|
Iris Oifigiúil |
GA Sraith L |
|
2024/832 |
7.3.2024 |
CINNEADH (AE) 2024/832 ÓN gCOMHAIRLE
an 4 Márta 2024
maidir leis an seasamh atá le glacadh, thar ceann an Aontais Eorpaigh, sa 67ú seisiún den Choimisiún um Dhrugaí Támhshuanacha maidir le sceidealú substaintí faoin gCoinbhinsiún Aonair um Dhrugaí Támhshuanacha 1961, arna leasú ag Prótacal 1972, agus faoin gCoinbhinsiún maidir le Substaintí Síceatrópacha 1971
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 83(1), i gcomhar le hAirteagal 218(9) de,
Ag féachaint don togra ón gCoimisiún Eorpach,
De bharr an mhéid seo a leanas:
|
(1) |
Tháinig Coinbhinsiún Aonair na Náisiún Aontaithe um Dhrugaí Támhshuanacha 1961, arna leasú le Prótacal 1972 (‘an Coinbhinsiún um Dhrugaí Támhshuanacha’), i bhfeidhm an 8 Lúnasa 1975. |
|
(2) |
De bhun Airteagal 3 den Choinbhinsiún um Dhrugaí Támhshuanacha, is féidir leis an gCoimisiún um Dhrugaí Támhshuanacha a chinneadh substaintí a chur leis na Sceidil a ghabhann leis an gCoinbhinsiún sin. Ní féidir leis athruithe a dhéanamh ar na Sceidil ach amháin i gcomhréir le moltaí na hEagraíochta Domhanda Sláinte (EDS), ach is féidir leis cinneadh a dhéanamh freisin gan na hathruithe arna moladh ag EDS a dhéanamh. |
|
(3) |
Tháinig Coinbhinsiún na Náisiún Aontaithe maidir le Substaintí Síceatrópacha 1971 (‘an Coinbhinsiún maidir le Substaintí Síceatrópacha’) i bhfeidhm an 16 Lúnasa 1976. |
|
(4) |
De bhun Airteagal 2 den Choinbhinsiún um Dhrugaí Támhshuanacha, is féidir leis an gCoimisiún um Dhrugaí Támhshuanacha a chinneadh substaintí a chur leis na Sceidil a ghabhann leis an gCoinbhinsiún sin nó iad a bhaint díobh, ar bhonn mholtaí EDS. Tá cumhachtaí lánroghnacha leathana ag an gCoimisiún um Dhrugaí Támhshuanacha tosca eacnamaíocha, sóisialta, dlíthiúla, riaracháin agus eile a chur san áireamh, ach ní féidir leis gníomhú go treallach. |
|
(5) |
Bíonn iarmhairtí díreacha ag athruithe ar na Sceidil a ghabhann leis an gCoinbhinsiún um Dhrugaí Támhshuanacha agus leis an gCoinbhinsiún maidir le Substaintí Síceatrópacha ar raon feidhme chur i bhfeidhm dhlí an Aontais i réimse an rialaithe drugaí. Tá feidhm ag Cinneadh Réime 2004/757/CGB (1) ón gComhairle maidir le substaintí a liostaítear sna Sceidil a ghabhann leis na Coinbhinsiúin sin. Dá bhrí sin, déantar aon athrú ar na Sceidil a ghabhann leis na Coinbhinsiúin sin a ionchorprú go díreach i gcomhrialacha an Aontais. |
|
(6) |
Le linn an 67ú seisiún dá chuid a bheidh ar súil ón 14 go dtí an 22 Márta 2024 i Vín, tá an Coimisiún um Dhrugaí Támhshuanacha chun cinneadh a dhéanamh maidir le cúig shubstaint nua a chur leis na Sceidil a ghabhann leis an gCoinbhinsiún um Dhrugaí Támhshuanacha agus leis an gCoinbhinsiún maidir le Substaintí Síceatrópacha. |
|
(7) |
Níl an tAontas ina pháirtí sa Choinbhinsiún um Dhrugaí Támhshuanacha ná sa Choinbhinsiún um Shubstaintí Síceatrópacha. Tá stádas breathnóra nach bhfuil cearta vótála aige sa Choimisiún um Dhrugaí Támhshuanacha ach is comhaltaí den Choimisiún iad 13 cheann de na Ballstáit a bhfuil vóta acu sa 67ú seisiún (2). Is gá don Chomhairle údarú a thabhairt do na Ballstáit sin seasamh an Aontais a chur in iúl maidir le sceidealú substaintí faoi na Coinbhinsiúin siúd ós rud é gur faoi inniúlacht an Aontais a thagann cinntí den sórt sin maidir le substaintí nua a chur lena Sceidil. |
|
(8) |
Mhol an Eagraíocht Dhomhanda Sláinte substaint nua amháin a chur le Sceideal I a ghabhann leis an gCoinbhinsiún um Dhrugaí Támhshuanacha, trí shubstaint nua a chur le Sceideal II a ghabhann leis an gCoinbhinsiún maidir le Substaintí Síceatrópacha, agus substaint nua amháin a chur le Sceideal IV a ghabhann leis an gCoinbhinsiún maidir le Substaintí Síceatrópacha. |
|
(9) |
Faoi théarmaí Rialachán (CE) Uimh. 1920/2006 ó Pharlaimint na hEorpa agus ón gComhairle (3), déanann an Lárionad Faireacháin Eorpach um Dhrugaí agus um Andúil i nDrugaí (EMCDDA) faireachán ar gach substaint arna hathbhreithniú ag Coiste Saineolaithe EDS ar Spleáchas ar Dhrugaí agus a mhol EDS a sceidealú mar shubstaint shícighníomhach nua. |
|
(10) |
De réir mheasúnú an Choiste Saineolaithe ar Spleáchas ar Dhrugaí, is beinsidé-isipin de neart réasúnta ard é brómasólam (Ainm IUPAC: 8-bróma-1-meitil-6-féinil-4H-[1,2,4]trí-asólai[4,3-a][1,4]beinsidé-isipin). Rinne an Coiste Saineolaithe ar Spleáchas ar Dhrugaí athbhreithniú ar bhrómasólam ag an 45ú cruinniú a bhí aige agus chuir sé faoi fhaireachas é. Ní heol aon úsáid theiripeach a bheith ag brómasólam ná aon údarú margaíochta. Tá a dhóthain fianaise ann go bhfuil mí-úsáid á baint as an mbrómasólam nó gur dócha go mbainfear mí-úsáid as agus gur féidir é a bheith ina fhadhb sláinte poiblí agus ina fhadhb shóisialta a fhágann gur gá í a chur faoi rialú idirnáisiúnta. Dá bhrí sin, molann an EDS go gcuirfí an brómasólam i Sceideal IV a ghabhann leis an gCoinbhinsiún maidir le Substaintí Síceatrópacha. |
|
(11) |
Braitheadh an brómasólam i 19 mBallstát agus rialaítear é i gceithre Bhallstát ar a laghad. Tá brómasólam faoi réir fhaireachán EMCDDA. Thuairiscigh Ballstát cás amháin de nimhiú géar inar deimhníodh nochtadh do bhrómasólam. Tá cás breise de nimhiú géar a bhfuil amhras ann ina leith maidir le nochtadh do bhrómasólam tuairiscithe ag Ballstát amháin. Tá 15 bhás san iomlán inar deimhníodh nochtadh do bhrómasólam tuairiscithe ag cúig Bhallstát. |
|
(12) |
Dá bhrí sin, ba cheart é a bheith mar sheasamh ag an Aontas brómasólam a chur le Sceideal IV a ghabhann leis an gCoinbhinsiún maidir le Substaintí Síceatrópacha. |
|
(13) |
De réir mheasúnú an Choiste Saineolaithe ar Spleáchas ar Dhrugaí, is ópóideach sintéiseach díorthaithe ón mbeinsimíodasól (níotaiséin) í bútainíotaiséin (ainm IUPAC: 2[4-eatocsaifeinil)meitil]-N,N-dé-eitil-5-nítrea-1H-beinsimíodasól-1-eatánaimín) agus struchtúr ceimiceach agus gníomhaíocht chógaseolaíochta aici atá cosúil le drugaí a thagann faoi Sceideal I a ghabhann leis an gCoinbhinsiún um Dhrugaí Támhshuanacha. Ní dhearna an Coiste Saineolaithe ar Spleáchas ar Dhrugaí athbhreithniú ar bhútainíotaiséin roimhe seo. Ní heol aon úsáid theiripeach a bheith ag bútainíotaiséin ná aon údarú margaíochta. Tá a dhóthain fianaise ann go bhfuil mí-úsáid á baint as an mbútainíotaiséin nó gur dócha go mbainfear mí-úsáid aisti agus gur féidir í a bheith ina fadhb sláinte poiblí agus ina fadhb shóisialta a fhágann gur gá í a chur faoi rialú idirnáisiúnta. Dá bhrí sin, molann EDS go gcuirfí bútainíotaiséin i Sceideal I a ghabhann leis an gCoinbhinsiún um Dhrugaí Támhshuanacha. |
|
(14) |
Braitheadh bútainíotaiséin i seacht mBallstát agus rialaítear í i dtrí Bhallstát ar a laghad. Tá dianfhaireachán á dhéanamh ag EMCDDA ar bhútainíotaiséin. Tá bás amháin lenar bhain teagmháil dheimhnithe le bútainíotaiséin tuairiscithe ag Ballstát amháin. |
|
(15) |
Dá bhrí sin, ba cheart é a bheith mar sheasamh ag an Aontas bútainíotaiséin a chur le Sceideal I a ghabhann leis an gCoinbhinsiún um Dhrugaí Támhshuanacha. |
|
(16) |
De réir mheasúnú an Choiste Saineolaithe ar Spleáchas ar Dhrugaí, is spreagadh sintéiseach den fhine chaitíonóin é 3-clóraimeatcáitíonón (3-CMC; ainm IUPAC: 1-(3-clóraifeinil)-2-(meitiolaimín)própán-1-a haon). Is analóg é 3-CMC leis an druga meitcáitíonón a rialaítear faoi Sceideal I a ghabhann leis an gCoinbhinsiún maidir le Substaintí Síceatrópacha. Níl 3-CMC faoi rialú idirnáisiúnta faoi láthair, ach cuireadh a isiméir 4-CMC faoi rialú idirnáisiúnta in 2020. Ní dhearna Coiste Saineolaithe ar Spleáchas ar Dhrugaí athbhreithniú ar 3-CMC roimhe seo. Ní heol aon úsáid theiripeach a bheith ag 3-CMC ná aon údarú margaíochta. Tá a dhóthain fianaise ann go bhfuil mí-úsáid á baint as 3-CMC nó gur dócha go mbainfear mí-úsáid as agus gur féidir é a bheith ina fhadhb sláinte poiblí agus ina fhadhb shóisialta a fhágann gur gá í a chur faoi rialú idirnáisiúnta. Dá bhrí sin, molann EDS go gcuirfí 3-CMC i Sceideal II a ghabhann leis an gCoinbhinsiún maidir le Substaintí Síceatrópacha. |
|
(17) |
Rinne coiste eolaíoch EMCDDA measúnú ar na rioscaí a bhaineann le 3-CMC agus cuireadh é san áireamh cheana féin sa sainmhíniú ar ‘druga’ faoi Chinneadh Réime 2004/757/CGB le Treoir Tarmligthe (AE) 2022/1326 ón gCoimisiún (4). Tá faireachán á dhéanamh ag EMCDDA air. Faoin am a rinneadh an measúnú riosca, i mí na Samhna 2021, braitheadh 3-CMC i 23 Bhallstát. Bhí 10 mbás san iomlán lenar bhain teagmháil dheimhnithe le 3-CMC tuairiscithe ag cúig Bhallstát agus bhí nimhiú géar amháin inar deimhníodh nochtadh do 3-CMC tuairiscithe ag Ballstát amháin. |
|
(18) |
Dá bhrí sin, ba cheart é a bheith mar sheasamh ag an Aontas 3-CMC a chur le Sceideal II a ghabhann leis an gCoinbhinsiún maidir le Substaintí Síceatrópacha. |
|
(19) |
De réir mheasúnú an Choiste Saineolaithe ar Spleáchas ar Dhrugaí, is spreagadh sintéiseach den fhine chaitíonóin é dépheintiolón (ainm IUPAC: 1-(1,3-beinseadé-ocsal-5-yl)-2-(démheitil-amínó)peantán-1-a haon). Tá struchtúr ceimiceach agus cógaseolaíochta aige atá cosúil leis an struchtúr atá ag cáitíonóin shintéiseacha eile atá in Sceideal II a ghabhann leis an gCoinbhinsiún maidir le Substaintí Síceatrópacha. Ní dhearna an Coiste Saineolaithe ar Spleáchas ar Dhrugaí athbhreithniú ar dhépheintiolón roimhe seo. Ní heol aon úsáid theiripeach a bheith ag dépheintiolón ná aon údarú margaíochta. Tá a dhóthain fianaise ann go bhfuil mí-úsáid á baint as dépheintiolón nó gur dócha go mbainfear mí-úsáid as agus gur féidir é a bheith ina fhadhb sláinte poiblí agus ina fhadhb shóisialta a fhágann gur gá í a chur faoi rialú idirnáisiúnta. Níor tuairiscíodh aon úsáid leighis fhormheasta. Dá bhrí sin, molann EDS go gcuirfí dépheintiolón i Sceideal II a ghabhann leis an gCoinbhinsiún maidir le Substaintí Síceatrópacha. |
|
(20) |
Braitheadh dépheintiolón i 16 Bhallstát agus rialaítear é i gceithre Bhallstát ar a laghad. Tá faireachán á dhéanamh ag EMCDDA ar dhépheintiolón. |
|
(21) |
Dá bhrí sin, ba cheart é a bheith mar sheasamh ag an Aontas dépheintiolón a chur le Sceideal II a ghabhann leis an gCoinbhinsiún maidir le Substaintí Síceatrópacha. |
|
(22) |
De réir mheasúnú an Choiste Saineolaithe ar Spleáchas ar Dhrugaí, is airilcioglaiheicsiolaimín é 2-fluaraideasclóraicéataimín (2-FDCK; Ainm IUPAC: 2-(2-fluara-feinil)-2-meitiolaimín-cioglaheacsanón) atá gaolmhar go ceimiceach leis an ainéistéiseach dícheangail céataimín. Ní dhearna an Coiste Saineolaithe ar Spleáchas ar Dhrugaí athbhreithniú ar 2-FDCK roimhe seo. Ní heol aon úsáid theiripeach a bheith ag 2-FDCK ná aon údarú margaíochta. Tá a dhóthain fianaise ann go bhfuil mí-úsáid á baint as 2-FDCK nó gur dócha go mbainfear mí-úsáid as agus gur féidir é a bheith ina fhadhb sláinte poiblí agus ina fhadhb shóisialta a fhágann gur gá í a chur faoi rialú idirnáisiúnta. Dá bhrí sin, molann EDS go gcuirfí 2-FDCK i Sceideal II a ghabhann leis an gCoinbhinsiún maidir le Substaintí Síceatrópacha. |
|
(23) |
Braitheadh 2-FDCK i 22 Bhallstát agus rialaítear é i gcúig Bhallstát ar a laghad. Tá dianfhaireachán á dhéanamh ag EMCDDA ar 2-FDCK. Tá dhá Bhallstát tar éis dhá bhás a thuairisciú inar deimhníodh nochtadh do 2-FDCK. Tá 11 cás san iomlán de nimhiú géar inar deimhníodh nochtadh do 2-FDCK tuairiscithe ag trí Bhallstát. Tá nimhiú géar amháin eile a bhfuil amhras ann ina leith maidir le nochtadh do 2-FDCK tuairiscithe ag Ballstát amháin. |
|
(24) |
Dá bhrí sin, ba cheart é a bheith mar sheasamh ag an Aontas 2-FDCK a chur le Sceideal II a ghabhann leis an gCoinbhinsiún maidir le Substaintí Síceatrópacha. |
|
(25) |
Is iomchuí an seasamh atá le glacadh thar ceann an Aontais sa Choimisiún um Dhrugaí Támhshuanacha a shuí, mar beidh, ag na cinntí maidir le sceidealú a mhéid a bhaineann leis na cúig shubstaint, tionchar díreach ar inneachar dhlí an Aontais, eadhon Cinneadh Réime 2004/757/CGB. |
|
(26) |
Tá seasamh an Aontais le cur in iúl ag na Ballstáit atá ina gcomhaltaí den Choimisiún um Dhrugaí Támhshuanacha, ag gníomhú dóibh go comhpháirteach chun leasa an Aontais. |
|
(27) |
Tá an Danmhairg faoi cheangal ag Cinneadh Réime 2004/757/CGB agus, dá bhrí sin, tá sí rannpháirteach i nglacadh agus i gcur i bhfeidhm an Chinnidh seo. |
|
(28) |
Tá Éire faoi cheangal ag Cinneadh Réime 2004/757/CGB agus, dá bhrí sin, tá sí rannpháirteach i nglacadh agus i gcur i bhfeidhm an Chinnidh seo, |
TAR ÉIS AN CINNEADH SEO A GHLACADH:
Airteagal 1
An seasamh atá le glacadh ag na Ballstáit thar ceann an Aontais sa 67ú seisiún den Choimisiún um Dhrugaí Támhshuanacha a bheidh ar siúl ón 14 go dtí an 22 Márta 2024 a mhéid a bhaineann le cinntí a ghlacadh maidir le substaintí a chur leis na Sceidil a ghabhann le Coinbhinsiún Aonair na Náisiún Aontaithe um Dhrugaí Támhshuanacha 1961, arna leasú le Prótacal 1972, agus le Coinbhinsiún na Náisiún Aontaithe maidir le Substaintí Síceatrópacha 1971, is mar a leagtar amach san Iarscríbhinn a ghabhann leis an gCinneadh seo a bheidh sé.
Airteagal 2
Na Ballstáit atá ina gcomhaltaí den Choimisiún um Dhrugaí Támhshuanach, cuirfidh siad in iúl an seasamh dá dtagraítear in Airteagal 1, ag gníomhú dóibh go comhpháirteach chun leas an Aontais.
Airteagal 3
Tiocfaidh an Cinneadh seo i bhfeidhm ar dháta a ghlactha.
Arna dhéanamh sa Bhruiséil, an 4 Márta 2024.
Thar ceann na Comhairle
An tUachtarán
A. VERLINDEN
(1) Cinneadh Réime 2004/757/CGB ón gComhairle an 25 Deireadh Fómhair 2004 lena leagtar síos forálacha íosta maidir leis na heilimintí a chomhdhéanann gníomhartha coiriúla agus maidir le pionóis i réimse na gáinneála aindleathaí ar dhrugaí (IO L 335, 11.11.2004, lch. 8).
(2) an Bheilg, an Spáinn, an Fhrainc, an Iodáil, an Liotuáin, an Ungáir, Málta, an Ísiltír, an Pholainn, an Phortaingéil, an tSlóivéin, agus an Fhionlainn.
(3) Rialachán (CE) Uimh. 1920/2006 ó Pharlaimint na hEorpa agus ón gComhairle an 12 Nollaig 2006 maidir leis an Lárionad Faireacháin Eorpach um Dhrugaí agus um Andúil i nDrugaí (IO L 376, 27.12.2006, lch. 1).
(4) Treoir Tarmligthe (AE) 2022/1326 ón gCoimisiún an 18 Márta 2022 lena leasaítear an Iarscríbhinn a ghabhann le Cinneadh Réime 2004/757/CGB ón gComhairle maidir le substaintí sícighníomhacha nua a áireamh sa sainmhíniú ar ‘dhruga’ (IO L 200, 29.7.2022, lch. 148).
IARSCRÍBHINN
An seasamh atá le glacadh ag na Ballstáit atá ina gcomhaltaí den Choimisiún um Dhrugaí Támhshuanacha, ag gníomhú dóibh go comhpháirteach chun leas an Aontais le linn an 67ú seisiún den Choimisiún um Dhrugaí Támhshuanacha maidir le sceidealú substaintí a bheith ar siúl ón 14 go dtí an 22 Márta 2024:
|
(1) |
Tá brómasólam le cur le Sceideal IV a ghabhann leis an gCoinbhinsiún maidir le Substaintí Síceatrópacha. |
|
(2) |
Tá bútainíotaiséin le cur le Sceideal I a ghabhann leis an gCoinbhinsiún um Dhrugaí Támhshuanacha. |
|
(3) |
Tá 3-Clóraimeatcáitíonón (3-CMC) le cur le Sceideal II a ghabhann leis an gCoinbhinsiún maidir le Substaintí Síceatrópacha. |
|
(4) |
Tá dépheintiolón le cur le Sceideal II a ghabhann leis an gCoinbhinsiún maidir le Substaintí Síceatrópacha. |
|
(5) |
Tá 2-fluaraideasclóraicéataimín (2-FDCK) le cur le Sceideal II a ghabhann leis an gCoinbhinsiún maidir le Substaintí Síceatrópacha. |
ELI: http://data.europa.eu/eli/dec/2024/832/oj
ISSN 1977-0839 (electronic edition)