ORDÚ NA CÚIRTE (an tOchtú Dlísheomra)
[Téacs a leasaíodh le hOrdú an 20 Bealtaine 2026]
(Tarchur chun réamhrialú – Airteagal 99 de Rialacha Nós Imeachta na Cúirte Breithiúnais – Freagra gan aon amhras réasúnach a fhágáil – Freagra a fhéadfar a bhaint go soiléir as an gcásdlí atá ann – Gréasán tras-Eorpach iompair – Rialachán (AE) Uimh. 1315/2013 – Bonneagar iompair de bhóthar – Airteagal 19(d) – Limistéir pháirceála – Airteagal 39(2)(c) – Limistéir scíthe – Rialachán (CE) Uimh. 561/2006 – Airteagal 8a – Faisnéis maidir le limistéir pháirceála shábháilte shlána – Reachtaíocht náisiúnta lena dtoirmisctear limistéir seirbhíse líonra mótarbhealaí a thógáil, lena n‑áirítear limistéir pháirceála shlána, ar thalamh príobháideach – Airteagal 56 CFAE – Neamhfheidhmeacht – Staid inmheánach amháin)
I gCás C‑439/25,
IARRAIDH ar réamhrialú faoi Airteagal 267 CFAE, ó Curtea de Apel Timişoara (an Chúirt Achomhairc, Timişoara, an Rómáin), trí bhreith an 10 Meitheamh 2025, a fuarthas ag an gCúirt an 4 Iúil 2025, sna himeachtaí
[Mar a leasaíodh le hordú an 20 Bealtaine 2026] OMV Petrom Marketing SRL
v
Compania Naţională de Administrare a Infrastructurii Rutiere SA,
ZR,
LN,
tugann AN CHÚIRT (an tOchtú Dlísheomra),
agus í comhdhéanta mar seo a leanas: O. Spineanu-Matei, Uachtarán Dlísheomra, N. Piçarra (Rapóirtéir) agus N. Fenger, Breithiúna,
Abhcóide Ginearálta: A. Rantos,
Cláraitheoir: A. Calot Escobar,
tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt trí ordú réasúnaithe i gcomhréir le hAirteagal 99 de Rialacha Nós Imeachta na Cúirte Breithiúnais,
an tOrdú seo a leanas:
Ordú
|
1 |
Baineann an iarraidh ar réamhrialú le léiriú ar aithris 6, ar Airteagal 19(d), agus ar Airteagal 39(2)(c) de Rialachán (AE) Uimh. 1315/2013 ó Pharlaimint na hEorpa agus ón gComhairle an 11 Nollaig 2013 maidir le treoirlínte an Aontais chun an gréasán tras-Eorpach iompair a fhorbairt agus lena n‑aisghairtear Cinneadh Uimh. 661/2010/AE (IO 2013 L 348, lch. 1), ar Airteagal 8a de Rialachán (CE) Uimh. 561/2006 ó Pharlaimint na hEorpa agus ón gComhairle an 15 Márta 2006 maidir le comhchuibhiú reachtaíochta sóisialta áirithe a bhaineann le hiompar de bhóthar agus lena leasaítear Rialacháin (CEE) Uimh. 3821/85 agus (CE) Uimh. 2135/98 ón gComhairle agus lena n‑aisghairtear Rialachán (CEE) Uimh. 3820/85 ón gComhairle (IO 2006 L 102, lch. 1), arna leasú le Rialachán (AE) 2020/1054 ó Pharlaimint na hEorpa agus ón gComhairle an 15 Iúil 2020 (IO 2020 L 249, lch. 1), (‘Rialachán Uimh. 561/2006’) agus Airteagal 56 CFAE. |
|
2 |
[Mar a leasaíodh le hordú an 20 Bealtaine 2026] Rinneadh an iarraidh seo in imeachtaí idir OMV Petrom Marketing SRL (‘OMV’) agus Compania Națională de Administrare a Infrastructurii Rutiere SA (Cuideachta Náisiúnta um Riarachán Bonneagair Bóithre, an Rómáin) (‘CNAIR’) agus ZR agus LN maidir le bailíocht gníomhartha riaracháin lenar fhormheas CNAIR tógáil, ar thalamh príobháideach gar do mhótarbhealach A1 i mbardas Pecica (an Rómáin), limistéar páirceála slán, stáisiún seirbhíse dáilte breosla, stáisiún mearluchtaithe do charranna leictreacha agus limistéar cóiríochta le seirbhísí. |
An dlí lena mbaineann
Dlí an Aontais Eorpaigh
An Dlí Príomha
|
3 |
Faoin gcéad mhír d’Airteagal 56 CFAE, tá toirmeasc ar shrianta ar an tsaoirse chun seirbhísí a sholáthar laistigh den Aontas Eorpach i gcás náisiúnaigh de chuid Ballstáit atá bunaithe i mBallstát seachas Ballstát an duine dá bhfuil na seirbhísí beartaithe. |
Rialachán Uimh. 561/2006
|
4 |
Foráiltear le hAirteagal 8a de Rialachán Uimh. 561/2006: ‘1. Áiritheoidh an Coimisiún [Eorpach] go mbeidh rochtain éasca ag tiománaithe atá ag gabháil d’iompar earraí agus paisinéirí de bhóthar ar fhaisnéis maidir le limistéir pháirceála shábháilte shlána. Foilseoidh an Coimisiún liosta de na limistéir pháirceála go léir atá deimhnithe, ionas gur féidir le tiománaithe tairbhe a bhaint as an méid seo a leanas:
Foilseofar liosta na limistéar páirceála sin ar shuíomh gréasáin oifigiúil aonair a nuashonrófar go rialta. [...] 3. Féadfaidh gach limistéar páirceála atá deimhnithe a léiriú go bhfuil siad deimhnithe i gcomhréir le caighdeáin agus nósanna imeachta an Aontais. I gcomhréir le hAirteagal 39(2)(c) de Rialachán [Uimh. 1315/2013], tá na Ballstáit le cruthú limistéar páirceála d’úsáideoirí tráchtála a spreagadh. [...]’ |
Rialachán Uimh. 1315/2013
|
5 |
Aisghaireadh Rialachán Uimh. 1315/2013 le héifeacht ón 18 Iúil 2024, de bhun Airteagal 68 de Rialachán (AE) 2024/1679 ó Pharlaimint na hEorpa agus ón gComhairle an 13 Meitheamh 2024 maidir le treoirlínte an Aontais chun an gréasán tras-Eorpach iompair a fhorbairt, lena leasaítear Rialacháin (AE) 2021/1153 agus (AE) Uimh. 913/2010 agus lena n‑aisghairtear Rialachán (AE) Uimh. 1315/2013 (IO L, 2024/1679). I bhfianaise dháta fhíorais na díospóide sna príomhimeachtaí, tá sé fós infheidhme ratione temporis maidir leis an díospóid sin mar sin féin. |
|
6 |
Luadh an méid seo a leanas in aithris 6 de Rialachán Uimh. 1315/2013: ‘Ní foláir a chur san áireamh i mbeartas an ghréasáin thras-Eorpaigh iompair an forás atá tagtha ar bheartais iompair agus ar úinéireacht an bhonneagair. Is iad na Ballstáit fós an príomheintiteas atá i gceannas ar an mbonneagar iompair a chruthú agus a chothabháil. Anois, áfach, tá eintitis eile ábhartha freisin, lena n‑áirítear comhpháirtithe na hearnála príobháidí, i dtaobh gréasán tras-Eorpach iompair ilmhódach a chur chun feidhme, agus i dtaobh na n‑infheistíochtaí lena mbaineann, lena n‑áirítear údaráis réigiúnacha agus áitiúla, bainisteoirí bonneagair, lamhaltóirí nó údaráis chalafort agus aerfort.’ |
|
7 |
Foráiltear le hAirteagal 1(1) den Rialachán sin, dar teideal ‘Ábhar’: ‘Leis an Rialachán seo, bunaítear treoirlínte chun gréasán tras-Eorpach iompair a fhorbairt a mbeidh struchtúr déchisealach aige ina mbeidh an gréasán cuimsitheach agus an croíghréasán, agus an cróighréasán sin á bhunú ar bhonn an ghréasáin chuimsithigh.’ |
|
8 |
Is mar seo a leanas a bhí an fhoclaíocht in Airteagal 19 den Rialachán sin, dar teideal ‘Tosaíochtaí d’fhorbairt an bhonneagair de bhóthar’: ‘Agus tionscadail leasa choitinn á gcur chun cinn a bhfuil baint acu le bonneagar bóithre, beidh tosaíocht, anuas ar na tosaíochtaí ginearálta a leagtar amach in Airteagal 10, ag an méid seo a leanas: [...]
[...]’ |
|
9 |
Foráiltear le hAirteagal 39 den Rialachán sin, dar teideal ‘Ceanglais ó thaobh an bhonneagair de’, i mír 2 de: ‘Comhlíonfaidh bonneagar an chroíghréasáin na ceanglais uile a leagtar amach i gCaibidil II. Ina theannta sin, comhlíonfaidh bonneagar an chroíghréasáin na ceanglais seo a leanas, gan dochar do mhír 3: [...] (c) i gcás bonneagair iompair de bhóthar: [...]
[...]’ |
Dlí na Rómáine
|
10 |
Foráiltear le hAirteagal 2(1) go (3) de Ordonanța Guvernului nr. 43/1997 privind regimul juridic al drumurilor (Ordú Rialtais Uimh. 43/1997 maidir leis na rialacha dlíthiúla lena rialaítear trácht ar bhóithre) an 28 Lúnasa 1997 (arna fhoilsiú in Monitorul Oficial al României, Cuid I, Uimh. 237 an 29 Meitheamh 1998), sa leagan is infheidhme maidir leis an díospóid sna príomhimeachtaí (‘OG Uimh. 43/1997’): ‘(1) Is cuid den ghréasán iompair náisiúnta iad bóithre. (2) Is éard atá sa ghréasán bóithre lánaí cumarsáide talún atá deartha go speisialta le haghaidh cúrsaíocht feithiclí agus coisithe. (3) Is cuid dhílis den ghréasán bóithre iad: [...], áiteanna stad agus páirceála [...], limistéir seirbhíse nó rialaithe [...]’ |
|
11 |
Luaitear an méid seo a leanas in Airteagal 6(1)(a) de OG Uimh. 43/1997: ‘(1) Tagann bóithre náisiúnta faoi réimse poiblí an Stáit agus áirítear leo bóithre náisiúnta a sholáthraíonn naisc le príomhchathair na tíre, le príomhchathracha chontae, le cuspóirí leasa náisiúnta, lena chéile agus le tíortha comharsanacha, agus ar féidir iad a aicmiú mar seo a leanas:
|
An díospóid sna príomhimeachtaí agus na ceisteanna a tarchuireadh
|
12 |
Idir mí Iúil 2020 agus mí na Nollag 2021, ghlac CNAIR roinnt gníomhartha lena bhformheastar limistéir seirbhíse a thógáil ar dhá dháileacht talún phríobháideacha ar le ZR agus le LN iad, atá suite gar do mhótarbhealach A1 i mbardas Pecica, lena n‑áirítear limistéar páirceála sláine, stáisiún seirbhíse dáilte breosla, stáisiúin mhearluchtaithe do charranna leictreacha agus limistéar cóiríochta le seirbhísí. |
|
13 |
An 15 Nollaig 2021, d’eisigh méara bhardas Pecica ceadanna tógála do ZR agus LN le haghaidh na limistéar sin. |
|
14 |
[Mar a leasaíodh le hordú an 20 Bealtaine 2026] An 17 Nollaig 2021, dhíol ZR agus LN an talamh lena mbaineann le OMV agus shann siad dó na cearta uile a eascraíonn as na húdaruithe ábhartha. Anois agus é ina úinéir ar an talamh sin, thug OMV faoi na limistéir sin a thógáil de réir na gceadanna a eisíodh. |
|
15 |
[Mar a leasaíodh le hordú an 20 Bealtaine 2026] I mí Aibreáin 2022, thionscain CNAIR imeachtaí dlí i gcoinne ZR agus LN ag iarraidh, ar an gcéad dul síos, go gcuirfí ar neamhní na fógraí, na comhaontuithe agus na húdaruithe a d’eisigh sé dóibh i ndáil le tógáil na limistéar sin, agus na gníomhartha go léir a glacadh ar an mbonn sin, agus, ar an dara dul síos, go n‑athbhunófaí an talamh. Rinne OMV iarratas ar idiragairt sna himeachtaí sin. |
|
16 |
Le breithiúnas an 3 Aibreán 2024, dhiúltaigh Tribunalul Arad (Ard-Chúirt Arad, an Rómáin) do chaingean CNAIR toisc í a bheith gan bhunús, agus chinn sí, go bunúsach, go gceadaítear leis an dlí náisiúnta limistéir scíthe agus pháirceála a thógáil ar thalamh príobháideach. |
|
17 |
Le breithiúnas an 5 Samhain 2024, sheas Curtea de Apel Timişoara (Cúirt Achomhairc Timişoara, an Rómáin) le hachomharc CNAIR agus chuir sé breithiúnas an 3 Aibreán 2024 ar neamhní. Ag brath ar mhíreanna 1 go 3 d’Airteagal 2 agus ar Airteagal 6(1)(a) de OG Uimh. 43/1997, mheas sí go bhfuil limistéir seirbhíse an ghréasáin mótarbhealaí, lena n‑áirítear limistéir pháirceála shlána, ina gcuid lárnach den ghréasán bóithre leasa náisiúnta agus, dá bhrí sin, nach mór iad a thógáil ar thalamh atá i bhfearann poiblí an Stáit. |
|
18 |
[Mar a leasaíodh le hordú an 20 Bealtaine 2026] Thug OMV caingean le haghaidh athbhreithniú os comhair na cúirte sin, arb í an chúirt a rinne an tarchur í, i gcoinne bhreithiúnas an 5 Samhain 2024, ag maíomh gur sháraigh an breithiúnas sin roinnt forálacha de Rialacháin Uimh. 561/2006 agus Uimh. 1315/2013 agus prionsabal na saoirse chun seirbhísí a sholáthar a ráthaítear le hAirteagal 56 CFAE. |
|
19 |
Maidir leis an sárú líomhnaithe ar fhorálacha Rialachán Uimh. 561/2006 agus Rialachán Uimh. 1315/2013, tugann an chúirt a rinne an tarchur dá haire nach bhfuil aon riail sna Rialacháin sin a bhaineann le cineál poiblí nó príobháideach talún atá beartaithe chun freastal ar limistéir pháirceála nó seirbhíse ar an ngréasán mótarbhealaí. Mar sin féin, tá amhras uirthi an gcuirtear cosc le dlí an Aontais ar reachtaíocht náisiúnta lena dtoirmisctear limistéir den sórt sin a thógáil ar thalamh príobháideach agus, dá bhrí sin, fiafraíonn sí an gá Airteagal 8a de Rialachán Uimh. 561/2006 agus Airteagal 19(d) agus Airteagal 39(2)(c) de Rialachán Uimh. 1315/2013 a léiriú sa chaoi go n‑aithnítear an ceart chun na limistéir sin a thógáil ar thalamh den sórt sin. |
|
20 |
Tugann an chúirt sin faoi deara freisin nach luaitear in aithris 6 sa bhrollach a ghabhann le Rialachán Uimh. 1315/2013 aon chearta a thabharfaí do ‘chomhpháirtithe san earnáil phríobháideach’ i réimse na ngréasán tras-Eorpach iompair. Thairis sin, ní leor, dar leis, an tábhacht a bhaineann leis na comhpháirtithe sin maidir le gréasán ilmhódach tras-Eorpach iompair a chruthú chun cosc a chur ar Bhallstát toirmeasc a thabhairt isteach ar thógáil limistéar páirceála nó limistéar seirbhíse gréasáin mótarbhealaigh ar thalamh príobháideach. |
|
21 |
[Mar a leasaíodh le hordú an 20 Bealtaine 2026] Maidir leis an sárú líomhnaithe ar Airteagal 56 CFAE, tugann an chúirt a rinne an tarchur dá haire, ar an gcéad dul síos, gur duine dlítheanach Rómánach é OMV a sholáthraíonn a sheirbhísí ar chríoch na Rómáine agus, ar an dara dul síos, gur staid inmheánach amháin sa Rómáin é tógáil agus oibriú limistéar páirceála agus seirbhíse sa chríoch sin, go háirithe ós rud é nach dtaistealódh náisiúnaigh de chuid Ballstát eile a d’fhéadfadh a bheith ina bhfaighteoirí amach anseo ar na seirbhísí a sholáthraíonn OMV sna limistéir sin go dtí an Rómáin chun na seirbhísí sin a fháil, ar seirbhísí iad atá coimhdeach le hidirthuras de bhóthar. Cuireann an chúirt sin in iúl, thairis sin, go bhfuil feidhm gan idirdhealú ag an toirmeasc ar limistéir den sórt sin a thógáil ar thalamh príobháideach atá cóngarach do mhótarbhealaí maidir le gach oibreoir, gan beann ar a náisiúntacht ná ar náisiúntacht fhaighteoirí na seirbhísí sin agus nach cosúil go bhfuil sé i bhfabhar go hindíreach soláthraithe seirbhíse atá bunaithe sa Rómáin. |
|
22 |
I bhfianaise, ar an gcéad dul síos, chineál cinntitheach an bhreithiúnais atá le tabhairt sna príomhimeachtaí agus, ar an dara dul síos, chineál bunúsach na saoirse chun seirbhísí a sholáthar san Aontas Eorpach, chastacht an limistéir atá i gceist agus rialacha sonracha dhlí an Aontais maidir le hiompar de bhóthar a bheith ann, measann an chúirt a rinne an tarchur go bhfuil sé úsáideach a iarraidh ar an gCúirt maidir le hinfheidhmeacht Airteagal 56 CFAE maidir le cás amhail an cás sna príomhimeachtaí, ina bhfuil sé ar intinn ag soláthraí seirbhíse Rómánach seirbhísí atá coimhdeach le hiompar de bhóthar ar mhótarbhealaí na Rómáine a sholáthar d’fhaighteoirí a d’fhéadfadh a bheith ina náisiúnaigh de Bhallstáit eile. |
|
23 |
Sna himthosca sin, chinn Curtea de Apel Timişoara (Cúirt Achomhairc Timişoara) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:
|
Na ceisteanna a tharchuirtear
|
24 |
Faoi Airteagal 99 dá Rialacha Nós Imeachta, féadfaidh an Chúirt, tráth ar bith, ar mholadh ón mBreitheamh is Rapóirtéir agus tar éis di an tAbhcóide Ginearálta a éisteacht, a chinneadh breith a thabhairt le hordú réasúnaithe i gcás ina bhféadfar freagra na gceisteanna a tharchuirtear le haghaidh réamhrialú a bhaint go soiléir ón gcásdlí atá ann nó i gcás nach n‑admhaítear aon amhras réasúnach leis an bhfreagra sin. |
|
25 |
Sa chás seo, ní mór Airteagal 99 de na Rialacha Nós Imeachta a chur i bhfeidhm ós rud é, ar an gcéad dul síos, nach bhfágann an freagra ar an gcéad cheist agus ar an dara ceist aon amhras réasúnach agus, ar an dara dul síos, gur féidir an freagra ar an tríú ceist a thuiscint go soiléir ó chásdlí na Cúirte Breithiúnais. |
An chéad cheist agus an dara ceist
|
26 |
Lena chéad dá cheist, arb iomchuí déileáil leo le chéile, fiafraíonn an chúirt a rinne an tarchur, go bunúsach, an gcuirtear cosc le hAirteagal 19(d) agus Airteagal 39(2)(c) de Rialachán Uimh. 1315/2013, arna léamh i gcomhar le haithris 6 den Rialachán sin, agus le hAirteagal 8a de Rialachán Uimh. 561/2006, ar reachtaíocht náisiúnta lena dtoirmisctear limistéir seirbhíse gréasáin mótarbhealaí a thógáil ar thalamh príobháideach. |
|
27 |
Ba cheart a mheabhrú ag an tús go mbunaítear le Rialachán Uimh. 1315/2013, i gcomhréir le hAirteagal 1(1) de, treoirlínte chun gréasán tras-Eorpach iompair a fhorbairt ina mbeidh struchtúr dhá shraith, ina mbeidh an gréasán cuimsitheach agus an croíghréasán, agus an gréasán sin bunaithe ar an ngréasán cuimsitheach. |
|
28 |
Ceanglaítear le hAirteagal 19(d) den Rialachán sin, lena rialaítear forbairt an ghréasáin chuimsithigh, ar na Ballstáit tosaíocht a thabhairt, agus tionscadail leasa choitinn a bhaineann le bonneagar bóithre á gcur chun cinn acu, do limistéir pháirceála iomchuí a bhfuil leibhéal leordhóthanach sábháilteachta agus slándála ag baint leo a sholáthar d’úsáideoirí tráchtála. |
|
29 |
Foráiltear le hAirteagal 39(2)(c) den Rialachán sin, a áirítear i gCaibidil III de, a bhaineann le forbairt an chroíghréasáin, d’fhorbairt limistéar scíthe thart ar gach 100 km ar mhótarbhealaí an ghréasáin sin, de réir riachtanais na sochaí, an mhargaidh agus an chomhshaoil, chun, inter alia, limistéir pháirceála iomchuí, shlána agus shábháilte a chur ar fáil d’úsáideoirí tráchtála. |
|
30 |
Is léir ó fhoclaíocht na bhforálacha sin go leagtar síos leo cuspóirí a bhaineann le forbairt limistéar scíthe agus páirceála, gan aon cheanglas a leagan amach, áfach, maidir le cé acu an talamh poiblí nó príobháideach é an talamh ar a bhfuil na limistéir sin le tógáil. |
|
31 |
Ní féidir amhras a chaitheamh ar an léiriú sin le haithris 6 de Rialachán Uimh. 1315/2013, nach luaitear ann ach go bhfuil baint ag eintitis seachas na Ballstáit, go háirithe ‘comhpháirtithe san earnáil phríobháideach’, faoi láthair le gréasán tras-Eorpach iompair ilmhódach a chruthú agus leis na hinfheistíochtaí is gá. In aon chás, leanann sé ó chásdlí socair nach bhfuil aon fheidhm dhlíthiúil cheangailteach ag brollach gnímh de chuid an Aontais agus nach féidir brath air chun forálacha iarbhír an ghnímh lena mbaineann a léiriú ar bhealach atá contrártha go soiléir dá bhfoclaíocht (féach, chuige sin, breithiúnais an 28 Meitheamh 2012, Caronna, C‑7/11, EU:C:2012:396, mír 40, agus an 20 Eanáir 2022, Air Berlin, C‑165/20, EU:C:2022:42, mír 55). |
|
32 |
Thairis sin, maidir le hAirteagal 8a de Rialachán Uimh. 561/2006, ceanglaítear le mír 1 de ar an gCoimisiún a áirithiú go mbeidh rochtain éasca ag tiománaithe ar fhaisnéis a bhaineann le limistéir pháirceála shábháilte shlána, agus liosta de limistéir pháirceála dheimhnithe a fhoilsiú ar shuíomh gréasáin oifigiúil a nuashonraítear go rialta. Luaitear i mír 3 den Airteagal 8a sin gur faoi na Ballstáit atá sé, i gcomhréir le hAirteagal 39(2)(c) de Rialachán Uimh. 1315/2013, cruthú limistéar páirceála d’úsáideoirí tráchtála a spreagadh. |
|
33 |
Amhail na forálacha dá dtagraítear i míreanna 28 agus 29 den ordú seo, ní mór a thabhairt faoi deara nach leagtar síos le hAirteagal 8a de Rialachán Uimh. 561/2006 aon cheanglas a bhaineann le cineál poiblí nó príobháideach na talún ar a dtógfar na limistéir seirbhíse den líonra mótarbhealaigh. Go háirithe, ní cheanglaítear ar na Ballstáit tógáil limistéar den sórt sin ar thalamh príobháideach a údarú. |
|
34 |
I bhfianaise an mhéid sin roimhe seo, is é an freagra ar an gcéad dá cheist nach mór Airteagal 19(d) agus Airteagal 39(2)(c) de Rialachán Uimh. 1315/2013, arna léamh i gcomhar le haithris 6 den Rialachán sin, agus Airteagal 8a de Rialachán Uimh. 561/2006 a léiriú sa chaoi nach gcuirtear cosc leo ar reachtaíocht náisiúnta lena dtoirmisctear limistéir seirbhíse gréasáin mótarbhealaí a thógáil ar thalamh príobháideach. |
An tríú ceist
|
35 |
Lena tríú ceist, fiafraíonn an chúirt a rinne an tarchur, go bunúsach, an gá Airteagal 56 CFAE a léiriú sa chaoi go bhfuil feidhm aige maidir le cuideachta atá bunaithe i mBallstát atá, tar éis di limistéar seirbhíse gréasáin mótarbhealaigh a thógáil sa Bhallstát sin, faoi réir, i gcomhthéacs imeachtaí breithiúnacha lena n‑iarrtar údaruithe arna n‑eisiúint chun na críche sin a neamhniú, reachtaíocht náisiúnta lena dtoirmisctear limistéir den sórt sin a thógáil ar thalamh príobháideach. |
|
36 |
De réir cásdlí socair, níl feidhm ag forálacha CFAE maidir le saoirse bunaíochta, saoirse chun seirbhísí a sholáthar agus saorghluaiseacht chaipitil maidir le cás atá teoranta ar gach bealach laistigh d’aon Bhallstát amháin (breithiúnais an 15 Samhain 2016, Ullens de Schooten, C‑268/15, EU:C:2016:874, mír 47 agus an cásdlí dá dtagraítear, agus an 2 Márta 2023, Bursa Română de Mărfuri, C‑394/21, EU:C:2023:146, mír 48). |
|
37 |
I gcás den sórt sin, is faoin gcúirt a rinne an tarchur atá sé na cúiseanna a chur in iúl, in ainneoin gur díospóid inmheánach amháin í, go bhfuil nasc idir an díospóid atá ar feitheamh os a comhair agus forálacha dhlí an Aontais a bhaineann leis na saoirsí bunúsacha a fhágann gur gá léiriú a dhéanamh ar an gceist a tharchuirtear chun réamhrialú chun go bhféadfaidh sí breithiúnas a thabhairt sa díospóid sin (féach, chuige sin, breithiúnais an 15 Samhain 2016, Ullens de Schooten, C‑268/15, EU:C:2016:874, mír 55, agus an 17 Deireadh Fómhair 2024, FA.RO. di YK & C., C‑16/23, EU:C:2024:886, mír 40). |
|
38 |
Ní mór a shuíomh san iarraidh ar réamhrialú an nascfhachtóir sin le tosca nithiúla agus áirithe, d’eisiamh comharthaí teibí nó hipitéiseacha. Dá bhrí sin, ní féidir leis an gcúirt a rinne an tarchur, i gcás inmheánach amháin, fianaise a thíolacadh lena bhféadfar gan nasc den sórt sin a chur as an áireamh, ach ní mór di, os a choinne sin, fianaise oibiachtúil chomhsheasmhach a sholáthar lena gcuirfear ar chumas na Cúirte a fhíorú gurb ann dó (féach, chuige sin, breithiúnais an 2 Márta 2023, Bursa Română de Mărfuri, C‑394/21, EU:C:2023:146, mír 52 agus an cásdlí dá dtagraítear, agus an 22 Feabhra 2024, Ente Cambiano società cooperativa per azioni, C‑660/22, EU:C:2024:152, mír 28 agus an cásdlí dá dtagraítear). |
|
39 |
[Mar a leasaíodh le hordú an 20 Bealtaine 2026] Sa chás seo, tugann an chúirt a rinne an tarchur féin dá haire, ar an gcéad dul síos, gur duine dlítheanach Rómánach é OMV a sholáthraíonn a sheirbhísí ar chríoch na Rómáine agus, ar an dara dul síos, gur staid inmheánach amháin don Rómáin é tógáil agus oibriú limistéar seirbhíse an líonra mótarbhealaigh sa chríoch sin. Tugann sí dá haire, thairis sin, go bhfuil feidhm gan idirdhealú ag an toirmeasc, a leagtar síos leis an reachtaíocht náisiúnta, ar limistéir den sórt sin a thógáil ar thalamh príobháideach maidir le gach soláthraí seirbhísí den sórt sin, gan beann ar a náisiúntacht agus ar náisiúntacht fhaighteoirí na seirbhísí a sholáthraíonn siad, agus nach ndealraíonn sé go bhfuil sé i bhfabhar go hindíreach soláthraithe seirbhísí atá bunaithe sa Rómáin. |
|
40 |
[Mar a leasaíodh le hordú an 20 Bealtaine 2026] I gcomhthéacs den sórt sin, a aithníonn an chúirt sin, atá inmheánach sa Bhallstát lena mbaineann amháin, cuireann an chúirt sin in iúl freisin go bhfuil na seirbhísí atá beartaithe ag OMV a sholáthar sna réimsí atá i gceist sna príomhimeachtaí coimhdeach le hiompar de bhóthar ar mhótarbhealaí na Rómáine, agus mar thoradh air sin nach dtaistealódh náisiúnaigh Ballstát eile a d’fhéadfadh iad a fháil amach anseo go dtí an Rómáin ar an gcúis sin amháin. |
|
41 |
In aon chás, ní leor éileamh go dtiocfaidh cuid de bhonn custaiméirí soláthraí seirbhíse amach anseo ó Bhallstát seachas Ballstát a bhunaithe chun a shuíomh gurb ann do staid trasteorann, a d’fhéadfadh teacht faoi raon feidhme Airteagal 56 CFAE (féach, chuige sin, breithiúnas an 3 Nollaig 2020, BONVER WIN, C‑311/19, EU:C:2020:981, mír 25). |
|
42 |
I bhfianaise na mbreithnithe roimhe seo, is é an freagra ar an tríú ceist ná nach mór Airteagal 56 CFAE a léiriú sa chaoi nach bhfuil feidhm aige maidir le cuideachta atá bunaithe i mBallstát atá, tar éis dó limistéar seirbhíse gréasáin mótarbhealaigh a thógáil sa Bhallstát sin, faoi réir, i gcomhthéacs imeachtaí breithiúnacha lena n‑iarrtar údaruithe arna n‑eisiúint chun na críche sin a neamhniú, reachtaíocht náisiúnta lena dtoirmisctear limistéir den sórt sin a thógáil ar thalamh príobháideach. |
An ceathrú ceist
|
43 |
I bhfianaise an fhreagra a tugadh ar an tríú ceist, ní gá an ceathrú ceist a fhreagairt. |
Costais
|
44 |
Os rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. |
|
Ar na forais sin, rialaíonn an Chúirt (an tOchtú Dlísheomra) mar seo a leanas: |
|
|
|
Sínithe |
( *1 ) Teanga an cháis: an Rómáinis.
( i ) Rinneadh leasuithe teanga agus formáidithe ar leathanach 1 agus ar mhíreanna 2, 14, 15, 18, 21, 39 agus 40 tar éis dóibh a bheith foilsithe ar líne den chéad uair.