(1)

An 8 Aibreán 2020, chuir an chuideachta Sharda Cropchem España S.L. (“an t-iarratasóir”) iarratas faoi bhráid na Fraince ar aitheantas frithpháirteach de réir oird i gcomhréir le hAirteagal 33 de Rialachán (AE) Uimh. 528/2012 ar údarú náisiúnta don táirge bithicídeach Sojet (“an táirge bithicídeach”) a deonaíodh sa Ghearmáin cheana féin. Is feithidicíd de chineál táirge 18 é an táirge bithicídeach atá le húsáid faoi dhíon ag gairmithe in áitribh thionsclaíocha nó áitribh thrádála, i dteaghlaigh nó in áiteanna poiblí agus i dtithíocht ainmhithe chun cuileoga a shrianadh. Scaiptear an táirge bithicídeach in uisce agus cuirtear ar bhileoga cairtchláir é trína scuabadh. Is iad imíodaclóiprid agus cis-Tricos-9-éin na substaintí gníomhacha atá ann.

(2)

An 6 Deireadh Fómhair 2020, de bhun Airteagal 35(2) de Rialachán (AE) Uimh. 528/2012, tharchuir an Fhrainc agóidí chuig an ngrúpa comhordúcháin, inar léiríodh nach n-áirithítear le coinníollacha an údaraithe a leag an Ghearmáin síos go gcomhlíonann an táirge bithicídeach an ceanglas a leagtar síos in Airteagal 19(1), pointe (b)(iii), den Rialachán sin. Measann an Fhrainc gur gá trealamh cosanta pearsanta a chaitheamh, i.e. lámhainní cosanta atá frithsheasmhach in aghaidh ceimiceán (ábhar na lámhainní le sonrú ag sealbhóir an údaraithe mar chuid den eolas faoin táirge) agus forchóta aon úsáide de chineál 6 EN 13034 ar a laghad, chun a áirithiú go láimhseálfar an táirge bithicídeach go sábháilte. Dar leis an bhFrainc, na bearta teicniúla agus eagraíochtúla a d’fhéadfaí a chur i bhfeidhm i gcomhréir le Treoir 98/24/CE ón gComhairle (2), mar a leagtar amach san údarú a dheonaigh an Ghearmáin, ar bearta iad a d’fhéadfaí a dhéanamh in ionad trealamh cosanta pearsanta a chaitheamh, ní áirithítear cosaint leordhóthanach leis na bearta sin, mura sonraítear iad agus mura ndéantar meastóireacht orthu le linn mheasúnú an táirge bhithicídigh.

(3)

Measann an Ghearmáin go mbunaítear le Treoir 98/24/CE ord tosaíochta na mbeart maolaithe riosca chun oibrithe a chosaint, agus gur thábhachtaí dar léi go gcuirfí bearta teicniúla agus eagraíochtúla i bhfeidhm ná go mbeadh trealamh cosanta pearsanta á chaitheamh le linn don táirge bithicídeach a bheith á úsáid. Dar leis an nGearmáin, de bhun na Treorach sin, is faoin bhfostóir atá an cinneadh maidir leis na bearta teicniúla agus eagraíochtúla atá le cur i bhfeidhm, agus ós rud é go bhfuil réimse leathan de bhearta dá leithéid ann, níl sé indéanta cur síos ná meastóireacht a dhéanamh ar na bearta atá in údarú an táirge bhithicídigh.

(4)

Ós rud é nár tháinig an grúpa comhordúcháin ar aon chomhaontú, an 3 Márta 2021, tharchuir an Ghearmáin an agóid nach raibh réitithe chuig an gCoimisiún de bhun Airteagal 36(1) de Rialachán (AE) Uimh. 528/2012. Ar an gcaoi sin, chuir sí ráiteas mionsonraithe faoi bhráid an Choimisiúin maidir leis an tsaincheist faoinar theip ar na Ballstáit teacht ar chomhaontú agus na cúiseanna a bhí lena n-easaontas. Cuireadh an ráiteas sin ar aghaidh chuig na Ballstáit lena mbaineann agus chuig an iarratasóir.

(5)

Foráiltear le hAirteagal 2(3), pointe (b) agus pointe (c), de Rialachán (AE) Uimh. 528/2012 go mbeidh an Rialachán sin gan dochar do Threoir 89/391/CEE ón gComhairle (3) ná do Threoir 98/24/CE.

(6)

Léirítear le hAirteagal 19(1), pointe (b)(iii), de Rialachán (AE) Uimh. 528/2012 mar cheann de na critéir maidir le húdarú a dheonú nach bhfuil éifeachtaí do-ghlactha ag an táirge bithicídeach féin, agus nach bhfuil éifeachtaí do-ghlactha de thoradh a iarmhar, ar shláinte an duine.

(7)

Luaitear i bpointe 9 d’Iarscríbhinn VI a ghabhann le Rialachán (AE) Uimh. 528/2012 go mbeidh de thoradh ar chur i bhfeidhm na gcomhphrionsabal a leagtar síos san Iarscríbhinn sin maidir le meastóireacht a dhéanamh ar shainchomhaid le haghaidh táirgí bithicídeacha dá dtagraítear in Airteagal 19(1), pointe (b), den Rialachán sin, nuair a chuirfear le chéile iad leis na coinníollacha eile a leagtar síos in Airteagal 19 de, go ndéanfaidh na húdaráis inniúla nó an Coimisiún cinneadh cé acu is féidir nó nach féidir táirge bithicídeach a údarú. D’fhéadfadh srianta ar úsáid an táirge bhithicídigh nó ar choinníollacha eile a bheith ag gabháil le húdarú den sórt sin.

(8)

Luaitear i bpointe 18(d) d’Iarscríbhinn VI a ghabhann le Rialachán (AE) Uimh. 528/2012 go gcinnfear leis an measúnú riosca a dhéantar ar an táirge na bearta is gá chun daoine, ainmhithe agus an comhshaol a chosaint le linn ghnáthúsáid bheartaithe an táirge bhithicídigh agus i gcás is measa atá réalaíoch araon.

(9)

Léirítear le pointe 56(2) d’Iarscríbhinn VI a ghabhann le Rialachán (AE) Uimh. 528/2012 gurb é ceann de na conclúidí ar a dtiocfaidh an comhlacht meastóireachta nuair atá sé ag fíorú an gcomhlíontar na critéir a leagtar amach in Airteagal 19(1), pointe (b), gur féidir leis an táirge bithicídeach, faoi réir coinníollacha nó srianta sonracha, na critéir a chomhlíonadh.

(10)

Luaitear i bpointe 62 d’Iarscríbhinn VI a ghabhann le Rialachán (AE) Uimh. 528/2012 go gcinnfidh an comhlacht meastóireachta, i gcás inarb iomchuí, nach mbeifear in ann an critéar faoi Airteagal 19(1), pointe (b)(iii), den Rialachán sin a chomhlíonadh ach amháin má chuirtear bearta coisc agus cosanta i bhfeidhm lena n-áirítear dearadh próiseas oibre agus dearadh rialuithe innealtóireachta, úsáid trealaimh agus ábhar leordhóthanach, cur i bhfeidhm beart comhchoiteann cosanta agus, i gcás nach féidir risíocht a chosc trí mheáin eile, cur i bhfeidhm beart aonair cosanta lena n-áirítear trealamh cosanta pearsanta amhail análaitheoirí, maisc le haghaidh análú, rabhlaeir, lámhainní agus spéaclaí cosanta a chaitheamh, d’fhonn risíocht a laghdú i gcás oibreoirí gairmiúla.

(11)

Mar sin féin, ní fhoráiltear le pointe 62 d’Iarscríbhinn VI a ghabhann le Rialachán (AE) Uimh. 528/2012 go ndéanfar an measúnú as a dtagann an conclúid nach féidir an critéar faoi Airteagal 19(1), pointe (b)(iii), den Rialachán sin a chomhlíonadh ach amháin má chuirtear bearta coisc agus cosanta i bhfeidhm i gcomhréir le Treoir 98/24/CE. Ní fhoráiltear leis go sainráite ach oiread nach mbeadh feidhm ag an Treoir sin. Dá bhrí sin, níor cheart tátal a bhaint as na forálacha sin nach bhfuil feidhm ag Treoir 98/24/CE. Ina theannta sin, is ar fhostóirí a fhorchuirtear na hoibleagáidí ábhartha faoi Threoir 98/24/CE agus ní ar údaráis na mBallstát.

(12)

Foráiltear le hAirteagal 4 de Threoir 98/24/CE i gcás ina ndéantar measúnú ar aon riosca maidir le sábháilteacht agus sláinte oibrithe de thoradh oibreáin cheimiceacha a bheith i láthair, go bhfuil ar fhostóirí faisnéis bhreise a fháil ón soláthróir nó ó fhoinsí eile atá ar fáil go héasca agus i gcás inarb iomchuí, go mbeidh an measúnú sonrach maidir leis an riosca d’úsáideoirí arna bhunú ar bhonn reachtaíocht Aontais maidir le hoibreáin cheimiceacha mar chuid den fhaisnéis sin.

(13)

Leagtar síos le hAirteagal 6 de Threoir 98/24/CE ord tosaíochta na mbeart atá le déanamh ag an bhfostóir chun oibrithe a chosaint ó na rioscaí a bhaineann le hoibreáin cheimiceacha ag an obair. Tabharfar tús áite do shubstaint eile a chur in ionad na substainte guaisí, agus mura féidir é sin a dhéanamh, is gá an riosca ó shubstaint ghuaiseach do shábháilteacht agus sláinte oibrithe a laghdú a oiread agus is féidir trí bhearta cosanta agus coisc a chur i bhfeidhm. Mura féidir risíocht leis an tsubstaint ghuaiseach a chosc ar mhodh eile, ní mór a áirithiú go bhfuil na hoibrithe cosanta trí bhearta eile a chur i bhfeidhm lena n-áirítear trealamh cosanta pearsanta.

(14)

Agus modh úsáide an táirge bhithicídigh agus an fhaisnéis atá ar fáil ón gcomhlacht meastóireachta á gcur san áireamh, níor sainaithníodh aon bheart teicniúil ná eagraíochtúil dá leithéid san iarratas ar an táirge bithicídeach a údarú, ná le linn mheastóireacht an iarratais sin.

(15)

Dá bhrí sin measann an Coimisiún go gcomhlíonann an táirge bithicídeach an critéar a leagtar síos in Airteagal 19(1), pointe (b)(iii) de Rialachán (AE) Uimh. 528/2012, ar choinníoll go mbeidh an coinníoll seo a leanas maidir lena úsáid mar chuid den údarú agus ar lipéad an táirge bhithicídigh: “Is gá na nithe seo a leanas a chaitheamh agus an táirge bithicídeach á láimhseáil: lámhainní cosanta atá frithsheasmhach in aghaidh ceimiceán (ábhar na lámhainní le sonrú ag sealbhóir an údaraithe mar chuid den eolas faoin táirge) agus forchóta aon úsáide de chineál 6 EN 13034 ar a laghad nó a choibhéis. Tá sé sin gan dochar do chur i bhfeidhm Threoir 98/24/CE ón gComhairle agus reachtaíocht eile an Aontais i réimse na sláinte agus na sábháilteachta ag an obair”.

(16)

Mar sin féin, má shainaithníonn an t-iarratasóir ar údarú nó an t-údarás údaraithe bearta éifeachtacha teicniúla nó eagraíochtúla as a n-eascraíonn laghdú risíochta de leibhéal coibhéiseach nó níos airde, ba cheart na bearta sin a chur in ionad trealamh cosanta pearsanta a chaitheamh, agus ba cheart iad a shonrú san údarú agus ar lipéad an táirge bhithicídigh.

(17)

An 23 Samhain 2021, thug an Coimisiún an deis don iarratasóir barúlacha i scríbhinn a chur ar fáil i gcomhréir le hAirteagal 36(2) de Rialachán (AE) Uimh. 528/2012. Chuir an t-iarratasóir barúlacha ar fáil a chuir an Coimisiún san áireamh ina dhiaidh sin.

(18)

Tá na bearta dá bhforáiltear sa Chinneadh seo i gcomhréir le tuairim an Bhuanchoiste um Tháirgí Bithicídeacha,