|
29.7.2020 |
GA |
Iris Oifigiúil an Aontais Eorpaigh |
L 244/13 |
CINNEADH CUR CHUN FEIDHME (AE) 2020/1114 ÓN gCOMHAIRLE
an 23 Iúil 2020
lena bhformheastar leasuithe ar Rialacha Nós Imeachta Eurojust
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2018/1727 ó Pharlaimint na hEorpa agus ón gComhairle an 14 Samhain 2018 maidir le Gníomhaireacht an Aontais Eorpaigh um Chomhar Ceartais Choiriúil (Eurojust), agus a thagann in ionad Chinneadh 2002/187/CGB ón gComhairle agus lena n‐aisghairtear an cinneadh sin (1), agus go háirithe Airteagal 5(5) de,
Ag féachaint do Rialacha Nós Imeachta Eurojust (2), mar a glacadh iad an 20 Nollaig 2019;
De bharr an mhéid seo a leanas:
|
(1) |
Féadfaidh Coláiste Eurojust (“an Coláiste”) Rialacha Nós Imeachta Eurojust (na “Rialacha Nós Imeachta”) a leasú agus an nós imeachta céanna á leanúint acu lena nglacadh ar thogra an Bhoird Feidhmiúcháin nó ar an tríú cuid de chomhaltaí an Choláiste, i gcomhréir le hAirteagal 5(5) de Rialachán (AE) 2018/1727 agus le hAirteagal 18 de na Rialacha Nós Imeachta. Beidh na leasuithe sin ar na Rialacha Nós Imeachta le formheas ag an gComhairle trí bhíthin gníomhartha cur chun feidhme. |
|
(2) |
D’fhormheas an Coláiste dréachtleasuithe ar na Rialacha Nós Imeachta, i gcomhréir le hAirteagal 5(5) de Rialachán (AE) 2018/1727, an 14 Iúil 2020. |
|
(3) |
Ba cheart don Chomhairle na Rialacha Nós Imeachta a fhormheas. |
|
(4) |
Níl Rialachán (AE) 2018/1727 ina cheangal ar an Danmhairg agus dá bhrí sin níl sí rannpháirteach i nglacadh ná i gcur chun feidhme an Chinnidh seo, ar leis a chuirtear Rialachán (AE) 2018/1727 chun feidhme. |
|
(5) |
Tá Rialachán (AE) 2018/1727 ina cheangal ar Éirinn agus dá bhrí sin tá sí rannpháirteach i nglacadh agus i gcur chun feidhme an Chinnidh seo, ar leis a chuirtear Rialachán (AE) 2018/1727 chun feidhme, |
TAR ÉIS AN CINNEADH SEO A GHLACADH:
Airteagal 1
Formheastar leis seo na leasuithe ar Rialacha Nós Imeachta Eurojust a ghabhann leis an gCinneadh seo .
Airteagal 2
Tiocfaidh an Cinneadh seo i bhfeidhm ar dháta a ghlactha.
Arna dhéanamh sa Bhruiséil, 23 Iúil 2020.
Thar ceann na Comhairle
An tUachtarán
M. ROTH
IARSCRÍBHINN
LEASUITHE AR RIALACHA NÓS IMEACHTA EUROJUST
TÁ COLÁISTE EUROJUST,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 85 de,
Ag féachaint do Rialachán (AE) 2018/1727 ó Pharlaimint na hEorpa agus ón gComhairle an 14 Samhain 2018 maidir le Gníomhaireacht an Aontais Eorpaigh um Chomhar Ceartais Choiriúil (Eurojust), agus a thagann in ionad Chinneadh 2002/187/CGB ón gComhairle agus lena n‐aisghairtear an cinneadh sin (1), dá ngairfear “Rialachán Eurojust” anseo feasta, agus go háirithe Airteagal 5(5) de,
Ag féachaint do Rialacha Nós Imeachta Eurojust (2) a d’fhormheas an Chomhairle le Cinneadh Cur Chun Feidhme (AE) 2019/2250 an 19 Nollaig 2019 (3) agus a ghlac an Coláiste an 20 Nollaig 2019, dá ngairfear na “Rialacha Nós Imeachta” anseo feasta, agus go háirithe Airteagail 2, 3, 5 agus 18 de,
De bharr an mhéid seo a leanas:
I gcomhréir le hAirteagal 5(5) de Rialachán Eurojust agus le hAirteagal 18 de na Rialacha Nós Imeachta, féadfaidh an Coláiste Rialacha Nós Imeachta Eurojust a leasú de réir an nós imeachta chéanna lena nglacadh ar thogra ón mBord Feidhmiúcháin nó ó aon trian de chomhaltaí an Choláiste. Is le tromlach dhá thrian de chomhaltaí an Choláiste a dhéanfar aon leasú. I gcás nach féidir teacht ar chomhaontú le tromlach dhá thrian, déanfar an cinneadh trí thromlach simplí le linn an chéad chruinnithe eile den Choláiste.
Mar fhreagairt ar phaindéim COVID-19, tá roinnt beart urghnách coisctheach agus srianta déanta ag na Ballstáit. Fágann na bearta sin go bhfuil sé an-deacair nó dodhéanta go mbeadh comhaltaí an Choláiste i láthair go fisiciúil ag cruinnithe de chuid an Choláiste a thionóltar ar áitribh Eurojust nó ar aon láthair eile. Mar thoradh air sin, tá sé deacair an córam a cheanglaítear le hAirteagal 6(1) de na Rialacha Nós Imeachta a bhaint amach agus tá sé deacair don Choláiste cruinnithe foirmiúla a thionól agus cinnteoireacht a áirithiú.
Chun leanúnachas institiúideach gnó a áirithiú, tá gá anois leis na Rialacha Nós Imeachta chun a cheadú don Choláiste cruinnithe a thionól ag baint úsáid as modhanna teicniúla, lena n‐áirítear trí fhíschomhdháil, nuair a choisceann teagmhais nó imthosca urghnácha nach bhfuil neart ag comhaltaí an Choláiste orthu, teacht le chéile i gcomhréir le ceanglais Airteagail 2, 3, 5(2) agus 6(1) de na Rialacha Nós Imeachta.
TAR ÉIS CINNEADH MAR A LEANAS:
Airteagal 1
Leasuithe ar na Rialacha Nós Imeachta
Leasaítear Airteagal 2 de na Rialacha Nós Imeachta leis seo mar a leanas:
|
|
Cuirtear mír (13) nua leis: “I gcomhréir le ceanglais an dara mír d’Airteagal 5(2) de na Rialacha Nós Imeachta seo, féadfar cruinnithe an Choláiste chun an tUachtarán a thoghadh a eagrú trí mhodhanna teicniúla a úsáid, lena n‐áirítear trí fhíschomhdháil. Leis na modhanna teicniúla sin ceadófar do chomhaltaí an Choláiste vóta leictreonach anaithnid a chaitheamh chun rúndacht a choimirciú agus chun a rannpháirtíocht sa phróiseas sin a fhíorú. Beidh feidhm mutatis mutandis ag forálacha eile an Airteagail sin maidir leis na cruinnithe sin.” |
Leasaítear Airteagal 3 de na Rialacha Nós Imeachta leis seo mar a leanas:
|
|
Cuirtear an méid a leanas in ionad mhír 3: “Beidh feidhm mutatis mutandis ag an nós imeachta chun an tUachtarán a thoghadh in Airteagal 2(3) go (13) de na Rialacha Nós Imeachta seo maidir leis na Leas-Uachtaráin a thoghadh gan dochar do mhír 4 den Airteagal sin.” |
Leasaítear Airteagal 5 de na Rialacha Nós Imeachta leis seo mar a leanas:
|
|
I mír 2, cuirtear an dara mír seo a leanas leis: “I gcás teagmhais nó imthosca urghnácha nach bhfuil neart ag comhaltaí an Choláiste orthu (force majeure) agus nuair nach féidir leis an gColáiste teacht le chéile faoi cheanglais na míre seo de na Rialacha Nós Imeachta, féadfaidh an Coláiste a chinneadh, i gcomhréir le hAirteagal 7 de na Rialacha Nós Imeachta seo, a chruinnithe a eagrú trí mhodhanna teicniúla a úsáid, lena n‐áirítear trí fhíschomhdháil. Is le cinneadh ón gColáiste a chinnfear ré an bhirt seo. Féadfar an cinneadh sin ón gColáiste a athnuachan a mhéid a bheidh na teagmhais nó na himthosca urghnácha (force majeure) fós ann. Féadfar cruinnithe den sórt sin den Choláiste a eagrú ar choinníoll gur féidir trí bhíthin na modhanna teicniúla atá ar fáil na comhaltaí a shainaithint agus gur féidir leo a bheith rannpháirteach sa phlé agus coláisteacht na bpléití a áirithiú. Tá feidhm mutatis mutandis ag forálacha Airteagail 5 agus 6 de na Rialacha Nós Imeachta seo maidir leis na cruinnithe sin.” |
Airteagal 2
Teacht i bhfeidhm agus foilsiú
Tiocfaidh na leasuithe seo ar Rialacha Nós Imeachta Eurojust i bhfeidhm ar dháta a nglactha.
Foilseofar na leasuithe seo ar na Rialacha Nós Imeachta in Iris Oifigiúil an Aontais Eorpaigh.
(1) IO L 295, 21.11.2018, lch. 138.