa agus ón gComhairle (2), ba cheart don Choimisiún an Rialachán seo a athbhreithniú agus a thabhairt cothrom le dáta, más gá, chun é a choimeád i gcomhréir le forbairtí domhanda, le teicneolaíochtaí nua, le caighdeáin nó sonraíochtaí teicniúla agus chun na dea-chleachtais ar an margadh inmheánach a leanúint.

(5)	Tá feidhm ag Rialachán (AE) 2016/679 ó Pharlaimint na hEorpa agus ón gComhairle (3) agus, i gcás inarb ábhartha, ag Treoir 2002/58/CE ó Pharlaimint na hEorpa agus ón gComhairle (4) maidir leis na gníomhaíochtaí próiseála sonraí pearsanta faoin Rialachán seo.

(6)	Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (5) agus thug an Maoirseoir tuairim an 6 Meitheamh 2025.

(7)	Tá na bearta dá bhforáiltear sa Rialachán seo i gcomhréir le tuairim an choiste a bunaíodh le hAirteagal 48 de Rialachán (AE) Uimh. 910/2014,

TAR ÉIS AN RIALACHÁN SEO A GHLACADH:

Airteagal 1

Leagtar amach na caighdeáin tagartha agus na sonraíochtaí dá dtagraítear in Airteagal 24(1c) de Rialachán (AE) Uimh. 910/2014 san Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm ag an Rialachán seo ón 19 Lúnasa 2027.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 29 Iúil 2025.

Thar ceann an Choimisiúin

An tUachtarán

Ursula VON DER LEYEN

(1) IO L 257, 28.8.2014, lch. 73, ELI: http://data.europa.eu/eli/reg/2014/910/oj.

(2) Rialachán (AE) 2024/1183 ó Pharlaimint na hEorpa agus ón gComhairle an 11 Aibreán 2024 lena leasaítear Rialachán (AE) Uimh. 910/2014 a mhéid a bhaineann leis an gCreat Eorpach um Chéannacht Dhigiteach a bhunú (IO L, 2024/1183, 30.4.2024, ELI: http://data.europa.eu/eli/reg/2024/1183/oj).

(3) Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (An Rialachán Ginearálta maidir le Cosaint Sonraí) (IO L 119, 4.5.2016, lch. 1, ELI: http://data.europa.eu/eli/reg/2016/679/oj).

(4) Treoir 2002/58/CE ó Pharlaimint na hEorpa agus ón gComhairle an 12 Iúil 2002 maidir le sonraí pearsanta a phróiseáil agus maidir le príobháideachas a chosaint san earnáil cumarsáide leictreonaí (an Treoir maidir le príobháideachas agus cumarsáid leictreonach) (IO L 201, 31.7.2002, lch. 37, ELI: http://data.europa.eu/eli/dir/2002/58/oj).

(5) Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).

IARSCRÍBHINN

Caighdeán tagartha chun céannacht agus tréithe na ndaoine a bhfuil deimhniú cáilithe nó ríomhdhearbhú tréithe cáilithe le heisiúint dóibh a fhíorú

Tá feidhm ag caighdeán ETSI TS 119461 V2.1.1 (2025-02) maidir le comhréireacht le clásal C.3 d’Iarscríbhinn C, leis na hoiriúnuithe seo a leanas:

(1)

2.1 Tagairtí normatacha

—	[1] ETSI EN 319 401 V3.1.1 (2024-06): ‘Ríomhshínithe agus Bonneagair Iontaoibhe (Ríomhshínithe agus Ríomhbhonneagair – ESI); Ceanglais Bheartais Ghinearálta le haghaidh Soláthraithe Seirbhísí Iontaoibhe’.

(2)

C.3 Cásanna úsáide chun deimhniú cáilithe nó ríomhdhearbhuithe tréithe cáilithe a eisiúint i gcomhréir le hAirteagal 24(1), (1a) agus (1b) de Rialachán (AE) Uimh. 910/2014

—

[COINNÍOLLACH] QTS-C3-01: Má dhéantar fíorú céannachta le haghaidh deimhniú cáilithe nó ríomhdhearbhú cáilithe i gcomhar le fíorú céannachta chun fianaise údarásach a eisiúint, déanfar an méid seo a leanas leis an bpróiseas fíoraithe céannachta sin:

—	beidh athbhreithniú piaraí déanta air nó beidh sé deimhnithe ag comhlacht creidiúnaithe um measúnú comhréireachta chun leibhéal dearbhaithe ard a chomhlíonadh i gcomhréir le Rialachán (AE) Uimh. 910/2014, nó

—	comhlíonfaidh sé na ceanglais a leagtar amach i gclásail C3.1 go C3.6.

(3)

C.3.4 Cás úsáide chun céannacht a phromhadh trí mhodhanna sainaitheantais eile

—

QTS-C.3.4-06A: Déanfar an comhlacht neamhspleách um measúnú comhréireachta dá dtagraítear in [COINNÍOLLACH] QTS-C.3.4-06, pointe c) a chreidiúnú de réir Airteagal 3 (18) de Rialachán (AE) Uimh. 910/2014, agus, má chomhlíontar na ceanglais uile is infheidhme, ba cheart deimhniú comhlíontachta bunaithe ar iniúchadh deimhniúcháin a bheith mar thoradh ar an measúnú. Beidh an próiseas deimhniúcháin foirmiúil sin bunaithe ar phróiseas meastóireachta slándála a thagraíonn do na leibhéil dearbhaithe a shainítear le haghaidh modhanna ríomh-shainaitheantais ar tugadh fógra ina leith nó Tiachóga Eorpacha Céannachta Digití deimhnithe faoi Rialachán (AE) Uimh. 910/2014 agus áireofar leis diantástáil chun meastóireacht a dhéanamh ar fhrithsheasmhacht in aghaidh bagairtí slándála a d’fhéadfadh a bheith ann. Úsáidfear caighdeáin theicniúla ábhartha sna meastóireachtaí sin chun stóinseacht i gcoinne ionsuithe den sórt sin a léiriú.

(4)

9.2.3.4 Cás úsáide le haghaidh oibriú uathoibrithe

—

USE-9.2.3.4-04: Bunóidh an Soláthraí Seirbhíse Promhaidh Céannachta (IPSP) spriocluachanna do ráta bréagdheimhniúcháin (FAR) agus do ráta bréagmheaitseála (FRR), bunaithe ar anailís riosca agus ar a nós imeachta maidir le faisnéis faoi bhagairtí, tríd an modheolaíocht a bunaíodh i dtuarascáil Ghníomhaireacht an Aontais Eorpaigh um Chibearshlándáil (ENISA) ‘Modheolaíocht le haghaidh measúnuithe earnála cibearshlándála’ [i.28] nó modheolaíocht choibhéiseach a leanúint, i bpróisis promhaidh céannachta atá go hiomlán uathoibrithe. Beidh na spriocluachanna sin cothrom leis na spriocluachanna a shocraítear le haghaidh cásanna úsáide hibridí, nó níos ísle ná iad, nuair is ann dóibh. Coinneoidh IPSP na spriocluachanna sin le haghaidh FAR agus FRR go comhsheasmhach, le tacaíocht ó anailís riosca agus a nós imeachta faisnéise maidir le bagairtí.

(5)

8.3.3 Doiciméad céannachta fhisiceach a bhailíochtú

—

VAL-8.3.3-21: Déanfaidh saotharlann chreidiúnaithe nó údarás inniúil náisiúnta tástáil ar éifeachtacht na mbeart chun ceanglais VAL-8.3.3-05X, VAL-8.3.3-05A, VAL-8.3.3-05C, VAL-8.3.3-07A agus VAL-8.3.3-07X a chomhlíonadh, aon uair a ainmneofar iad, faoin 19 Lúnasa 2027 ar a dhéanaí agus déanfar arís í gach dara bliain.

(6)

7.12. Foirceannadh agus pleananna foirceanta

—	OVR-7.12-02: Comhlíonfaidh an plean foirceanta na ceanglais a leagtar amach sna gníomhartha cur chun feidhme arna nglacadh de bhun Airteagal 24(5) de Rialachán (AE) Uimh. 910/2014 [i.1]