(1)

Le Rialachán (AE) 2016/679 ó Pharlaimint na hEorpa agus ón gComhairle (3), bunaítear córas forfheidhmithe díláraithe arb é is aidhm dó a áirithiú go ndéanfar an Rialachán sin a léirmhíniú agus a chur i bhfeidhm go comhsheasmhach i gcásanna a bhaineann le próiseáil trasteorann. I gcásanna den sórt sin, éilítear leis an gcóras forfheidhmithe díláraithe comhar idir údaráis mhaoirseachta chun teacht ar chomhdhearcadh. I gcás nach féidir le húdaráis mhaoirseachta teacht ar chomhdhearcadh, foráiltear le Rialachán (AE) 2016/679 do réiteach díospóide ag an mBord Eorpach um Chosaint Sonraí (‘an Bord’).

(2)

Chun foráil a dhéanamh maidir le feidhmiú rianúil agus éifeachtach an tsásra comhair agus réitigh díospóidí dá bhforáiltear in Airteagail 60 agus 65 de Rialachán (AE) 2016/679, faoi seach, is gá rialacha a leagan síos maidir le stiúradh imeachtaí ag na húdaráis mhaoirseachta i gcásanna a bhaineann le próiseáil trasteorann, agus ag an mBord le linn réiteach díospóide, lena n-áirítear gearáin a láimhseáil. Is gá freisin, ar an gcúis sin, rialacha a leagan síos maidir le feidhmiú an chirt chun éisteacht a fháil sula nglacfaidh údaráis mhaoirseachta agus, de réir mar a bheidh, an Bord cinntí.

(3)

In éagmais rialacha an Aontais lena rialaítear an t-ábhar, is faoi gach Ballstát atá sé, i gcomhréir le prionsabal neamhspleáchas nós imeachta na mBallstát, rialacha mionsonraithe a leagan síos maidir le nósanna imeachta riaracháin agus breithiúnacha atá ceaptha chun ardleibhéal cosanta a áirithiú do chearta a dhíorthaíonn daoine aonair ó dhlí an Aontais. Dá bhrí sin, ba cheart feidhm a bheith ag dlí nós imeachta gach Ballstáit maidir leis na húdaráis mhaoirseachta a mhéid nach ndéantar ábhar a chomhchuibhiú leis an Rialachán seo, agus fad nach gcuirtear bac le rialacha nós imeachta náisiúnta den sórt sin ar phrionsabail na héifeachtachta agus an chomhionannais a bhaineann le dlí an Aontais.

(4)

Is é is aidhm don Rialachán seo a áirithiú go ndéanfar imscrúduithe i gcásanna a bhaineann le próiseáil trasteorann i gcomhréir le prionsabal an dea-riaracháin, agus go háirithe go ndéanfar iad go neamhchlaonta, go cothrom agus laistigh de thréimhse réasúnach ama. Sa Rialachán seo, dá bhrí sin, leagtar síos prionsabail chothrománacha a bhaineann leis na nósanna imeachta i bhforfheidhmiú Rialachán (AE) 2016/679 i gcásanna den sórt sin.

(5)

Is foinse bhunriachtanach faisnéise iad gearáin chun sáruithe ar rialacha cosanta sonraí a bhrath. Is féidir le hargóintí agus fianaise ar féidir leo cabhrú le cur chun cinn an imscrúdaithe a bheith san áireamh san fhaisnéis a sholáthraíonn gearánaigh mar chuid den ghearán a thaisctear nó nuair a chuireann siad a dtuairimí in iúl. Is gá nósanna imeachta soiléire agus éifeachtúla a bhunú chun gearáin a láimhseáil i gcásanna a bhaineann le próiseáil trasteorann ós rud é go bhféadfaidh údarás maoirseachta déileáil leis an ngearán seachas an t-údarás lenar taisceadh an gearán.

(6)

Ba cheart gearán a thuiscint mar éileamh arna thaisceadh ag ábhar sonraí le húdarás maoirseachta i gcomhréir le hAirteagal 77(1) nó Airteagal 80 de Rialachán (AE) 2016/679. Ní mheasfar gur gearán é nuair nach ndéantar ach tuairisc a dhéanamh ar sháruithe a líomhnaítear nach mbaineann le próiseáil sonraí pearsanta a bhfuil baint acu leis an ábhar sonraí, nó iarrataí ar chomhairle ó rialaitheoirí nó ó phróiseálaithe nó iarrataí ginearálta maidir le Rialachán (AE) 2016/679 a chur i bhfeidhm, ó rialaitheoirí, ó phróiseálaithe nó ó dhaoine nádúrtha.

(7)

Chun go mbeidh gearán a bhaineann le próiseáil trasteorann inghlactha, ba cheart faisnéis shonraithe a bheith ann. Níor cheart aon fhaisnéis sa bhreis ar an bhfaisnéis a shonraítear sa Rialachán seo a éileamh chun go mbeadh gearán den sórt sin inghlactha. Beidh feidhm i gcónaí ag módúlachtaí riaracháin agus ceanglais maidir le hinghlacthacht gearán faoi dhlí náisiúnta an údaráis maoirseachta lenar taisceadh gearán, amhail teanga, reacht na dtréimhsí, meán aitheantais, foirm leictreonach, teimpléad sonrach nó síniú.

(8)

D’fhéadfaí seoladh poist, áit chónaithe agus, i gcás ina mbeidh fáil air, seoladh ríomhphoist a áireamh i sonraí teagmhála an duine a thaisceann an gearán. Maidir leis an bhfíoras gur duine nádúrtha é gearánach nach bhfuil in ann feidhm a bhaint as a cheart nó a ceart chun gearán a thaisceadh gan cúnamh ó ionadaí dlíthiúil, mar shampla toisc gur leanbh é nó í nó toisc go bhfuil sé nó sí faoi mhíchumas nó go bhfuil sé nó sí leochaileach, agus dá bhrí sin go bhfuil cearta an duine sin á bhfeidhmiú trí dhuine eile, amhail tuismitheoir, caomhnóir dlíthiúil nó ball teaghlaigh, ar choinníoll go gceadaítear ionadaíocht den sórt sin faoin dlí náisiúnta, ní mór an fíoras sin a shainaithint go soiléir tráth a thaisctear an gearán.

(9)

I gcás inar comhlacht, eagraíocht nó comhlachas seachbhrabúsach dá dtagraítear in Airteagal 80 de Rialachán (AE) 2016/679 a thaisceann an gearán, ba cheart cruthúnas go bhfuil an comhlacht, an eagraíocht nó an comhlachas comhdhéanta mar is ceart i gcomhréir le dlí Ballstáit a sholáthar, in éineacht le ainm agus sonraí teagmhála comhlachta, eagraíochta nó comhlachais den sórt sin agus cruthúnas go bhfuil comhlacht, eagraíocht nó comhlachas den sórt sin ag gníomhú ar bhonn shainordú an ábhair sonraí. Cinntear na módúlachtaí agus nósanna imeachta do chruthúnas den sórt sin i gcomhréir le dlí Bhallstát an údaráis maoirseachta lena dtaisctear an gearán.

(10)

Níor cheart ceangal a chur ar an ngearánach dul i dteagmháil leis an bpáirtí faoi imscrúdú sula dtaiscfidh sé gearán chun go mbeidh an gearán sin inghlactha. I gcás ina bhfuil baint ag an ngearán le feidhmiú cirt de chuid an ábhair sonraí atá ag brath ar an ábhar sonraí lena mbaineann iarraidh a dhéanamh ar an rialaitheoir, ba cheart an iarraidh sin a chur chuig an rialaitheoir sula dtaiscfear an gearán.

(11)

Ba cheart don údarás maoirseachta lenar taisceadh an gearán a chinneadh, trí réamhchonclúid, an bhfuil baint ag an ngearán le próiseáil trasteorann, an bhfuil an t-údarás maoirseachta a thoimhdítear a bheith inniúil chun gníomhú mar phríomhúdarás maoirseachta i gcomhréir le hAirteagal 56(1) de Rialachán (AE) 2016/679, agus an bhfuil feidhm ag Airteagal 56(2) den Rialachán sin. I gcás nár tionscnaíodh nós imeachta luathréitigh, ba cheart don údarás maoirseachta lenar taisceadh an gearán gearáin inghlactha a tharchur chuig an údarás maoirseachta a thoimhdítear a bheith inniúil chun gníomhú mar phríomhúdarás maoirseachta agus an gearánach a chur ar an eolas faoi sin. Ba cheart an cinneadh maidir le hinghlacthacht an ghearáin ag an údarás maoirseachta lenar taisceadh an gearán a bheith ina cheangal ar an bpríomhúdarás maoirseachta.

(12)

Tá sé tábhachtach go n-éascóidh na húdaráis mhaoirseachta don ghearánach cur isteach na faisnéise uile is gá, mar shampla trí theimpléid nó foirmeacha leictreonacha a sholáthar, agus treoraíocht ábhartha ón mBord á gcur san áireamh acu. Is féidir le húdaráis mhaoirseachta taisceadh gearán i bhformáid leictreonach atá áisiúil don úsáideoir a éascú agus aird á tabhairt ar riachtanais daoine faoi mhíchumas, ar choinníoll go gcomhfhreagraíonn an fhaisnéis a iarrfar ar an ngearánach a thabhairt, go gcomhfhreagraíonn sí don fhaisnéis shonraithe a cheanglaítear. Níor cheart aon fhaisnéis bhreise a éileamh chun a chinneadh go bhfuil an gearán inghlactha.

(13)

Chun láimhseáil gearáin a éascú, ba cheart do na húdaráis mhaoirseachta a bheith in ann faisnéis fhorlíontach a iarraidh ar an ngearánach. I gcás ina bhfuil cuid den fhaisnéis is gá chun go measfar gearán a bheith inghlactha ar iarraidh, d’fhéadfadh an t-údarás maoirseachta lenar taisceadh an gearán sin teagmháil a dhéanamh leis an ngearánach chun an fhaisnéis atá ar iarraidh a fháil i gcás inarb indéanta. I gcás nach bhfuil gearán inghlactha, ba cheart don údarás maoirseachta a dhearbhú go bhfuil sé neamh-inghlactha agus an gearánach a chur ar an eolas faoin bhfaisnéis atá ar iarraidh laistigh den spriocdháta dá bhforáiltear sa Rialachán seo, chun go mbeidh an gearánach in ann gearán inghlactha a thaisceadh.

(14)

Más rud é, tar éis gearán inghlactha a bhaineann le próiseáil trasteorann a fháil ó údarás maoirseachta, go n-éilíonn an príomhúdarás maoirseachta faisnéis bhreise ón ngearánach chun foráil a dhéanamh d’imscrúdú iomlán a dhéanamh ar an ngearán, ba cheart don údarás maoirseachta lenar taisceadh an gearán cuidiú leis an bpríomhúdarás maoirseachta, lena n-áirítear trí theagmháil a dhéanamh leis an ngearánach chun an fhaisnéis is gá a lorg más gá.

(15)

I gcás ina dtionscnóidh an príomhúdarás maoirseachta imscrúdú ar bhonn gearáin, ba cheart na páirtithe faoi imscrúdú a chur ar an eolas gan mhoill faoi thaisceadh an ghearáin sin agus faoina phríomhghnéithe. D’fhéadfaí soláthar faisnéise den sórt sin ag an bpríomhúdarás maoirseachta a chur siar, áfach, a fhad is gá chun sláine an imscrúdaithe a chosaint agus chun gur féidir bearta imscrúdaitheacha a dhéanamh go héifeachtach.

(16)

Chun feidhmiú éifeachtach na sásraí comhair agus comhsheasmhachta i gCaibidil VII de Rialachán (AE) 2016/679 a ráthú, tá sé tábhachtach go réiteofaí cásanna a bhaineann le próiseáil trasteorann ar bhealach tráthúil agus i gcomhréir le meon an chomhair dhílis agus éifeachtaigh is bonn le hAirteagal 60 de Rialachán (AE) 2016/679. Ba cheart don phríomhúdarás maoirseachta a inniúlacht a fheidhmiú faoi chuimsiú dlúthchomhair leis na húdaráis mhaoirseachta eile lena mbaineann. Ar an gcaoi chéanna, ba cheart do na húdaráis mhaoirseachta lena mbaineann páirt ghníomhach a ghlacadh in imscrúdú ag céim luath d’fhonn teacht ar chomhdhearcadh, agus leas iomlán á bhaint as na huirlisí dá bhforáiltear le Rialachán (AE) 2016/679. Tá sé tábhachtach go mbeidh an comhar idir na húdaráis mhaoirseachta bunaithe ar idirphlé oscailte lenar féidir leis na húdaráis mhaoirseachta lena mbaineann tionchar fóinteach a imirt ar chúrsa an imscrúdaithe trína dtaithí agus a dtuairimí a roinnt leis an bpríomhúdarás maoirseachta, agus aird chuí á tabhairt ar an gcorrlach lánroghnach atá ag gach údarás maoirseachta. Ba cheart do na húdaráis mhaoirseachta nósanna imeachta a chur i gcrích ar bhealach caoithiúil agus éifeachtúil agus ba cheart dóibh dul i gcomhair le chéile ar bhealach dílis agus éifeachtach, lena n-áirítear tacaíocht a thabhairt i gcás inar gá agus iarrataí a fhreagairt gan mhoill.

(17)

Ba cheart d’údaráis mhaoirseachta cinneadh a dhéanamh maidir le gearáin laistigh de thréimhse ama réasúnach. Ar an gcúis sin, leagtar síos teorainneacha ama leis an Rialachán seo. Braitheann a bhfuil i gceist le tréimhse ama réasúnach ar imthosca gach cáis agus, go háirithe, ar chomhthéacs an cháis, ar na céimeanna nós imeachta éagsúla a leanann an príomhúdarás maoirseachta, ar iompar na bpáirtithe faoi imscrúdú agus an ghearánaigh le linn an nós imeachta agus ar chastacht an cháis. Chun cosaint éifeachtach a thabhairt ar chearta agus saoirsí bunúsacha ábhar sonraí i bpróiseáil sonraí pearsanta, tá sé tábhachtach go láimhseálfaí gearáin ar bhealach éifeachtúil agus caoithiúil. Ag brath ar imthosca an cháis, d’fhéadfadh an t-am a theastaíonn chun gearán a láimhseáil a bheith níos giorra ná an teorainn ama a sholáthraítear leis an Rialachán seo. Is féidir tionchar dearfach a bheith ag comhar éifeachtúil idir an príomhúdarás maoirseachta agus na húdaráis mhaoirseachta eile lena mbaineann freisin maidir le cásanna a láimhseáil go caoithiúil.

(18)

Ba cheart an fhéidearthacht a bheith ag gearánach chun cumarsáid a dhéanamh go heisiach leis an údarás maoirseachta lenar taisceadh gearán an ghearánaigh sin. Ní chuireann an fhéidearthacht sin cosc ar an ngearánach cumarsáid dhíreach a dhéanamh le húdarás maoirseachta eile, lena n-áirítear an príomhúdarás maoirseachta.

(19)

Tá sé tábhachtach breithniú a dhéanamh ar na sonraí pearsanta a phróiseáiltear agus ar staid an ábhair sonraí, mar shampla i gcás ina mbaineann gearán le próiseáil sonraí pearsanta leanaí.

(20)

Ba cheart don phríomhúdarás maoirseachta an fhaisnéis is gá maidir le dul chun cinn an imscrúdaithe a sholáthar don údarás maoirseachta lenar taisceadh an gearán chun críche nuashonruithe a sholáthar don ghearánach.

(21)

Ionas gur féidir leis na húdaráis mhaoirseachta deireadh a chur go tapa le sáruithe ar Rialachán (AE) 2016/679 agus réiteach tapa a chur ar fáil do ghearánaigh, ba cheart do na húdaráis mhaoirseachta féachaint, i gcás inarb iomchuí, le gearáin a réiteach trí nós imeachta luathréitigh i gcomhréir leis an Rialachán seo. Chun na críche sin, ba cheart don údarás maoirseachta a shuíomh ar cuireadh deireadh leis an sárú a líomhnaítear sa ghearán ar bhealach a fhágann nach bhfuil aon chuspóir leis an ngearán. Ní cheanglaítear ar na Ballstáit nósanna imeachta nua a thabhairt isteach faoin dlí náisiúnta chun ligean dá n-údaráis mhaoirseachta gearán a réiteach trí nós imeachta luathréitigh.

(22)

Níor cheart gearáin a réiteach trí nós imeachta luathréitigh ach amháin i gcás nár chuir an gearánach agóid thráthúil isteach i gcoinne an chinnidh gur cuireadh deireadh leis an sárú líomhnaithe agus, dá bhrí sin, nach bhfuil aon chuspóir leis an ngearán. Dá bhrí sin, ba cheart feidhm a bheith ag luathréiteach gearáin maidir le cásanna ina bhfuil an gearánach in ann measúnú cuí a dhéanamh ar an toradh atá beartaithe.

(23)

Is féidir luathréiteach gearáin a bheith úsáideach go háirithe chun gearáin a bhaineann le sáruithe ar chearta an ábhair sonraí faoi Chaibidil III de Rialachán (AE) 2016/679 a réiteach go gasta chun sástachta an ghearánaigh. Leis an luathréiteach sin, ba cheart don údarás maoirseachta lenar taisceadh an gearán nó an príomhúdarás maoirseachta a bheith in ann a shuíomh, ar bhonn réamhtheagmháil leis an rialaitheoir agus ar choinníoll go bhfuarthas fianaise thacaíochta, nach bhfuil aon chuspóir leis an ngearán.

(24)

Ba cheart luathréiteach gearáin trí nós imeachta luathréitigh a bheith gan dochar don phríomhúdarás maoirseachta a bheith ag feidhmiú a chumhachtaí i gcomhréir le Rialachán (AE) 2016/679 maidir leis an ábhar céanna, mar shampla i gcás sáruithe sistéamacha nó leanúnacha ar an Rialachán sin.

(25)

I gcás ina measann an príomhúdarás maoirseachta lenar taisceadh an gearán gur féidir gearán a réiteach trí nós imeachta luathréitigh, ba cheart dréachtchinneadh de bhun Airteagal 60(3) de Rialachán (AE) 2016/679 a chur faoi bhráid na n-údarás maoirseachta eile lena mbaineann, d’fhonn cinneadh críochnaitheach a ghlacadh i gcomhréir le hAirteagal 60(7) de Rialachán (AE) 2016/679 lena suitear gur cuireadh deireadh leis an sárú líomhnaithe agus gur réitigh an príomhúdarás maoirseachta an gearán, nó cuid den ghearán. Dá bhrí sin, maidir leis an dréachtchinneadh a cuireadh isteach, d’fhéadfaí é a shimpliú agus a theorannú don fhaisnéis gur réitíodh an gearán, go hiomlán nó go páirteach, trí nós imeachta luathréitigh, lena léirítear na cúiseanna is bonn leis an gcinneadh agus raon feidhme an réitigh, agus lena ndeimhnítear, dá bhrí sin, nach bhfuil aon chuspóir leis an ngearán. I gcásanna den sórt sin, ba cheart don phríomhúdarás maoirseachta a dhréachtchinneadh a chur go díreach faoi bhráid na n-údarás maoirseachta eile lena mbaineann, gan bheith air achoimre ar phríomh-shaincheisteanna nó ar réamhthorthaí a dhréachtú agus a scaipeadh.

(26)

I gcás ina bhfuil réamhthuairim ag an bpríomhúdarás maoirseachta maidir leis na príomh-shaincheisteanna in imscrúdú, ba cheart don phríomhúdarás maoirseachta a bheith in ann comhoibriú leis na húdaráis mhaoirseachta eile lena mbaineann trí nós imeachta comhair shimplí. Ba cheart an nós imeachta comhair shimplí a chur i bhfeidhm ar bhonn cás ar chás, ar choinníoll go measann an príomhúdarás maoirseachta nach bhfuil aon amhras réasúnach ann maidir le raon feidhme an imscrúdaithe agus nach n-éilítear leis na saincheisteanna dlíthiúla agus fíorasacha a sainaithníodh go mbeadh comhar breise ag teastáil chun críocha imscrúdaithe chasta, go háirithe i gcás inar féidir aghaidh a thabhairt ar na saincheisteanna sin ar bhonn shaintréithe an cháis agus na gcinntí roimhe sin i gcásanna comhchosúla. Ina theannta sin, tá sé tábhachtach go ndéanfaidh an príomhúdarás maoirseachta an cásdlí agus na treoirlínte atá ann cheana arna nglacadh ag an mBord maidir leis na sáruithe líomhnaithe ar Rialachán (AE) 2016/679 atá le himscrúdú a chur san áireamh freisin agus é á mheas gur dócha go dtiocfar ar chomhdhearcadh maidir le príomhghnéithe cáis. I bprionsabal, níl feidhm ag an nós imeachta comhair shimplí i gcás ina n-ardaíonn an cás fadhbanna sistéamacha nó athfhillteacha i roinnt Ballstát, ina mbaineann sé le saincheist dhlíthiúil ghinearálta maidir le léirmhíniú, cur i bhfeidhm nó forfheidhmiú Rialachán (AE) 2016/679, ina mbaineann sé le trasnú na cosanta sonraí le réimsí dlíthiúla eile, ina ndéanann sé difear do líon mór ábhar sonraí i roinnt Ballstát, nó ina mbaineann sé le líon mór gearán i roinnt Ballstát nó i gcás ina bhféadfadh ardriosca a bheith ann do chearta agus saoirsí na n-ábhar sonraí.

(27)

I gcás ina bhfuil sé beartaithe ag an bpríomhúdarás maoirseachta an nós imeachta comhair shimplí a chur i bhfeidhm, ba cheart dó na húdaráis mhaoirseachta eile lena mbaineann a chur ar an eolas faoina bhfuil ar intinn aige agus an fhaisnéis ábhartha uile a sholáthar maidir le saintréithe an cháis agus an ghearáin, lena n-áirítear na príomhfhíorais ábhartha agus an sárú líomhnaithe atá le himscrúdú. I gcás ina gcuirtear an nós imeachta comhair shimplí i bhfeidhm, ba cheart don phríomhúdarás maoirseachta leanúint den chomhar leis na húdaráis mhaoirseachta eile lena mbaineann agus dréachtchinneadh a chur isteach laistigh de na teorainneacha ama dá bhforáiltear sa Rialachán seo.

(28)

I gcás ina gceanglaítear ar údarás maoirseachta céimeanna áirithe nós imeachta a dhéanamh laistigh de theorainneacha ama sonraithe, is é is cuspóir do na teorainneacha ama sin a áirithiú go ndéanfar an nós imeachta a chur chun cinn agus a thabhairt chun críche laistigh de thréimhse réasúnach ama. Ní chuireann na teorainneacha ama sin bac ar údaráis mhaoirseachta na céimeanna nós imeachta is gá a ghlacadh tar éis dóibh dul in éag. Is gá a áirithiú, dá bhrí sin, nach féidir céimeanna nós imeachta den sórt sin a ghlacadh tar éis dhul in éag a dteorainneacha ama comhfhreagracha a mheas mar fhorais le neamhdhleathacht nó neamhbhailíocht na céime nós imeachta atá i gceist nó an chinnidh chríochnaithigh.

(29)

Ba cheart don phríomhúdarás maoirseachta a bheith in ann síneadh a chur leis an teorainn ama i dtaobh dréachtchinneadh a chur isteach. Níor cheart síntí den sórt sin a chur i bhfeidhm ach amháin ar bhonn eisceachtúil mar gheall ar chastacht cáis. Ba cheart na húdaráis mhaoirseachta eile lena mbaineann a chur ar an eolas agus ba cheart an deis a bheith acu chun agóidí a chur isteach in aghaidh an tsínidh, ar cheart don phríomhúdarás maoirseachta iad a chur san áireamh agus cinneadh á dhéanamh aige síneadh a chur leis an teorainn ama agus, i gcás inarb infheidhme, fad an tsínidh sin.

(30)

I gcás ina gcuireann an príomhúdarás maoirseachta síneadh leis an teorainn ama i dtaobh dréachtchinneadh a chur isteach, ba cheart do na húdaráis mhaoirseachta eile lena mbaineann a bheith in ann an príomhúdarás maoirseachta a chur ar an eolas faoina measúnú gur gá gníomhú chun cearta agus saoirsí na n-ábhar sonraí a chosaint. I gcás inar cuireadh an príomhúdarás maoirseachta ar an eolas faoi mheasúnú den sórt sin, agus nach gcuireann sé dréachtchinneadh isteach laistigh den teorainn ama shínithe, ba cheart a thoimhdiú go bhfuil géarghá le gníomhú dá dtagraítear in Airteagal 66(1) de Rialachán (AE) 2016/679. D’ainneoin na féidearthachta sin, tá an nós imeachta práinne fós ar fáil d’údaráis mhaoirseachta faoi réir na gcoinníollacha a leagtar amach in Airteagal 66 de Rialachán (AE) 2016/679.

(31)

Chun a áirithiú go seolfar imeachtaí ar bhealach éifeachtúil, gan dochar do neamhspleáchas na mBallstát ó thaobh nósanna imeachta de, is fearr nach mbeadh leigheasanna i gcoinne céimeanna nós imeachta arna nglacadh ag údaráis mhaoirseachta ar fáil ach amháin i gcomhar le leigheas i gcoinne cinneadh críochnaitheach, ach amháin má dhéanann an chéim nós imeachta ann féin difear do-athraithe do chearta an pháirtí faoi imscrúdú nó an ghearánaigh, gan beann ar an gcinneadh críochnaitheach.

(32)

Tá sé thar a bheith tábhachtach go dtiocfaidh údaráis mhaoirseachta ar chomhdhearcadh maidir le príomhghnéithe an cháis a luaithe is féidir agus sula nglacfar an dréachtchinneadh dá dtagraítear in Airteagal 60 de Rialachán (AE) 2016/679.

(33)

Is gné thábhachtach é an malartú faisnéise ábhartha idir an príomhúdarás maoirseachta agus na húdaráis mhaoirseachta eile lena mbaineann chun tacú le meon an chomhair dhílis agus éifeachtaigh. Is próiseas leanúnach le linn imscrúdaithe é an malartú sin, agus soláthar tráthúil faisnéise sonraí ag an bpríomhúdarás maoirseachta, agus d’fhéadfadh na doiciméid agus na sonraí is gá a bheith éagsúil ag brath ar chastacht an cháis. Ag brath ar chéim an imscrúdaithe agus ar imthosca cáis, d’fhéadfaí go n-áireofaí ar an bhfaisnéis ábhartha, inter alia, malartú comhfhreagrais leis an rialaitheoir nó leis an ábhar sonraí maidir le gearán nó imscrúdú, na doiciméid ullmhúcháin le haghaidh iniúchta nó cigireachta, nó réamh-mheasúnú teicniúil nó dlíthiúil arna dhéanamh ag an bpríomhúdarás maoirseachta mar thoradh ar chéim shonrach ina imscrúdú.

(34)

Cé gur cheart don phríomhúdarás maoirseachta aon fhaisnéis ábhartha a sholáthar do na húdaráis mhaoirseachta eile lena mbaineann gan mhoill tar éis an fhaisnéis sin a bheith curtha ar fáil, ba cheart do na húdaráis mhaoirseachta eile lena mbaineann aon fhaisnéis ábhartha a mheastar a bheith úsáideach chun measúnú a dhéanamh ar ghnéithe dlíthiúla agus fíorasacha an cháis a chur ar fáil go réamhghníomhach freisin. Leis an malartú faisnéise ábhartha, ba cheart tacú leis an gcomhar tapa éifeachtach idir údaráis mhaoirseachta agus is féidir, i gcásanna áirithe, tacú leis trí bhíthin achoimrí, sleachta nó cóipeanna de dhoiciméid chun tuiscint ghasta ar chás a éascú, agus san am céanna gan bac a chur ar fhaisnéis chomhlántach a sholáthar i gcás inar gá. Chun malartú éifeachtach agus iomchuí faisnéise ábhartha idir údaráis mhaoirseachta a éascú, ba cheart don Bhord a bheith in ann na módúlachtaí agus na ceanglais maidir le malartú faisnéise den sórt sin a shonrú.

(35)

Mar chuid den fhaisnéis ábhartha maidir le cás sonrach, ba cheart don phríomhúdarás maoirseachta achoimre ar na príomh-shaincheisteanna a sholáthar do na húdaráis mhaoirseachta eile lena mbaineann ina leagtar amach a réamhthuairim ar phríomh-shaincheisteanna an imscrúdaithe. Ba cheart an achoimre sin a sholáthar ag céim sách luath chun gur féidir na tuairimí arna gcur isteach ag na húdaráis mhaoirseachta eile lena mbaineann a chuimsiú go héifeachtach ach, ag an am céanna, ag céim ag a bhfuil gnéithe leordhóthanacha ag an bpríomhúdarás maoirseachta chun teacht ar thuairimí maidir leis an gcás, i gcás inar gá trí mheán réamhanailíse agus trí bhearta féideartha imscrúdaitheacha tosaigh. D’fhéadfaí go n-áireofaí san achoimre ar na príomh-shaincheisteanna freisin réamh-shainaithint beart ceartaitheach féideartha i gcás ina bhfuil go leor gnéithe ag an bpríomhúdarás maoirseachta chun teacht ar réamhthuairim ar na bearta sin, go háirithe nuair is féidir forálacha Rialachán (AE) 2016/679 lena mbaineann an sárú líomhnaithe a aimsiú agus a shainaithint go héasca ag céim luath.

(36)

Ba cheart an deis a bheith ag na húdaráis mhaoirseachta lena mbaineann chun a mbarúlacha a thabhairt maidir leis an achoimre ar na príomh-shaincheisteanna, lena n-áirítear maidir le raon leathan ábhair, amhail raon feidhme an imscrúdaithe, sainaithint na sáruithe líomhnaithe agus sainaithint na saincheisteanna fíorasacha agus dlíthiúla atá ábhartha i dtaca leis an imscrúdú. Ós rud é go gcinntear le raon feidhme an imscrúdaithe na hábhair lena n-éilítear imscrúdú ag an bpríomhúdarás maoirseachta, ba cheart do na húdaráis mhaoirseachta féachaint le teacht ar chomhdhearcadh a luaithe is féidir maidir le raon feidhme an imscrúdaithe.

(37)

Ar mhaithe le comhar cuimsitheach éifeachtach idir an príomhúdarás maoirseachta agus na húdaráis mhaoirseachta eile uile lena mbaineann, tá sé tábhachtach go mbeidh an achoimre ar na príomh-shaincheisteanna agus barúlacha na n-údarás maoirseachta lena mbaineann gonta agus i dtéarmaí a bheadh soiléir agus beacht go leor lena bheith sothuigthe ag na húdaráis mhaoirseachta uile. Ba cheart na hargóintí dlíthiúla a ghrúpáil trí thagairt a dhéanamh don chuid den achoimre ar phríomh-shaincheisteanna lena mbaineann siad. Is féidir an achoimre ar na príomh-shaincheisteanna agus barúlacha na n-údarás maoirseachta lena mbaineann a fhorlíonadh le doiciméid bhreise. Mar sin féin, ní leor tagairt amháin sna barúlacha ó údarás maoirseachta lena mbaineann do dhoiciméid fhorlíontacha a bheith ann in éagmais na n-argóintí bunriachtanacha sa dlí nó i bhfíoras a bheidh sna barúlacha. Is gá na sonraí bunúsacha dlíthiúla agus fíorasacha a bhfuiltear ag brath orthu i ndoiciméid den sórt sin a léiriú, i bhfoirm achomair ar a laghad, ar bhealach comhleanúnach agus intuigthe sa bharúil féin.

(38)

Ba cheart d’údaráis mhaoirseachta a bheith in ann úsáid a bhaint as na modhanna uile is gá chun teacht ar chomhdhearcadh de mheon an chomhair dhílis agus éifeachtaigh. I gcás ina bhfuil éagsúlacht tuairime idir an príomhúdarás maoirseachta agus na húdaráis mhaoirseachta eile lena mbaineann maidir le raon feidhme imscrúdaithe atá bunaithe ar ghearáin, lena n-áirítear forálacha Rialachán (AE) 2016/679 lena mbaineann an sárú líomhnaithe atá le himscrúdú, nó i gcás ina mbaineann barúlacha na n-údarás maoirseachta lena mbaineann le hathrú tábhachtach ar an measúnú casta dlíthiúil nó fíorasach, nó le réamh-shainaithint beart ceartaitheach féideartha, féadfaidh na húdaráis mhaoirseachta lena mbaineann na huirlisí dá bhforáiltear faoi Airteagail 61 agus 62 de Rialachán (AE) 2016/679 a úsáid.

(39)

Le Rialachán (AE) 2016/679, cuirtear ar a chumas don údarás maoirseachta cinneadh ceangailteach práinneach a iarraidh ar an mBord i gcás nach bhfuil beart iomchuí déanta ag údarás maoirseachta inniúil i gcásanna ina bhfuil gá práinneach le gníomhú chun cearta agus saoirsí na n-ábhar sonraí a chosaint. Faoin Rialachán seo, más rud é, tar éis úsáid a bhaint as na modhanna a leagtar amach sa Rialachán seo, nach dtagann na húdaráis mhaoirseachta ar chomhdhearcadh maidir le raon feidhme imscrúdaithe atá bunaithe ar ghearáin, ba cheart a thoimhdiú go bhfuil na coinníollacha dá dtagraítear in Airteagal 66(3) de Rialachán (AE) 2016/679 maidir le cinneadh ceangailteach práinneach a iarraidh comhlíonta agus ba cheart don phríomhúdarás maoirseachta cinneadh ceangailteach práinneach ón mBord a iarraidh. Ní féidir le cinneadh ceangailteach práinneach an Bhoird maidir le raon feidhme imscrúdaithe atá bunaithe ar ghearáin teacht roimh thoradh imscrúdú an phríomhúdaráis maoirseachta ná roimh éifeachtacht cheart éisteachta na bpáirtithe faoi imscrúdú.

(40)

Ba cheart cearta nós imeachta a thabhairt do ghearánach a mhéid a bhaineann lena chearta agus lena shaoirsí nó lena cearta agus lena saoirsí mar ábhar sonraí. Leis na céimeanna nós imeachta a leagtar síos sa Rialachán seo, a bhaineann le comhar idir údaráis mhaoirseachta, ní thugtar cearta do ghearánach ná do pháirtithe faoi imscrúdú. Dá bhrí sin, soiléirítear leis an Rialachán seo na forálacha maidir le céimeanna nós imeachta nach dtugann cearta do dhaoine aonair nó do pháirtithe faoi imscrúdú, nó nach gcuireann teorainn leis na cearta sin.

(41)

Ba cheart an deis a bheith ag gearánaigh a gcuid tuairimí a chur in iúl sula ndéantar cinneadh a bhfuil drochthionchar aige orthu. Dá bhrí sin, i gcás ina ndiúltófar go hiomlán nó go páirteach do ghearán i gcás a bhaineann le próiseáil trasteorann, nó i gcás ina ndíbhtear go hiomlán nó go páirteach é, ba cheart an deis a bheith ag an ngearánach a thuairimí a chur in iúl sula gcuirfear isteach dréachtchinneadh faoi Airteagal 60(3) de Rialachán (AE) 2016/679, dréachtchinneadh athbhreithnithe faoi Airteagal 60(5) den Rialachán sin nó cinneadh ceangailteach ón mBord faoi Airteagal 65(1), pointe (a), den Rialachán sin.

(42)

Is gá soiléiriú a dhéanamh ar roinnt na bhfreagrachtaí idir an príomhúdarás maoirseachta agus an t-údarás maoirseachta lenar taisceadh an gearán i gcás ina ndiúltaítear do ghearán go hiomlán nó go páirteach nó i gcás ina ndíbhtear go hiomlán nó go páirteach é i gcás a bhaineann le próiseáil trasteorann. Mar phointe teagmhála don ghearánach le linn an imscrúdaithe, ba cheart don údarás maoirseachta lenar taisceadh an gearán deis a thabhairt don ghearánach a thuairimí nó a tuairimí a chur in iúl maidir le gearán a bhfuil sé beartaithe diúltú don ghearán go hiomlán nó go páirteach nó é a dhíbhe go hiomlán nó go páirteach, agus ba cheart don údarás sin a bheith freagrach as gach cumarsáid leis an ngearánach. Ba cheart an chumarsáid uile den sórt sin a tharchur chuig an bpríomhúdarás maoirseachta. Ós rud é, faoi Airteagal 60(8) agus (9) de Rialachán (AE) 2016/679, go bhfuil sé de fhreagracht ar an údarás maoirseachta lenar taisceadh an gearán an cinneadh críochnaitheach a ghlacadh lena ndiúltaítear don ghearán go hiomlán nó go páirteach nó lena ndíbhtear go hiomlán nó go páirteach é, ba cheart don phríomhúdarás maoirseachta an dréachtchinneadh a ullmhú faoi Airteagal 60(3) de Rialachán (AE) 2016/679, i gcomhar leis an údarás maoirseachta lenar taisceadh an gearán. Áirítear leis an gcomhar sin an fhéidearthacht cúnamh a iarraidh ar an údarás maoirseachta lenar taisceadh an gearán chun dréacht den sórt sin a ullmhú.

(43)

Ba cheart forfheidhmiú éifeachtach rialacha an Aontais maidir le cosaint sonraí a bheith comhoiriúnach le cearta cosanta na bpáirtithe faoi imscrúdú a urramú go hiomlán, ar prionsabal bunúsach de chuid dhlí an Aontais é atá le hurramú i ngach imthoisc, agus tá tábhacht ar leith ag baint leis na cearta sin i nósanna imeachta a bhféadfadh pionóis a bheith mar thoradh orthu.

(44)

Chun an ceart chun dea-riaracháin agus na cearta cosanta mar a chumhdaítear i gCairt um Chearta Bunúsacha an Aontais Eorpaigh (‘an Chairt’) a choimirciú go héifeachtach, tá sé tábhachtach foráil a dhéanamh maidir le rialacha soiléire i ndáil le feidhmiú an chirt atá ag gach duine chun éisteacht a fháil sula ndéantar aon bheart aonair a dhéanfadh dochar dó nó di.

(45)

Leis na rialacha maidir leis an nós imeachta riaracháin arna chur i bhfeidhm ag údaráis mhaoirseachta agus Rialachán (AE) 2016/679 á fhorfheidhmiú, ba cheart a áirithiú go mbeidh an deis, go praiticiúil, ag na páirtithe faoi imscrúdú a gcuid tuairimí a chur in iúl maidir le fírinne agus ábharthacht na bhfíoras a líomhnaítear, na n-agóidí agus na n-imthosca a chuir an t-údarás maoirseachta chun cinn le linn an nós imeachta, rud a chuirfidh ar a gcumas a gcearta cosanta a fheidhmiú. Leagtar amach sna réamhthorthaí an réamhsheasamh maidir leis an sárú líomhnaithe ar Rialachán (AE) 2016/679 tar éis imscrúdú a dhéanamh. Dá bhrí sin, is cosaint nós imeachta bhunriachtanach iad lena n-áirithítear go n-urramaítear an ceart chun éisteacht a fháil. Ba cheart na doiciméid is gá a sholáthar do na páirtithe faoi imscrúdú chun iad féin a chosaint go héifeachtach agus chun barúlacha a dhéanamh maidir leis na líomhaintí a dhéantar ina gcoinne, trí rochtain a fháil ar an gcomhad riaracháin.

(46)

Ba cheart na rialacha sin a bheith gan dochar don fhéidearthacht atá ag údaráis mhaoirseachta rochtain bhreise a thabhairt ar an gcomhad riaracháin chun tuairimí a fháil ó aon cheann de na páirtithe faoi imscrúdú nó ón ngearánach le linn na n-imeachtaí, i gcomhréir le dlí náisiúnta an phríomhúdaráis maoirseachta.

(47)

Sainítear sna réamhthorthaí raon feidhme an imscrúdaithe agus, dá bhrí sin, raon feidhme aon chinnidh chríochnaithigh a dhéantar amach anseo, de réir mar a bheidh, ar bhonn cinneadh ceangailteach arna eisiúint ag an mBord faoi Airteagal 65(1), pointe (a), de Rialachán (AE) 2016/679 ar féidir iad a dhíriú ar rialaitheoirí nó ar phróiseálaithe. Ba cheart na réamhthorthaí a chur in iúl go soiléir, fiú má tá siad gonta, chun a chur ar chumas na bpáirtithe faoi imscrúdú cineál an tsáraithe líomhnaithe ar Rialachán (AE) 2016/679 a shainaithint i gceart. Comhlíontar an oibleagáid an fhaisnéis uile is gá a thabhairt do na páirtithe faoi imscrúdú ionas go mbeidh siad in ann iad féin a chosaint i gceart mura líomhnaítear leis an gcinneadh críochnaitheach go ndearna na páirtithe faoi imscrúdú sáruithe seachas na sáruithe sin dá dtagraítear sna réamhthorthaí agus nach gcuireann sé san áireamh ach fíorais a raibh deis ag na páirtithe faoi imscrúdú a dtuairimí a chur in iúl ina leith. Ní gá, áfach, go mbeadh cinneadh críochnaitheach an phríomhúdaráis maoirseachta ina mhacasamhail de na réamhthorthaí. Ba cheart cead a bheith ag an bpríomhúdarás maoirseachta sa chinneadh críochnaitheach freagairtí na bpáirtithe faoi imscrúdú do na réamhthorthaí, agus, i gcás inarb infheidhme, don dréachtchinneadh athbhreithnithe faoi Airteagal 60(5) de Rialachán (AE) 2016/679 a chur san áireamh. Ba cheart don phríomhúdarás maoirseachta a bheith in ann a mheasúnú féin a dhéanamh ar na fíorais agus ar na hargóintí dlíthiúla arna gcur chun cinn ag na páirtithe faoi imscrúdú chun diúltú do na hargóintí i gcás ina gcinnfidh an príomhúdarás maoirseachta go bhfuil siad gan bhunús nó chun a argóintí a fhorlíonadh agus a athdhréachtú, i bhfíoras agus i ndlí araon, chun tacú leis na hargóintí atá á gcoimeád aige. Mar shampla, agus argóint arna cur chun cinn ag páirtí faoi imscrúdú le linn an nós imeachta riaracháin á cur san áireamh, gan deis a bheith tugtha dó tuairim a chur in iúl ina leith sin sula nglactar an cinneadh críochnaitheach, ní féidir leis an argóint sin a bheith ina shárú ar chearta cosanta per se.

(48)

Foráiltear leis an Rialachán seo do rialacha i gcásanna ina gceanglaítear ar an bpríomhúdarás maoirseachta faoin dlí náisiúnta dul i mbun imeachtaí intíre ina dhiaidh sin a bhaineann leis an gcás céanna, amhail imeachtaí achomhairc riaracháin.

(49)

Ba cheart ceart éisteachta a thabhairt do na páirtithe faoi imscrúdú sula gcuirtear isteach dréachtchinneadh athbhreithnithe faoi Airteagal 60(5) de Rialachán (AE) 2016/679 nó sula nglacfaidh an Bord cinneadh ceangailteach faoi Airteagal 65(1), pointe (a), den Rialachán sin. Áirítear ar na gnéithe dlíthiúla nua agóidí ábhartha réasúnaithe i gcás ina bhfuil measúnuithe dlíthiúla sna hagóidí sin atá éagsúil leis na measúnuithe a mhol an príomhúdarás maoirseachta sa dréachtchinneadh a cuireadh isteach de bhun Airteagal 60(4) de Rialachán (AE) 2016/679.

(50)

Ba cheart an fhéidearthacht a thabhairt do ghearánaigh baint a bheith acu leis na himeachtaí arna dtionscnamh ag údarás maoirseachta d’fhonn saincheisteanna a bhaineann le sárú féideartha ar Rialachán (AE) 2016/679 a shainaithint nó a shoiléiriú. Cé gur thionscain údarás maoirseachta imscrúdú cheana féin maidir le hábhar an ghearáin nó go ndéileálfaidh sé leis an ngearán in imscrúdú ex officio tar éis dó an gearán a fháil, ní chuireann sé sin bac ar cháilíocht ábhair sonraí mar ghearánach. Is nós imeachta é imscrúdú arna dhéanamh ag údarás maoirseachta ar shárú a d’fhéadfadh rialaitheoir nó próiseálaí a dhéanamh ar Rialachán (AE) 2016/679, ar nós imeachta é ar chuir údarás maoirseachta tús leis, ar a thionscnamh féin nó bunaithe ar ghearán, chun a chúraimí faoi Airteagal 57(1) den Rialachán sin a chomhlíonadh. Níl na páirtithe faoi imscrúdú ná an gearánach sa chás nós imeachta céanna, agus tá sé fíor-riachtanach cearta cosanta an pháirtí faoi imscrúdú a choimirciú. Maidir leis an gceart bunúsach chun éisteacht a fháil, féadfaidh na páirtithe faoi imscrúdú agus an gearánach é a agairt nuair a dhéantar dochar dá seasamh dlíthiúil leis an gcinneadh.

(51)

Ba cheart an fhéidearthacht a thabhairt do ghearánaigh a dtuairimí maidir leis na réamhthorthaí a chur isteach i scríbhinn a mhéid a bhaineann na tuairimí sin lena ngearán maidir le próiseáil a sonraí pearsanta. Níor cheart rochtain a bheith acu, áfach, ar rúin trádála nó ar fhaisnéis rúnda eile de chuid na páirtithe faoi imscrúdú nó tríú daoine.

(52)

Agus spriocdhátaí á leagan síos do pháirtithe faoi imscrúdú agus do ghearánaigh chun a dtuairimí maidir le réamhthorthaí a sholáthar, tá sé tábhachtach go dtabharfaidh na húdaráis mhaoirseachta aird ar chastacht na saincheisteanna a ardaíodh sna réamhthorthaí, d’fhonn a áirithiú go mbeidh deis leordhóthanach ag na páirtithe faoi imscrúdú agus ag gearánaigh chun a dtuairimí maidir leis na saincheisteanna a ardaíodh a sholáthar go fóinteach.

(53)

Is é atá i gceist leis an malartú tuairimí idir údaráis mhaoirseachta sula gcuirtear isteach dréachtchinneadh idirphlé oscailte agus malartú fairsing tuairimí inar cheart d’údaráis mhaoirseachta a ndícheall a dhéanamh teacht ar chomhdhearcadh maidir le himscrúdú a chur chun cinn. Os a choinne sin, maidir le heasaontas a chuirtear in iúl in agóidí ábhartha réasúnaithe de bhun Airteagal 60(4) de Rialachán (AE) 2016/679, ar mó an fhéidearthacht le haghaidh réiteach díospóidí idir údaráis mhaoirseachta ina leith faoi Airteagal 65 den Rialachán sin agus lena gcuirtear moill ar an údarás maoirseachta inniúil cinneadh críochnaitheach a ghlacadh, níor cheart dó teacht chun cinn ach amháin i gcás ina dteipfeadh ar údaráis mhaoirseachta teacht ar chomhdhearcadh agus i gcás inar gá léirmhíniú comhsheasmhach ar Rialachán (AE) 2016/679 a áirithiú. Ba cheart agóidí den sórt sin a úsáid nuair a bhíonn ábhair a bhaineann le forfheidhmiú comhsheasmhach Rialachán (AE) 2016/679 i mbaol.

(54)

Ar mhaithe leis an nós imeachta um réiteach díospóide a thabhairt i gcrích go héifeachtúil agus go cuimsitheach, i gcás inar cheart do na húdaráis mhaoirseachta uile a bheith in ann a dtuairimí a thabhairt agus aird á tabhairt ar na srianta ama le linn réiteach díospóide, ba cheart d’fhoirm agus struchtúr na n-agóidí ábhartha réasúnaithe ceanglais áirithe a chomhlíonadh.

(55)

Déantar foráil maidir le rochtain ar an gcomhad riaracháin mar chuid de na cearta cosanta agus an ceart chun dea-riaracháin a chumhdaítear sa Chairt. Ba cheart rochtain ar an gcomhad riaracháin a thabhairt do na páirtithe faoi imscrúdú nuair a thugtar fógra dóibh faoi réamhthorthaí agus ba cheart an spriocdháta a leagan síos chun a bhfreagra i scríbhinn ar na réamhthorthaí a chur isteach.

(56)

Agus rochtain á tabhairt acu ar an gcomhad riaracháin do na páirtithe faoi imscrúdú agus don ghearánach, ba cheart do na húdaráis mhaoirseachta a áirithiú go gcosnófaí rúin trádála agus faisnéis rúnda eile. Áirítear i gcatagóir na faisnéise rúnda eile aon fhaisnéis seachas rúin trádála, a d’fhéadfaí a mheas mar fhaisnéis rúnda i gcomhréir le dlí an Aontais agus leis an dlí náisiúnta, a mhéid a dhéanfadh nochtadh na faisnéise sin dochar suntasach do rialaitheoir, do phróiseálaí nó do dhuine nádúrtha nó dlítheanach. Le faisnéis rúnda, ba cheart a áireamh go háirithe faisnéis nach eol ach do líon teoranta daoine agus a bhféadfadh a nochtadh díobháil thromchúiseach a dhéanamh don duine a sholáthair í nó do thríú daoine, agus i gcás inar fiú, ar bhonn oibiachtúil, cosaint a thabhairt do na leasanna a bhféadfaí dochar a dhéanamh dóibh de bharr nochtadh faisnéise den sórt sin. Ba cheart do na húdaráis mhaoirseachta a bheith in ann a iarraidh ar pháirtithe faoi imscrúdú a chuireann isteach nó a chuir isteach doiciméid nó ráitis faisnéis rúnda a shainaithint.

(57)

I gcás ina bhfuil gá le rúin trádála nó le faisnéis rúnda le cruthú gur tharla sárú, ba cheart do na húdaráis mhaoirseachta measúnú a dhéanamh maidir le gach doiciméad aonair ar bhealach comhréireach an mó an gá chun nochtadh ná an díobháil a d’fhéadfaí teacht leis an nochtadh.

(58)

Is i gcomhréir le dlí náisiúnta na mBallstát a sholáthrófar rochtain ar dhoiciméid a áirítear sa chomhad riaracháin ar bhonn rochtain ar dhoiciméid phoiblí. Ina leith sin, tá sé tábhachtach go gcosnófaí sláine an phróisis cinnteoireachta go dtí go nglacfaidh an t-údarás maoirseachta inniúil an cinneadh críochnaitheach.

(59)

Tá sé tábhachtach go n-éascóidh an Bord rochtain ar chinntí arna nglacadh i gcomhréir leis na sásraí comhair agus comhsheasmhachta, trí théacs na gcinntí críochnaitheacha arna nglacadh ag údaráis mhaoirseachta náisiúnta a chur ar fáil ar líne trí chláir a bhfuil rochtain éasca orthu. I gcomhréir leis an dlí náisiúnta is infheidhme, is féidir le húdaráis mhaoirseachta folú a dhéanamh ar ainmneacha, ar aon fhaisnéis eile lenar féidir páirtithe faoi imscrúdú nó an gearánach a shainaithint, agus ar fhaisnéis eile atá cosanta faoi dhlí an Aontais agus faoin dlí náisiúnta is infheidhme.

(60)

Tá sé tábhachtach go mbeidh soláthar de leagan den chinneadh críochnaitheach don ghearánach i gcomhréir leis an Rialachán seo fós gan dochar don fhéidearthacht atá ag údarás maoirseachta cinneadh a dhéanamh an ndéanfaidh sé an cinneadh a phoibliú mar chuid dá chumhachtaí ceartaitheacha.

(61)

Agus ábhar á tharchur chuig réiteach díospóide faoi Airteagal 65 de Rialachán (AE) 2016/679, ba cheart don phríomhúdarás maoirseachta na doiciméid agus an fhaisnéis uile is gá a sholáthar don Bhord chun a chur ar a chumas measúnú a dhéanamh ar inghlacthacht agóidí ábhartha réasúnaithe agus an cinneadh a ghlacadh faoi Airteagal 65(1), pointe (a), den Rialachán sin. A luaithe a bheidh na doiciméid agus an fhaisnéis uile is gá i seilbh ag an mBord, ba cheart don Bhord tarchur an ábhair a chlárú i gcomhréir le hAirteagal 65(2) de Rialachán (AE) 2016/679.

(62)

Ba cheart an cinneadh ceangailteach ón mBord faoi Airteagal 65(1), pointe (a), de Rialachán (AE) 2016/679 a bheith bainteach go heisiach le hábhair as ar eascair an réiteach díospóide agus ba cheart é a dhréachtú ar bhealach lena gceadaítear don phríomhúdarás maoirseachta a chinneadh críochnaitheach a ghlacadh ar bhonn chinneadh an Bhoird.

(63)

Chun réiteach díospóide idir údaráis mhaoirseachta arna gcur faoi bhráid an Bhoird faoi Airteagal 65(1), pointí (b) agus (c) de Rialachán (AE) 2016/679 a chuíchóiriú, is gá rialacha nós imeachta a shonrú maidir le doiciméid agus faisnéis atá le cur faoi bhráid an Bhoird agus ar cheart don Bhord a chinneadh a bhunú orthu. Is gá a shonrú freisin cathain ba cheart don Bhord tarchur an ábhair chuig réiteach díospóide a chlárú.

(64)

Chun cuíchóiriú a dhéanamh ar an nós imeachta maidir le tuairimí práinneacha agus cinntí ceangailteacha práinneacha ón mBord a ghlacadh faoi Airteagal 66(2) de Rialachán (AE) 2016/679, is gá rialacha nós imeachta a shonrú maidir le huainiú na n-iarrataí ar thuairim phráinneach nó ar chinneadh ceangailteach práinneach, maidir leis na doiciméid agus an fhaisnéis atá le cur faoi bhráid an Bhoird agus ar cheart don Bhord a chinneadh a bhunú orthu.

(65)

Foráiltear le Rialachán (AE) 2016/679 go bhfuil sé de cheart ag an ábhar sonraí leigheas breithiúnach éifeachtach a fháil i gcás nach láimhseálann údarás maoirseachta inniúil gearán. Ní chruthaítear leis an Rialachán seo leigheasanna breithiúnacha nua sa bhreis orthu siúd a bunaíodh cheana le Rialachán (AE) 2016/679, ná ní chuireann sé teorainn le cur i bhfeidhm na leigheasanna breithiúnacha a bhunaítear leis an Rialachán sin. Tá tábhacht ar leith ag baint le forálacha áirithe den Rialachán seo chun go ndéanfaidh na húdaráis mhaoirseachta an cinneadh críochnaitheach go tráthúil agus gearáin á láimhseáil acu. Agus cinneadh á dhéanamh ar láimhseáil údarás maoirseachta gearán, ba cheart breithniú a dhéanamh i dtaobh ar chomhlíon an t-údarás maoirseachta teorainneacha ama áirithe a leagtar síos sa Rialachán seo agus i Rialachán (AE) 2016/679. Agus an cinneadh sin á dhéanamh, tá sé fíor-riachtanach go gcoimirceofaí ceart an ghearánaigh go láimhseálfaí a ghearán nó a gearán laistigh de thréimhse réasúnach ama. Tá forálacha an Rialacháin seo gan dochar don fhéidearthacht foráil a dhéanamh do leigheasanna sa dlí náisiúnta don pháirtí faoi imscrúdú, i bhfianaise a chirt go láimhseálfaí a ghnóthaí laistigh de thréimhse réasúnach ama.

(66)

Chun an Rialachán seo a chur chun feidhme, is gá uirlisí digiteacha leormhaithe a bheith ann chun tacú le malartú tapa slán faisnéise. Tá sé tábhachtach go mbeadh uirlis leictreonach choiteann shlán iomchuí ar fáil do gach údarás cosanta sonraí, agus an taithí a fuarthas agus uirlisí atá ann cheana á húsáid á cur san áireamh. Tá sé tábhachtach freisin go soláthrófaí na hacmhainní is gá chun uirlis leictreonach den sórt sin a chur chun feidhme agus go n-éascódh uirlis den sórt sin bailiú agus comhdhlúthú staidrimh forfheidhmithe ag an mBord maidir le cásanna a bhaineann le próiseáil trasteorann.

(67)

Baineann Caibidlí III agus IV den Rialachán seo le comhar idir údaráis mhaoirseachta, le cearta nós imeachta na bpáirtithe faoi imscrúdú agus le rannpháirtíocht gearánach. Chun deimhneacht dhlíthiúil a áirithiú, níor cheart feidhm a bheith ag na forálacha sin maidir le himscrúduithe atá ar siúl cheana féin tráth a thiocfaidh an Rialachán seo i bhfeidhm. Beidh feidhm acu maidir le himscrúduithe ex officio arna n-oscailt 15 mhí ó dháta theacht i bhfeidhm an Rialacháin seo agus maidir le himscrúduithe atá bunaithe ar ghearáin i gcás inar taisceadh an gearán 15 mhí ó dháta theacht i bhfeidhm an Rialacháin seo. Déantar foráil i gCaibidlí V agus VI den Rialachán seo maidir le rialacha nós imeachta le haghaidh cásanna a tharchuirtear chuig réiteach díospóide faoi Airteagal 65 de Rialachán (AE) 2016/679 agus le haghaidh iarrataí ar thuairim phráinneach nó ar chinneadh ceangailteach práinneach faoi Airteagal 66 de Rialachán (AE) 2016/679. Ar chúiseanna deimhneachta dlíthiúla, níor cheart feidhm a bheith ag na caibidlí sin maidir le cásanna a tarchuireadh chuig réiteach díospóide roimh theacht i bhfeidhm an Rialacháin seo. Ba cheart feidhm a bheith acu maidir le gach cás a tharchuirtear chuig réiteach díospóide 15 mhí ó dháta theacht i bhfeidhm an Rialacháin seo.

(68)

Chuathas i gcomhairle leis an Maoirseoir Eorpach ar Chosaint Sonraí agus leis an mBord Eorpach um Chosaint Sonraí i gcomhréir le hAirteagal 42(1) agus (2) de Rialachán (AE) 2018/1725 ó Pharlaimint na hEorpa agus ón gComhairle (4) agus thug siad tuairim chomhpháirteach an 19 Meán Fómhair 2023,