(1)

Skont l-Artikolu 3(1) tad-Deċiżjoni (PESK) 2023/1599, il-Kumitat Politiku u ta’ Sigurtà (KPS) għandu jeżerċita l-kontroll politiku u d-direzzjoni strateġika tal-Inizjattiva tal-Unjoni Ewropea għas-Sigurtà u d-Difiża b’appoġġ għall-pajjiżi tal-Afrika tal-Punent tal-Golf tal-Guinea (l-“Inizjattiva”). Barra minn hekk, il-Kunsill awtorizza lill-KPS biex jieħu d-deċiżjonijiet rilevanti f’konformità mal-Artikolu 38 tat-Trattat dwar l-Unjoni Ewropea, inkluż deċiżjonijiet dwar il-ħatra tal-kap taċ-ċellola militari ta’ kmand u appoġġ.

(2)

Fid-9 ta’ Lulju 2025, il-KPS adotta d-Deċiżjoni (PESK) 2025/1431 (2) li taħtar lil-Kaptan André (Annius) VAN DER KAMP bħala kap taċ-ċellola militari ta’ kmand u appoġġ tal-Inizjattiva mis-16 ta’ Lulju 2025.

(3)

Fit-3 ta’ Diċembru 2025, l-awtoritajiet militari Spanjoli pproponew il-ħatra tal-Kurunell Emilio Asensio BAUTISTA MARTÍNEZ bħala kap taċ-ċellola militari ta’ kmand u appoġġ tal-Inizjattiva (il-“ħatra proposta”).

(4)

Fid-9 ta’ Diċembru 2025, il-Kmandant Militari għall-pilastru militari tal-Inizjattiva appoġġa l-ħatra proposta.

(5)

Fit-12 ta’ Diċembru 2025 il-Kumitat Militari tal-UE appoġġa l-ħatra proposta u rrakkomanda li l-KPS japprovaha.

(6)

Jenħtieġ li tittieħed deċiżjoni dwar il-ħatra tal-Kurunell Emilio Asensio BAUTISTA MARTÍNEZ bħala kap taċ-ċellola militari ta’ kmand u appoġġ tal-Inizjattiva mid-9 ta’ Jannar 2026.

(7)

Jenħtieġ li d-Deċiżjoni (PESK) 2025/1431 titħassar,