|
Iris Oifigiúil |
GA Sraith L |
|
2024/1489 |
27.5.2024 |
CINNEADH (AE) 2024/1489 ÓN gCOMHAIRLE
an 21 Bealtaine 2024
lena n-údaraítear tús a chur leis an gcaibidlíocht lena leasaítear na Comhaontuithe a bhaineann le huathmhalartú faisnéise i dtaca le cuntais airgeadais chun feabhas a chur ar an gcomhlíontacht cánach idirnáisiúnta idir an tAontas Eorpach agus Cónaidhm na hEilvéise, Prionsacht Lichtinstéin, Prionsacht Andóra, Prionsacht Mhonacó agus Poblacht San Mairíne, faoi seach
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 115, i gcomhar le hAirteagal 218(3) agus (4), de,
Ag féachaint don mholadh ón gCoimisiún Eorpach,
De bharr an mhéid seo a leanas:
|
(1) |
Leis na Comhaontuithe a bhaineann le huathmhalartú faisnéise i dtaca le cuntais airgeadais arna dtabhairt i gcrích idir an tAontas agus Cónaidhm na hEilvéise (1), Prionsacht Lichtinstéin (2), Prionsacht Andóra (3), Prionsacht Mhonacó (4) agus Poblacht San Mairíne (5), faoi seach (‘na Comhaontuithe’), foráiltear an bunús dlí chun faisnéis i dtaca le cuntais airgeadais a uathmhalartú go cómhalartach idir gach Ballstát agus gach ceann de na triú tíortha sin, i gcomhréir le Comhchaighdeán Tuairiscithe (‘CRS’) arna ghlacadh go hidirnáisiúnta a d’fhorbair an Eagraíocht um Chomhar agus Forbairt Eacnamaíochta (‘ECFE’). Tá sé d’aidhm ag na Comhaontuithe feabhas a chur ar an gcomhlíontacht cánach idirnáisiúnta agus an tráth céanna cúnamh a thabhairt do na húdaráis chánach chun dul i ngleic le calaois chánach agus imghabháil cánach, agus chun iad a chosc. |
|
(2) |
Cuirtear CRS chun feidhme laistigh den Aontas le haghaidh malartuithe idir na Ballstáit faoi Threoir 2011/16/AE ón gComhairle (6). |
|
(3) |
Formheasadh athruithe tábhachtacha ar CRS in ECFE an 26 Lúnasa 2022. Tá na hathruithe sin le cur chun feidhme ón 1 Eanáir 2026 ar aghaidh. |
|
(4) |
Foráiltear cur chun feidhme na n-athruithe sin laistigh den Aontas trí bhíthin leasaithe ar Threoir 2011/16/AE. |
|
(5) |
I ngach ceann de na Comhaontuithe tá forálacha comhionanna lena bhforáiltear go bhfuil comhairliúcháin fhoirmiúla dhéthaobhacha idir na Páirtithe Conarthacha le bheith ar siúl nuair a ghlacfar athrú tábhachtach ar leibhéal ECFE ar aon cheann de ghnéithe CRS agus ina dhiaidh sin is féidir an comhaontú sin a leasú trí phrótacal nó trí chomhaontú nua idir na Páirtithe Conarthacha |
|
(6) |
Is chun leasa an Aontais agus a Bhallstát é a áirithiú go leanfar gan bhriseadh tar éis an 1 Eanáir 2026 leis an gcomhar i réimse an uathmhalartaithe faisnéise i dtaca le cuntais airgeadais idir na húdaráis chánach dá bhforáiltear sna Comhaontuithe. |
|
(7) |
Chuige sin, ba cheart tús a chur le caibidlíocht d’fhonn na Comhaontuithe a bhaineann le huathmhalartú faisnéise i dtaca le cuntais airgeadais a leasú chun feabhas a chur ar an gcomhlíontacht cánach idirnáisiúnta idir an tAontas agus Cónaidhm na hEilvéise, Prionsacht Lichtinstéin, Prionsacht Andóra, Prionsacht Mhonacó agus Poblacht San Mairíne, faoi seach, |
TAR ÉIS AN CINNEADH SEO A GHLACADH:
Airteagal 1
Leis seo údaraítear don Choimisiún tús a chur leis an gcaibidlíocht, thar ceann an Aontais, chun na Comhaontuithe maidir le huathmhalartú faisnéise i dtaca le cuntais airgeadais a leasú chun feabhas a chur ar an gcomhlíontacht cánach idirnáisiúnta idir an tAontas Eorpach agus Cónaidhm na hEilvéise, Prionsacht Lichtinstéin, Prionsacht Andóra, Prionsacht Mhonacó agus Poblacht San Mairíne, faoi seach.
Airteagal 2
1. Déanfaidh an Coimisiún an chaibidlíocht i gcomhréir leis na treoracha caibidlíochta a leagtar amach san aguisín a ghabhann leis an gCinneadh sin. Déanfar athbhreithniú agus tuilleadh forbartha ar na treoracha sin faoi mar is iomchuí, ag brath ar éabhlóid na caibidlíochta.
2. Déanfar an chaibidlíocht i ndlúthchomhar le Meitheal na Comhairle um Cheisteanna Cánach, a ainmnítear leis seo mar choiste speisialta de réir bhrí Airteagal 218(4) den Chonradh ar Fheidhmiú an Aontais Eorpaigh.
3. Tuairisceoidh an Coimisiún don choiste speisialta agus rachaidh sé i gcomhairle leis ar bhonn rialta. Arna iarraidh sin ag an gComhairle, tuairisceoidh an Coimisiún don Chomhairle maidir le seoladh agus toradh na caibidlíochta, lena n-áirítear i scríbhinn.
Airteagal 3
Is chuig an gCoimisiún a dhírítear an Cinneadh seo.
Arna dhéanamh sa Bhruiséil, an 21 Bealtaine 2024.
Thar ceann na Comhairle
An tUachtarán
H. LAHBIB
(1) Comhaontú idir an tAontas Eorpach agus Cónaidhm na hEilvéise maidir le huathmhalartú faisnéise i dtaca le cuntas airgeadais chun feabhas a chur ar an gcomhlíonacht cánach idirnáisiúnta (IO L 385, 29.12.2004, lch. 30).
(2) Comhaontú idir an tAontas Eorpach agus Prionsacht Lichtinstéin maidir le huathmhalartú faisnéise i dtaca le cuntas airgeadais chun feabhas a chur ar an gcomhlíonacht cánach idirnáisiúnta (IO L 379, 24.12.2004, lch. 84).
(3) Comhaontú idir an tAontas Eorpach agus Prionsacht Andóra ar mhalartú uathoibríoch faisnéise cuntas airgeadais chun feabhas a chur ar an gcomhlíonacht cánach idirnáisiúnta (IO L 359, 4.12.2004, lch. 33).
(4) Comhaontú idir an tAontas Eorpach agus Prionsacht Mhonacó maidir le malartú faisnéise i dtaca le cuntais airgeadais chun feabhas a chur ar an gcomhlíonacht cánach idirnáisiúnta i gcomhréir leis an gCaighdeán um Malartú Uathoibríoch Faisnéise i dtaca le Cuntais Airgeadais i gCúrsaí Cánach arna fhorbairt ag an Eagraíocht um Chomhar agus Forbairt Eacnamaíochta (ECFE) (IO L 19, 21.1.2005, lch. 55).
(5) Comhaontú idir an tAontas Eorpach agus Poblacht San Mairíne maidir le malartú uathoibríoch faisnéise i dtaca le cuntas airgeadais chun feabhas a chur ar an gcomhlíonacht cánach idirnáisiúnta (IO L 381, 28.12.2004, lch. 33).
(6) Treoir 2011/16/AE ón gComhairle an 15 Feabhra 2011 maidir le comhar riaracháin i réimse an chánachais agus lena aisghairtear Treoir 77/799/CE (IO L 64, 11.3.2011, lch. 1).
ELI: http://data.europa.eu/eli/dec/2024/1489/oj
ISSN 1977-0839 (electronic edition)