|
15.11.2022 |
GA |
Iris Oifigiúil an Aontais Eorpaigh |
C 434/123 |
P9_TA(2022)0127
Meastacháin Pharlaimint na hEorpa ar ioncam agus ar chaiteachas don bhliain airgeadais 2023
Rún ó Pharlaimint na hEorpa an 7 Aibreán 2022 maidir le meastacháin Pharlaimint na hEorpa ar ioncam agus caiteachas don bhliain airgeadais 2023 (2021/2227(BUI))
(2022/C 434/28)
Tá Parlaimint na hEorpa,
|
— |
ag féachaint d’Airteagal 314 den Chonradh ar Fheidhmiú an Aontais Eorpaigh, |
|
— |
ag féachaint do Rialachán (AE, Euratom) 2018/1046 ó Pharlaimint na hEorpa agus ón gComhairle an 18 Iúil 2018 maidir leis na rialacha airgeadais is infheidhme maidir le buiséad ginearálta an Aontais, lena leasaítear Rialacháin (AE) Uimh. 1296/2013, (AE) Uimh. 1301/2013, (AE) Uimh. 1303/2013, (AE) Uimh. 1304/2013, (AE) Uimh. 1309/2013, (AE) Uimh. 1316/2013, (AE) Uimh. 223/2014, (AE) Uimh. 283/2014, agus Cinneadh Uimh. 541/2014/AE agus lena n-aisghairtear Rialachán (AE, Euratom) Uimh. 966/2012 (1) (“an Rialachán Airgeadais”), |
|
— |
ag féachaint do Rialachán (AE, Euratom) 2020/2093 ón gComhairle an 17 Nollaig 2020 lena leagtar síos an creat airgeadais ilbhliantúil do na blianta 2021 go 2027 (2), |
|
— |
ag féachaint do Chomhaontú Idirinstitiúideach an 16 Nollaig 2020 idir Parlaimint na hEorpa, Comhairle an Aontais Eorpaigh agus an Coimisiún Eorpach maidir leis an smacht buiséadach, le comhar in ábhair bhuiséadacha agus le bainistíocht fhónta airgeadais, agus maidir le hacmhainní dílse nua, lena n-áirítear treochlár i dtreo acmhainní dílse nua a thabhairt isteach (3), |
|
— |
ag féachaint do Rialachán (AE, Euratom) Uimh. 1023/2013 ó Pharlaimint na hEorpa agus ón gComhairle an 22 Deireadh Fómhair 2013 lena leasaítear Rialacháin Foirne Oifigigh an Aontais Eorpaigh agus Coinníollacha Fostaíochta Sheirbhísigh eile an Aontais Eorpaigh (4), |
|
— |
ag féachaint do na conclúidí ó chruinnithe Bhiúró Pharlaimint na hEorpa an 4 Deireadh Fómhair 2021 agus an 22 Samhain 2021; |
|
— |
ag féachaint do chonclúidí ón gComhairle an 10 Nollaig 2021 maidir le hiarrachtaí comhlántacha chun an Athléimneacht a Fheabhsú agus chun Bagairtí Hibrideacha a Chomhrac; |
|
— |
ag féachaint do Réamhaisnéis Eacnamaíoch an Gheimhridh, 2022, ón gCoimisiún, a foilsíodh an 10 Feabhra 2022; |
|
— |
ag féachaint don litir a seoladh an 7 Iúil 2020 ina raibh Feisirí de Pharlaimint na hEorpa ag tathant ar an Uachtarán Sassoli agus ar an Ard-Rúnaí Welle feabhas a chur ar shoghluaisteacht ghníomhach inbhuanaithe agus shábháilte i bParlaimint na hEorpa; |
|
— |
ag féachaint do Straitéis Mheántéarmach 2024 ó EMAS a ghlac an Coiste Stiúrtha Bainistíochta Comhshaoil sa Bhruiséil an 15 Nollaig 2020, |
|
— |
ag féachaint do na ceanglais bhreisíochta i dTreoir (AE) 2018/2001 ó Pharlaimint na hEorpa agus ón gComhairle an 11 Nollaig 2018 maidir le húsáid fuinnimh ó fhoinsí in-athnuaite a chur chun cinn (an Treoir maidir le Fuinneamh Inathnuaite), go háirithe Aithris 90 agus Airteagal 27 di, |
|
— |
ag féachaint don teachtaireacht ón gCoimisiún chuig Parlaimint na hEorpa, chuig an gComhairle Eorpach, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún maidir le Straitéis um an tSoghluaisteacht Inbhuanaithe agus Chliste – lena gcuirtear iompar Eorpach ar an mbóthar ceart don todhchaí (COM(2020)0789), go háirithe mír 9 di maidir le taisteal comhchoiteann, |
|
— |
ag féachaint dá rún an 29 Aibreán 2021 maidir le meastacháin Pharlaimint na hEorpa ar ioncam agus caiteachas don bhliain airgeadais 2022 (5), |
|
— |
ag féachaint dá rún an 21 Deireadh Fómhair 2021 maidir le seasamh na Comhairle ar dhréachtbhuiséad ginearálta an Aontais Eorpaigh don bhliain airgeadais 2022 (6), |
|
— |
ag féachaint do bhuiséad ginearálta an Aontais Eorpaigh don bhliain airgeadais 2022 (7) agus do na ráitis chomhpháirteacha a comhaontaíodh idir Parlaimint na hEorpa, an Chomhairle agus an Coimisiún atá i gceangal leis seo, |
|
— |
ag féachaint do thuarascáil an Ardrúnaí chuig an mBiúró maidir le réamhdhréacht de mheastacháin Pharlaimint na hEorpa don bhliain airgeadais 2023 a tharraingt suas, |
|
— |
ag féachaint don réamhdhréacht de na meastacháin arna dtarraingt suas ag an mBiúró an 7 Márta 2022 de bhun Rialacha 25(7) agus 102(1) de Rialacha Nós Imeachta Pharlaimint na hEorpa, |
|
— |
ag féachaint do na dréachtmheastacháin arna dtarraingt suas ag an gCoiste um Buiséid de bhun Riail 102(2) de Rialacha Nós Imeachta Pharlaimint na hEorpa, |
|
— |
ag féachaint do Riail 102 dá Rialacha Nós Imeachta, |
|
— |
ag féachaint don tuarascáil ón gCoiste um Buiséid (A9-0087/2022), |
|
A. |
de bhrí gurb ionann an buiséad a mhol an tArd-Rúnaí an 14 Feabhra 2022 don réamhdhréacht de mheastacháin na Parlaiminte do 2023 agus méadú 4,9 %; |
|
B. |
de bhrí gur ríomh an Coimisiún i Réamhaisnéis Eacnamaíoch an Gheimhridh, 2022, dá chuid gurbh é 4,9 % ráta boilscithe an Aontais Eorpaigh i ráithe dheiridh 2021 agus 2,9 % don bhliain iomlán; de bhrí go measann an Coimisiún go ndéanfar boilsciú a chobhsú ag 3.9 % in 2022 agus ag 1,9 % in 2023 tar éis na buaice a tharla ag deireadh 2021 agus tús 2022; de bhrí go bhfuil leibhéal boilscithe 2023 thar a bheith luaineach agus dothuartha faoi láthair; de bhrí go ndéanfaidh an Coiste um Buiséid faireachán ar a theacht chun cinn agus go ngníomhóidh sé dá réir, más gá; |
|
C. |
de bhrí go mbraitheann iontaoibh shaoránaigh na hEorpa sa Pharlaimint agus a Feisirí ar chumas na Parlaiminte féin cáilíocht na hoibre reachtaíochta agus grinnscrúdaithe a áirithiú agus na torthaí a chur in iúl; de bhrí nach mór don Pharlaimint sampla a thabhairt le taobh institiúidí eile agus, dá bhrí sin, a caiteachas a phleanáil agus a chur i gcrích go stuama agus go héifeachtúil agus na réaltachtaí eacnamaíocha forleathana a léiriú; |
|
D. |
de bhrí gur cheart buiséad na Parlaiminte a shocrú ar bhonn réalaíoch agus gur cheart é a bheith i gcomhréir le prionsabail an smachta bhuiséadaigh agus na bainistíochta fónta airgeadais; |
|
E. |
de bhrí go bhfuil sé ríthábhachtach guth daonlathach na Parlaiminte a chosaint, go háirithe i bhfianaise na staide geopholaitiúla atá ann faoi láthair, go háirithe an t-ionsaí neamhdhlisteanach cogaidh a rinne an Rúis ar an Úcráin agus na toghcháin don Pharlaimint atá ar na bacáin; de bhrí go bhfuil cibearbhagairtí i gcoinne na Parlaiminte ag fás as cuimse, lena n-áirítear bagairtí ó ghrúpaí státurraithe, ó thaobh líon na mbagairtí sin agus a shofaisticiúla is atá siad; de bhrí go n-éilíonn an caighdeán sa tionscal gur cheart 10 % den bhuiséad iomlán faisnéise, cumarsáide agus teicneolaíochta (TFC) a chaitheamh ar an gcibearshlándáil; de bhrí gur fhormheas an Biúró, le linn a chruinnithe an 4 Deireadh Fómhair 2021, stiúrthóireacht nua um chibearshlándáil a chruthú, agus go háirithe an tAonad um bagairtí cibearshlándála, um fhaireachán ar rioscaí agus um chomhlíonadh maidir le cosaint sonraí a thuairisciú, san Ard-Stiúrthóireacht um Nuálaíocht agus um Thacaíocht Theicniúil (AS ITEC) agus gur fhormheas sé na hacmhainní is gá a leithdháileadh; |
|
F. |
de bhrí gur bagairtí iad cibearionsaithe ní hamháin ar an bParlaimint ach ar institiúidí uile an Aontais; de bhrí go bhfuil comhar idirinstitiúideach ríthábhachtach chun na bagairtí sin a chosc agus a bhrath, chun faireachán a dhéanamh orthu agus chun freagairt dóibh ar bhealach leordhóthanach; de bhrí gurb é Ard-Stiúrthóir AS ITEC Cathaoirleach na Foirne Práinnfhreagartha Ríomhaire (CERT-AE), comhlacht idirinstitiúideach i réimse na cibearshlándála; de bhrí go bhfuil an Pharlaimint an-tiomanta do shineirgí breise agus comhar le hinstitiúidí eile a lorg, trí, inter alia acmhainní CERT-EU a fhorbairt trí bheirt státseirbhíseach ón bParlaimint a phostú, mar a chomhaontaigh an Biúró, le linn a chruinnithe an 4 Deireadh Fómhair 2021; |
|
G. |
de bhrí nach bhfuil i gcibearionsaithe ach cineál amháin cibearbhagartha; de bhrí gurb iad bagairtí hibrideacha na príomhbhagairtí ar an bParlaimint agus ar institiúidí eile de chuid an Aontais anois; de bhrí go dtagraíonn bagairtí hibrideacha do chibearionsaithe, spiaireacht, cur isteach ar thoghcháin agus feachtais bhréagaisnéise, lena n-áirítear ar na meáin shóisialta; de bhrí gur iarr an Chomhairle ar institiúidí, comhlachtaí agus gníomhaireachtaí an Aontais, le tacaíocht ó na Ballstáit, i gconclúidí a cruinnithe an 10 Nollaig 2021 maidir le hiarrachtaí comhlántacha chun Feabhas a chur ar an Athléimneacht agus ar Bhagairtí Hibrideacha a Chomhrac, inniúlacht an Aontais a áirithiú chun a shláine a chosaint agus feabhas a chur ar shlándáil líonraí faisnéise agus cumarsáide an Aontais agus ar phróisis chinnteoireachta chun iad a chosaint ar ghníomhaíochtaí mailíseacha de gach cineál, ar bhonn measúnú cuimsitheach ar bhagairtí; de bhrí gur fhormheas an Biúró, le linn a chruinnithe an 22 Samhain 2021, atheagrú na hArd-Stiúrthóireachta um Shlándáil agus Sábháilteacht (AS SAFE), lena gcruthófaí stiúrthóireacht nua um theicneolaíocht agus faisnéis slándála chun idirchaidreamh oibríochtúil agus malartú faisnéise a chuimsiú agus a chomhordú le seirbhísí slándála institiúidí, comhlachtaí agus gníomhaireachtaí eile an Aontais, agus le seirbhísí póilíneachta agus slándála na dtíortha óstacha agus na mBallstát eile, rud a chomhlánóidh gníomhaíochtaí cosanta AS ITEC sa chibearshlándáil; |
|
H. |
de bhrí gur tháinig méadú ocht bpointe céatadáin ar an ráta rannpháirtíochta i dtoghcháin 2019 do Pharlaimint na hEorpa i gcomparáid le toghcháin 2014; de bhrí gur bliain thábhachtach í 2023 chun ullmhú do thoghcháin 2024; |
|
I. |
de bhrí go ndíríonn an “Straitéis Foirgneamh Tar Éis 2019” ar riachtanais nach dtugtar aghaidh orthu go leordhóthanach go fóill, amhail saoráidí a chur in oiriúint do nuachóiriú samhlacha cruinnithe parlaiminteacha, a tharlóidh go háirithe a bhuí le comhtháthú “Europa Experience” sna hOifigí Idirchaidrimh, le feabhsú leanúnach shlándáil fhoirgnimh na Parlaiminte agus le hidirnascadh foirgneamh lárnach agus gá atá le foirgnimh a chothabháil chun caighdeáin sábháilteachta reatha a chomhlíonadh agus freastal ar fhíor-riachtanais a n-úsáideoirí; |
Creat ginearálta
|
1. |
ag meabhrú go ndéantar formhór bhuiséad na Parlaiminte a shocrú le hoibleagáidí reachtúla nó conarthacha; ag tabhairt dá haire go bhfuil 65 % den bhuiséad faoi réir innéacsú bliantúil, arb ionann é agus méadú EUR 67 milliún in 2023 sa réamhdhréacht de na meastacháin a mhol an tArd-Rúnaí an 14 Feabhra 2022; á mheabhrú go bhfuil réamhaisnéisiú déanta ag an gCoimisiún ar an innéacsú tuarastail, i gcomhréir leis na Rialacháin Foirne agus le Reacht Fheisirí Pharlaimint na hEorpa, do mhí Iúil 2022, do mhí Aibreáin 2023 agus do mhí Iúil 2023 agus go seasann an réamhaisnéisiú sin faoi láthair ag 4.3 %, 1,1 % agus 2,6 % faoi seach; ag tabhairt dá haire go ndearna an Pharlaimint, i bhfianaise an ionchais eacnamaíoch reatha, 6 % d’innéacsú tuarastail a thuar amhail ó mhí Iúil 2022; á mheabhrú, i gcomhréir leis na réamhaisnéisí ón gCoimisiún, nár áiríodh i mbuiséad 2022 ach innéacsú tuarastail de 2,5 % do 2022; |
|
2. |
ag formhuiniú an chomhaontaithe ar thángthas air san Idir-réiteach idir an Biúró agus an Coiste um Buiséid an 30 Márta 2022 chun an méadú thar bhuiséad 2022 a shocrú ag 6,24 %, a chomhfhreagraíonn do leibhéal foriomlán meastachán de EUR 2 244 696 416 do 2023, chun leibhéal caiteachais an réamhdhréachta de na meastacháin a d’fhormheas an Biúró an 7 Márta 2022 a laghdú EUR 33,96 milliún, chun foráil a dhéanamh do 60 post nua i ndáil leis an gcibearshlándáil agus leis an tslándáil, ach gan ach 52 phost bhreise a iarraidh sa phlean bunaíochta do 2023 ós rud é go ndéantar 8 bpost a athlonnú ó sheirbhisí riaracháin eile agus chun leithreasuithe ó a laghdú dá réir, a mholadh de réir na línte buiséid seo a leanas:
1 0 0 4 – Gnáthspeansais taistil, 1 2 0 0 – Luach saothair agus liúntais, 1 4 5 – Caiteachas ar ateangaireacht, 1 4 2 – Seirbhísí aistriúcháin sheachtraigh, 2 0 0 7 – Foirgnimh a thógáil agus feistiú áitreabh, 2 1 0 2 – Ríomhaireacht agus teileachumarsáid – Oibríochtaí 'gnó mar is ghnách' – Tacaíocht ghinearálta d’úsáideoirí, 2 1 0 3 – Ríomhaireacht agus teileachumarsáid – oibríochtaí “gnó mar is gnách” Bainistíocht feidhmchlár TFC, 2 1 0 4 – Ríomhaireacht agus teileachumarsáid – Infheistíocht i mbonneagar, 2 1 0 5 – Ríomhaireacht agus teileachumarsáid – Infheistíocht i dtionscadail, 2 1 2 – Troscán, 2 1 4 – Trealamh teicniúil agus suiteálacha teicniúla, 2 1 6 – Iompar Feisirí, daoine eile agus earraí, 2 3 7 — Aistriú troscán, 2 3 8 – Caiteachas riaracháin eile, 3 0 0 – Speansais le haghaidh misin foirne agus taisteal dualgais idir na trí áit oibre, 3 2 0 – Fáil saineolais, 3 2 1 – Caiteachas ar sheirbhísí taighde pharlaimintigh na hEorpa, lena n-áirítear an leabharlann, an chartlann stairiúil, measúnú ar roghanna eolaíocha agus teicneolaíochta (STOA) agus Mol Eorpach na Meán Eolaíochta, 1 – Foilseacháin dhigiteacha agus thraidisiúnta, 3 2 4 2 – Caiteachas ar fhoilsiú, faisnéis agus rannpháirtíocht in imeachtaí poiblí, 3 2 4 3 – Ionaid chuairteoirí Pharlaimint na hEorpa, 3 2 4 4 – Eagrú agus fáiltiú grúpaí cuairteoirí, clár Euroscola agus cuirí d’iolraitheoirí tuairimíochta ó thríú tíortha, 3 2 4 8 – Caiteachas ar fhaisnéis chlosamhairc, 4 0 0 – Caiteachas riaracháin reatha agus caiteachas a bhaineann le gníomhaíochtaí polaitiúla agus faisnéise na ngrúpaí polaitiúla agus na bhFeisirí neamhcheangailte thairis sin, i bhfianaise éifeachtaí urghnácha na géarchéime idirnáisiúnta ar bhoilsciú, ar speansais reachtúla agus ar an ngá atá le hathléimneacht na Parlaiminte a neartú go háirithe trí infheistíocht a dhéanamh sa tslándáil agus sa chibearshlándáil, chun leibhéal caiteachais an réamhdhréachta ar na meastacháin a d’fhormheas an Biúró an 7 Márta 2022 a mhéadú EUR 62 mhilliún agus na leithreasuithe atá beartaithe maidir leis na línte buiséid seo a leanas a mhéadú dá réir: 1 0 0 0 – Tuarastail, 1 0 0 4 – Gnáthspeansais taistil, 1 0 0 5 – Speansais taistil eile, 1 0 0 6 – Liúntas do chaiteachas ginearálta, 1 0 2 – Liúntais idirthréimhseacha, 1 0 3 0 – Pinsin scoir (PEAM), 1 0 3 1 – Pinsin easláine (PEAM), 1 0 3 2 – Pinsin Marthanóirí (PEAM), 1 2 0 0 – Luach saothair agus liúntais, 1 4 0 0 – Foireann eile – Rúnaíocht agus grúpaí polaitiúla, 1 4 0 1 – Foireann eile – Slándáil, 1 4 0 2 – Foireann eile – Tiománaithe sa Rúnaíocht, 1 4 0 5 – Caiteachas ar ateangaireacht, 2 0 2 4 – Tomhaltas fuinnimh, 2 1 0 4 – Ríomhaireacht agus teileachumarsáid – Infheistíocht i mbonneagar, 4 2 2 – Caiteachas a bhaineann le cúnamh parlaiminteach |
|
3. |
á mheas nach mór breathnú ar an méadú foriomlán de 6,24 % i gcomparáid le 2022 mar mhéadú 2,46 % don chuid faoi ghnáthdhálaí agus, i ngeall ar na cúinsí eisceachtúla atá ann faoi láthair, méadú EUR 79,8 milliún a chomhfhreagraíonn don chuid le haghaidh géarchéime chun boilsciú eisceachtúil, an méadú ar chostais reachtúla mar thoradh air sin agus infheistíochtaí sa tslándáil agus sa chibearshlándáil a chumhdach. |
|
4. |
á chur i bhfios go láidir go raibh ráta méadaithe bhuiséad na Parlaiminte níos ísle le blianta beaga anuas ná ráta méadaithe Cheannteideal 7; ag tabhairt dá haire nár bhain an Pharlaimint úsáid as an 20 % de Cheannteideal 7 a bhfuil sí ina theideal; |
|
5. |
á chur i bhfios go láidir gur gá d’institiúidí uile an Aontais géilleadh don smacht buiséadach agus a riachtanais airgeadais á mbunú acu don chéad bhliain eile; |
Slándáil i gcoinne bagairtí hibrideacha méadaitheacha
|
6. |
á chur i bhfios go láidir gur príomhthosaíocht í cibearshlándáil na Parlaiminte, go háirithe i bhfianaise an teannais gheopholaitiúil atá ann faoi láthair; á chinneadh, dá bhrí sin, tacú le moladh an Ard-Rúnaí 40 post sa bhreis a dhaingniú do AS ITEC chun inniúlachtaí cibearchosanta na Parlaiminte a mhéadú agus leibhéal leordhóthanach acmhainne inmheánaí a bhaint amach; á mheabhrú gur laghdaíodh faoi 6 % foireann na Parlaiminte le linn Chreat Airgeadais Ilbhliantúil 2014-2020, a tharla den chuid is mó laistigh dá foireann riaracháin; á chreidiúint gur gá acmhainní na Parlaiminte ó thaobh slándála de a mhéadú chun sláine a córas TFC a chosaint; ag tabhairt dá haire gurb ionann tionchar na 40 post a chruthófar do 2023 agus 4,3 milliún agus gur áiríodh EUR 5 mhilliún sa bhuiséad do 2023 d’infheistíochtaí agus oibríochtaí cibearshlándála; |
|
7. |
Sa chomhthéacs sin, ag athdhearbhú a hiarrata ar na seirbhísí ábhartha réitigh a chomhtháthú agus a úsáid le haghaidh teachtaireachtaí meandracha agus cruinnithe fíorúla atá bunaithe ar fhoinse oscailte, a óstáiltear ar fhreastalaithe na Parlaiminte, agus a chumasaíonn cumarsáid shlán, amhail Matrix agus Jitsi chun cur go suntasach le rúndacht na cumarsáide inmheánaí; |
|
8. |
á mheas go bhfuil comhar idirinstitiúideach ríthábhachtach chun sineirgí a mhéadú i measc na riarachán agus chun institiúidí an Aontais a chosaint go leordhóthanach ar chibearbhagairtí; ag tacú go láidir leis an bhfíoras go ndéanfar 2 phost AD (as 40 post breise sa chibearshlándáil) a chur ar fáil go sealadach do CERT-EU mar aon le buiséad bliantúil breise de EUR 1,564 milliún; á mheas go rachaidh acmhainn mhéadaithe na Parlaiminte i ndáil le cibearshlándáil chun tairbhe na n-institiúidí uile trí chosc, brath agus roinnt agus leasanna an Aontais a chosaint ar chibearbhagairtí ar bhealach níos fearr, lena n-áirítear an togra nua ón gCoimisiún le haghaidh Rialachán ó Pharlaimint na hEorpa agus ón gComhairle lena leagtar síos bearta maidir le leibhéal ard cibearshlándála ag institiúidí, comhlachtaí, oifigí agus gníomhaireachtaí an Aontais; |
|
9. |
á mheabhrú go bhfuil bagairtí ag tiontú de réir a chéile ina mbagairtí hibrideacha; ag tacú go láidir le 20 post breise do AS SAFE chun acmhainneacht agus cumas na Parlaiminte a neartú chun na bagairtí nua seo de chineál hibrideach a bhrath, a chosc agus freagairt dóibh agus chun próisis slándála a nuachóiriú agus a dhigitiú; ag tabhairt dá haire go bhfuil mar aidhm leis an Tascfhórsa Idirinstitiúideach um Fhrithaisnéis Dhaonna, Dhigiteach agus Hibrideach an comhar idir institiúidí an Aontais agus an comhordú le seirbhísí faisnéise agus slándála na mBallstát a threisiú; |
|
10. |
á iarraidh ar an Ard-Rúnaí leas a bhaint as sineirgí féideartha chun éifeachtúlacht laistigh den riarachán a mhéadú, agus chun anailís a dhéanamh ar an gcaoi a gcuidíonn digitiú agus bealaí nua oibre chun na stiúrthóireachtaí a chuíchóiriú agus chun gur féidir poist a aistriú chuig réimsí tosaíochta; sa chomhthéacs sin, á chur in iúl gur geal léi an tástáil phíolótach a rinneadh ar an ardán foinse oscailte idirnasctha micreabhlagála “EU Voice” arna bhunú ag an Maoirseoir Eorpach ar Chosaint Sonraí, chun rannchuidiú le príobháideachas úsáideoirí, slándáil agus athléimneacht TF, ceannasacht theicneolaíoch an Aontais, idir-inoibritheacht, iomaíocht agus rogha úsáideoirí; |
Straitéis chumarsáide i leith na saoránach
|
11. |
á thabhairt chun suntais go bhfuil ról ag an bParlaimint i bhfeasacht pholaitiúil Eorpach a fhorbairt agus luachanna an Aontais a chur chun cinn; |
|
12. |
á chur i bhfios go láidir go bhfuil cumarsáid na bpáirtithe polaitiúla agus na bhFeisirí féin ar cheann de na príomhspreagthóirí do ráta ard rannpháirtíochta agus spéise i measc shaoránaigh an Aontais sna toghcháin Eorpacha; á iarraidh go mbeadh comhordú ann idir Ard-Stiúrthóireacht na Cumarsáide (DG COMM) agus seirbhísí preasa na ngrúpaí polaitiúla, le tacaíocht theicniúil ón Ard-Stiúrthóireacht um Sheirbhísí Taighde Pharlaimintigh (DG EPRS) agus ó Ard-Stiúrthóireacht an Aistriúcháin (AS TRAD) chun teachtaireacht chomhordaithe, leormhaith agus shoiléir a áirithiú do shaoránaigh; |
|
13. |
ag tabhairt dá haire gur leithdháileadh acmhainní breise (EUR 27,5 milliún) ar AS COMM don straitéis chumarsáide a bhaineann le toghcháin 2024 do Pharlaimint na hEorpa chun ról agus feidhmeanna an Aontais a mhíniú, agus go háirithe ról agus feidhmeanna na Parlaiminte, an tionchar nithiúil ar shaol na saoránach, an fáth ar féidir difríocht a dhéanamh le vótáil sna toghcháin agus chun a áirithiú go mbeidh gach struchtúr, uirlis agus ardán i bhfeidhm agus ullamh in 2024; |
|
14. |
á iarraidh go mbeifí cáiréiseach tráth a nascfar leibhéal na speansas cumarsáide le líon na ndaoine a vótálfaidh ag na toghcháin Eorpacha, nó go ndéanfaí é a nascadh go comhleanúnach, lena n-áirítear i gcás ráta athraithe níos ísle rannpháirtíochta; |
|
15. |
á mheas go bhfuil sé thar a bheith tábhachtach go mbeadh an Pharlaimint ullamh mar is ceart chun dul i ngleic le bréagaisnéis; á iarraidh go mbeadh comhar feabhsaithe idir AS ITEC, AS SAFE agus AS COMM chun feachtais bhréagaisnéise a bhrath, faireachán a dhéanamh orthu agus réiteach a fháil orthu go pras agus go soiléir, go háirithe ar na meáin shóisialta; á iarraidh go leanfar den chomhar leis an gCoimisiún agus leis an tSeirbhís Eorpach Gníomhaíochta Seachtraí maidir leis an mbréagaisnéis; |
|
16. |
ag tacú le bunú Europa Experiences faoi 2024 sna Ballstáit uile; ag tacú leis an lucht riaracháin ina bheartas arb é is aidhm dó an leas is fearr is féidir a bhaint as sineirgí; ag dréim leis go mbeidh tionchar fadtéarmach buiséadach ag Europa Experiences ó thaobh na gcostas reatha atá le cur faoi bhráid an Choiste um Buiséid a luaithe is féidir; á mheabhrú gur cheart go gcuirfeadh Europa Experiences ar chumas na saoránach uile tuiscint níos fearr a fháil ar fheidhmiú institiúidí an Aontais agus, dá bhrí sin, gur dlúthchuid iad den phlean cumarsáide don fheachtas toghcháin; á mheabhrú go bhfuil sé ríthábhachtach don Pharlaimint plé go leanúnach le saoránaigh an Aontais trí bhealaí cumarsáide éagsúla, de mheon idirphlé ilghnéithigh pholaitiúil, ní hamháin le linn bhliain na dtoghchán ach le linn an téarma reachtaigh ar fad; á chreidiúint gur cheart cinneadh a dhéanamh maidir le haon tionscadal a chur siar ar bhonn critéir bhunaithe agus go mbeadh ríthábhacht sna critéir sin le cothromaíocht gheografach i measc na mBallstát a bhaint amach; á athdhearbhú gur gá don Pharlaimint, i gcomhar leis an gCoimisiún agus leis an tSeirbhís Eorpach Gníomhaíochta Seachtraí, a bheith i láthair ag feachtais ghníomhacha faisnéise sna tíortha a rinne iarratas foirmiúil ar dhul isteach san Aontas, eadhon Poblacht na Moldóive, an Úcráin agus an tSeoirsia; |
|
17. |
á iarraidh ar an Ard-Rúnaí an fhaisnéis go léir a chur ar fáil a cheanglaítear faoi Airteagal 266(6) den Rialachán Airgeadais a bhaineann leis an iasacht EUR 37,9 milliún atá beartaithe chun ceannach Áras Europa Experience i mBaile Átha Cliath a mhaoiniú a luaithe is féidir; |
|
18. |
á mheas gur cheart d’Oifigí Idirchaidrimh Pharlaimint na hEorpa (EPLOnna) níos mó a dhéanamh le saoránaigh de gach aois; á iarraidh ar an bParlaimint tuilleadh cruinnithe agus imeachtaí a fhorbairt idir Feisirí agus saoránaigh ar an leibhéal áitiúil trína EPLOnna; á athdhearbhú gur gá do na EPLOnna tacaíocht leordhóthanach a chur ar fáil do na Feisirí chun cláir oibre agus imeachtaí na gcruinnithe a shocrú; |
|
19. |
á mheas gur cheart do na EPLOnna faisnéis a chur ar fáil freisin i dteangacha iasachta do phobail Eorpacha a bhfuil cónaí orthu i dtíortha eile san Eoraip; á chur i bhfios go láidir go bhfuil gá le nglacfaidh EPLOnna páirt i ngníomhaíochtaí breise maidir le hoideachas saoránachta agus rannpháirtíocht ina mbeidh pobail áitiúla, scoileanna áitiúla nó ollscoileanna áitiúla rannpháirteach. |
|
20. |
á iarraidh go mbeadh seirbhís tiomnaithe ann do sheanóirí lena leagtar béim ar chláir agus ar bheartais de chuid an Aontais a théann chun tairbhe don aosú gníomhach; |
Glasú agus neamhspleáchas fuinnimh
|
21. |
á athdhearbhú go gcreideann sí gur gá don Pharlaimint a bheith ar thús cadhnaíochta i dtaca le modhanna oibre níos digití, níos solúbtha agus níos tíosaí ar fhuinneamh a ghlacadh agus cleachtais a chomhlíonadh, ag foghlaim ón taithí a fuarthas ó phaindéim COVID-19 agus ag baint leas as na hinfheistíochtaí teicneolaíochta atá curtha chun feidhme cheana féin; á iarraidh go ndéanfar measúnú straitéiseach ar chostas an bheartais tógála, go háirithe trí na bealaí nua oibre a mheas, amhail teilea-obair, a tháinig chun cinn mar thoradh ar phaindéim COVID-19, agus é á aithint go bhfuil láithreacht fhisiciúil le haghaidh caibidlíocht pholaitiúil, díospóireachtaí nó malartú tuairimí fós níos éifeachtúla maidir le ceapadh beartais phoiblí; á chur in iúl gur cúis bhuartha di cáilíocht neamhchothrom saoráidí ateangaireachta agus na fadhbanna teicniúla a bhaineann le Interactio; á iarraidh go ndéanfaí infheistíocht go práinneach agus go spriocdhírithe chun an leibhéal is airde ilteangachais a áirithiú; ag cur béim ar an bhfíoras, i ndiaidh na ngéarchéimeanna polaitiúla, sláinte agus eacnamaíocha, go bhfuil méadú mór tagtha ar na costais fuinnimh, agus go mbeidh iarmhairtí fadtéarmacha aige sin; á iarraidh go gcuirfí san áireamh an tionchar airgeadais ar fhoirgnimh na Parlaiminte; á mholadh go gcuirfí san áireamh sa phleanáil bhuiséadach bhliantúil athchóiriú rialta na bhfoirgneamh uile; á chur i bhfios go bhfuil an leithdháileadh sin mar chuid de bheartas tógála réamhghníomhach, ar beartas é nach mór é a dhíriú ar athchóiriú glas an stoic foirgneamh agus a ráthóidh go ndéanfaidh an Pharlaimint a dícheall an éifeachtúlacht fuinnimh a uasmhéadú, agus ar an gcaoi sin ídiú fuinnimh agus costas shaoráidí na Parlaiminte a laghdú; maidir leis sin, á chur i bhfios go láidir gur gá foirgneamh Trèves I a uasghrádú go dtí na noirm fuinnimh agus chomhshaoil is déanaí; ag meabhrú a thábhachtaí atá próiseas cinnteoireachta trédhearcach agus cothrom i réimse an bheartais tógála, agus aird chuí á tabhairt ar Airteagal 266 den Rialachán Airgeadais, i ndáil le beartas tógála na Parlaiminte; ag meabhrú an chinnidh ón mBiúró an 2 Iúil 2018 a bhaineann le hathshlánú fhoirgneamh Paul-Henri Spaak; á iarraidh ar an mBiúró a chinneadh maidir leis an bhfoirgneamh sin a chur in iúl go tráthúil; |
|
22. |
á mheabhrú gur fhormheas an Biúró, ag an gcruinniú a bhí aige an 16 Nollaig 2019, na príomhspriocanna táscairí feidhmíochta comhshaoil nuashonraithe ag a bhfuil spriocdháta aontaithe de 2024, lena n-áirítear laghdú 40 % ar na hastaíochtaí carbóin iomlána, ó leibhéil 2006; á mheabhrú go n-áirítear i straitéis mheántéarma EMAS clásal athbhreithnithe chun an uaillmhian chomhshaoil a mhéadú ar bhonn na feidhmíochta a breathnaíodh; á iarraidh go ndéanfaí athbhreithniú i dtreo ardú a dhéanamh ar spriocanna EMAS do na príomhtháscairí feidhmíochta toisc gur comhlíonadh cheana go leor de na spriocanna a leagadh amach in 2019, agus i bhfianaise phaindéim COVID-19 agus an gá atá le dlús a chur leis na bearta éifeachtúlachta fuinnimh agus ár spleáchas ar ghás a laghdú; ag athdhearbhú a hiarrata a plean reatha maidir le laghdú CO2 a leasú chun carbóin-neodracht a bhaint amach trí mhodh a aithnítear go hidirnáisiúnta a úsáid i gcás ina bhfuil sé bailíochtaithe mar shampla, mar shásra maidir le Praghsáil Inmheánach Carbóin trína ndéanann cuideachtaí a lorg carbóin a phraghsáil go deonach agus, ar an gcaoi sin, luach a chur ar a n-astaíochtaí gás ceaptha teasa; |
|
23. |
ag meabhrú gurb é iompar daoine agus earraí is siocair le beagnach dhá thrian de lorg carbóin na Parlaiminte; á iarraidh go ndéanfaí modhanna iompair ísealcharbóin do mhisin a chur chun cinn; ag athdhearbhú a tuairime nach mór go gcuirfí san áireamh i gcinntí taistil an tábhacht a bhaineann le láithreacht pharlaiminteach, cúiseanna imní sláinte, praghas agus tomhaltas ama; á chur i bhfios go láidir go dteastaíonn turais fhada sa taisteal a dhéanann a lán Feisirí óna dtoghlaigh chuig teacht ar áiteanna oibre na Parlaiminte agus nach féidir tabhairt fúthu ach ar eitleán; á mheabhrú freisin go bhfuil sé de chuspóir ag an bParlaimint a cuid astaíochtaí a laghdú tuilleadh agus á chur bhfios go láidir go bhfuil eitiltí díreacha agus ticéid sholúbtha aerlíne ar na bealaí is lú a chruthaíonn truailliú más gá tabhairt faoi aerthaisteal; |
|
24. |
á iarraidh ar an Lucht Riarachán leanúint de choigilteas costais agus éifeachtúlachtaí tomhaltais a fhiosrú; á iarraidh go mbeadh treochlár ann chun deireadh a chur de réir a chéile le breoslaí iontaise; á iarraidh ar an bParlaimint méadú breise a dhéanamh ar sciar an fhuinnimh inathnuaite ina meascán fuinnimh agus go háirithe táirgeadh fuinnimh agus ag dréim le go suiteálfar fótavoltas úrscothach dín ar mhaithe leis an acmhainneacht uasta; á chur in iúl gur geal léi an infheistíocht leanúnach; ag athdhearbhú a hiarrata ar sheirbhísí na Parlaiminte leanúint de thomhaltas páipéir a laghdú trí aistriú chuig timpeallacht gan pháipéar, chomhchoiteann agus ar líne do gach cruinniú, agus trí shocruithe don síniú leictreonach a chur chun feidhme tuilleadh, agus díriú ar na laghduithe a choinneáil sa “normáltacht nua”; ag athdhearbhú a hiarrata go ndéanfaí anailís ar roghanna malartacha, i gcomhréir le sprioc EMAS do Pharlaimint “gan pháipéar” a luaithe is féidir; ag dréim leis go ndéanfar prionsabail na hÉifeachtúlachta Fuinnimh ar dtús agus prionsabail an Gheilleagair Chiorclaigh a chur i bhfeidhm maidir leis na hinfheistíochtaí uile, lena n-áirítear infheistíochtaí digiteacha agus cinntí bainistíochta; á iarraidh go ndéanfaí iarrachtaí treisithe chun straitéis bainistithe dramhaíola na Parlaiminte a chur chun feidhme go hiomlán i gcomhréir le prionsabail ordlathas na réiteach dramhaíola; á mheas go bhfuil sé ríthábhachtach feasacht a ardú sa Teach, trí oiliúint shonrach freisin, chun torthaí sásúla a bhaint amach agus chun gur féidir spriocanna EMAS sa réimse sin a uasghrádú; á iarraidh go ndéanfaí bearta a chur chun feidhme ina n-iomláine chun go mbeidh an Pharlaimint saor ó phlaisteach aon úsáide de réir mar a fhilleann daoine ar an obair agus iad ag úsáid seirbhísí lónadóireachta laistigh den Pharlaimint; |
|
25. |
á chur in iúl gur geal léi na feabhsuithe ar bhonneagar rothar ar áitribh na Parlaiminte; á mholadh do na seirbhísí tuilleadh feabhais a chur ar an mbonneagar sin trí shaoráidí páirceála rothar a uasghrádú, lena n-áirítear do rothair lastais i ngach foirgneamh, agus trí dhreasachtaí breise a chruthú do chomaitéireacht rothar; á chur in iúl gur geal léi iarrachtaí na Parlaiminte chun iompar poiblí a chur chun cinn trína beartas nua páirceála, trí dheontais a mhéadú do shíntiúis iompair phoiblí agus trí úsáid feithiclí leictreacha a chur chun cinn trí stáisiúin luchtaithe leictreacha a shuiteáil; á iarraidh, sa chomhthéacs sin, go dtiocfadh méadú iomchuí ar líon na luchtairí feithiclí leictreacha i gcomhréir leis an éileamh atá ann faoi láthair agus a bheidh ann go luath sa Bhruiséil, in Strasbourg agus i Lucsamburg; ag tabhairt dá haire nach soláthraítear leis an mbeartas reatha páirceála dreasachtaí airgeadais le haghaidh soghluaisteacht ghníomhach; á iarraidh ar na seirbhísí meastóireacht a dhéanamh ar an rath a bhí ar an mbeartas nua páirceála agus tuilleadh dreasachtaí spriocdhírithe a thabhairt isteach nuair is gá; |
|
26. |
ag athdhearbhú a hiarrata go mbeadh ról gníomhach ag an bParlaimint mar mhórfhostóir i ndíospóireachtaí agus i gcomhairliúcháin maidir le pleanáil uirbeach agus béim ar leith á leagan ar shoghluaisteacht ghníomhach a chur chun cinn trí bhonneagar sábháilte, compordach agus leanúnach, folláine a mhéadú trí mheán spás poiblí ar ardchaighdeán, agus oiriúnú don athrú aeráide tríd na hoileáin teasa a sheachaint; ag tabhairt chun suntais go bhfuil deiseanna ann don idirphlé i gcomhthéacs GoodMove na Bruiséile agus an phlean a thagann i ndiaidh Plan d’Aménagement Directeur Loi, chomh maith le tuilleadh forbartha a dhéanamh ar an Archipel mar a thugtar air i gcomharsanacht Wacken in Strasbourg, agus maidir leis an gcaidreamh leanúnach le Fonds Kirchberg i Lucsamburg; |
Saincheisteanna eile
|
27. |
ag tabhairt dá haire, ar thionscnamh an iar-Uachtaráin Sassoli, gur phléigh fócasghrúpaí ar “Athmhachnamh ar Dhaonlathas Parlaiminteach – Parlaimint na hEorpa níos láidre tar éis Covid-19” todhchaí na hoibre sa Pharlaimint idir Aibreán agus Iúil 2021, i ndáil le gach ceann dá réimsí gníomhaíochta: suí iomlánach, sainphribhléidí parlaiminteacha, cumarsáid, taidhleoireacht sheachtrach agus eagrúchán inmheánach; á chur in iúl gur geal léi gur thug na fócasghrúpaí tuarascáil deiridh lena n-áirítear moltaí ina bpléifidh an Biúró a cur chun feidhme agus aird chuí á tabhairt aige ar a costas, agus Coiste um Buiséid rannpháirteach sa réamh-mheasúnú a dhéanfaidh sé, más gá; |
|
28. |
á mheabhrú go dtacaíonn tromlach na bhFeisirí le suíochán aonair; á mheabhrú gur gá teacht ar réitigh chun barrfheabhas a chur ar an obair institiúideach pharlaiminteach, ar na costais airgeadais agus ar an lorg carbóin; á mheabhrú gurb in Strasbourg a bheidh suíomh Pharlaimint na hEorpa, de réir an Chonartha ar an Aontas Eorpach; ag tabhairt dá haire go n-éileodh athruithe buana athrú ar an gConradh; |
|
29. |
ag athdhearbhú a hiarrata, arna glacadh ar leibhéal an tseisiúin iomlánaigh ar roinnt ócáidí, ar an mBiúró tús a chur leis an obair maidir le hathbhreithniú ar na Rialacha Nós Imeachta, rud a chuirfidh ar chumas na bhFeisirí a gceart chun vótála a fheidhmiú go cianda, agus tairbhe á baint acu as saoire mháithreachais nó atharthachta, le linn breoiteacht fhadtéarmach nó i gcásanna force majeure; ag cur sonrú sna hathruithe a rinneadh ar na Rialacha Nós Imeachta an 20 Nollaig 2020 lena gceadaítear cianvótáil; á chur in iúl gurb oth leis nach bhforáiltear don chianvótáil sa choiste faoi láthair faoi Rialacha Nós Imeachta na Parlaiminte mura rud é go suíonn an tUachtarán go bhfuil imthosca neamhghnácha ann; |
|
30. |
á iarraidh an athuair ar an Ard-Rúnaí a áitiú go mbeadh an earcaíocht go léir bunaithe ar inniúlacht, agus urraim á tabhairt ag an am céanna don ghá atá le cothromaíocht gheografach na mBallstát uile a bhaint amach ar gach leibhéal foirne; á chur in iúl gur cúis bhuartha di na deacrachtaí a bhaineann le náisiúntachtaí áirithe a earcú agus próifílí poist áirithe a thabhairt isteach go hinmheánach; á iarraidh go ndéanfaí tuilleadh iarrachtaí chun a áirithiú go mbeidh an fhostaíocht sa Pharlaimint chomh tarraingteach céanna do náisiúntachtaí uile an Aontais ach go mbeadh sé fós bunaithe ar phróisis oibiachtúla; á iarraidh ar an bParlaimint a hinniúlacht for-rochtana féin a fhorbairt, agus é d’aidhm aici iarrthóirí ar ardchaighdeán atá de dhíth ar an bParlaimint a mhealladh chuig comórtais, i dtéarmaí próifíle, aoise, inscne agus náisiúntachta agus go háirithe ó thíortha atá faoi ghannionadaíocht; maidir le hearcú foirne nua, á iarraidh ar an Ard-Rúnaí na céimeanna riaracháin a chuíchóiriú agus an próiseas a ghiorrú; |
|
31. |
á iarraidh ar an bParlaimint measúnuithe rialta a dhéanamh ar eagrú a hArdrúnaíochta agus ar a riachtanais phearsanra, poist fholmha a ath-leithdháileadh idir stiúrthóireachtaí chun cúraimí nua a chur i gcrích ag leibhéil sheasmhacha foirne; |
|
32. |
á iarraidh ar an Ard-Rúnaí measúnú a dhéanamh ar na rioscaí a bhaineann le líon méadaitheach gníomhairí ar conradh a fhostú, lena n-áirítear an baol struchtúr foirne dhá shraith a chruthú laistigh den Pharlaimint; |
|
33. |
á chur in iúl gur geal léi na bearta a ghlac AS INLO le linn phaindéim COVID-19, arb é ab aidhm leo rioscaí gabhála a mhaolú laistigh d’áitribh na Parlaiminte agus tacú le cur chun feidhme na mbeart nithiúil dlúthpháirtíochta arna gcinneadh ag an mBiúró; |
|
34. |
á athdhearbhú go mbaineann thart ar 50 milliún duine le mionlaigh agus pobail éagsúla teanga san Aontas; ag meabhrú go spreagann an Pharlaimint rannpháirtíocht na saoránach san Aontas, lena n-áirítear na mionlaigh náisiúnta, réigiúnacha agus teanga; á mheabhrú go dtacaíonn an Pharlaimint go láidir leis an ilteangachas agus go gcuireann sí cearta na mionlach náisiúnta, réigiúnach agus teanga chun cinn; á mheas gur féidir leis an bParlaimint cur go gníomhach leis an gcomhrac i gcoinne na bréagaisnéise, agus faisnéis á cur ar fáil aici freisin do mhionlaigh teanga agus do phobail i gcás inarb iomchuí; ag moladh don Bhiúró machnamh a dhéanamh ar thacú le gníomhaíochtaí cumarsáide atá i gcomhréir le riachtanais na mionlach náisiúnta, réigiúnach agus teanga sna Ballstáit; |
|
35. |
á iarraidh ar an Ard-Rúnaí anailís a dhéanamh ar a indéanta atá sé ateangaireacht i dteanga chomharthaíochta idirnáisiúnta a thabhairt isteach do na díospóireachtaí go léir sa suí iomlánach, i gcomhréir leis na hiarrataí a ghlac an Seisiún Iomlánach, agus an cinneadh sin a chur chun feidhme ag féachaint do phrionsabal na rochtana comhionainne do na saoránaigh uile; |
|
36. |
á chur in iúl gur cúis bhuartha di é cáilíocht Chlár Trédhearcachta AE; á mheabhrú, de réir Thuarascálacha Bliantúla an Chláir Trédhearcachta, go bhfuil thart ar leath de na hiontrálacha ar fad sa Chlár mícheart; á iarraidh ar an bParlaimint bearta a dhéanamh chun cruinneas an Chláir a fheabhsú agus faireachán a dhéanamh air go rialta maidir le heintitis a dhéanann ionadaíocht ar leas daoine agus eintitis a smachtbhannaíodh agus dul ar aghaidh lena mbaint láithreach bonn ionas go mbeidh sí in ann a cuspóir a chomhlíonadh maidir le trédhearcacht níos fearr a chur ar fáil maidir le gníomhaíochtaí ionadaithe leasmhara; ag athdhearbhú a hiarrata go ndréachtaíonn an Pharlaimint tuarascáil mhionsonraithe bhliantúil maidir leis na hionadaithe leasmhara agus na heagraíochtaí eile ar tugadh rochtain dóibh ar áitribh na Parlaiminte, agus í a fhoilsiú i ndáil leis an Rialachán Ginearálta maidir le Cosaint Sonraí (8); |
|
37. |
ag meabhrú gur vótáil an Pharlaimint roinnt uaireanta chun an Liúntas Caiteachais Ghinearálta a athchóiriú; á iarraidh ar an mBiúró meastóireacht a dhéanamh ar a chinneadh in 2019 maidir leis an liúntas caiteachais ghinearálta ar bhonn na taithí a fuarthas le linn an 9ú téarma parlaiminteach agus na cinntí is gá a dhéanamh chun trédhearcacht agus cuntasacht a fheabhsú; á chur in iúl gur geal léi an fógra ón Uachtarán go mbunófaí Meitheal ad hoc de chuid an Bhiúró um an Liúntas Caiteachais Ghinearálta chun obair a dhéanamh ar athbhreithniú na rialacha a bhí ann roimhe sin; |
|
38. |
ag athdhearbhú, i gcomhthéacs an nós imeachta athbhreithnithe atá ar siúl go hiarbhír maidir leis na forálacha cur chun feidhme ginearálta maidir le haisíocaíocht speansas taistil misin agus dualgais agus maidir leis na rialacha inmheánacha lena rialaítear misin agus taisteal dualgais oifigigh agus sheirbhísigh eile Pharlaimint na hEorpa, gur chuir an seisiún iomlánach in iúl roinnt uaireanta go mbaineann sé le méid na liúntas a íoctar leis na Cúntóirí Parlaiminteacha Creidiúnaithe (APAnna) le haghaidh na misean a chuireann siad i gcrích idir trí áit oibre na Parlaiminte d’fhonn a áirithiú go ndéanfaidh an Biúró é a ailíniú ar leibhéal na gcóras liúntais do státseirbhísigh agus do ghníomhairí eile; |
|
39. |
á iarraidh arís ar Chomhdháil na nUachtarán agus ar an mBiúró athbhreithniú a dhéanamh faoi seach ar na forálacha Cur Chun Feidhme lena rialaítear obair na dtoscaireachtaí agus na misean lasmuigh den Aontas Eorpach agus ar an gcinneadh maidir le “Misin an Choiste lasmuigh de na trí áit oibre”; á chur i bhfios go láidir gur cheart go mbreithneofaí, leis an athbhreithniú sin, an fhéidearthacht go mbeadh tionlacan APAnna, faoi réir coinníollacha áirithe, ag na Feisirí atá ar thoscaireachtaí oifigiúla agus ar mhisin oifigiúla na Parlaiminte; |
|
40. |
ag meabhrú Airteagal 27(1) agus (2) de Reacht Fheisirí Pharlaimint na hEorpa (9) ina luaitear “go gcoimeádfar an ciste pinsin deonach arna bhunú ag an bParlaimint tar éis theacht i bhfeidhm an Reachta seo i gcás Feisirí nó iar-Fheisirí a bhfuil cearta nó teidlíochtaí todhchaí faighte acu sa chiste sin cheana féin” agus go ndéanfar “cearta faighte agus teidlíochtaí amach anseo a choimeád ina n-iomláine”; ag tabhairt dá haire, de réir Sheirbhís Dlí na Parlaiminte, go leanann sé ón dá bhreithiúnas go ndeimhníonn an Chúirt Bhreithiúnais go bhfuil cearta faighte acu mar sin, i gcás Feisirí a bhfuil na coinníollacha riachtanacha go léir comhlíonta acu cheana chun an ceart chun pinsean saorálach breise a fháil, go bhfuil siad faoi chosaint iomlán faoi phrionsabail ghinearálta dhlí an Aontais; ag tabhairt dá haire, áfach, go ndearbhaítear leis na breithiúnais freisin nach gcuireann sé sin cosc ar an mBiúró coinníollacha ná rialacha mionsonraithe an ghrúpa Feisirí sin a mhodhnú ar choinníoll go n-urramaítear prionsabal na comhréireachta go cuí, agus i gcás na bhFeisirí sin nach bhfuil na coinníollacha go léir chun cearta pinsin a fháil comhlíonta acu go fóill agus nach sealbhaíonn dá bhrí sin ach teidlíochtaí amach anseo faoin scéim pinsin; ag tathant, dá bhrí sin, ar an mBiúró agus ar an lucht riaracháin, réiteach oiriúnach a mholadh go práinneach amach anseo ina gcuirfear san áireamh staid phinsin agus mhaireachtála na bhFeisirí agus na n-iar-Fheisirí a bhfuil teidlíocht acu, chomh maith le prionsabail na bainistíochta fónta airgeadais agus cásdlí ábhartha Chúirt Bhreithiúnais an Aontais Eorpaigh; á iarraidh ar na geallsealbhóirí uile lena mbaineann teacht ar réiteach inbhuanaithe agus indéanta go pras; |
|
41. |
á chur in iúl gur geal léi beartas na Parlaiminte arb é is aidhm dó a áirithiú go mbainfidh daoine faoi mhíchumas úsáid iomlán neamhspleách as foirgnimh na Parlaiminte agus go dtacóidh sé le bearta agus le hoiriúnuithe breise a bheidh riachtanach i ndáil leis sin; |
|
42. |
ag tabhairt dá haire gur ar an 24 Deireadh Fómhair 2017 a rinne na Caestóirí an cinneadh deireadh a chur le huisce te a dháileadh in oifigí na bhFeisirí sa Bhruiséil agus in Strasbourg i ndáil leis an mbaol don tsláinte a eascraíonn as baictéir dhíobhálacha legionella a bheith ann laistighde chórais hiodrálacha na bhfoirgneamh atá ag dul in aois agus in olcas; |
|
43. |
á chur i bhfios go láidir gur cheart go mbeadh ról eiseamláireach ag an bParlaimint maidir leis na beartais a dhéanann sí a chosaint agus a chur chun cinn, amhail an comhshaol, comhionannas inscne agus trédhearcacht; |
o
o o
|
44. |
ag glacadh na meastachán don bhliain airgeadais 2023; |
|
45. |
á threorú dá hUachtarán an rún seo a chur ar aghaidh chuig an gComhairle agus chuig an gCoimisiún. |
(1) IO L 193, 30.7.2018, lch. 1.
(2) IO L 433 I, 22.12.2020, lch. 11.
(3) IO L 433 I, 22.12.2020, lch. 28.
(4) IO L 287, 29.10.2013, lch. 15.
(5) IO C 506, 15.12.2021, lch. 247.
(6) Téacsanna arna nglacadh, P9_TA(2021)0432.
(8) Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (IO L 119, 4.5.2016, lch. 1).
(9) Cinneadh ó Pharlaimint na hEorpa an 28 Meán Fómhair 2005 lena nglactar Reacht Chomhaltaí Pharlaimint na hEorpa (2005/684/CE, Euratom) (IO L 262, 7.10.2005, lch. 1).