(1)

L-Artikolu 13(1) tar-Regolament (KE) Nru 1967/2006 jipprojbixxi l-użu ta’ tagħmir irmunkat sa tliet mili nawtiċi mill-kosta jew sa livell ta’ fond ta’ 50 m meta dak il-fond jintlaħaq ’il ġewwa minn dik id-distanza mill-kosta.

(2)

Fuq talba ta’ xi Stat Membru, il-Kummissjoni tista’ tippermetti deroga mill-ewwel subparagrafu tal-Artikolu 13(1) tar-Regolament (KE) Nru 1967/2006, dment li jintlaħqu għadd ta’ kundizzjonijiet stabbiliti fl-Artikolu 13(5) u (9).

(3)

Għall-ewwel darba, ingħatat deroga mill-ewwel subparagrafu tal-Artikolu 13(1) għall-użu tal-bastimenti tas-sajd bit-tartarun għall-makku (Aphia minuta) fl-ilmijiet territorjali Spanjoli tal-Komunità Awtonoma tar-Reġjun ta’ Murcia, sal-31 ta’ Diċembru 2016, permezz tar-Regolament ta’ Implimentazzjoni tal-Kummissjoni (UE) Nru 773/2013 (2). Dik id-deroga kienet ibbażata fuq deroga addizzjonali mid-daqs minimu tal-malji adottata minn Spanja skont l-Artikolu 9(7) tar-Regolament (KE) Nru 1967/2006 minħabba li mingħajru s-sajd rilevanti ma setax iseħħ u kien ikollu sempliċiment jieqaf.

(4)

Permezz tar-Regolament ta’ Implimentazzjoni tal-Kummissjoni (UE) 2017/677 (3), ingħatat estensjoni tad-deroga sal-31 ta’ Diċembru 2019, filwaqt li tqies il-pjan ta’ ġestjoni għas-sajd li għalih ġiet applikata d-deroga stabbilita minn Spanja skont l-Artikolu 19 tar-Regolament (KE) Nru 1967/2006.

(5)

Spanja ressqet rapporti xjentifiċi dwar l-implimentazzjoni ta’ dan il-pjan ta’ ġestjoni fl-2017, fl-2018 u fl-2019.

(6)

Fis-26 ta’ Ġunju 2019, Spanja talbet lill-Kummissjoni testendi d-deroga mill-ewwel subparagrafu tal-Artikolu 13(1) lil hinn mill-31 ta’ Diċembru 2019. Spanja pprovdiet abbozz tal-pjan ta’ ġestjoni l-ġdid li jirregola s-sajd għall-makku (Aphia minuta) fl-ilmijiet interni tar-Reġjun ta’ Murcia f’konformità mal-Artikolu 19 tar-Regolament (KE) Nru 1967/2006 u pprovdiet informazzjoni aġġornata biex tiġġustifika t-tiġdid tad-deroga.

(7)

F’Settembru 2019, il-Kumitat Xjentifiku, Tekniku u Ekonomiku għas-Sajd (STECF) ivvaluta t-talba għal estensjoni tad-deroga u l-abbozz tal-pjan ta’ ġestjoni relatat (4). L-STECF ikkonkluda li l-pjan ta’ ġestjoni tat-tartaruni fir-Reġjun ta’ Murcia fil-perjodu 2016–2019 ġie implimentat kif suppost, u li l-kundizzjonijiet li fuqhom ingħatat id-deroga rigward id-distanza minima mill-kosta u l-fond minimu fl-2016 baqgħu jiġu ssodisfati. L-STECF jinnota li l-irkaptu tas-sajd jidher li huwa selettiv ħafna.

(8)

Fil-21 ta’ Diċembru 2019, Spanja adottat dan il-pjan ta’ ġestjoni l-ġdid (5).

(9)

Id-deroga li talbet Spanja tikkonforma mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(10)

Jeżistu limitazzjonijiet ġeografiċi speċifiċi meta wieħed iqis id-daqs limitat tal-blata kontinentali u d-distribuzzjoni spazjali tal-ispeċi fil-mira, li hija limitata esklussivament għal ċerti żoni fiż-żoni kostali f’fond li jkun anqas minn 50 metru.

(11)

Is-sajd ma għandu l-ebda impatt sinifikanti fuq l-ambjent tal-baħar, peress li t-tartaruni jinġibdu fil-kolonna tal-ilma u ma jmissux qiegħ il-baħar. Permezz tal-użu tal-ekosondi, is-sajd huwa selettiv ħafna bi ftit qabdiet inċidentali. Barra minn hekk, il-qabdiet mhux mixtieqa jintelqu immedjatament u ħajjin, b’sopravvivenza għolja ħafna.

(12)

Id-deroga li talbet Spanja tolqot għadd limitat ta’ 27 bastiment biss.

(13)

Is-sajd ma jistax isir b’tagħmir ieħor, minħabba li t-tartaruni huma l-uniku tagħmir regolat li għandu l-permess li jaqbad speċijiet żgħar daqs il-makku u bi mġiba ta’ ġliba f’ilmijiet kostali baxxi.

(14)

Il-bastimenti huma rreġistrati fiċ-Ċensiment tal-Flotta tas-Sajd Nazzjonali Operazzjonali Spanjola, għandhom esperjenza f’dan it-tip ta’ sajd ta’ aktar minn ħames snin u se joperaw taħt pjan ta’ ġestjoni.

(15)

Il-pjan ta’ ġestjoni jiggarantixxi li fil-ġejjieni ma jiżdiedx l-isforz tas-sajd, billi l-awtorizzazzjonijiet tas-sajd se jinħarġu biss lil 27 bastiment speċifiku u se jinvolvu kapaċità massima ta’ 116 Hp għal kull bastiment. Is-sajd ikompli jseħħ fil-jiem tax-xogħol (mit-Tnejn sal-Ġimgħa) matul Diċembru, Jannar u Frar. Barra minn hekk, il-kwota massima għal kull staġun tas-sajd tnaqqset għal 18,2 tunnellata. Abbażi tal-pjan ta’ ġestjoni, jekk jinqabeż, is-sajd jingħalaq sal-istaġun li jkun imiss.

(16)

Is-sajd ikkonċernat jissodisfa r-rekwiżiti tal-Artikolu 4(1) tar-Regolament (KE) Nru 1967/2006 li, permezz ta’ deroga, jippermetti s-sajd ’il fuq mill-ħabitati protetti jekk is-sajd isir mingħajr ma jintmess il-qiegħ tal-algi f’ċerti kundizzjonijiet.

(17)

Barra minn hekk, is-sajd ikkonċernat irid ikun tali li ma setax iseħħ mingħajr deroga mid-daqs minimu tal-malji applikabbli.

(18)

Madankollu, minħabba li s-sajd ikkonċernat huwa selettiv, għandu effett negliġibbli fuq l-ambjent tal-baħar, u mhux affettwat mid-dispożizzjonijiet fl-Artikolu 4(5) tar-Regolament (KE) Nru 1967/2006, Spanja fil-passat awtorizzat id-deroga mill-qies minimu tal-malji msemmi fl-Artikolu 9(7) tar-Regolament (KE) Nru 1967/2006.

(19)

L-Artikolu 9 tar-Regolament (KE) Nru 1967/2006 tħassar permezz tar-Regolament (UE) 2019/1241 tal-Parlament Ewropew u tal-Kunsill (6). Madankollu, skont il-punt 4, il-parti B tal-Anness IX tar-Regolament (UE) 2019/1241, id-derogi minn daqsijiet minimi tal-malji adottati abbażi tal-Artikolu 9 tar-Regolament (KE) Nru 1967/2006, li kienu fis-seħħ fl-14 ta’ Awwissu 2019, jistgħu jkomplu japplikaw, sakemm ma jwasslux għal żieda fil-qabdiet ta’ ħut li għadu qed jikber. Id-deroga estiża mitluba minn Spanja tikkonforma mal-kundizzjonijiet stabbiliti fl-Artikolu 15(5) u fil-punt 4 tal-Parti B tal-Anness IX tar-Regolament (UE) 2019/1241, peress li ma twassalx għal deterjorament tal-istandards ta’ selettività, b’mod partikolari f’termini ta’ żieda fil-qabdiet ta’ ħut li għadu qed jikber, eżistenti fl-14 ta’ Awwissu 2019, u għandha l-għan li tikseb l-objettivi u l-miri stabbiliti fl-Artikoli 3 u 4 ta’ dak ir-Regolament.

(20)

L-attivitajiet tas-sajd ikkonċernati jissodisfaw ir-rekwiżiti tar-reġistrazzjoni stabbiliti fl-Artikolu 14 tar-Regolament tal-Kunsill (KE) Nru 1224/2009 (7).

(21)

Is-sajd ikkonċernat jitwettaq f’distanza qasira ħafna mill-kosta u għaldaqstant ma jfixkilx l-attivitajiet tas-sajd ta’ bastimenti oħra.

(22)

Is-sajd ikkonċernat huwa regolat fil-pjan ta’ ġestjoni ta’ Spanja li jiżgura li l-qabdiet tal-ispeċijiet imsemmijin fl-Anness IX tar-Regolament (UE) 2019/1241 ikunu minimi.

(23)

Is-sajd bit-tartaruni ma għandux fil-mira ċ-ċefalopodi.

(24)

Il-pjan ta’ ġestjoni Spanjol fih miżuri għall-monitoraġġ tas-sajd, f’konformità mat-tielet subparagrafu tal-Artikolu 13(9) tar-Regolament (KE) Nru 1967/2006.

(25)

Għaldaqstant, jenħtieġ li d-deroga mitluba tingħata.

(26)

Spanja jenħtieġ li tirrapporta lill-Kummissjoni fi żmien xieraq u f’konformità mal-pjan ta’ monitoraġġ previst fil-pjan ta’ ġestjoni Spanjol.

(27)

B’limitu fid-durata tad-deroga jkunu jistgħu jittieħdu miżuri ta’ ġestjoni korrettivi fil-pront, f’każ li l-monitoraġġ tal-pjan ta’ ġestjoni jkun juri status ta’ konservazzjoni dgħajjef għall-istokk sfruttat, filwaqt li jkun hemm lok li tissaħħaħ il-bażi xjentifika għal pjan ta’ ġestjoni mtejjeb. Għalhekk, it-tmiem tad-deroga jenħtieġ li jiġi stabbilit fi tmiem l-istaġun tas-sajd. Għaldaqstant, jenħtieġ li d-deroga tkun tapplika sal-1 ta’ Marzu 2023.

(28)

Peress li d-deroga mogħtija mir-Regolament ta’ Implimentazzjoni (UE) 2017/677 skadiet fil-31 ta’ Diċembru 2019, sabiex tiġi żgurata l-kontinwità legali, dan ir-Regolament jenħtieġ li japplika b’effett mill-1 ta’ Jannar 2020. Għal raġunijiet ta’ ċertezza legali, dan ir-Regolament jenħtieġ li jidħol fis-seħħ b’urġenza.

(29)

Il-miżuri previsti f’dan ir-Regolament huma f’konformità mal-opinjoni tal-Kumitat għas-Sajd u l-Akkwakultura,

(a)

li jkunu rreġistrati f’ċensiment marittimu ġestit mid-Direttorat Ġenerali għall-Agrikultura, il-Bhejjem, is-Sajd u l-Akkwakultura tal-Komunità Awtonoma tar-Reġjun ta’ Murcia;

(b)

li jkollhom esperjenza dimostrabbli fis-sajd ta’ aktar minn ħames snin u li ma huma involuti fl-ebda żieda futura fl-isforz tas-sajd previst;

(c)

li għandhom awtorizzazzjoni għas-sajd u li joperaw skont il-pjan ta’ ġestjoni li adottat Spanja skont l-Artikolu 19(2) tar-Regolament (KE) Nru 1967/2006.