(1)

Le Cinneadh (AE) 2017/418 ón gComhairle (1), tugadh i gcrích an Comhaontú Comhpháirtíochta Iascaigh Inbhuanaithe idir an tAontas Eorpach agus Rialtas Oileáin Cook (2) (“an Comhaontú”) agus tháinig sé i bhfeidhm an 10 Bealtaine 2017. Tá feidhm ag an gComhaontú agus ag an bPrótacal maidir lena chur chun feidhme (“an Prótacal atá ann faoi láthair”) ar bhonn sealadach ó bhí an 14 Deireadh Fómhair 2016 (3) ann.

(2)

An 7 Iúil 2020 thug an Chomhairle údarú don Choimisiún tús a chur le caibidlíocht le Rialtas Oileáin Cook maidir le tabhairt i gcrích Prótacal nua maidir le cur chun feidhme an Chomhaontaithe (“an Prótacal”).

(3)

Go dtí go dtabharfar an chaibidlíocht i gcrích, cuireadh síneadh bliana amháin leis an bPrótacal atá ann faoi láthair (4) agus tá sé le dul in éag an 13 Samhain 2021.

(4)

Tugadh an chaibidlíocht sin chun críche go rathúil agus cuireadh inisealacha leis an bPrótacal an 28 Iúil 2021.

(5)

Tá sé d’aidhm ag an bPrótacal cur ar chumas an Aontais agus Rialtas Oileáin Cook leanúint de chomhoibriú le chéile chun beartas iascaigh inbhuanaithe a chur chun cinn agus chun acmhainní iascaigh uiscí iascaigh Oileáin Cook a shaothrú ar bhealach fónta, i gcomhréir leis an gcuspóir i dtaobh acmhainní bitheolaíocha na mara a chaomhnú, ar cuspóir é a dtugtar aitheantas dó faoi dhlí an Aontais, agus chun go bhféadfaidh soithí an Aontais a ngníomhaíochtaí iascaireachta a dhéanamh sna huiscí sin.

(6)

I bhfianaise na tábhachta eacnamaíche a bhaineann le gníomhaíochtaí iascaireachta an Aontais i limistéir iascaireachta Oileáin Cook agus i bhfianaise an ghá atá ann gan cur isteach ar na gníomhaíochtaí sin ar dhul in éag an Phrótacail atá ann faoi láthair, ba cheart an Prótacal a theacht i bhfeidhm a luaithe is féidir.

(7)

Dá bhrí sin, ba cheart an Prótacal a shíniú agus a chur i bhfeidhm ar bhonn sealadach ó dháta a shínithe, go dtí go gcomhlánófar na nósanna imeachta is gá chun go dtiocfaidh sé i bhfeidhm.

(8)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42 de Rialachán (AE) 2018/1725 ó Pharlaimint na hEorpa agus ón gComhairle (5) agus thug sé tuairim uaidh an 3 Samhain 2021,