(1)

Maidir leis an gCoinbhinsiún an 20 Bealtaine 1987 maidir le foirmiúlachtaí i dtrádáil earraí a shimpliú (1) agus an Coinbhinsiún an 20 Bealtaine 1987 maidir le nós imeachta comhchoiteann um earraí faoi bhealach (2) (go comhpháirteach ‘na Coinbhinsiúin’), a tugadh i gcrích idir Comhphobal Eacnamaíochta na hEorpa, Poblacht na hOstaire, Poblacht na Fionlainne, Poblacht na hÍoslainne, Ríocht na hIorua, Ríocht na Sualainne agus Cónaidhm na hEilvéise, is é an 1 Eanáir 1988 a tháinig siad i bhfeidhm.

(2)

Chuir an tSeoirsia in iúl gur mian léi aontú do na Coinbhinsiúin a luaithe a chomhlíonann sí na ceanglais maidir lena haontachas.

(3)

De bhun Airteagal 11(3) den Choinbhinsiún maidir le foirmiúlachtaí i dtrádáil earraí a shimpliú, féadfaidh an Comhchoiste AE-TCI a bunaíodh leis an gCoinbhinsiún sin iarrataí ar thríú tíortha aontú don Choinbhinsiún sin a ghlacadh trí chinneadh.

(4)

De bhun Airteagal 15(3), pointe (e), den Choinbhinsiún maidir le nós imeachta comhchoiteann um earraí faoi bhealach, féadfaidh an Comhchoiste AE-TCI a bunaíodh leis an gCoinbhinsiún sin iarrataí ar thríú tíortha aontú don Choinbhinsiún sin a ghlacadh trí chinneadh.

(5)

Is iomchuí an seasamh atá le glacadh thar ceann an Aontais sna Comhchoistí AE-TCI a bunaíodh leis na Coinbhinsiúin a bhunú, ós rud é go mbeidh na cinntí maidir le hiarraidh ar an tSeoirsia aontú do na Coinbhinsiúin ceangailteach ar an Aontas.

(6)

Áiritheoidh na Coinbhinsiúin nósanna imeachta éifeachtúla um thrasnú teorann idir an tSeoirsia agus na páirtithe sna Coinbhinsiúin.

(7)

Maidir le seasamh an Aontais sna Comhchoistí AE-TCI a bunaíodh leis na Coinbhinsiúin a mhéid a bhaineann le cinneadh a ghlacadh maidir le hiarraidh ar an tSeoirsia aontú do na Coinbhinsiúin, ba cheart, dá bhrí sin, don seasamh sin a bheith fabhrach agus ba cheart é a bheith bunaithe ar na dréacht-chinntí atá i gceangal leis seo.

(8)

Chun aontachas tráthúil na Seoirsia do na Coinbhinsiúin a éascú, is gá an Cinneadh seo a ghlacadh gan mhoill,