(1)

L-infezzjoni bil-virus tal-pesta tar-ruminanti żgħar hija marda infettiva li taffettwa lill-annimali kaprini u ovini u jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tal-biedja u tikkawża disturb fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn il-pajjiżi terzi. F’każ ta’ tifqigħa tal-infezzjoni bil-virus tal-pesta tar-ruminanti żgħar fl-annimali kaprini jew ovini, hemm riskju serju li dik il-marda tinxtered fi stabbilimenti oħra tal-annimali kaprini jew ovini.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-pesta tar-ruminanti żgħar, u ċerti miżuri li għandhom jiġu applikati fiha. L-Artikolu 21(1) ta’ dak ir-Regolament Delegat jipprevedi li ż-żona ristretta trid tinkludi żona ta’ protezzjoni, żona ta’ sorveljanza, u jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew li jmissu magħhom.

(3)

Id-Deċiżjoni ta’ Implimentazzjoni tal-Kummissjoni (UE) 2024/3238 (4) ġiet adottata abbażi tar-Regolament (UE) 2016/429, u tistabbilixxi ċerti miżuri ta’ emerġenza relatati mal-infezzjoni bil-virus tal-pesta tar-ruminanti żgħar fil-Bulgarija b’reazzjoni għal tifqigħa kkonfermata fil-25 ta’ Novembru 2024 fil-muniċipalità ta’ Velingrad, fir-reġjun ta’ Pazardzhik. B’mod aktar speċifiku, id-Deċiżjoni ta’ Implimentazzjoni (UE) 2024/3238 tipprevedi li ż-żoni ta’ protezzjoni, iż-żoni ta’ sorveljanza u ż-żoni ristretti ulterjuri li għandhom jiġu stabbiliti minn dak l-Istat Membru, f’konformità mar-Regolament Delegat (UE) 2020/687 jridu jinkludu mill-inqas iż-żoni elenkati fl-Anness ta’ dik id-Deċiżjoni ta’ Implimentazzjoni.

(4)

Mill-aħħar emenda tad-Deċiżjoni ta’ Implimentazzjoni (UE) 2024/3238, bid-Deċiżjoni ta’ Implimentazzjoni tal-Kummissjoni (UE) 2025/1921 (5), fir-rigward tat-tifqigħa li ġiet ikkonfermata fil-muniċipalità ta’ Velingrad fir-reġjun ta’ Pazardzhik, il-Bulgarija nnotifikat lill-Kummissjoni dwar dewmien kontinwu fl-implimentazzjoni tal-miżuri għall-kontroll tal-mard meħtieġa li jiġu applikati fil-każ ta’ konferma uffiċjali ta’ tifqigħa ta’ marda tal-kategorija A fl-annimali miżmuma fi stabbiliment f’konformità mal-Artikolu 12 tar-Regolament Delegat (UE) 2020/687.

(5)

Fid-dawl tas-sitwazzjoni epidemjoloġika attwali, fir-rigward tal-infezzjoni bil-virus tal-pesta tar-ruminanti żgħar fil-Bulgarija, u tal-ħtieġa urġenti li jittaffa b’mod effettiv ir-riskju tat-tixrid ta’ dik il-marda, kemm f’dak l-Istat Membru kif ukoll fi Stati Membri oħra, huwa kruċjali li tiġi emendata d-durata tal-miżuri ta’ kontroll tal-mard fiż-żoni ta’ protezzjoni, żoni ta’ sorveljanza u żoni ristretti ulterjuri għall-Bulgarija elenkati fl-Anness tad-Deċiżjoni ta’ Implimentazzjoni (UE) 2024/3238. Dawn l-emendi jindirizzaw ir-riskju sinifikanti kkawżat miċ-ċirkolazzjoni kontinwa u t-tixrid potenzjali tal-marda lil hinn miż-żoni attwalment affettwati, sakemm il-miżuri ta’ kontroll tal-mard ma jkunux tlestew.

(6)

Għalhekk, jenħtieġ li l-Anness tad-Deċiżjoni ta’ Implimentazzjoni (UE) 2024/3238 jiġi emendat kif xieraq.

(7)

Id-durata taż-żoni ta’ protezzjoni, iż-żoni ta’ sorveljanza u ż-żoni ristretti ulterjuri hija bbażata fuq il-kriterji stabbiliti fl-Artikolu 64(1) tar-Regolament (UE) 2016/429 u fuq ir-regoli stabbiliti fir-Regolament Delegat (UE) 2020/687. Barra minn hekk, jitqiesu s-sitwazzjoni epidemjoloġika fir-rigward tal-infezzjoni bil-virus tal-pesta tar-ruminanti żgħar fiż-żoni affettwati kif ukoll is-sitwazzjoni epidemjoloġika ġenerali tal-infezzjoni bil-virus tal-pesta tar-ruminanti żgħar fil-Bulgarija, u l-livell ta’ riskju għal aktar tixrid ta’ dik il-marda f’dak l-Istat Membru u fl-Unjoni. Barra minn hekk, id-durata tal-miżuri previsti b’din id-Deċiżjoni ġiet iddeterminata fi qbil mal-istandards internazzjonali stabbiliti fil-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali.

(8)

Barra minn hekk, fid-dawl tad-dewmien kontinwu fl-applikazzjoni tal-miżuri ta’ kontroll tal-mard meħtieġa li għandhom jiġu applikati fil-każ ta’ konferma uffiċjali ta’ tifqigħa ta’ marda tal-kategorija A fl-annimali miżmuma fi stabbiliment f’konformità mal-Artikolu 12 tar-Regolament Delegat (UE) 2020/687, huwa neċessarju li l-projbizzjoni fuq il-movimenti tal-annimali ovini u kaprini mit-territorju kollu tal-Bulgarija tiġi estiża lejn Stati Membri oħra, kif previst fl-Artikolu 2, il-punt (d), tad-Deċiżjoni ta’ Implimentazzjoni (UE) 2024/3238, peress li għaddew aktar minn 12-il xahar mill-konferma tal-infezzjoni bil-virus tal-pesta tar-ruminanti żgħar fir-reġjun ta’ Pazardzhik. Għaldaqstant, jenħtieġ li dik il-projbizzjoni tiġi estiża sat-30 ta’ Ġunju 2026.

(9)

Barra minn hekk, filwaqt li titqies is-sitwazzjoni epidemjoloġika attwali fl-Unjoni fir-rigward tal-infezzjoni bil-virus tal-pesta tar-ruminanti żgħar u l-ħtieġa li li l-Bulgarija atapplika l-miżuri ta’ kontroll tal-mard previsti bid-Deċiżjoni ta’ Implimentazzjoni (UE) 2024/3238, jenħtieġ li l-applikazzjoni ta’ dik id-Deċiżjoni ta’ Implimentazzjoni tiġi estiża sat-30 ta’ Ġunju 2026.

(10)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

Fl-Artikolu 2, il-punt (d), id-data “il-31 ta’ Diċembru 2025” hija sostitwita bid-data “it-30 ta’ Ġunju 2026”;

2.

Fl-Artikolu 4, id-data “il-31 ta’ Jannar 2026” hija sostitwita bid-data “it-30 ta’ Ġunju 2026”;

3.

L-Anness huwa sostitwit bit-test stipulat fl-Anness ta’ din id-Deċiżjoni.