(1)

Permezz tal-ittra datata l-14 ta’ Frar 2022, ir-Repubblika tal-Korea esprimiet l-interess formali tagħha li tiġi assoċjata ma’ Orizzont Ewropa – il-Programm Qafas għar-Riċerka u l-Innovazzjoni (2021-2027) stabbilit bir-Regolament (UE) 2021/695 tal-Parlament Ewropew u tal-Kunsill (1) (“Orizzont Ewropa”).

(2)

Fil-15 ta’ Mejju 2023, il-Kunsill adotta d-Deċiżjoni (UE) 2023/1093 (2), li tawtorizza l-ftuħ tan-negozjati mar-Repubblika tal-Korea għal ftehim dwar il-prinċipji ġenerali għall-parteċipazzjoni tar-Repubblika tal-Korea f’Orizzont Ewropa.

(3)

In-negozjati tlestew u l-Ftehim bejn l-Unjoni Ewropea, minn naħa waħda, u r-Repubblika tal-Korea, min-naħa l-oħra, dwar il-Parteċipazzjoni tar-Repubblika tal-Korea fi programmi tal-Unjoni (il-“Ftehim”) ġie inizjalat fid-29 ta’ Marzu 2024. Il-konklużjoni tan-negozjati tħabbret uffiċjalment fil-25 ta’ Marzu 2024 fi Brussell, il-Belġju. Fuq talba tar-Repubblika tal-Korea, saru sessjonijiet ta’ negozjati addizzjonali u verżjoni modifikata tat-test tal-Ftehim ġiet inizjalata fit-23 ta’ Settembru 2024.

(4)

L-objettivi tal-Ftehim huma li jiġi stabbilit jistabbilixxu qafas dejjiemi għall-kooperazzjoni bejn l-Unjoni u r-Repubblika tal-Korea u li jiġu stipulati t-termini u l-kundizzjonijiet għall-parteċipazzjoni tar-Repubblika tal-Korea fi programmi tal-Unjoni li huma miftuħa għall-parteċipazzjoni tagħha f’konformità mal-atti bażiċi li jistabbilixxu programmi tal-Unjoni kif definiti fil-Ftehim. Skont il-Ftehim, l-Unjoni ser twettaq miżuri ta’ kooperazzjoni mar-Repubblika tal-Korea skont l-Artikolu 212 tat-Trattat dwar il-Funzjonament tal-Unjoni Ewropea.

(5)

Skont l-Artikolu 3(1) tal-Ftehim, it-termini u l-kundizzjonijiet speċifiċi għall-parteċipazzjoni tar-Repubblika tal-Korea fi kwalunkwe programm jew attività tal-Unjoni huma soġġetti għall-atti bażiċi u kif koperti mill-Protokolli ta’ dan il-Ftehim.

(6)

Skont l-Artikolu 3(2) tal-Ftehim, it-termini u l-kundizzjonijiet speċifiċi għall-parteċipazzjoni tar-Repubblika tal-Korea f’Orizzont Ewropa huma stabbiliti fil-Protokoll dwar l-Assoċjazzjoni tar-Repubblika tal-Korea ma’ Orizzont Ewropa – il-Programm Qafas għar-Riċerka u l-Innovazzjoni (2021-2027) (il-“Protokoll dwar l-Assoċjazzjoni tal-Korea ma’ Orizzont Ewropa”) tal-Ftehim.

(7)

F’konformità mal-mandat tal-Kunsill, il-Protokoll dwar l-Assoċjazzjoni tal-Korea ma’ Orizzont Ewropa ġie negozjat b’mod parallel mal-Ftehim u, skont l-Artikolu 17(9) tal-Ftehim, jifforma parti integrali minnu. Ir-Repubblika tal-Korea tassoċja mal-Pilastru II “Sfidi Globali u Kompetittività Industrijali Ewropea” ta’ Orizzont Ewropa.

(8)

Ir-Repubblika tal-Korea tissodisfa l-kriterji stabbiliti fl-Artikolu 16(1), il-punt (d), tar-Regolament (UE) 2021/695.

(9)

Il-Ftehim jikkonforma mal-Artikolu 16(2) tar-Regolament (UE) 2021/695, li jirrikjedi li l-assoċjazzjoni tal-pajjiżi terzi ma’ Orizzont Ewropa skont l-Artikolu 16(1), il-punt (d), ta’ dak ir-Regolament tkun f’konformità mal-kundizzjonijiet stabbiliti fi ftehim li jkopri l-parteċipazzjoni ta’ tali pajjiż jew territorju fi kwalunkwe programm tal-Unjoni, dment li l-ftehim jiżgura bilanċ ġust fir-rigward tal-kontribuzzjonijiet u l-benefiċċji tal-pajjiż terz li jipparteċipa fil-programmi tal-Unjoni; jistabbilixxi l-kundizzjonijiet tal-parteċipazzjoni fil-programmi tal-Unjoni, inkluż il-kalkolu ta’ kontribuzzjonijiet finanzjarji għal programmi individwali u l-kostijiet amministrattivi tagħhom; ma jagħti lill-pajjiż terz ebda setgħa ta’ teħid ta’ deċiżjonijiet fir-rigward tal-programm tal-Unjoni, u jiggarantixxi d-drittijiet tal-Unjoni li tiżgura ġestjoni finanzjarja soda u li tipproteġi l-interessi finanzjarji tal-Unjoni.

(10)

Għaldaqstant, jenħtieġ li l-Ftehim jiġi ffirmat.

(11)

Bil-ħsieb li tiġi żgurata l-kooperazzjoni f’waqtha bejn l-Unjoni u r-Repubblika tal-Korea fil-qasam tar-riċerka, tal-iżvilupp teknoloġiku u tal-innovazzjoni u li tiġi permessa l-parteċipazzjoni tal-entitajiet tal-Korea f’Orizzont Ewropa, il-Ftehim għandu jiġi applikat b’mod provviżorju,