European flag

Iris Oifigiúil
an Aontais Eorpaigh

GA

Sraith L


2026/789

16.7.2026

RIALACHÁN TARMLIGTHE (AE) 2026/789 ÓN gCOIMISIÚN

an 8 Aibreán 2026

lena bhforlíontar Rialachán (AE) Uimh. 596/2014 ó Pharlaimint na hEorpa agus ón gComhairle a mhéid a bhaineann le nochtadh faisnéise ón taobh istigh i bpróisis fhadtréimhseacha agus moilliú nochta

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 596/2014 ó Pharlaimint na hEorpa agus ón gComhairle an 16 Aibreán 2014 maidir le drochúsáid mhargaidh (an rialachán maidir le drochúsáid mhargaidh) agus lena n-aisghairtear Treoir 2003/6/CE ó Pharlaimint na hEorpa agus ón gComhairle agus Treoracha 2003/124/CE, 2003/125/CE agus 2004/72/CE (1) ón gCoimisiún, agus go háirithe Airteagal 17(12) di,

De bharr an mhéid seo a leanas:

(1)

Le liosta neamh-uileghabhálach na n-imeachtaí críochnaitheacha nó na n-imthosca críochnaitheacha i bpróisis fhadtréimhseacha dá dtagraítear in Airteagal 17(12), pointe (a), de Rialachán (AE) Uimh. 596/2014, ba cheart sainaithint an trátha a cheanglaítear nochtadh faisnéise ón taobh istigh a éascú de bhun Airteagal 17(1) den Rialachán sin. Fágann sé sin gur cheart an liosta sin a bheith chomh cuimsitheach agus is féidir, trí na próisis fhadtréimhseacha is coitianta d’eisitheoirí a áireamh. Is éard a bhíonn i gceist le próiseas fadtréimhseach sraith gníomhaíochtaí, céimeanna, nó cinntí a scaiptear thar thréimhse ama ach ar gá d’eisitheoir iad a dhéanamh nó a ghlacadh, go páirteach ar a laghad, chun cuspóir nó toradh beartaithe a bhaint amach.

(2)

Chun freastal ar shainiúlachtaí na mBallstát, lena n-áirítear sainiúlachtaí maidir le dlí na gcuideachtaí, an dlí dócmhainneachta agus rialacha lena rialaítear imeachtaí breithiúnacha nó riaracháin, ba cheart liosta neamh-uileghabhálach na n-imeachtaí críochnaitheacha nó na n-imthosca críochnaitheach i bpróisis fhadtréimhseacha a tharraingt suas ar bhealach cineálach. Ba cheart do rannpháirtithe sa mhargadh agus d’údaráis inniúla an liosta sin a úsáid i bhfianaise dhlí ábhartha uile an Aontais agus an dlí náisiúnta ábhartha uile.

(3)

Ba cheart feidhm a bheith ag liosta neamh-uileghabhálach na n-imeachtaí críochnaitheacha nó na n-imthosca críochnaitheacha i bpróisis fhadtréimhseacha gan dochar don mheasúnú ar cé acu a eascraíonn nó nach n-eascraíonn faisnéis ón taobh istigh as próiseas fadtréimhseach i gcúinsí cáis shonraigh. Dá bhrí sin, más rud é, i gcás sonrach, maidir leis an bhfaisnéis a bhaineann le himeacht críochnaitheach nó le himthosca críochnaitheacha i bpróiseas fadtréimhseach a áirítear sa liosta neamh-uileghabhálach, nach gcáilíonn an fhaisnéis sin mar fhaisnéis ón taobh istigh de bhun Airteagal 7 de Rialachán (AE) Uimh. 596/2014, níor cheart d’eisitheoir a bheith faoi oibleagáid an fhaisnéis sin a nochtadh faoi Airteagal 17(1) den Rialachán sin.

(4)

Féadfar a cheangal leis an dlí náisiúnta, nó le fodhlíthe, nó le reacht eisitheora, go bhformheasfaidh an bord maoirseachta cinneadh. Chun míniú a thabhairt ar eisitheoirí a bhfuil struchtúr boird dhá shraith acu, ba cheart don bhord maoirseachta sin ról chomhlacht rialaithe an eisitheora a chomhlíonadh chun an tráth ábhartha nochta a chomhlíonadh a leagtar amach sa liosta neamh-uileghabhálach d’imeachtaí críochnaitheacha nó d’imthosca críochnaitheacha i bpróisis fhadtréimhseacha. Chun nochtadh tráthúil a áirithiú i gcás ina bhfuil bord maoirseachta eisitheora chun cinneadh an bhoird bainistíochta a fhormhuiniú, ba cheart foráil a dhéanamh i bpróiseas cinnteoireachta inmheánach an eisitheora sin go ndéanfar cinneadh an bhoird maoirseachta a luaithe is féidir tar éis chinneadh an bhoird bainistíochta.

(5)

Chun míniú a thabhairt ar chásanna, i bpróiseas fadtréimhseach, go dtarmligeann bord stiúrthóirí eisitheora aon cheann dá chumhachtaí nó dá fheidhmeanna chuig coiste nó chuig stiúrthóir feidhmiúcháin, lena n-áirítear Príomhoifigeach Feidhmiúcháin, nó i gcás ina bhfuil coiste nó stiúrthóir feidhmiúcháin i dteideal gníomhú thar ceann eisitheora, ba cheart don choiste sin nó don stiúrthóir feidhmiúcháin sin ról comhlachta rialaithe eisitheora a chomhlíonadh chun an tráth ábhartha nochta a chomhlíonadh a leagtar amach sa liosta neamh-uileghabhálach d’imeachtaí críochnaitheacha nó d’imthosca críochnaitheacha i bpróisis fhadtréimhseacha.

(6)

Chun difríochtaí i ndlíthe cuideachtaí náisiúnta ar fud an Aontais a mhíniú, i gcásanna ina gceanglaítear le dlí náisiúnta na gcuideachtaí go bhformheasfaidh na scairshealbhóirí cinneadh a dhéanfaidh comhlacht rialaithe an eisitheora dá dtagraítear i liosta neamh-uileghabhálach na n-imeachtaí críochnaitheacha nó na n-imthosca críochnaitheacha i bpróisis fhadtréimhseacha agus i gcás ina dtagraíonn an liosta sin do chinneadh a dhéanfaidh comhlacht rialaithe an eisitheora mar thráth ábhartha an nochta, ba cheart gurb é cinneadh an chomhlachta rialaithe sin, togra a chur faoi bhráid na scairshealbhóirí lena fhormheas, tráth ábhartha an nochta.

(7)

Chun an tsoiléireacht dhlíthiúil a fheabhsú d’eisitheoirí ar institiúidí creidmheasa iad, ba cheart a áireamh ar liosta neamh-uileghabhálach na n-imeachtaí críochnaitheacha nó na n-imthosca críochnaitheacha i bpróisis fhadtréimhseacha, próisis fhadtréimhseacha a bhaineann go sonrach le téarnamh agus réiteach institiúidí creidmheasa. Mar sin féin, ní bhaineann bearta áirithe téarnaimh agus luath-idirghabhála a leagtar amach i dTreoir 2014/59/AE ó Pharlaimint na hEorpa agus ón gComhairle (2) go sonrach le téarnamh agus réiteach institiúidí creidmheasa ach comhfhreagraíonn siad do phróisis fhadtréimhseacha is coiteann do na heisitheoirí uile. Fágann sé sin, i gcás na bpróiseas fadtréimhseach comhchoiteann sin, chun a shainaithint cathain ba cheart faisnéis ón taobh istigh a nochtadh, ba cheart d’institiúidí creidmheasa an chuid den liosta neamh-uileghabhálach a cheadú lena gcumhdaítear próisis fhadtréimhseacha a bhaineann le straitéis ghnó eisitheora. Ar an gcúis chéanna, ba cheart a áireamh freisin ar liosta neamh-uileghabhálach na n-imeachtaí críochnaitheacha nó na n-imthosca críochnaitheacha i bpróisis fhadtréimhseacha, próisis fhadtréimhseacha a bhaineann leis an ullmhúchán do ghníomhaíocht réitigh maidir le gnóthais árachais agus athárachais.

(8)

I bhfianaise chineál neamh-uileghabhálach liosta na n-imeachtaí críochnaitheacha nó na n-imthosca críochnaitheacha i bpróisis fhadtréimhseacha, ba cheart sainaithint imeachtaí críochnaitheacha nó sainaithint imthosca críochnaitheacha i ndáil le próisis fhadtréimhseacha nach n-áirítear sa liosta sin a bheith faoi réir measúnú cás ar chás i gcónaí. Ciallaíonn sé sin gur cheart freagracht a bheith ar eisitheoirí i gcónaí as an imeacht críochnaitheach nó na himthosca críochnaitheacha agus tráth ábhartha an nochta a shainaithint. I gcásanna den sórt sin, ba cheart d’eisitheoirí a bheith in ann brath ar an liosta neamh-uileghabhálach, ar choinníoll go bhfuil cosúlachtaí idir imeachtaí críochnaitheacha nó imthosca críochnaitheacha i bpróisis fhadtréimhseacha nach bhfuil san áireamh ar an liosta agus iad siúd atá san áireamh ar an liosta. Chun comhlíonadh Airteagal 17(1) de Rialachán (AE) Uimh. 596/2014 a léiriú, ba cheart d’eisitheoir, arna iarraidh sin don údarás inniúil, a bheith in ann bunús a thabhairt le sainaithint na gcúiseanna leis an imeacht críochnaitheach nó leis na himthosca críochnaitheacha agus le tráth ábhartha an nochta.

(9)

Leis an liosta neamh-uileghabhálach de chásanna dá dtagraítear in Airteagal 17(12), pointe (b), de Rialachán (AE) Uimh. 596/2014, ba cheart deimhneacht dhlíthiúil a sholáthar d’eisitheoirí agus do rannpháirtithe sa mhargadh lamháltas astaíochtaí agus measúnú á dhéanamh maidir le cé acu atá nó nach bhfuil codarsnacht idir an fhaisnéis ón taobh istigh a bhfuil sé beartaithe acu moill a chur ar a nochtadh agus an fógra poiblí is déanaí uathu nó cineál eile teachtaireachta uathu ar an ábhar céanna. Go heisceachtúil, i gcásanna nach féidir teacht ar chonclúid shoiléir maidir le cé acu atá nó nach bhfuil codarsnacht ann ar bhonn an fhógra phoiblí is déanaí nó ar bhonn cineál eile teachtaireachta agus ar an mbonn sin amháin, ba cheart d’eisitheoir nó do rannpháirtí sa mhargadh lamháltas astaíochtaí fógraí nó teachtaireachtaí a bhí ann roimhe sin a mheas freisin.

(10)

Chun an tsoiléireacht dhlíthiúil a fheabhsú d’eisitheoirí agus do rannpháirtithe sa mhargadh lamháltas astaíochtaí agus measúnú á dhéanamh acu maidir le cé acu atá nó nach bhfuil an fhaisnéis ón taobh istigh i gcodarsnacht le fógraí poiblí roimhe sin nó le cineál eile teachtaireachta, is gá liosta a sholáthar de na cineálacha cumarsáide ba cheart d’eisitheoirí agus do rannpháirtithe sa mhargadh lamháltas astaíochtaí a chur san áireamh ina measúnú,

TAR ÉIS AN RIALACHÁN SEO A GHLACADH:

Airteagal 1

Faisnéis ón taobh istigh i bpróisis fhadtréimhseacha a nochtadh

Leagtar síos in Iarscríbhinn I an liosta neamh-uileghabhálach d’imeachtaí críochnaitheacha nó d’imthosca críochnaitheacha i bpróisis fhadtréimhseacha dá dtagraítear in Airteagal 17(12), pointe (a), de Rialachán (AE) Uimh. 596/2014.

Airteagal 2

Nochtadh moillithe faisnéis ón taobh istigh

1.   Leagtar síos in Iarscríbhinn II an liosta neamh-uileghabhálach de chásanna ina bhfuil an fhaisnéis ón taobh istigh i gcodarsnacht leis an bhfógra poiblí is déanaí nó le cineál eile cumarsáide dá dtagraítear in Airteagal 17(12), pointe (b), de Rialachán (AE) Uimh. 596/2014.

2.   Chun críocha mhír 1, leagtar síos in Iarscríbhinn III na cineálacha eile cumarsáide ó eisitheoir nó ó rannpháirtí sa mhargadh lamháltas astaíochtaí maidir leis an ábhar céanna dá dtagraíonn an fhaisnéis ón taobh istigh.

Airteagal 3

Teacht i bhfeidhm agus cur i bhfeidhm

Tiocfaidh an Rialachán seo i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 8 Aibreán 2026.

Thar ceann an Choimisiúin

An tUachtarán

Ursula VON DER LEYEN


(1)   IO L 173, 12.6.2014, lch. 1, ELI: http://data.europa.eu/eli/reg/2014/596/oj.

(2)  Treoir 2014/59/AE ó Pharlaimint na hEorpa agus ón gComhairle an 15 Bealtaine 2014 lena mbunaítear creat do théarnamh agus réiteach institiúidí creidmheasa agus gnólachtaí infheistíochta agus lena leasaítear Treoir 82/891/CEE ón gComhairle, agus Treoracha 2001/24/CE, 2002/47/CE, 2004/25/CE, 2005/56/CE, 2007/36/CE, 2011/35/AE, 2012/30/AE agus 2013/36/AE, agus Rialacháin (AE) Uimh. 1093/2010 agus (AE) Uimh. 648/2012, ó Pharlaimint na hEorpa agus ón gComhairle (IO L 173, 12.6.2014, lch. 190, ELI: http://data.europa.eu/eli/dir/2014/59/io).


IARSCRÍBHINN I

Liosta neamh-uileghabhálach d’imeachtaí críochnaitheacha nó d’imthosca críochnaitheacha i bpróisis fhadtréimhseacha dá dtagraítear in Airteagal 17(12), pointe (a), de Rialachán (AE) Uimh. 596/2014

Uimh.

Próiseas Fadtréimhseach

Imeachtaí críochnaitheacha nó imthosca críochnaitheacha

Tráth nochta

A

Straitéis ghnó

1

Comhaontuithe (lena n-áirítear fáil nó diúscairt sócmhainní ábhartha nó fochuideachtaí)

Síniú an chomhaontaithe nó gníomh coibhéiseach eile le héifeacht cheangailteach

A luaithe is féidir tar éis an comhaontú a shíniú, nó tar éis aon ghníomh coibhéiseach eile a bhfuil éifeacht cheangailteach leis a shíniú.

2

Cumaisc

Na dréacht-téarmaí cumaisc a fhoilsiú

A luaithe is féidir tar éis do chomhlacht rialaithe an eisitheora na dréacht-téarmaí cumaisc a fhormheas mar a shonraítear in Airteagal 91(2) de Threoir (AE) 2017/1132 ó Pharlaimint na hEorpa agus ón gComhairle (1).

3

Mór-atheagruithe corparáideacha

Cinneadh maidir le hatheagrú corparáideach

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh dul ar aghaidh le hatheagrú corparáideach.

4

Foirceannadh deonach comhaontaithe ábhartha ag an eisitheoir

Cinneadh comhaontú ábhartha a fhoirceannadh

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh comhaontú ábhartha a fhoirceannadh.

B

Struchtúr caipitiúil, díbhinní agus íocaíochtaí úis

5

Méadú caipitil

Cinneadh an caipiteal a mhéadú

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh an caipiteal a mhéadú.

6

Ionstraimí nua a eisiúint

Cinneadh ionstraimí nua a eisiúint

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh ionstraimí nua a eisiúint.

7

Aischeannach scaireanna

Cinneadh aischeannach scaireanna a dhéanamh

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh aischeannach scaireanna a dhéanamh.

8

Ionstraimí a chomhshó

Cinneadh ionstraimí a chomhshó

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh ionstraimí a chomhshó.

9

Díbhinní

Cinneadh dáileadh díbhinní nó athrú ar an mbeartas díbhinní ar na scairshealbhóirí a mholadh

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh dáileadh díbhinní nó athrú ar an mbeartas díbhinní a chur faoi bhráid na scairshealbhóirí lena fhormheas.

10

Íocaíochtaí úis nó íocaíochtaí fuascailte a chur siar nó a chealú

Cinneadh íocaíochtaí úis nó fuascailte a chur siar nó a chealú

A luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh na híocaíochtaí úis nó fuascailte a chur siar nó a chealú.

C

Faisnéis airgeadais

11

Tuarascálacha airgeadais nó tuarascálacha airgeadais eatramhacha

Torthaí airgeadais a admháil nó a fhormheas

A luaithe is féidir tar éis do chomhlacht rialaithe an eisitheora na torthaí airgeadais a admháil nó a fhormheas.

12

Réamhaisnéisí

Na réamhaisnéisí a admháil nó a fhormheas

A luaithe is féidir tar éis do chomhlacht rialaithe an eisitheora na réamhaisnéisí a admháil nó a fhormheas.

D

Rialachas corparáideach

13

Comhaltaí de chomhlacht rialaithe eisitheora nó bainisteoirí a bhfuil ról lárnach acu a cheapadh nó a chur as oifig

Cinneadh maidir leis an gceapadh nó an cur as oifig

A luaithe is féidir tar éis do chomhlacht rialaithe an eisitheora an cinneadh a dhéanamh comhalta de chomhlacht rialaithe an eisitheora nó bainisteoir a bhfuil ról lárnach aige a cheapadh nó a chur as oifig.

14

Leasuithe suntasacha ar na hairteagail chorpraithe nó ar na fodhlíthe

Cinneadh leasuithe suntasacha ar airteagail chorpraithe an eisitheora, nó ar na fodhlíthe, a mholadh do na scairshealbhóirí

A luaithe is féidir tar éis do chomhlacht rialaithe an eisitheora cinneadh a dhéanamh leasuithe suntasacha ar na hairteagail chorpraithe nó ar na fodhlíthe a chur faoi bhráid na scairshealbhóirí lena bhformheas.

E

Idirghabhálacha ó údaráis phoiblí

15

Iarratas ar cheadúnas nó ar údarú

Iarratas ar cheadúnas nó ar údarú

A luaithe is féidir tar éis don eisitheoir an t-iarratas ar cheadúnas nó ar údarú a chur faoi bhráid an údaráis inniúil.

16

Ceadúnas nó údarú a dheonú nó a dhiúltú

Ceadúnas nó údarú a dheonú nó a dhiúltú

A luaithe is féidir tar éis don eisitheoir an fógra foirmiúil a fháil ón údarás inniúil lena ndeonaítear ceadúnais nó údarú, nó lena ndiúltaítear d’iarratas ar cheadúnas nó ar údarú, fiú amháin, i gcás ina bhfuarthas iarratas, gur mhalartaigh an t-eisitheoir agus an t-údarás inniúil réamhfhaisnéis nó dréachtchinntí a bhféadfaí a chur ina leith gur faisnéis ón taobh istigh iad, astu féin,, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

17

Ceadúnas nó údarú a tharraingt siar

Ceadúnas nó údarú a tharraingt siar

A luaithe is féidir tar éis don eisitheoir an fógra foirmiúil a fháil ón údarás inniúil lena dtarraingítear siar an ceadúnas nó an t-údarú, fiú i gcás gur mhalartaigh an t-eisitheoir agus an t-údarás inniúil réamhfhaisnéis nó dréachtchinntí roimhe seo a bhféadfaí a chur ina leith gur faisnéis ón taobh istigh iad, astu féin, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

18

Iarratas ar chearta maoine intleachtúla (‘MI’) a aithint

Iarratas ar chearta MI a aithint

A luaithe is féidir tar éis don eisitheoir an t-iarratas ar chearta MI a aithint a chur faoi bhráid an údaráis inniúil.

19

Aitheantas ar chearta MI

Fógra a thabhairt faoi chearta MI a aithint nó gan iad a aithint

A luaithe is féidir tar éis don eisitheoir an fógra foirmiúil a fháil maidir le cearta MI a aithint nó gan iad a aithint, fiú i gcás, mar thoradh ar iarratas ar chearta MI a aithint, gur mhalartaigh an t-eisitheoir agus an t-údarás inniúil réamhfhaisnéis nó dréachtchinntí a bhféadfaí a chur ina leith gur faisnéis ón taobh istigh iad, astu féin, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

20

Iarratas ar údarú chun táirge a thráchtálú

Iarratas ar údarú chun táirge a thráchtálú

A luaithe is féidir tar éis don eisitheoir iarratas ar údarú chun táirge a thráchtálú a chur faoi bhráid an údaráis inniúil.

21

Údarú chun táirge a thráchtálú

Údarú chun táirge a thráchtálú

A luaithe is féidir tar éis don eisitheoir an fógra foirmiúil a fháil ón údarás inniúil lena ndeonaítear an t-údarú chun táirge a thráchtálú, nó ag diúltú don iarratas chun táirge a thráchtálú, fiú i gcás, mar thoradh ar iarratas, gur mhalartaigh an t-eisitheoir agus an t-údarás inniúil réamhfhaisnéis nó dréachtchinntí a bhféadfaí a chur ina leith gur faisnéis ón taobh istigh iad, astu féin, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

22

Trialacha leighis/cliniciúla le haghaidh táirgí cógaisíochta

Conclúid trialacha leighis/cliniciúla

A luaithe is féidir tar éis don eisitheoir na trialacha leighis/cliniciúla a thabhairt i gcrích.

23

Údarú chun táirgí leighis/cógaisíochta a thráchtálú

Údarú chun táirgí leighis/cógaisíochta a thráchtálú

A luaithe is féidir tar éis don eisitheoir an fógra foirmiúil faoin gcinneadh críochnaitheach a fháil ón údarás inniúil (gan beann ar cibé acu glacadh nó diúltú atá ann), fiú i gcás, mar thoradh ar iarratas ar údarú chun táirge leighis/cógaisíochta a thráchtálú, inar mhalartaigh an t-eisitheoir agus an t-údarás inniúil réamhfhaisnéis nó dréachtchinntí a bhféadfaí a chur ina leith gur faisnéis ón taobh istigh iad, astu féin, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

24

Rannpháirtíocht i bpróiseas soláthair phoiblí

Dámhachtain conartha

A luaithe is féidir tar éis don eisitheoir an fógra foirmiúil a fháil go ndearnadh conradh a dhámhachtain don eisitheoir, fiú i gcás, mar thoradh ar an rannpháirtíocht i bpróiseas soláthair phoiblí, gur mhalartaigh an t-eisitheoir agus an t-údarás poiblí réamhfhaisnéis nó dréachtchinntí a bhféadfaí a chur ina leith gur faisnéis ón taobh istigh iad, astu féin, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

25

Imeachtaí réamhdhócmhainneachta/ athstruchtúraithe

Cinneadh imeachtaí nó comhaontuithe réamhdhócmhainneachta a dhéanamh le creidiúnaithe

I gcás imeachtaí atá faoi mhaoirseacht cúirte, a luaithe is féidir tar éis do chomhlacht rialaithe an eisitheora an cinneadh a dhéanamh iarratas a chomhdú ar imeachtaí réamhdhócmhainneachta/athstruchtúrúcháin.

I gcás imeachtaí nach bhfuil faoi mhaoirseacht cúirte, a luaithe is féidir tar éis do chomhlacht rialaithe an eisitheora comhaontú a shíniú le creidiúnaithe nó aon socruithe eile dá bhforáiltear sa chás réamhdhócmhainneachta.

26

Dócmhainneacht

Dócmhainneacht a chomhdú

A luaithe is féidir tar éis do chomhlacht rialaithe an eisitheora an cinneadh a dhéanamh iarratas ar dhócmhainneacht a chomhdú.

F

Institiúidí creidmheasa, gnóthais árachais agus gnóthais athárachais

27

Athbhreithniú agus meastóireacht mhaoirseachta amhail dá dtagraítear in Airteagal 97 de Threoir 2013/36/AE ó Pharlaimint na hEorpa agus ón gComhairle (2)

Cinneadh foirmiúil an údaráis inniúil

A luaithe is féidir tar éis don institiúid chreidmheasa an t-athbhreithniú maoirseachta críochnaitheach agus an cinneadh próisis meastóireachta a fháil ón údarás inniúil, fiú i gcás inar mhalartaigh an t-eisitheoir agus an t-údarás inniúil réamhfhaisnéis nó dréachtchinntí roimhe sin a bhféadfaí a chur ina leith gur faisnéis ón taobh istigh iad, astu féin.

28

Laghdú ar chistí dílse, de bhun Airteagal 77 de Rialachán (AE) Uimh. 575/2013 ó Pharlaimint na hEorpa agus ón gComhairle (3)

Cinneadh foirmiúil an údaráis inniúil laghdú ar chistí dílse a údarú

A luaithe is féidir tar éis don institiúid chreidmheasa fógra a fháil go bhfuil an laghdú ar chistí dílse údaraithe ag an údarás inniúil, fiú i gcás inar mhalartaigh an t-eisitheoir agus an t-údarás inniúil réamhfhaisnéis nó dréachtchinntí roimhe sin a bhféadfaí a chur ina leith gur faisnéis ón taobh istigh iad, astu féin.

29

Ullmhú le haghaidh gníomhaíocht réitigh, lena n-áirítear aon chinneadh nó gníomhaíocht a ghlacann an t-údarás inniúil nó an t-údarás réitigh go dtí go nglacfar an cinneadh chun gníomhaíocht réitigh a dhéanamh

Cinneadh an údaráis réitigh gníomhaíocht réitigh a dhéanamh i gcomhréir le hAirteagal 82(1) agus (2) de Threoir 2014/59/AE ó Pharlaimint na hEorpa agus ón gComhairle nó Airteagal 64 de Threoir (AE) 2025/1 ó Pharlaimint na hEorpa agus ón gComhairle (4)

A luaithe is féidir tar éis fhoilsiú chinneadh an údaráis réitigh de bhun Airteagal 83(4) de Threoir 2014/59/AE nó Airteagal 65(3) de Threoir (AE) 2025/1.

30

Imeachtaí dócmhainneachta i gcomhréir leis an dlí náisiúnta is infheidhme

Cinneadh an údaráis inniúil i gcomhréir leis an dlí náisiúnta is infheidhme

A luaithe is féidir tar éis don institiúid fógra a fháil maidir le cinneadh an údaráis inniúil i gcomhréir leis an dlí náisiúnta is infheidhme.

G

Imeachtaí dlíthiúla, smachtbhannaí agus díliostú

31

Imeachtaí riaracháin

Cinneadh an údaráis inniúil

A luaithe is féidir tar éis don údarás inniúil an t-eisitheoir a chur ar an eolas go foirmiúil maidir lena chinneadh críochnaitheach tar éis na n-imscrúduithe ábhartha, fiú i gcás inar mhalartaigh an t-eisitheoir agus an t-údarás inniúil réamhfhaisnéis nó dréachtchinntí roimhe sin a bhféadfaí a chur ina leith gur faisnéis ón taobh istigh iad, astu féin, nó i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

32

Bearta réamhchúraim laistigh d’imeachtaí breithiúnacha, mar ghearánaí nó mar chosantóir araon

Cinneadh ó údarás nó ó chúirt

A luaithe is féidir tar éis don eisitheoir an fógra a fháil faoin gcinneadh maidir leis na bearta réamhchúraim, fiú i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

33

Imeachtaí breithiúnacha

Cinneadh ó údarás nó ó chúirt

A luaithe is féidir tar éis don eisitheoir fógra a fháil maidir leis an gcinneadh, fiú i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

34

Imeachtaí chun smachtbhannaí a chainníochtú

Cinneadh maidir le smachtbhanna

A luaithe is féidir tar éis an t-eisitheoir a chur ar an eolas maidir leis an gcinneadh faoin smachtbhanna, fiú i gcás ina bhféadfadh an cinneadh a bheith faoi réir achomhairc nó ina bhfuil sé faoi réir achomhairc.

35

Díliostú

Cinneadh maidir leis an díliostú

I gcás díliostú deonach, a luaithe is féidir tar éis do chomhlacht rialaithe an eisitheora an cinneadh críochnaitheach a dhéanamh maidir leis an díliostú.

I gcás cinneadh díliostála arna dhéanamh ag an údarás inniúil nó ag an ionad trádála, a luaithe is féidir tar éis don eisitheoir an fógra foirmiúil faoin gcinneadh díliostála a fháil, fiú i gcás inar mhalartaigh an t-eisitheoir agus an t-údarás inniúil nó an t-ionad trádála réamhfhaisnéis nó dréachtchinntí roimhe sin a bhféadfaí a chur ina leith gur faisnéis ón taobh istigh iad, astu féin.

(1)  Treoir (AE) 2017/1132 ó Pharlaimint na hEorpa agus ón gComhairle an 14 Meitheamh 2017 maidir le gnéithe áirithe de dhlí na gcuideachtaí (IO L 169, 30.6.2017, lch. 46, ELI: http://data.europa.eu/eli/dir/2017/1132/oj).

(2)  Treoir 2013/36/AE ó Pharlaimint na hEorpa agus ón gComhairle an 26 Meitheamh 2013 maidir le rochtain ar ghníomhaíochtaí institiúidí creidmheasa agus maoirseacht stuamachta ar institiúidí creidmheasa, lena leasaítear Treoir 2002/87/CE agus lena n-aisghairtear Treoracha 2006/48/CE agus 2006/49/CE (IO L 176, 27.6.2013, lch. 338, ELI: http://data.europa.eu/eli/dir/2013/36/oj).

(3)  Rialachán (AE) Uimh. 575/2013 ó Pharlaimint na hEorpa agus ón gComhairle an 26 Meitheamh 2013 maidir le ceanglais stuamachta i gcomhair institiúidí creidmheasa agus lena leasaítear Rialachán (AE) Uimh. 648/2012 (IO L 176, 27.6.2013, lch. 1, ELI: http://data.europa.eu/eli/reg/2013/575/oj).

(4)  Treoir (AE) 2025/1 ó Pharlaimint na hEorpa agus ón gComhairle an 27 Samhain 2024 lena mbunaítear creat le haghaidh gnóthais árachais agus athárachais a théarnamh agus a réiteach agus lena leasaítear Treoracha 2002/47/CE, 2004/25/CE, 2007/36/CE, 2014/59/AE agus (AE) 2017/1132 agus Rialacháin (AE) Uimh. 1094/2010, (AE) Uimh. 648/2012, (AE) Uimh. 806/2014 agus (AE) 2017/1129 (IO L, 2025/1, 8.1.2025, ELI: http://data.europa.eu/eli/dir/2025/1/oj).


IARSCRÍBHINN II

Liosta neamh-uileghabhálach de chásanna ina bhfuil an fhaisnéis ón taobh istigh i gcodarsnacht leis an bhfógra poiblí is déanaí nó cineál eile cumarsáide dá dtagraítear in Airteagal 17(12), pointe (b), de Rialachán (AE) Uimh. 596/2014

Uimh.

Cás

1

Faisnéis ón taobh istigh a bhaineann le hathrú ábhartha ar réamhaisnéisí, ar thorthaí airgeadais nó ar chuspóirí gnó mar a fógraíodh nó mar a cuireadh in iúl go poiblí roimhe sin (amhail rabhaidh bhrabúis nó neamhshúilíochtaí tuillimh).

2

Faisnéis ón taobh istigh a bhaineann le hathrú ábhartha ar thionchar comhshaoil nó sóisialta tionscadail nó táirge mar a fógraíodh nó mar a cuireadh in iúl go poiblí roimhe sin (amhail spriocanna comhshaoil nach gcomhlíontar).

3

Faisnéis ón taobh istigh maidir le hinmharthanacht airgeadais eisitheora/rannpháirtí sa mhargadh lamháltas astaíochtaí i gcás inar fógraíodh nó inar cuireadh in iúl go poiblí roimhe sin faisnéis atá éagsúil go hábhartha maidir lena choinníollacha airgeadais (amhail an gá atá le méadú caipitil nó le heisiúint bannaí urghnácha).

4

Faisnéis ón taobh istigh a bhaineann leis an bhfíoras nach gcomhlíonfar torthaí nó spriocdhátaí táirge nó tionscadail atá á fhorbairt, i gcás inar fógraíodh nó inar cuireadh in iúl go poiblí roimhe sin na torthaí nó na spriocdhátaí sin.

5

Faisnéis ón taobh istigh a bhaineann le hathrú ábhartha ar an struchtúr caipitil mar a fógraíodh nó mar a cuireadh in iúl go poiblí roimhe sin (amhail modhnú suntasach ar eisiúint ionstraimí airgeadais).

6

Faisnéis ón taobh istigh a bhaineann le hathrú ábhartha ar straitéis ghnó a fógraíodh nó a cuireadh in iúl go poiblí roimhe sin (amhail cinneadh dul isteach i ndeighleog mhargaidh gheografach nua).

7

Faisnéis ón taobh istigh a bhaineann le hathrú ábhartha ar phríomheilimintí conartha nó idirbhirt a fógraíodh nó a cuireadh in iúl go poiblí roimhe sin (amhail foirceannadh comhpháirtíochta tráchtála, nó, i gcás éadála, roghnú sprioc-chuideachta difriúla).

8

Faisnéis ón taobh istigh a bhaineann le hathrú ábhartha ar an rialachas corparáideach mar a fógraíodh nó mar a cuireadh in iúl go poiblí roimhe sin, lena n-áirítear struchtúr bainistíochta agus cóid iompair (amhail cinneadh a chur ar ceal chun méadú beartaithe a dhéanamh ar líon na gcomhaltaí neamhspleácha Boird).


IARSCRÍBHINN III

Cineálacha eile teachtaireachta dá dtagraítear in Airteagal 2(2) den Rialachán seo:

1.   

aon teachtaireacht nó preaseisiúint a fhoilsíonn an t-eisitheoir/an rannpháirtí sa mhargadh lamháltas astaíochtaí, lena n-áirítear trí na meáin shóisialta nó trí mheáin eile agus ar a shuíomh gréasáin.

2.   

agallaimh phoiblí arna dtabhairt ag aon duine a dhéanann ionadaíocht fhoirmiúil ar an eisitheoir/ar an rannpháirtí sa mhargadh lamháltas astaíochtaí.

3.   

glaonna réamhdhúnta, seónna bóthair agus imeachtaí poiblí eile a bhfuil rochtain ag an bpobal orthu, lena n-áirítear seimineáir ghréasáin agus podchraoltaí, arna n-eagrú nó arna n-údarú ag an eisitheoir/ag an rannpháirtí sa mhargadh lamháltas astaíochtaí, agus ina nglacann aon duine a dhéanann ionadaíocht fhoirmiúil ar an eisitheoir/ar an rannpháirtí sa mhargadh lamháltas astaíochtaí páirt.

4.   

feachtais fógraíochta agus mhargaíochta arna gcur ar fáil go poiblí ag an eisitheoir/ag an rannpháirtí sa mhargadh lamháltas astaíochtaí.

5.   

comhduithe rialála atá inrochtana don phobal ag an eisitheoir/ag an rannpháirtí sa mhargadh lamháltas astaíochtaí.

6.   

teachtaireachtaí atá inrochtana don phobal a sholáthraítear i gcomhthéacs chruinnithe scairshealbhóirí an eisitheora/an rannpháirtí sa mhargadh lamháltas astaíochtaí.

7.   

aon teachtaireacht eile chuig an bpobal arna seachadadh ag aon duine a dhéanann ionadaíocht fhoirmiúil ar an eisitheoir/ar an rannpháirtí sa mhargadh lamháltas astaíochtaí.


ELI: http://data.europa.eu/eli/reg_del/2026/789/oj

ISSN 1977-0839 (electronic edition)