22.2.2022   

GA

Iris Oifigiúil an Aontais Eorpaigh

L 41/8

RIALACHÁN CUR CHUN FEIDHME (AE) 2022/246 ÓN gCOIMISIÚN

an 13 Nollaig 2021

lena leasaítear Rialachán Cur Chun Feidhme (AE) 2017/39 a mhéid a bhaineann le hiarratais ar chabhair, íocaíocht ar an gcabhair agus seiceálacha ar an láthair

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 1308/2013 ó Pharlaimint na hEorpa agus ón gComhairle an 17 Nollaig 2013 lena mbunaítear comheagraíocht na margaí i dtáirgí talmhaíochta agus lena n-aisghairtear Rialacháin (CEE) Uimh. 922/72, (CEE) Uimh. 234/79, (CE) Uimh. 1037/2001, agus (CE) Uimh. 1234/2007 ón gComhairle (1), agus go háirithe Airteagal 25, pointe (b), de,

Ag féachaint do Rialachán (AE) Uimh. 1306/2013 ó Pharlaimint na hEorpa agus ón gComhairle an 17 Nollaig 2013 maidir leis an gcomhbheartas talmhaíochta a mhaoiniú, a bhainistiú agus faireachán a dhéanamh air agus lena n-aisghairtear Rialacháin (CEE) Uimh. 352/78, (CE) Uimh. 165/94, (CE) Uimh. 2799/98, (CE) Uimh. 814/2000, (CE) Uimh. 1290/2005 agus (CE) Uimh. 485/2008 ón gComhairle (2), agus go háirithe Airteagal 62(2), pointe (a), de,

De bharr an mhéid seo a leanas:

(1)

Leagtar síos le hAirteagal 4(6) de Rialachán Cur Chun Feidhme (AE) 2017/39 ón gCoimisiún (3) gur gá tacú leis na méideanna arna n-éileamh sna hiarratais ar chabhair le fianaise dhoiciméadach lena léirítear praghas na dtáirgí, an ábhair nó na seirbhísí arna soláthar mar aon le hadmháil nó cruthúnas ar íocaíocht nó a gcoibhéis. Níl tábhacht le praghas an táirge, an ábhair nó na seirbhíse i gcás ina n-úsáidtear rogha costas simplithe, agus níl sé comhsheasmhach leis na cuspóirí maidir le simpliú agus laghdú an ualaigh riaracháin i leith roghanna costas simplithe. Dá bhrí sin, is iomchuí ceanglais eile a leagan síos maidir le córais bunaithe ar chostas nó roghanna costas simplithe.

(2)

Le hAirteagal 5 de Rialachán Cur Chun Feidhme (AE) 2017/39, leagtar síos na coinníollacha i leith íocaíocht ar an gcabhair. Áirítear san fhianaise dhoiciméadach atá ag teastáil, i gcás roghanna costas simplithe, cruthúnas ar íocaíocht ar na táirgí a sholáthraítear agus/nó a dháiltear agus ar an ábhar nó na seirbhísí a sholáthraítear faoi na bearta tionlacain oideachais, faireachán, agus na gníomhaíochtaí meastóireachta agus poiblíochta. Níl an fhianaise dhoiciméadach sin ag teastáil i gcás córais bunaithe ar chostas, áfach. Léiríodh sa taithí a fuarthas nach bhfuil ceanglas den sórt cuí i dtaobh íocaíocht ar an gcabhair, gan beann ar cibé acu an úsáidtear córas bunaithe ar chostas nó rogha costas simplithe, agus nach bhfuil sé comhsheasmhach leis na cuspóirí maidir le simpliú agus laghdú an ualaigh riaracháin trí roghanna costas simplithe. Dá bhrí sin, ba cheart an ceanglas sin a bhaint.

(3)

I gcomhréir le hAirteagal 9(4) de Rialachán Cur Chun Feidhme (AE) 2017/39, i gcás cabhair a ndearnadh iarratas ina leith maidir le soláthar agus dáileadh táirgí agus bearta tionlacain oideachais, tá na seiceálacha riaracháin le forlíonadh le seiceálacha ar an láthair. Le hAirteagal 10(1) den Rialachán sin, leagtar síos liosta neamh-uileghabhálach fíoruithe atá le háireamh sna seiceálacha ar an láthair i gcás cabhair maidir le soláthar agus dáileadh táirgí. I bhfianaise na taithí a fuarthas, agus ar mhaithe le soiléireacht, ba cheart an liosta neamh-uileghabhálach fíoruithe sin atá le déanamh a chomhlánú, le haghaidh seiceálacha ar an láthair i gcás cabhair a chuirtear i bhfeidhm i gcomhair soláthar agus dáileadh táirgí mar aon le bearta tionlacain oideachais.

(4)

Dá bhrí sin, ba cheart Rialachán Cur Chun Feidhme (AE) 2017/39 a leasú dá réir.

(5)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Chomheagrú na Margaí Talmhaíochta,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán Cur Chun Feidhme (AE) 2017/39 mar a leanas:

(1)

in Airteagal 4(6), cuirtear an méid seo a leanas in ionad na chéad fhomhíre:

“Sonróidh na Ballstáit na doiciméid a chuirfear isteach mar thaca le hiarratais ar chabhair. Tacófar leis na méideanna arna n-éileamh sna hiarratais ar chabhair le fianaise dhoiciméadach lena léirítear an méid seo a leanas:

(a)

praghas na dtáirgí, an ábhair nó na seirbhíse a sholáthraítear mar aon le hadmháil nó cruthúnas ar íocaíocht nó a gcoibhéis; nó

(b)

i gcás ina n-údaróidh an Ballstát úsáid scálaí caighdeánacha na gcostas aonaid, maoiniú ar ráta comhréidh agus/nó cnapshuimeanna, go ndearnadh na cainníochtaí a sholáthar agus/nó a dháileadh chun críoch na scéime scoile.”;

(2)

leasaítear Airteagal 5 mar a leanas:

(a)

i mír 1, cuirtear an méid seo a leanas in ionad phointe (b):

“(b)

i gcás ina n-údaróidh na Ballstáit úsáid scálaí caighdeánacha na gcostas aonaid, maoiniú ar ráta comhréidh agus/nó cnapshuimeanna, ar an bhfianaise a thíolacadh go ndearnadh na cainníochtaí a sholáthar agus/nó a dháileadh chun críoch na scéime scoile.”;

(b)

cuirtear an méid seo a leanas in ionad mhír 2:

“2.   Maidir le cabhair a bhaineann le bearta tionlacain oideachais, faireachán, meastóireacht agus poiblíocht, ní íocfar aisti ach ar sholáthar an ábhair nó na seirbhísí lena mbaineann agus ar an bhfianaise dhoiciméadach ábhartha atá ag teastáil ón údarás inniúil a chur isteach nó, i gcás ina n-údaróidh na Ballstáit úsáid scálaí caighdeánacha na gcostas aonaid, maoiniú ar ráta comhréidh agus/nó cnapshuimeanna, ar an bhfianaise a chur isteach go ndearnadh an t-ábhar nó na seirbhísí a sholáthar.”;

(3)

in Airteagal 10, cuirtear an méid seo a leanas in ionad mhír 1:

“1.   Fíorófar leis na seiceálacha ar an láthair na nithe seo a leanas, go háirithe:

(a)

na taifid dá dtagraítear in Airteagal 6 de Rialachán Tarmligthe (AE) 2017/40, trí chomhthacaíocht agus comhlánú a dhéanamh ar na seiceálacha riaracháin leis an doiciméadacht ábhartha lena n-áirítear doiciméid airgeadais amhail sonraisc dhíolacháin agus cheannaigh, nótaí seachadta, asbhaintí as an mbanc nó cruthúnas eile ar íocaíocht agus a dtaifead sa chuntasaíocht;

(b)

tá úsáid na dtáirgí i gcomhréir le Rialachán (AE) Uimh. 1308/2013, le Rialachán Tarmligthe (AE) 2017/40 agus leis an Rialachán seo;

(c)

cur chun feidhme bearta tionlacain oideachais chun tacú le dáileadh táirgí, i gcás ina ndéantar seiceálacha ar an láthair in áitreabh an fhorais oideachais nó i gcás ina mbaineann an tseiceáil ar an láthair le cabhair arna héileamh a bhaineann le bearta tionlacain oideachais;

(d)

úsáid uirlisí poiblíochta oiriúnacha, i gcás ina ndéantar an tseiceáil ar an láthair in áitreabh an fhorais oideachais.”.

Airteagal 2

Tiocfaidh an Rialachán seo i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 13 Nollaig 2021.

Thar ceann an Choimisiúin

An tUachtarán

Ursula VON DER LEYEN

(1)   IO L 347, 20.12.2013, lch. 671.

(2)   IO L 347, 20.12.2013, lch. 549.

(3)  Rialachán Cur Chun Feidhme (AE) 2017/39 ón gCoimisiún an 3 Samhain 2016 lena leagtar síos rialacha maidir le cur i bhfeidhm Rialachán (AE) Uimh. 1308/2013 ó Pharlaimint na hEorpa agus ón gComhairle i dtaca le cabhair ón Aontas chun torthaí agus glasraí, bananaí agus bainne a sholáthar i bhforais oideachas (IO L 5, 10.1.2017, lch. 1).