(1)

De bhun Rialachán (CE) Uimh. 1924/2006, tá toirmeasc ar mhaímh shláinte a dhéantar i leith bianna ach amháin má tá siad údaraithe ag an gCoimisiún i gcomhréir leis an Rialachán sin agus más rud é go n-áirítear iad i liosta de mhaímh cheadaithe.

(2)

Foráiltear le Rialachán (CE) Uimh. 1924/2006 freisin go bhféadfaidh oibreoirí gnólachtaí bia iarratais ar údaruithe i leith maímh shláinte a chur faoi bhráid údarás inniúil náisiúnta de chuid Ballstáit. Cuirfidh an t-údarás inniúil náisiúnta iarratais bhailí chuig an Údarás Eorpach um Shábháilteacht Bia (“an tÚdarás”) le haghaidh measúnú eolaíoch, agus cuirfidh siad iad chuig an gCoimisiún agus na Ballstáit chomh maith, ar mhaithe le faisnéis.

(3)

Tá an tÚdarás le tuairim a thabhairt ar an maíomh sláinte lena mbaineann.

(4)

Déanfaidh an Coimisiún cinneadh i dtaca le húdarú a thabhairt do mhaímh shláinte agus an tuairim ón Údarás á cur san áireamh aige.

(5)

Tar éis iarratas a fháil ó analyze & realize GmbH, iarratas a cuireadh isteach de bhun Airteagal 13(5) de Rialachán (CE) Uimh. 1924/2006, ceanglaíodh ar an Údarás tuairim a thabhairt ar mhaíomh sláinte a bhain le GlycoLite™ i ndáil le meáchan coirp a laghdú (Ceist Uimh. EFSA-Q-2018-00611). Is mar seo a leanas a bhí an fhoclaíocht sa mhaíomh a mhol an t-iarratasóir: “Cabhraíonn GlycoLite™ le meáchan coirp a laghdú”.

(6)

Fuair an Coimisiún, na Ballstáit agus an t-iarratasóir an tuairim eolaíoch (2) maidir leis an maíomh sin ón Údarás inar thángthas ar an gconclúid, ar bhonn na sonraí a cuireadh i láthair, nár leor an fhianaise a cuireadh ar fáil chun a shuí go bhfuil caidreamh cúise agus éifeachta idir eastóscán uiscí ó phónairí duánacha bána (Phaseolus vulgaris L.) a chaitheamh, eastóscán atá caighdeánaithe ag a ghníomhaíocht thoirmeascach α-aimileáis in vitro (GlycoLiteTM), agus meáchan coirp a laghdú mar chuid de shrianadh fuinnimh nó nuair a itear ad libitum. Dá réir sin, ós rud é nach gcomhlíonann an maíomh sin ceanglais Rialachán (CE) Uimh. 1924/2006 lena chur san áireamh i liosta an Aontais de mhaímh cheadaithe, níor cheart é a údarú.

(7)

Tar éis iarratas a fháil ó BioGaia AB, iarratas a cuireadh isteach de bhun Airteagal 13(5) de Rialachán (CE) Uimh. 1924/2006, bhí de cheangal ar an Údarás tuairim a thabhairt ar mhaíomh sláinte a bhain le losainní a leánn i mbéal duine agus ina bhfuil meascán de Lactobacillus reuteri DSM 17938 agus Lactobacillus reuteri ATCC PTA 5289, agus le gnáthfheidhmiú na ndrandal (Ceist Uimh. EFSA-Q-2019-00383). Is mar seo a leanas a bhí an fhoclaíocht sa mhaíomh a mhol an t-iarratasóir: “Cabhraíonn losainní ina bhfuil Lactobacillus reuteri DSM 17938 agus Lactobacillus reuteri ATCC PTA 5289 le gnáthfheidhmiú na ndrandal”.

(8)

Fuair an Coimisiún, na Ballstáit agus an t-iarratasóir an tuairim eolaíoch (3) maidir leis an maíomh ón Údarás inar thángthas ar an gconclúid, ar bhonn na sonraí a cuireadh i láthair, nár leor an fhianaise eolaíoch a cuireadh ar fáil chun a shuí go bhfuil caidreamh cúise agus éifeachta idir caitheamh na losainní a leánn i mbéal duine agus ina bhfuil meascán de Lactobacillus reuteri DSM 17938 agus Lactobacillus reuteri ATCC PTA 5289, agus gnáthfheidhmiú na ndrandal a choimeád. Dá réir sin, ós rud é nach gcomhlíonann an maíomh sin ceanglais Rialachán (CE) Uimh. 1924/2006 lena chur san áireamh i liosta an Aontais de mhaímh cheadaithe, níor cheart é a údarú.

(9)

Cuireadh na barúlacha a fuair an Coimisiún ó analyse & realize GmbH de bhun Airteagal 16(6) de Rialachán (CE) Uimh. 1924/2006 san áireamh agus an Rialachán seo á ghlacadh.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,