(1)

Maidir leis na treoirlínte atá sa Socrú maidir leis na Creidmheasanna Onnmhairiúcháin arna dTacú go hOifigiúil (‘an Socrú’) a forbraíodh faoi chuimsiú na hEagraíochta um Chomhar agus Forbairt Eacnamaíochta (ECFE), rinneadh iad a thrasuí agus dá bhrí sin, rinneadh ceangailteach ó thaobh dlí san Aontas iad de bhun Rialachán (AE) Uimh. 1233/2011 ó Pharlaimint na hEorpa agus ón gComhairle (1).

(2)

Faoi láthair, cuirtear toirmeasc le hAirteagal 6 den Socrú ar aon chreidmheas onnmhairiúcháin nó ar aon tacaíocht cabhrach ceangailte a sholáthar do ghléasra giniúna leictreachais gualbhreoslaithe nach bhfuil gabháil ná stóráil éifeachtach carbóin ag baint leis, ach amháin i gcás ina n-úsáidtear an creidmheas onnmhairiúcháin nó an tacaíocht cabhrach ceangailte chun trealamh a sholáthar chun truailliú a laghdú, rud nach gcuireann síneadh le saolré úsáideach an ghléasra sin.

(3)

I gcomhréir le hAirteagal 6 den Socrú, bhí na Rannpháirtithe sa Socrú (‘na Rannpháirtithe’) le hathbhreithniú a dhéanamh air faoin 31 Nollaig 2022 d’fhonn a théarmaí agus a choinníollacha a neartú a thuilleadh chun rannchuidiú leis an sprioc chomhchoiteann aghaidh a thabhairt ar an athrú aeráide.

(4)

Sna Conclúidí uaithi an 15 Márta 2022, d’fhógair an Chomhairle go bhfuil sé ar intinn ag na Ballstáit a spriocdhátaí eolaíochtbhunaithe féin a chinneadh ina mbeartais náisiúnta faoi dheireadh 2023 chun deireadh a chur le creidmheasanna onnmhairiúcháin arna dtacú go hoifigiúil do thionscadail san earnáil fuinnimh breosla iontaise, cé is moite de chúinsí teoranta a shaineofar go soiléir agus atá comhsheasmhach le teorainn téimh 1,5 oC agus le spriocanna Chomhaontú Pháras a glacadh faoi Chreat-Choinbhinsiún na Náisiún Aontaithe ar an Athrú Aeráide (2).

(5)

Chomhaontaigh na Rannpháirtithe cinneadh a ghlacadh i nós imeachta i scríbhinn lena dtugtar isteach airteagal nua amháin agus lena leasaítear Airteagal 6. Leis an gcinneadh atá beartaithe, cheanglófaí ar Rúnaíocht ECFE tuarascáil phoiblí a ullmhú gach bliain maidir le hidirbhearta in earnáil an fhuinnimh.

(6)

Is iomchuí an seasamh atá le glacadh thar ceann an Aontais maidir leis an gcinneadh ó na Rannpháirtithe i ndáil le leasuithe ar an Socrú a bhunú, ós rud é go mbeidh an cinneadh sin ina cheangal ar an Aontas agus go mbeidh sé in ann tionchar cinntitheach a imirt ar inneachar dhlí an Aontais, de bhua Airteagal 2 de Rialachán (AE) Uimh. 1233/2011.

(7)

Dá bhrí sin, ba cheart gurb é seasamh an Aontais tacú leis an gcinneadh i ndáil leis na leasuithe ar an Socrú bunaithe ar an dréacht-téacs atá i gceangal leis an gCinneadh seo,