(1)

Is galar víreasach tógálach é ionfhabhtú le plá na n-athchogantach beag a bhíonn ar ainmhithe den chineál gabhair agus den chineál caorach agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha. I gcás ráige d’ionfhabhtú le plá na n-athchogantach beag in ainmhithe den chineál gabhair nó den chineál caorach, tá riosca tromchúiseach ann go leathfadh an galar sin go bunaíochtaí eile ainmhithe den chineál gabhair nó den chineál caorach.

(2)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c), de Rialachán (AE) 2016/429 agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil in Airteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear ionfhabhtú le plá na n-athchogantach beag, agus maidir le bearta áirithe a bheidh le cur i bhfeidhm ann. Déantar foráil le hAirteagal 21(1) den Rialachán Tarmligthe sin go gcuimseofar leis an gcrios srianta crios cosanta, crios faireachais, agus, más gá, criosanna srianta breise timpeall na gcriosanna cosanta agus faireachais nó cóngarach dóibh.

(3)

Glacadh Cinneadh Cur Chun Feidhme 2024/3238 ón gCoimisiún (4) ar bhonn Rialachán (AE) 2016/429 agus leagtar síos ann bearta éigeandála eatramhacha áirithe a bhaineann le hionfhabhtú le plá na n-athchogantach beag sa Bhulgáir mar fhreagairt ar ráig a deimhníodh an 25 Samhain 2024 i mbardasacht Velingrad, i réigiún Pazardzhik. Go sonrach, foráiltear le Cinneadh Cur Chun Feidhme (AE) 2024/3238 maidir leis na criosanna cosanta, na criosanna faireachais agus na criosanna srianta breise atá le bunú ag an mBallstát sin, i gcomhréir le Rialachán Tarmligthe (AE) 2020/687, go gcuimseoidh na criosanna sin ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme sin.

(4)

Ó rinneadh an leasú deireanach ar Chinneadh Cur Chun Feidhme (AE) 2024/3238 le Cinneadh Cur Chun Feidhme (AE) 2025/1921 ón gCoimisiún (5), tá fógra tugtha don Choimisiún ag an mBulgáir, a mhéid a bhaineann leis an ráig a deimhníodh i mbardasacht Velingrad i réigiún Pazardzhik, faoi mhoilleanna leanúnacha ar chur i bhfeidhm na mbeart rialaithe galar is gá a chur i bhfeidhm i gcás ráig ghalair de chatagóir A a bheith deimhnithe go hoifigiúil in ainmhithe atá ar coimeád i mbunaíocht i gcomhréir le hAirteagal 12 de Rialachán Tarmligthe (AE) 2020/687.

(5)

I bhfianaise na staide eipidéimeolaíche atá ann faoi láthair a mhéid a bhaineann le hionfhabhtú le plá na n-athchogantach beag sa Bhulgáir, agus an gá atá ann an riosca go leathfadh an galar sin, laistigh den Bhallstát sin agus chuig na Ballstáit eile araon, a mhaolú go héifeachtach, tá sé ríthábhachtach fad tréimhse na mbeart rialaithe galar is infheidhme sna criosanna cosanta, criosanna faireachais agus criosanna srianta breise a leasú le haghaidh na Bulgáire a liostaítear san Iarscríbhinn a ghabhann le Cinneadh Cur Chun Feidhme (AE) 2024/3238. Leis na leasuithe sin, tugtar aghaidh ar an riosca mór a bhaineann le cúrsaíocht leanúnach agus leathadh féideartha an ghalair lasmuigh de na limistéir atá buailte faoi láthair fad is nach mbeidh na bearta rialaithe galar curtha i gcrích.

(6)

Dá bhrí sin, ba cheart an Iarscríbhinn a ghabhann le Cinneadh Cur Chun Feidhme (AE) 2024/3238 a leasú dá réir sin.

(7)

Tá fad tréimhse na gcriosanna cosanta, na gcriosanna faireachais agus na gcriosanna srianta breise bunaithe ar na critéir a leagtar amach in Airteagal 64(1) de Rialachán (AE) 2016/429, agus ar na rialacha a leagtar síos i Rialachán Tarmligthe (AE) 2020/687. Ina theannta sin, cuirtear san áireamh an staid eipidéimeolaíoch maidir le hionfhabhtú le plá na n-athchogantach beag sna limistéir atá buailte chomh maith le staid eipidéimeolaíoch fhoriomlán an ionfhabhtaithe le plá na n-athchogantach beag sa Bhulgáir, chomh maith leis an leibhéal riosca maidir le leathadh breise an ghalair sin laistigh den Bhallstát sin agus san Aontas. Thairis sin, fad tréimhse na mbeart dá bhforáiltear leis an gCinneadh seo, rinneadh é a chinneadh i gcomhréir leis na caighdeáin idirnáisiúnta a leagtar amach sa Chód um Shláinte na nAinmhithe Talún de chuid na hEagraíochta Domhanda um Shláinte Ainmhithe.

(8)

Ina theannta sin, i bhfianaise na moille leanúnaí ar chur i bhfeidhm na mbeart rialaithe galar is gá a chur i bhfeidhm i gcás deimhniú oifigiúil ráige de chatagóir A in ainmhithe atá ar coimeád i mbunaíocht, i gcomhréir le hAirteagal 12 de Rialachán Tarmligthe (AE) 2020/687, tá níos mó ná 12 mhí caite ó deimhníodh an t-ionfhabhtú le plá na n-athchogantach beag i réigiún Pazardzhik agus is gá síneadh a chur leis an toirmeasc ar ghluaiseachtaí ainmhithe de chineál caorach agus de chineál gabhair ó chríoch iomlán na Bulgáire chuig Ballstáit eile a leagtar síos in Airteagal 2, pointe (d), de Chinneadh Cur Chun Feidhme (AE) 2024/3238. Dá réir sin, ba cheart síneadh a chur leis an toirmeasc sin go dtí an 30 Meitheamh 2026.

(9)

Thairis sin, agus an staid eipidéimeolaíoch atá ann faoi láthair san Aontas á cur san áireamh a mhéid a bhaineann le hionfhabhtú le plá na n-athchogantach beag. agus an gá atá le bearta rialaithe galair dá bhforáiltear i gCinneadh Cur Chun Feidhme (AE) 2024/3238 atá le cur i bhfeidhm ag an mBulgáir, is iomchuí síneadh a chur le tréimhse chur i bhfeidhm an Chinnidh Cur Chun Feidhme sin go dtí an 30 Meitheamh 2026.

(10)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

1.

in Airteagal 2, mír (d), cuirtear ’30 Meitheamh 2026’ in ionad an dáta ’31 Nollaig 2025’;

2.

In Airteagal 4, cuirtear ’30 Meitheamh 2026’ in ionad an dáta ’31 Eanáir 2026’;

3.

Cuirtear an téacs a leagtar amach san Iarscríbhinn a ghabhann leis an gCinneadh seo in ionad na hIarscríbhinne.