European flag

Il-Ġurnal Uffiċjali
ta'l-Unjoni Ewropea

MT

Is-serje L


2024/3029

10.12.2024

DEĊIŻJONI TAL-KUNSILL (UE) 2024/3029

tal-21 ta’ Ottubru 2024

dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt EU-CTC stabbilit bil-Konvenzjoni dwar is-simplifikazzjoni tal-formalitajiet fil-kummerċ tal-oġġetti u fil-Kumitat Konġunt EU-CTC stabbilit bil-Konvenzjoni dwar proċedura komuni ta’ tranżitu fir-rigward tal-istediniet biex il-Georgia taderixxi ma’ dawk il-Konvenzjonijiet

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)

Il-Konvenzjoni tal-20 ta’ Mejju 1987 dwar is-simplifikazzjoni tal-formalitajiet fil-kummerċ tal-oġġetti (1) u l-Konvenzjoni tal-20 ta’ Mejju 1987 dwar proċedura komuni ta’ tranżitu (2) (flimkien il-“Konvenzjonijiet”), konklużi bejn il-Komunità Ekonomika Ewropea, ir-Repubblika tal-Awstrija, ir-Repubblika tal-Finlandja, ir-Repubblika tal-Iżlanda, ir-Renju tan-Norveġja, ir-Renju tal-Iżvezja u l-Konfederazzjoni Żvizzera, daħlu fis-seħħ fl-1 ta’ Jannar 1988.

(2)

Il-Georgia esprimiet ix-xewqa tagħha li taderixxi għall-Konvenzjonijiet ladarba tkun ikkonformat mar-rekwiżiti marbuta mal-adeżjoni tagħha.

(3)

Skont l-Artikolu 11(3) tal-Konvenzjoni dwar is-simplifikazzjoni tal-formalitajiet fil-kummerċ tal-oġġetti, il-Kumitat Konġunt EU-CTC stabbilit minn dik il-Konvenzjoni jista’, permezz ta’ deċiżjoni, jadotta stediniet biex il-pajjiżi terzi jaderixxu ma’ dik il-Konvenzjoni.

(4)

Skont l-Artikolu 15(3), il-punt (e), tal-Konvenzjoni dwar proċedura komuni ta’ tranżitu, il-Kumitat Konġunt EU-CTC stabbilit minn dik il-Konvenzjoni jista’, permezz ta’ deċiżjoni, jadotta stediniet biex il-pajjiżi terzi jaderixxu ma’ dik il-Konvenzjoni.

(5)

Jixraq li tiġi stabbilita l-pożizzjoni li għandha tittieħed f’isem l-Unjoni fil-Kumitati Konġunti EU-CTC stabbiliti mill-Konvenzjonijiet, peress li d-deċiżjonijiet li jistiednu lill-Georgia taderixxi għall-Konvenzjonijiet se jkunu vinkolanti għall-Unjoni.

(6)

Il-Konvenzjonijiet se jiżguraw proċeduri effiċjenti għall-qsim tal-fruntieri bejn il-Georgia u l-partijiet għall-Konvenzjonijiet.

(7)

Għalhekk, il-pożizzjoni tal-Unjoni fil-Kumitati Konġunti EU-CTC stabbiliti mill-Konvenzjonijiet fir-rigward tal-adozzjoni ta’ deċiżjoni li tistieden lill-Georgia taderixxi mall-Konvenzjonijiet jenħtieġ għalhekk li tkun favorevoli u tkun imsejsa fuq l-abbozzi mehmużin tad-deċiżjonijiet.

(8)

Sabiex tiġi ffaċilitata l-adeżjoni f’waqtha tal-Georgia mal-Konvenzjonijiet, huwa meħtieġ li din id-Deċiżjoni tiġi adottata mingħajr dewmien,

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni fil-Kumitat Konġunt EU-CTC stabbilit mill-Konvenzjoni dwar is-simplifikazzjoni tal-formalitajiet fil-kummerċ tal-oġġetti fir-rigward tal-adozzjoni ta’ deċiżjoni li tistieden lill-Georgia taderixxi ma’ dik il-Konvenzjoni għandha tkun imsejsa fuq l-abbozz tad-deċiżjoni ta’ dak il-Kumitat Konġunt mehmuż ma’ din id-Deċiżjoni.

Artikolu 2

Il-pożizzjoni li għandha tittieħed f’isem l-Unjoni fil-Kumitat Konġunt tal-EU-CTC stabbilit mill-Konvenzjoni dwar proċedura komuni ta’ tranżitu fir-rigward tal-adozzjoni ta’ deċiżjoni li tistieden lill-Georgia taderixxi ma’ dik il-Konvenzjoni għandha tkun imsejsa fuq l-abbozz tad-deċiżjoni ta’ dak il-Kumitat Konġunt mehmuż ma’ din id-Deċiżjoni.

Artikolu 3

Wara l-adozzjoni tagħhom, id-deċiżjonijiet tal-Kumitati Konġunti EU-CTC imsemmija fl-Artikoli 1 u 2 għandhom jiġu ppubblikati f’Il-Ġurnal Uffiċjali tal-Unjoni Ewropea.

Artikolu 4

Din id-Deċiżjoni għandha tidħol fis-seħħ fid-data tal-adozzjoni tagħha..

Magħmul fil-Lussemburgu, il-21 ta’ Ottubru 2024.

Għall-Kunsill

Il-President

NAGY I.


(1)   ĠU L 134, 22.5.1987, p. 2.

(2)   ĠU L 226, 13.8.1987, p. 2.


ELI: http://data.europa.eu/eli/dec/2024/3029/oj

ISSN 1977-074X (electronic edition)