|
Iris Oifigiúil |
GA Sraith L |
|
2025/2433 |
5.12.2025 |
CINNEADH (AE) 2025/2433 ÓN gCOIMISIÚN
an 29 Iúil 2025
maidir leis an scéim cabhrach SA.51501 (2021/C) (ex 2019/NN) (ex (2018/N) arna cur chun feidhme ag an tSeicia i bhfabhar fiontair mhóra atá gníomhach i dtáirgeadh príomhúil talmhaíochta
(tugadh fógra faoi leis an doiciméad C(2025) 5149)
(Is é an téacs Seicise amháin atá barántúil)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh (dá ngairtear ‘CFAE’ anseo feasta), agus go háirithe Airteagal 108(2), an chéad fhomhír, de,
Tar éis a iarraidh ar na páirtithe leasmhara a gcuid barúlacha a thíolacadh de bhun na forála thuasluaite (1) agus ag féachaint dá gcuid barúlacha,
De bharr an mhéid seo a leanas:
1. NÓS IMEACHTA
|
(1) |
I litir dar dáta an 29 Meitheamh 2018, thug an tSeicia fógra don Choimisiún faoi scéim cabhrach SA.51501 (2018/N) — An tSeicia, Cabhair le haghaidh préimh árachais d’fhiontair mhóra, lena ndéantar foráil maidir le cabhair a dheonú chun préimheanna árachais a íoc lena gcumhdaítear damáiste a tharlaíonn de bharr tubaistí nádúrtha, teagmhais dhíobhálacha aeráide agus lotnaidí plandaí nó galar ainmhithe do bharra agus do bheostoc faoi seach (an ‘scéim’). |
|
(2) |
D’iarr an Coimisiún faisnéis bhreise i litreacha dar dáta an 24 Lúnasa 2018, an 8 Deireadh Fómhair 2018, an 17 Nollaig 2018, an 6 Márta 2019, an 28 Bealtaine 2019 agus an 8 Eanáir 2020. Chuir údaráis na Seice faisnéis bhreise isteach i litreacha dar dáta an 18 Meán Fómhair 2018, an 18 Eanáir 2019, an 23 Aibreán 2019, an 23 Meán Fómhair 2019 agus an 10 Feabhra 2020. |
|
(3) |
Le faisnéis a fuarthas le linn an réamhscrúdaithe ar an scéim, léiríodh gur deonaíodh roinnt cabhrach d’fhiontair mhóra cheana féin chun préimheanna árachais a íoc lena gcumhdaítear damáiste a tharlaíonn de bharr tubaistí nádúrtha, teagmhais dhíobhálacha aeráide agus lotnaidí plandaí nó galar ainmhithe do bharra agus do bheostoc faoi seach (‘an chabhair aonair’). Dheonaigh údaráis na Seice an chabhair sin faoin scéim SA.49594 (2017/XA) (2), ós rud é gur cháiligh na faighteoirí mar FBManna. |
|
(4) |
An 12 Eanáir 2021, ghlac an Coimisiún Cinneadh C(2021)34 final an 12 Eanáir 2021 (3) (dá ngairtear an ‘cinneadh tosaigh’ anseo feasta), lenar chuir sé an tSeicia ar an eolas go raibh cinneadh déanta aige an nós imeachta a leagtar síos in Airteagal 108(2) CFAE a thionscnamh i leith (i) na cabhrach aonair agus (ii) na scéime. Foilsíodh an cinneadh tosaigh in Iris Oifigiúil an Aontais Eorpaigh (4). |
|
(5) |
I litir dar dáta an 19 Feabhra 2021, chuir údaráis na Seice a mbarúlacha isteach. |
|
(6) |
Ní bhfuair an Coimisiún aon bharúil ó pháirtithe leasmhara eile. |
|
(7) |
D’iarr an Coimisiún soiléiriú breise ar údaráis na Seice i litreacha an 4 Lúnasa 2023, an 8 Feabhra 2024 agus an 6 Meitheamh 2024. D’fhreagair údaráis na Seice i litreacha dar dáta an 24 Lúnasa 2023, an 28 Feabhra 2024 agus an 26 Meitheamh 2024. |
2. RAON FEIDHME AN CHINNIDH SEO
|
(8) |
Leis an gcinneadh seo, déantar measúnú ar chomhoiriúnacht i) na scéime agus ii) na cabhrach aonair dá dtagraítear in aithris 3 leis an margadh inmheánach. |
3. TUAIRISC AR AN SCÉIM
3.1. Cuspóir
|
(9) |
Is é cuspóir na scéime cabhair a sholáthar chun préimheanna árachais a íoc agus, ar an gcaoi sin, árachas a chur ar fáil go forleathan don earnáil táirgthe phríomhúil talmhaíochta. Meastar gur uirlis éifeachtúil bainistithe riosca é an t-árachas, lena soláthraítear slándáil mhéadaithe d’fheirmeoirí in aghaidh damáiste nach féidir a thuar. Déantar foráil leis an scéim maidir le cabhair le haghaidh préimheanna árachais lena gcumhdaítear barra agus beostoc. |
3.2. Fad ama
|
(10) |
Tá sé beartaithe an scéim a bheith i bhfeidhm ón bhfógra faoin gCinneadh ón gCoimisiún lena bhformheastar an scéim go dtí an 31 Nollaig 2024. |
3.3. Bunúis dlí
|
(11) |
Is iad na gníomhartha dlí seo a leanas atá sa bhunús dlí:
|
3.4. Buiséad
|
(12) |
Meastar gurb é CZK 690 milliún (thart ar EUR 25,8 milliún (5)) buiséad foriomlán na scéime. Tá an chabhair le maoiniú ó bhuiséad an Stáit. |
|
(13) |
Is é an t-údarás deonúcháin an Ciste tacaíochta agus ráthaíochta talmhaíochta agus foraoiseachta [Podpůrný a garanční rolnický a lesnický fond, a.s.]. Is gníomhaireacht rialtais shainchuspóireach í, i bhfoirm cuideachta comhstoic, ina bhfuil 100 % de na scaireanna faoi úinéireacht an Stáit. Gníomhaíonn sí mar údarás deonúcháin ar bhonn § 2da d’Acht Uimh. 252/1997 Bail. maidir le talmhaíocht. |
3.5. Foirm cabhrach
|
(14) |
D’íocfaí cabhair i bhfoirm deontas díreach. Measann údaráis na Seice gurb í an fhoirm cabhrach sin an fhoirm cabhrach is iomchuí chun costais na bpréimheanna árachais a chumhdach. |
3.6. Tairbhithe
|
(15) |
Tá an scéim ceaptha i bhfabhar fiontair mhóra atá gníomhach i dtáirgeadh príomhúil talmhaíochta. |
|
(16) |
Tá an líon measta tairbhithe níos mó ná 1 000. |
|
(17) |
Dheimhnigh údaráis na Seice nach bhfuil gnóthais atá i gcruachás de réir bhrí phointe 33(63) de na Treoirlínte maidir le státchabhair in earnáil na talmhaíochta agus in earnáil na foraoiseachta agus i limistéir thuaithe (6) (dá ngairtear ‘Treoirlínte 2023’ anseo feasta) incháilithe do chabhair faoin scéim. |
|
(18) |
Ar an gcaoi chéanna, gheall údaráis na Seice íocaíocht na cabhrach a chur ar fionraí má bhí cabhair neamhdhleathach níos luaithe fós ar fáil don tairbhí a dearbhaíodh a bheith neamhréir le cinneadh ón gCoimisiún (maidir le cabhair aonair nó scéim cabhrach), go dtí go mbeidh méid iomlán na cabhrach neamhdhleathaí agus neamhréire, lena n-áirítear an t-ús aisghabhála comhfhreagrach, aisíoctha nó íoctha isteach i gcuntas stoptha ag an tairbhí. |
3.7. Sonraí breise
|
(19) |
Leis an bhfógra, tá sé beartaithe ag an tSeicia beart cabhrach SA.49594 (2017/XA) atá ann cheana a chomhlánú, beart a bhí i bhfeidhm ón 1 Eanáir 2018 (7). Díolmhaíodh an beart sin ar bhonn Rialachán (AE) Uimh. 702/2014 ón gCoimisiún (8) (dá ngairtear ‘an Rialachán Blocdhíolúine Talmhaíochta’ anseo feasta) agus bhí a raon feidhme teoranta do FBManna. Leis an bhfógra, tá sé beartaithe ag an tSeicia, dá bhrí sin, an bonn a chur i bhfeidhm le haghaidh cabhair i bhfabhar fiontair mhóra. |
|
(20) |
De réir an bhunúis dlí náisiúnta, tuigtear ‘tubaistí nádúrtha’ mar chreathanna talún, maidhmeanna sléibhe, sciorrthaí talún agus tuilte, tornádónna agus falscaithe a tharlaíonn go nádúrtha. Tuigtear ‘teagmhais dhíobhálacha aeráide’ mar dhálaí díobhálacha aimsire amhail sioc, stoirmeacha agus cloichshneachta, oighear, báisteach throm nó sheasta, triomach nó dálaí díobhálacha aeráide eile. Tuigtear ‘lotnaidí plandaí’ mar aon speiceas, tréithchineál nó bith-thíopa planda, ainmhí nó pataigine atá díobhálach do phlandaí nó do tháirgí plandaí. |
Cabhair le haghaidh árachais lena gcumhdaítear damáiste a tharlaíonn do bharra
|
(21) |
Is féidir cabhair a dheonú do shaothraithe a thógann polasaí árachais barr amach ina n-ainm féin agus a íocann CZK 1 000 (thart ar EUR 37,4) ar a laghad i bpréimheanna le haghaidh bliain ábhartha. Ní mheastar gur barra iad foraoisí ná plandlanna foraoise. |
|
(22) |
Braitheann an déine cabhrach ar an gcineál barr. Athraíonn sé idir 35 % agus 65 % de chostas doiciméadaithe an árachais barr speisialta le haghaidh bliain ábhartha. I gcás barra eile, athraíonn an déine cabhrach idir 10 % agus 50 % de chostas doiciméadaithe an árachais le haghaidh bliain ábhartha. |
|
(23) |
Ciallaíonn ‘barra speisialta’ an méid seo a leanas go háirithe:
|
Cabhair le haghaidh árachais lena gcumhdaítear damáiste a tharlaíonn do bheostoc
|
(24) |
Is féidir cabhair a dheonú d’fheirmeoirí beostoic a thógann polasaí árachais beostoic amach ina n-ainm féin agus a íocann CZK 1 000 (thart ar EUR 37,4) ar a laghad i bpréimheanna le haghaidh bliain ábhartha. |
|
(25) |
Athraíonn an déine cabhrach idir 35 % suas le 65 % de na costais árachais dhoiciméadaithe. |
Coinníollacha breise
|
(26) |
Dheimhnigh údaráis na Seice nach mór na híocaíochtaí árachais a bheith teoranta do chúitimh as méid nach mó ná an costas a bhaineann leis an damáiste a tharla de bharr na dteagmhas lena mbaineann a shlánú (aithris (20)) agus nach bhféadfaidís ach an táirgeadh iarbhír sula ndearnadh an damáiste a chumhdach. Thairis sin, ní cheanglófaí ná ní shonrófaí cineál ná cainníocht an táirgthe amach anseo le conarthaí árachais. |
|
(27) |
Dheimhnigh údaráis na Seice nach féidir an chabhair a theorannú d’árachas arna sholáthar ag cuideachta árachais aonair nó ag grúpa cuideachtaí agus nach féidir an chabhair a bheith coinníollach ar an gconradh árachais a bheith tugtha i gcrích le cuideachta atá bunaithe sa tSeicia. |
|
(28) |
Ní mór do na hiarratasóirí ar chabhair conradh árachais a thabhairt i gcrích le soláthraí árachais, a bhfuil comhaontú comhair aige leis an údarás deonúcháin (9). Féadfaidh aon soláthraí árachais a iarraidh comhaontú comhair den sórt sin a thabhairt i gcrích leis an údarás deonúcháin. |
|
(29) |
De réir an bhunúis dlí náisiúnta agus mar a dheimhnigh údaráis na Seice, ní mór an t-iarratas ar chabhair a chur isteach sula n-íocfar an phréimh árachais. |
|
(30) |
Ní mór a áireamh san iarratas ar chabhair ainm an iarratasóra agus méid an ghnóthais, tuairisc ar an tionscadal nó ar an ngníomhaíocht, lena n-áirítear a shuíomh agus na dátaí tosaithe agus an dáta críochnaithe, an méid cabhrach is gá chun an tionscadal nó an ghníomhaíocht a dhéanamh agus na costais incháilithe. |
|
(31) |
Ní mór d’iarratasóirí tuairisc a thabhairt san iarratas ar an gcás gan an chabhair (cás frithfhíorasach) agus fianaise dhoiciméadach a chur isteach chun tacú leis an gcás frithfhíorasach ar a dtugtar tuairisc san iarratas. Agus iarratas á fháil aige, ní mór don údarás deonúcháin seiceáil inchreideachta a dhéanamh ar an gcás frithfhíorasach agus a dheimhniú go bhfuil an éifeacht dreasachta is gá ag an gcabhair. |
|
(32) |
Ní féidir cabhair a charnadh le cabhair a fhaightear ó scéimeanna áitiúla, réigiúnacha, náisiúnta ná ó scéimeanna eile de chuid an Aontais ná le cabhair ad hoc le haghaidh na gcostas incháilithe céanna. |
|
(33) |
Ríomhann an t-údarás deonúcháin an uasdéine cabhrach agus an t-uasmhéid cabhrach ar bhealach neamh-idirdhealaitheach tráth deonaithe na cabhrach. Ní mór fianaise dhoiciméadach shoiléir chomhaimseartha a bheith ann chun tacú leis na costais incháilithe. Chun an déine cabhrach agus na costais incháilithe a ríomh, ní mór na figiúirí uile a úsáidtear a ghlacadh sula n-asbhaintear aon cháin nó muirear eile. |
|
(34) |
Níl cáin bhreisluacha (‘CBL’) incháilithe do chabhair, ach amháin i gcás nach bhfuil sí in-aisghabhála faoi na rialacha náisiúnta. |
|
(35) |
Mhínigh údaráis na Seice nach bhfuil coinne leis go mbeidh tionchar ag an scéim ar an gcomhshaol, toisc nach raibh inti ach cabhair chun préimheanna árachais a íoc. |
|
(36) |
Ní áirítear an beart céanna i bPlean Straitéiseach na Seice, ach bhí an scéim comhsheasmhach le cuspóir ginearálta an chomhbheartais talmhaíochta (‘CBT’) earnáil talmhaíochta iomaíoch athléimneach a chothú, a leagtar síos in Airteagal 5, pointe (a) de Rialachán (AE) 2021/2115 ó Pharlaimint na hEorpa agus ón gComhairle (10), mar aon le cuspóir sonrach CBT tacú le hioncam feirme inmharthana agus athléimneacht na hearnála talmhaíochta agus iomaíochas feirme a mhéadú, mar a leagtar síos in Airteagal 6(1), pointí (a) agus (b), den Rialachán sin. |
|
(37) |
Dheimhnigh údaráis na Seice go bhfoilseoidís i modúl an Choimisiúin Eorpaigh maidir le trédhearcacht dámhachtana (11) téacs iomlán na scéime agus a forálacha cur chun feidhme nó a bunús dlí, céannacht an údaráis deonúcháin agus céannacht na dtairbhithe a fhaigheann dámhachtain cabhrach aonair os cionn EUR 60 000 (12). Dheimhnigh údaráis na Seice go bhfoilseofaí an fhaisnéis sin tar éis don chinneadh an chabhair a dheonú a bheith déanta, go gcoinneofaí í ar feadh 10 mbliana ar a laghad agus go mbeadh sí ar fáil don phobal i gcoitinne gan srianta. |
|
(38) |
Gheall údaráis na Seice an scéim a oiriúnú do na rialacha nua (13), atá i bhfeidhm ón 1 Eanáir 2023, agus iad a chur i bhfeidhm iad maidir leis an scéim (14). |
4. TUAIRISC AR AN gCABHAIR AONAIR
4.1. Cuspóir
|
(39) |
Ba é cuspóir na cabhrach aonair árachas a chur ar fáil go forleathan don earnáil talmhaíochta trí chúiteamh páirteach ar chostais na préimhe árachais. Cumhdaíodh barra agus beostoc leis an árachas incháilithe. |
4.2. Fad ama
|
(40) |
Deonaíodh an chabhair aonair ón 1 Eanáir 2018 go dtí an 31 Nollaig 2022. |
4.3. Bunúis dlí
|
(41) |
Dheonaigh an tSeicia an chabhair aonair ar bhonn scéim SA.49594 (2017/XA). |
4.4. Buiséad
|
(42) |
Níor suíodh buiséad na cabhrach aonair. Cé gur ceadaíodh leis an imscrúdú foirmiúil tairbhí amháin den chabhair aonair sin a shainaithint (aithris (261)), d’fhéadfadh sé go bhfuair tairbhithe eile an chabhair aonair freisin. In aon chás, maoiníodh an chabhair aonair ó bhuiséad an Stáit. |
|
(43) |
Ba é an t-údarás deonúcháin an Ciste tacaíochta agus ráthaíochta talmhaíochta agus foraoiseachta [Podpůrný a garanční rolnický a lesnický fond, a.s.]. Is gníomhaireacht rialtais shainchuspóireach í, i bhfoirm cuideachta comhstoic, ina bhfuil 100 % de na scaireanna faoi úinéireacht an Stáit. Gníomhaíonn sí mar údarás deonúcháin ar bhonn § 2da d’Acht Uimh. 252/1997 Bail. maidir le talmhaíocht. |
4.5. Foirm chabhrach
|
(44) |
Deonaíodh an chabhair aonair i bhfoirm deontais dhíreacha. Mheas údaráis na Seice gurb í an fhoirm sin an fhoirm is iomchuí chun costais na bpréimheanna árachais a chumhdach. |
4.6. Tairbhithe
|
(45) |
B’fhiontair mhóra a bhí gníomhach i dtáirgeadh príomhúil talmhaíochta iad tairbhithe na cabhrach aonair. |
|
(46) |
Dheimhnigh údaráis na Seice nach raibh gnóthais i gcruachás de réir bhrí phointe 33(63) de na Treoirlínte maidir le státchabhair in earnáil na talmhaíochta agus in earnáil na foraoiseachta agus i limistéir thuaithe incháilithe do chabhair. |
|
(47) |
Ar an gcaoi chéanna, níor deonaíodh aon chabhair aonair do thairbhithe a raibh cabhair neamhdhleathach níos luaithe fós ar fáil dóibh a dearbhaíodh a bheith neamhréir le cinneadh ón gCoimisiún (maidir le cabhair aonair nó scéim cabhrach), go dtí go mbeidh méid iomlán na cabhrach neamhdhleathaí agus neamhréire, lena n-áirítear an t-ús aisghabhála comhfhreagrach, aisíoctha nó íoctha isteach i gcuntas stoptha ag an tairbhí sin. |
4.7. Sonraí breise
|
(48) |
Faoin scéim SA.49594 (2017/XA), tuigtear ‘tubaistí nádúrtha’ mar chreathanna talún, maidhmeanna sléibhe, sciorrthaí talún agus tuilte, tornádónna agus falscaithe a tharlaíonn go nádúrtha. Tuigtear ‘teagmhais dhíobhálacha aeráide’ mar dhálaí díobhálacha aimsire amhail sioc, stoirmeacha agus cloichshneachta, oighear, báisteach throm nó sheasta, triomach nó dálaí díobhálacha aeráide eile. Tuigtear ‘lotnaidí plandaí’ mar aon speiceas, tréithchineál nó bith-thíopa planda, ainmhí nó pataigine atá díobhálach do phlandaí nó do tháirgí plandaí. |
Cabhair le haghaidh árachais lena gcumhdaítear damáiste a tharlaíonn do bharra
|
(49) |
D’fhéadfaí cabhair a dheonú do shaothraithe a thóg beartas árachais barr amach ina n-ainm féin agus a d’íoc CZK 1 000 (thart ar EUR 37,4) ar a laghad i bpréimheanna le haghaidh bliain ábhartha. Ní mheastar gur barra iad foraoisí ná plandlanna foraoise. |
|
(50) |
Bhí an déine cabhrach ag brath ar an gcineál barr. D’athraigh sé idir 35 % agus 65 % de chostas doiciméadaithe an árachais barr speisialta le haghaidh bliain ábhartha. I gcás barra eile, d’athraigh an déine cabhrach idir 10 % agus 50 % de chostas doiciméadaithe an árachais le haghaidh bliain ábhartha. |
|
(51) |
Ciallaíonn ‘barra speisialta’ an méid seo a leanas go háirithe:
|
Cabhair le haghaidh árachais lena gcumhdaítear damáiste a tharlaíonn do bheostoc
|
(52) |
D’fhéadfaí cabhair a dheonú d’fheirmeoirí beostoic a thóg beartas árachais beostoic amach ina n-ainm féin agus a d’íoc CZK 1 000 ar a laghad (thart ar EUR 37,4) i bpréimheanna le haghaidh bliain ábhartha. |
|
(53) |
D’athraigh an déine cabhrach idir 35 % suas le 65 % de na costais árachais dhoiciméadaithe. |
Coinníollacha breise
|
(54) |
Dheimhnigh údaráis na Seice nár mhór na híocaíochtaí árachais a theorannú do chúitimh as méid nach mó ná an costas a bhaineann leis an damáiste a tharla de bharr na dteagmhas lena mbaineann a shlánú (aithris (20)) agus nach bhféadfaidís ach an táirgeadh iarbhír sular tharla an damáiste a chumhdach. Thairis sin, ní cheanglófaí ná ní shonrófaí cineál ná cainníocht an táirgthe amach anseo le conarthaí árachais. |
|
(55) |
Dheimhnigh údaráis na Seice nárbh fhéidir an chabhair a theorannú d’árachas arna sholáthar ag cuideachta árachais aonair nó ag grúpa cuideachtaí agus nach bhféadfadh an chabhair a bheith coinníollach ar an gconradh árachais a bheith tugtha i gcrích le cuideachta atá bunaithe sa tSeicia. |
|
(56) |
Bhí ar na hiarratasóirí ar chabhair conradh árachais a thabhairt i gcrích le soláthraí árachais, a raibh comhaontú comhair aige leis an údarás deonúcháin (15). D’fhéadfadh aon soláthraí árachais a iarraidh comhaontú comhair den sórt sin a thabhairt i gcrích leis an údarás deonúcháin. |
|
(57) |
Faoin scéim SA.49694 (2017/XA), agus mar a dheimhnigh údaráis na Seice, níor mhór an t-iarratas ar chabhair a chur isteach sula n-íocfaí an phréimh árachais. |
|
(58) |
Níor mhór a áireamh san iarratas ar chabhair ainm an iarratasóra agus méid an ghnóthais, tuairisc ar an tionscadal nó ar an ngníomhaíocht, lena n-áirítear a shuíomh agus na dátaí tosaithe agus an dáta críochnaithe, an méid cabhrach is gá chun an tionscadal nó an ghníomhaíocht a dhéanamh agus na costais incháilithe. |
|
(59) |
Níorbh fhéidir cabhair a charnadh le cabhair a fuarthas ó scéimeanna áitiúla, réigiúnacha, náisiúnta ná ó scéimeanna eile de chuid an Aontais ná le cabhair ad hoc le haghaidh na gcostas incháilithe céanna. |
|
(60) |
Bhí an uasdéine cabhrach agus an t-uasmhéid cabhrach le ríomh ar bhealach neamh-idirdhealaitheach ag an údarás deonúcháin tráth deonaithe na cabhrach. Níor mhór fianaise dhoiciméadach shoiléir chomhaimseartha a bheith ann chun tacú leis na costais incháilithe. Chun an déine cabhrach agus na costais incháilithe a ríomh, níor mhór na figiúirí uile a úsáideadh a ghlacadh sular asbhaineadh aon cháin nó muirear eile. |
|
(61) |
Ní raibh CBL incháilithe do chabhair, ach amháin i gcás nach raibh sé in-aisghabhála faoi na rialacha náisiúnta. |
|
(62) |
Mhínigh údaráis na Seice nach raibh aon tionchar ag an gcabhair ar an gcomhshaol, toisc nár chúitigh sí ach cuid de na préimheanna árachais. |
|
(63) |
Ní áirítear an beart céanna i bPlean Straitéiseach na Seice ná i gClár Forbartha Tuaithe na Seice le haghaidh 2014-2020, ach tá cuspóir na cabhrach comhsheasmhach le cuspóir ginearálta an chomhbheartais talmhaíochta (‘CBT’) earnáil talmhaíochta iomaíoch athléimneach a chothú, mar aon le cuspóir sonrach CBT tacú le hioncam feirme inmharthana agus athléimneacht na hearnála talmhaíochta agus iomaíochas feirme a mhéadú. |
|
(64) |
Dheimhnigh údaráis na Seice go bhfoilseoidís i modúl an Choimisiúin Eorpaigh maidir le trédhearcacht dámhachtana (16) téacs iomlán an bhirt agus a fhorálacha cur chun feidhme nó a bhunús dlí, céannacht an údaráis deonúcháin agus céannacht na dtairbhithe a fhaigheann dámhachtain cabhrach aonair os cionn EUR 60 000 (17). Dheimhnigh údaráis na Seice go bhfoilseofaí an fhaisnéis sin tar éis don chinneadh an chabhair a dheonú a bheith déanta, go gcoinneofaí í ar feadh 10 mbliana ar a laghad agus go mbeadh sí ar fáil don phobal i gcoitinne gan srianta. |
5. FORAIS CHUN AN NÓS IMEACHTA A THIONSCNAMH DE BHUN AIRTEAGAL 108(2) CFAE
|
(65) |
Mar a thugtar le fios in aithris (67) den chinneadh tosaigh, thionscain an Coimisiún an nós imeachta de bhun Airteagal 108(2) CFAE ar na forais seo a leanas:
|
5.1. Amhras maidir le comhoiriúnacht na scéime leis an margadh inmheánach
|
(66) |
I gcomhréir le hAirteagal 107(3) CFAE, ní fhéadfar a mheas go bhfuil an chabhair comhoiriúnach leis an margadh inmheánach ach amháin más féidir léi tairbhiú de cheann de na maoluithe dá bhforáiltear san Airteagal sin. Sna cásanna atá idir lámha, scrúdaigh an Coimisiún cé acu a bhí nó nach raibh an maolú dá bhforáiltear in Airteagal 107(3), pointe (c), CFAE infheidhme. |
|
(67) |
I gcomhréir le hAirteagal 107(3), pointe (c), CFAE, féadfar a mheas go bhfuil cabhair comhoiriúnach leis an margadh inmheánach má chinntear go n-éascaítear léi forbairt gníomhaíochtaí eacnamaíocha áirithe nó limistéar eacnamaíoch áirithe, i gcás nach ndéanann an chabhair sin difear díobhálach do dhálaí trádála an oiread go mbeadh dochar ann don leas comhchoiteann. |
|
(68) |
Sa chinneadh tosaigh, rinne an Coimisiún measúnú ar chomhoiriúnacht na scéime leis an margadh inmheánach i bhfianaise Threoirlínte an Aontais Eorpaigh maidir le státchabhair sna hearnálacha talmhaíochta agus foraoiseachta agus i limistéir thuaithe 2014 go 2020 (18), (dá ngairtear ‘Treoirlínte 2014’ anseo feasta) a bhí i bhfeidhm an tráth sin. |
|
(69) |
Go sonrach, rinne an Coimisiún measúnú ar chomhoiriúnacht na scéime leis an margadh inmheánach i bhfianaise Chaibidil 3 (‘Prionsabail mheasúnaithe choiteanna’) de Chuid I de Threoirlínte 2014. |
|
(70) |
Tráth an mheasúnaithe sin, chuir an Coimisiún amhras in iúl go raibh an scéim comhoiriúnach leis an margadh inmheánach faoi Airteagal 107(3), pointe (c), CFAE, mar gheall ar amhras a bhain leis an tráth a cuireadh an t-iarratas ar chabhair isteach. |
An tráth a cuireadh an t-iarratas isteach
|
(71) |
De bhun phointe (66) de Threoirlínte 2014, ní fhéadfaí a chinneadh go bhfuil cabhair comhoiriúnach leis an margadh inmheánach ach amháin más rud é go n-athraíonn sí iompraíocht gnóthais ar bhealach go dtugann sé faoi ghníomhaíocht bhreise nach mbeadh sé ag gabháil di gan an chabhair nó a mbeadh sé ag gabháil di ar bhealach srianta nó éagsúil. |
|
(72) |
De bhun phointe (70) de Threoirlínte 2014, measann an Coimisiún nach dreasacht do thairbhí í cabhair in aon chás ina raibh obair ar ghníomhaíocht tosaithe cheana féin roimh don tairbhí an t-iarratas ar chabhair a dhéanamh chuig na húdaráis náisiúnta. |
|
(73) |
De bhun phointe 35(25) de Threoirlínte 2014, ciallaíonn ‘tús na n-oibreacha ar an tionscadal nó ar an ngníomhaíocht’ tús na ngníomhaíochtaí, nó na n-oibreacha tógála i ndáil leis an infheistíocht, pé acu is luaithe, nó an chéad ghealltanas atá ceangailteach ó thaobh dlí de chun trealamh a ordú nó seirbhísí a úsáid nó aon ghealltanas eile a fhágann gur tionscadal nó gníomhaíocht dho-athraithe é nó í. |
|
(74) |
Faoi rialacha na scéime, ní mór an t-iarratas ar chabhair a chur isteach tar éis an conradh árachais a bheith tugtha i gcrích ach sula n-íoctar an phréimh árachais (aithris (29)). |
|
(75) |
In aithris (66) den chinneadh tosaigh, chuir an Coimisiún amhras in iúl gur chomhlíon nós imeachta náisiúnta den sórt sin pointe (35)25 de Threoirlínte 2014, go sonrach cé acu a chuirfí nó nach gcuirfí na hiarratais ar chabhair isteach roimh ‘tús na n-oibreacha ar an tionscadal nó ar an ngníomhaíocht’, mar a shainmhínítear sa phointe sin. Chuir an Coimisiún an réamhthuairim in iúl gurbh é tabhairt i gcrích conartha árachais an chéad ghealltanas atá ceangailteach ó thaobh dlí de sa chás seo agus nach mór an tráth sin a mheas dá bhrí sin mar ‘tús na n-oibreacha ar an tionscadal nó ar an ngníomhaíocht’. Dá bhrí sin, chun pointe (70) de Threoirlínte 2014 a chomhlíonadh, tháinig an Coimisiún ar an réamhchonclúid gur cheart na hiarratais a chur isteach ní hamháin sula n-íocfar an phréimh árachais, ach sula dtabharfar an conradh árachais i gcrích freisin. |
|
(76) |
Ar bhonn na mbreithnithe sin, chuir an Coimisiún amhras in iúl gur chomhlíon an scéim na rialacha maidir le státchabhair a bhaineann leis an éifeacht dreasachta (19). |
|
(77) |
Ar na forais sin, thionscain an Coimisiún an nós imeachta de bhun Airteagal 108(2) CFAE agus d’iarr sé ar gach tríú páirtí a bhféadfadh sé go ndearna an chabhair sin difear dóibh chomh maith leis an tSeicia a mbarúlacha a chur isteach. An tráth céanna, d’iarr an Coimisiún ar an tSeicia an fhaisnéis uile a sholáthar a d’fhéadfadh cabhrú le measúnú a dhéanamh ar an gcabhair. |
5.2. Amhras maidir le dlíthiúlacht na cabhrach aonair
|
(78) |
Ina chinneadh tosaigh, thagair an Coimisiún don fhaisnéis mhargaidh a fuarthas le linn an réamhscrúdaithe, inar tugadh le fios gur deonaíodh cabhair aonair d’fhiontair mhóra áirithe a ndearna an t-údarás deonúcháin meastóireacht earráideach orthu mar FBManna tráth an deonaithe. Mheas an Coimisiún go ndearnadh an mheastóireacht sin ar fhorais fhoirmiúla amháin (20), i.e. trí sheiceáil a dhéanamh go heisiach ar chomhlíonadh foirmiúil na gcritéar lena sainítear FBM, gan an réaltacht eacnamaíoch ná na prionsabail cásdlí a leagtar amach in aithrisí (58) go (61) den chinneadh tosaigh a chur san áireamh. Mheas an Coimisiún go raibh cabhair deonaithe cheana féin ag an tSeicia do thairbhithe a bhféadfadh sé nár chomhlíon siad an sainmhíniú ar FBM tráth a deonaíodh cabhair (21) agus, dá bhrí sin, nach bhféadfaidís tairbhiú de scéim SA.49594 (2017/XA). Dá bhrí sin, mheas an Coimisiún go raibh aon chabhair aonair den sórt sin a deonaíodh cheana sular tugadh fógra faoin scéim agus, dá bhrí sin, sular formheasadh í, neamhdhleathach toisc gur deonaíodh í de shárú ar Airteagal 108(3) CFAE (22). |
|
(79) |
Bhí an breithniú a leag an Coimisiún amach sa chinneadh tosaigh bunaithe ar a léiriú ar Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta, mar a mhínítear in aithris (61) den chinneadh sin. Shonraigh an Coimisiún go raibh a léiriú bunaithe ar chásdlí Chúirt Bhreithiúnais agus Chúirt Ghinearálta an Aontais Eorpaigh (‘Cúirteanna an Aontais’) faoi threoir phrionsabal effet utile. |
5.3. Amhras maidir le comhoiriúnacht na cabhrach aonair leis an margadh inmheánach
|
(80) |
I gcomhréir le hAirteagal 107(3) CFAE, ní fhéadfar a mheas go bhfuil an chabhair comhoiriúnach leis an margadh inmheánach ach amháin más féidir leis tairbhiú de cheann de na maoluithe dá bhforáiltear san Airteagal sin. Sna cásanna atá idir lámha, scrúdaigh an Coimisiún cé acu a bhí nó nach raibh an maolú dá bhforáiltear in Airteagal 107(3), pointe (c), CFAE infheidhme. |
|
(81) |
I gcomhréir le hAirteagal 107(3), pointe (c), CFAE, féadfar a mheas go bhfuil cabhair comhoiriúnach leis an margadh inmheánach má chinntear go n-éascaítear léi forbairt gníomhaíochtaí eacnamaíocha áirithe nó limistéar eacnamaíoch áirithe, i gcás nach ndéanann an chabhair sin difear díobhálach do dhálaí trádála an oiread go mbeadh dochar ann don leas comhchoiteann. |
|
(82) |
Sa chinneadh tosaigh, rinne an Coimisiún measúnú ar chomhoiriúnacht na cabhrach aonair leis an margadh inmheánach i bhfianaise Threoirlínte 2014, a bhí i bhfeidhm an tráth sin. |
|
(83) |
Go sonrach, rinne an Coimisiún measúnú ar chomhoiriúnacht na cabhrach aonair leis an margadh inmheánach i bhfianaise Chaibidil 3 (‘Prionsabail mheasúnaithe choiteanna’) de Chuid I de Threoirlínte 2014. |
|
(84) |
Tráth an mheasúnaithe sin, chuir an Coimisiún amhras in iúl go raibh an chabhair a deonaíodh go neamhdhleathach comhoiriúnach leis an margadh inmheánach faoi Airteagal 107(3), pointe (c), CFAE, go sonrach i ndáil le héifeacht dreasachta a bheith ann. I ndáil leis sin, scrúdaigh an Coimisiún dhá choinníoll: cur isteach an cháis fhrithfhíorasaigh agus an tráth a cuireadh an t-iarratas ar chabhair isteach. |
Cur isteach an cháis fhrithfhíorasaigh
|
(85) |
De bhun phointe (72) de Threoirlínte 2014, ní mór do thairbhithe, ar fiontair mhóra iad, tuairisc a thabhairt san iarratas ar chabhair ar an gcás gan an chabhair, i.e. an cás frithfhíorasach nó tionscadal nó gníomhaíocht mhalartach. Ní mór fianaise dhoiciméadach a bheith ann chun tacú leis an gcás frithfhíorasach agus bhí ar an údarás deonúcháin a sheiceáil inchreidteachta a dhéanamh agus a éifeacht dreasachta a dheimhniú. |
|
(86) |
Ag céim an chinnidh tosaigh, bhí amhras ar an gCoimisiún ar urramaíodh an ceanglas sin i gcás tairbhithe móra a fuair cabhair aonair dá dtagraítear in aithris (3). Mheas an Coimisiún nár comhlíonadh an coinníoll sin mar gheall ar chur i mífheidhm an tsainmhínithe ar FBManna i gcomhthéacs chur chun feidhme scéim bhlocdhíolmhaithe SA.49594 (2017/XA). |
|
(87) |
I ndáil leis sin, rinne an Coimisiún tagairt sa chinneadh tosaigh do ghnéithe áirithe den sainmhíniú ar FBM a leagtar amach in Iarscríbhinn I a ghabhann leis an Rialachán Blocdhíolúine Talmhaíochta agus cásdlí ábhartha Chúirteanna an Aontais (23), dá dtagraítear freisin in aithrisí (78) agus (79) den Chinneadh seo. |
|
(88) |
Ní fhéadfadh ach FBManna amháin a bheith ina dtairbhithe den chabhair faoin scéim bhlocdhíolmhaithe agus, dá bhrí sin, níor ceanglaíodh orthu an cás frithfhíorasach a chur isteach. Dá bhrí sin, chuir an Coimisiún amhras in iúl maidir le cé acu a chuir nó nár chuir tairbhithe na cabhrach aonair an cás frithfhíorasach a cheanglaítear isteach chun éifeacht dreasachta na cabhrach sin a shuí (24). |
An tráth a cuireadh an t-iarratas isteach
|
(89) |
De bhun phointe (66) de Threoirlínte 2014, ní fhéadfaí a chinneadh go bhfuil cabhair comhoiriúnach leis an margadh inmheánach ach amháin más rud é go n-athraíonn sí iompraíocht gnóthais ar bhealach go dtugann sé faoi ghníomhaíocht bhreise nach mbeadh sé ag gabháil di gan an chabhair nó a mbeadh sé ag gabháil di ar bhealach srianta nó éagsúil. |
|
(90) |
De bhun phointe (70) de Threoirlínte 2014, measann an Coimisiún nach dreasacht do thairbhí í cabhair in aon chás ina raibh obair ar ghníomhaíocht tosaithe cheana féin roimh don tairbhí an t-iarratas ar chabhair a dhéanamh chuig na húdaráis náisiúnta. |
|
(91) |
De bhun phointe 35(25) de Threoirlínte 2014, ciallaíonn ‘tús na n-oibreacha ar an tionscadal nó ar an ngníomhaíocht’ tús na ngníomhaíochtaí, nó na n-oibreacha tógála i ndáil leis an infheistíocht, pé acu is luaithe, nó an chéad ghealltanas atá ceangailteach ó thaobh dlí de chun trealamh a ordú nó seirbhísí a úsáid nó aon ghealltanas eile a d’fhág gur thionscadal nó gníomhaíocht dho-athraithe é nó í. |
|
(92) |
Sa chás atá idir lámha, b’éigean an t-iarratas ar chabhair a chur isteach tar éis an conradh árachais a thabhairt i gcrích ach sular íocadh an phréimh árachais (aithris (29) den Chinneadh seo). |
|
(93) |
In aithris (62) den chinneadh tosaigh, chuir an Coimisiún amhras in iúl maidir le cé acu a chuir nó nár chuir na tairbhithe a fuair cabhair aonair de thoradh a n-aicmithe earráidigh mar FBManna cás frithfhíorasach isteach. |
|
(94) |
Dá bhrí sin, chinn an Coimisiún an nós imeachta a thionscnamh de bhun Airteagal 108(2) CFAE maidir leis an gcabhair aonair ‘mar gheall ar amhras a bhaineann le cur isteach an cháis fhrithfhíorasaigh agus maidir leis an tráth a cuireadh an t-iarratas isteach’ (25). |
6. BARÚLACHA ÓN tSEICIA
|
(95) |
Chuir an tSeicia an Coimisiún ar an eolas nach raibh aon ghlao ar iarratais ar chabhair oscailte faoin scéim. Dá bhrí sin, níor deonaíodh aon chabhair faoin scéim roimh an dáta a cuireadh barúlacha údaráis na Seice isteach maidir leis an gcinneadh tosaigh. |
|
(96) |
Chuir an tSeicia an Coimisiún ar an eolas gur sainaithníodh roinnt tairbhithe cabhrach faoi scéim bhlocdhíolmhaithe SA.49594 (2017/XA) mar fhiontair mhóra sa tseiceáil leantach riaracháin chaighdeánach. Ós rud é nach raibh aon bhunús dlí i bhfeidhm an tráth sin d’fhiontair mhóra agus go raibh an scéim bhlocdhíolmhaithe sin teoranta do FBManna (aithris (19)), chuir an tSeicia nósanna imeachta aisghabhála i bhfeidhm maidir leis na tairbhithe sin. Chuir an tSeicia isteach liosta de na tairbhithe lenar bhain an aisghabháil. |
|
(97) |
Chuir an tSeicia isteach freisin an liosta seo a leanas de thairbhithe eile a ndearna seiceáil orthu nár léirigh, de réir údaráis na Seice, aon neamhrialtacht ina leith sa tseiceáil ex post: AGROPARKL s.r.o., Podnik pro výrobu vajec v Kosičkách s.r.o., Zemědělský podnik Kvasicko, a.s., MEZILESÍ s.r.o., MORAVA-HOP s.r.o., AGRO Jesenice u Prahy a.s., ZEPOS a.s., AGROSERVIS 1. zemědělská a.s. Višňové, JAROS s.r.o., Zea a.s., ZEV Šaratice a.s., Agro družstvo Sebranice, PROVEM a.s. Havlíčkův Brod, Zemědělské družstvo Radiměř, Zemědělské družstvo Květná, Zemědělské družstvo Vendolí, Rostěnice a.s., Agria a.s., ZD Krásná Hora nad Vltavou a.s., Zemědělské družstvo Dolany, ČESKÁ VEJCE FARMS, s.r.o., DRUKO STŘÍŽOV s.r.o., FARMA VESELKA s.r.o., KLADRUBSKÁ a.s., Lužanská zemědělská a.s., Vlčnovská zemědělská a.s. agus Zemědělská společnost Blšany s.r.o. |
|
(98) |
I leith amhras an Choimisiúin a luaitear in aithris (62) den chinneadh tosaigh (i.e. go bhféadfadh sé nár chomhlíon cuid de na tairbhithe an sainmhíniú ar FBM tráth a deonaíodh cabhair), mhaígh an tSeicia nár chuir na tairbhithe sin na cásanna frithfhíorasacha isteach. D’áitigh an tSeicia nár deonaíodh an chabhair ach do FBManna faoi scéim bhlocdhíolmhaithe SA.49594 (2017/XA) agus i gcomhréir leis na ceanglais a leagtar síos sa Rialachán Blocdhíolúine Talmhaíochta. Dá bhrí sin, níor leagadh síos leis an scéim bhlocdhíolmhaithe an coinníoll maidir le cás frithfhíorasach. |
|
(99) |
Mhaígh an tSeicia, cé is moite de na hearráidí riaracháin a sainaithníodh (aithris (96) den Chinneadh seo), nár deonaíodh aon chabhair do thairbhithe nach mbeadh incháilithe do chabhair faoin scéim bhlocdhíolmhaithe mar gheall ar a méid. De réir údaráis na Seice, rinneadh measúnú ar an gcoinníoll sin i gcónaí i bhfianaise na rialacha a leagtar amach i ndlí ceangailteach an Aontais, go háirithe in Iarscríbhinn I a ghabhann leis an Rialachán Blocdhíolúine Talmhaíochta. |
6.1. Cáiliú tairbhithe áirithe mar FBManna
|
(100) |
Thagair údaráis na Seice go sonrach d’Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta: ‘Sa chás, ar an dáta a dhúntar na cuntais, go bhfaigheann fiontar amach gur sháraigh sé nó gur thit sé, ar bhonn bliantúil, faoin líon foirne nó faoi na tairseacha airgeadais a luaitear in Airteagal 2, ní bheidh caillteanas nó gnóthú stádais mar fhiontar meánmhéide, fiontar beag nó micrifhiontar mar thoradh air sin, ach amháin má sháraítear na tairseacha sin thar dhá thréimhse cuntasaíochta leanúnacha’. |
|
(101) |
Chuir údaráis na Seice in iúl nach bhfuil aon eisceacht ón riail sin agus go bhfuil an fhoráil sin curtha in iúl mar riail ghinearálta a bhfuil feidhm uathoibríoch aici a mhéid a fuarthas go bhfuil a boinn bailí agus fíor. Chuir siad in iúl freisin, le hathrú ar struchtúr úinéireachta fiontair tar éis cumaisc nó fála, sáraítear na luachanna tairsí FBM is infheidhme go comhsheasmhach. I ndáil leis sin, chinn an tSeicia go raibh aithris (60) den chinneadh tosaigh míréasúnta inar mheas an Coimisiún go raibh deonú na cabhrach do na fiontair sin neamhréir le prionsabal na héifeachta dreasachta. |
|
(102) |
Measann an tSeicia, mura mbeadh an riail a leagtar síos in Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta le cur i bhfeidhm go foirmiúil ach go gcuirfí an réaltacht eacnamaíoch san áireamh, go n-úsáidfí foclaíocht dhifriúil, e.g. ‘Níl feidhm ag an riail seo i gcás inar léir go bhfuil an t-athrú buan.’ Ní fhéadfaí ná ní dhéanfaí an réaltacht eacnamaíoch a léiriú go dtí sin le cur i bhfeidhm na rialach, agus i ngach imthoisc seachas i gcás cumaisc nó fáil cuideachta amháin, nach bhfuil aon tionchar acu, astu féin, ar dho-athraitheacht an athraithe. |
|
(103) |
Dar le húdaráis na Seice, dá gcuirfí an réaltacht eacnamaíoch amháin san áireamh, d’fhéadfadh sé a bheith meabhlach ó bhonn i gcásanna comhchosúla. Sa chleachtas, is minic a thagann méadú mór ar an líon foirne nó ar na huasteorainneacha airgeadais de bharr a mbeartais rathúil tráchtála nó monaraíochta, i.e. fiú in éagmais cumaisc nó fála, rud a d’fhéadfadh a bheith amhail gur léir go bhfuil an próiseas do-athraithe. Mar sin féin, fiú in imthosca den sórt sin, tá feidhm ag an riail a leagtar síos in Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta gan ceangal a chur ar údaráis náisiúnta athmheasúnú a dhéanamh ar réaltacht eacnamaíoch gach cáis aonair agus an riail á cur i bhfeidhm. |
|
(104) |
Ar an taobh eile, d’fhéadfadh sé nach athrú úinéireachta do-athraithe é cumasc nó fáil ach, ina ionad sin, d’fhéadfadh próiseas athruithe nó claochluithe struchtúracha éagsúla, nó fáil fiontar chun críoch infheistíochta, a bheith i gceist leo. |
|
(105) |
Measann an tSeicia thairis sin gur critéar soiléir ábhartha comhréireach í an riail a leagtar síos in Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta lena gceadaítear luaineachtaí réasúnta i bhfigiúirí agus i nochtaí arna dtuairisciú ag fiontar thar thréimhse áirithe. Ní cosúil go dtugtar le fios le haon ní sa riail sin go raibh sé beartaithe ag an gCoimisiún údaráis náisiúnta a chur i gceannas ar mheasúnú a dhéanamh ar an réaltacht eacnamaíoch i ngach cás aonair. Dar leis an tSeicia, tá ról na n-údarás náisiúnta teoranta d’athbhreithniú a dhéanamh ar chomhlíontacht na gcritéar mar a leagtar síos gan débhrí iad in Airteagal 4(2) d’Iarscríbhinn I a ghabhann leis an Rialachán sin. Ní chomhfhreagródh an oibleagáid measúnú a dhéanamh ar na luachanna buaine (nó neamhbhuaine) arna dtuairisciú ag fiontair don cheanglas maidir le critéir mheasúnaithe shoiléire shimplí a úsáid, ós rud é go n-éileofaí le measúnú den sórt sin measúnú eacnamaíoch cuimsitheach ar gach iarratasóir aonair. Bheadh sé sin contrártha do chuspóir an Choimisiúin an t-ualach riaracháin a shimpliú agus feabhas a chur ar thrédhearcacht agus ar dheimhneacht dhlíthiúil, agus cur i bhfeidhm aonfhoirmeach rialacha blocdhíolúine a áirithiú ar fud na mBallstát. |
|
(106) |
A mhéid a bhaineann le léiriú Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta faoi threoir an chásdlí, measann an tSeicia, cé go bhféadfaí ábhar rialach dlí a shoiléiriú trí léiriú, nach bhféadfaí an léiriú a úsáid chun míthuiscint a bhaint as dlí a bhfuil brí shoiléir intuigthe aige. Bheadh riosca ann go mbeadh easpa cinnteachta dho-ghlactha in idirbhearta dlíthiúla mar thoradh ar ghníomhaíocht den sórt sin. |
|
(107) |
Cuireann an tSeicia in iúl go dtagraíonn an cásdlí dá dtagraíonn an Coimisiún in aithris (59) den chinneadh tosaigh don chaidreamh idir fiontair nasctha, mar a thugtar orthu, arb é an critéar é a úsáidtear chun Airteagal 3 seachas Airteagal 4 d’Iarscríbhinn I a ghabhann leis an Rialachán Blocdhíolúine Talmhaíochta a chur i bhfeidhm. |
|
(108) |
De réir na Seicia, leagtar amach le hAirteagal 4(1) d’Iarscríbhinn I a ghabhann leis an Rialachán Blocdhíolúine Talmhaíochta na sonraí ábhartha (an líon foirne agus an uasteorainn airgeadais) le haghaidh fiontair ar éirigh leo sa tástáil fiontair nasctha agus, dá bhrí sin, is é an ‘dara céim’ den mheasúnú ar stádas fiontair é. Dá bhrí sin, tugann sé aghaidh ar chás difriúil agus níl feidhm aige maidir leis an measúnú ar an gcaidreamh idir fiontair faoin gcásdlí dá dtagraíonn an Coimisiún ina chinneadh tosaigh. |
|
(109) |
Ina theannta sin, áitíonn an tSeicia go ndéantar tuilleadh mionsaothraithe le hAirteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta ar Airteagal 4(1) den Iarscríbhinn sin nuair a fhoráiltear leis, maidir le fiontar ar éirigh leis sa tástáil fiontair nasctha cheana féin agus a bhfuair na húdaráis na sonraí riachtanacha ina leith (an líon foirne agus na méideanna airgeadais faoi Airteagal 4(1) d’Iarscríbhinn I a ghabhann leis an Rialachán sin), cé acu a chomhlíonann nó nach gcomhlíonann an fiontar sin na ceanglais incháilitheachta chun cáiliú mar FBM. Dá bhrí sin, is é Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta an tríú céim den mheasúnú ar stádas FBM, nuair a leagtar amach leis an riail nach mbeidh caillteanas ná fáil stádais FBM mar thoradh uathoibríoch ar an athrú ar shonraí tuairiscithe fiontar ar éirigh leo sa tástáil fiontair nasctha faoi Airteagal 3(1) go (4) den Iarscríbhinn sin. |
|
(110) |
Tagann an tSeicia ar an gconclúid, dá bhrí sin, nach bhfuil feidhm ag an gcásdlí a luaigh an Coimisiún maidir leis an gcás atá idir lámha, toisc nach dtagraíonn sé don ‘tríú céim’ den mheasúnú ar stádas FBM. Dar leis an tSeicia freisin, ní thugtar le tuiscint le beartas bunaithe an Choimisiúin ná leis na rialuithe roimhe seo ó Chúirteanna an Aontais nach mbeadh feidhm ag Airteagal 4(1) d’Iarscríbhinn I a ghabhann leis an Rialachán Blocdhíolúine Talmhaíochta sna himthosca ina sáraítear na tairseacha FBM mar gheall ar chumasc nó fáil. Os a choinne sin, i rialú T-745/17 (26), tháinig Cúirt Ghinearálta an Aontais Eorpaigh ar an gconclúid go soiléir go bhfuil feidhm ag Airteagal 4(2) d’Iarscríbhinn I a ghabhann le Rialachán (AE) Uimh. 651/2014 ón gCoimisiún (‘an Rialachán Ginearálta maidir le Blocdhíolúine’) (27) fiú i gcás cumasc agus fálacha. |
|
(111) |
Ar deireadh, d’áitigh an tSeicia, chun feabhas a chur ar an deimhneacht dhlíthiúil do thairbhithe cabhrach agus d’údaráis deonúcháin, ón 1 Lúnasa 2018, gur thréig sí an cleachtas cur chun feidhme thuasluaite agus, ag gníomhú di i gcomhréir le Treoir Úsáideora an Choimisiúin maidir leis an Sainmhíniú ar FBM, nach gcuireann sí Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta i bhfeidhm a thuilleadh maidir le fiontair a sháraíonn tairseacha FBM mar thoradh ar athrú úinéireachta. An tráth céanna, áitíonn an tSeicia nár sárú ar an bhforáil sin é a cur chun feidhme roimhe seo. |
6.2. Tús na n-oibreacha agus an tráth a cuireadh an t-iarratas isteach
|
(112) |
D’áitigh an tSeicia, sa chás atá idir lámha, gurb é tráth íoctha na préimhe árachais nach mór a mheas mar thráth thús na n-oibreacha seachas tabhairt i gcrích an chonartha árachais, mar a mhol an Coimisiún sa chinneadh tosaigh (28). |
|
(113) |
Mhínigh an tSeicia go dtagraíonn ‘tionscadal’ nó ‘gníomhaíocht’ faoina rialacha náisiúnta d’árachas, a íoctar ar bhonn bliantúil. Dá bhrí sin, ní mór do ghnóthas cinneadh a dhéanamh gach bliain an dtógfaidh sé an t-árachas bliantúil amach agus is féidir cabhair a dheonú le haghaidh árachas bliantúil amháin agus ní le haghaidh tréimhse árachais ilbhliantúil. |
|
(114) |
I ndáil le tráth thús na n-oibreacha ar an tionscadal nó ar an ngníomhaíocht a chinneadh, tagraíonn údaráis na Seice don ghnáthchleachtas gnó: déanann gnóthais talmhaíochta conradh árachais lena ngabhann clásal um shíneadh uathoibríoch. Tá an síneadh uathoibríoch fíor-riachtanach chun cumhdach árachais fadtéarmach a fháil. Ina dhiaidh sin, chun cumhdach árachais a fháil le haghaidh bliain ábhartha, éilítear an phréimh árachais bhliantúil a íoc. Mura n-íocann gnóthas an phréimh le haghaidh bliain atá le teacht, forghéilleann sé a chumhdach don bhliain sin. Ní gá aon bheart eile seachas íocaíocht na préimhe bliantúla. |
|
(115) |
In éagmais cabhrach, measann údaráis na Seice nach gá go dtógfadh gnóthas atá faoi árachas in aon bhliain amháin, an t-árachas amach don bhliain dár gcionn. Sula n-íoctar an phréimh árachais, ní dhéanann fiontar gealltanas atá ceangailteach ó thaobh dlí de a d’fhágfadh go mbeadh an t-árachas bliantúil do-athraithe. Ní mór féachaint ar gach árachas bliantúil mar thionscadal ar leithligh lena n-éilítear cinnteoireacht nua neamhspleách agus ní féidir a thuiscint as conradh ilbhliantúil nó árachas bliantúil a bheith ann a íoctar in aon bhliain amháin go dtógfaidh gnóthas an t-árachas céanna amach don bhliain dár gcionn. |
|
(116) |
Sna himthosca sin, is é is cuspóir don chabhair gnóthais a dhreasú chun an t-árachas bliantúil a thógáil amach. In éagmais tacaíocht phoiblí lena spreagtar feirmeoirí chun árachas a thógáil amach gach bliain, bheadh cumhdach árachais na rioscaí san earnáil talmhaíochta i bhfad níos ísle i bhfianaise chostas ard na préimhe árachais agus na n-acmhainní airgeadais teoranta atá ar fáil don earnáil feirmeoireachta. |
|
(117) |
Dá bhrí sin, de réir údaráis na Seice, sa chás atá idir lámha, ba cheart íocaíocht na préimhe bliantúla a mheas mar thráth thús na n-oibreacha. |
|
(118) |
Léirítear an cleachtas sin freisin sa chreat dlíthiúil náisiúnta le haghaidh árachais. De réir § 2804 d’Acht 89/2012 Bail., an Cód Sibhialta, arna leasú: ‘Má mheabhraíonn an t-árachóir don sealbhóir polasaí préimh árachais a íoc agus má chuireann sé in iúl dó sa mheabhrúchán go múchfar an t-árachas mura n-íocfar an phréimh árachais laistigh de theorainn ama bhreise de mhí amháin ar a laghad ó dháta seachadta an mheabhrúcháin, múchfar an t-árachas ar dhul in éag na teorann ama nár íocadh an phréimh árachais lena linn’. |
|
(119) |
Mhínigh údaráis na Seice an tábhacht a bhaineann le conarthaí ilbhliantúla. Dá gcuirfeadh tairbhithe deireadh lena bpolasaithe árachais a bhí ann cheana sula síneoidís conradh árachais nua, bheadh siad faoi cheangal a gcumhdach árachais a ligean uathu ar feadh tréimhse áirithe ama. Bheadh iarmhairt neamh-inmhianaithe aige sin a bheadh contrártha d’aidhmeanna airbheartaithe na scéime agus a bheadh do-ghlactha ó thaobh bainistiú riosca fiontair de. Measann údaráis na Seice nach bhféadfar a iarraidh go réasúnach ar thairbhithe iad féin a nochtadh don riosca ar chúiseanna foirmiúla amháin. |
|
(120) |
Thairis sin, is minic a thairgeann cuideachtaí árachais dreasachtaí chun an t-árachas fadtéarmach a thógáil amach, amhail lascainí préimhe árachais nó sochair eile, rud a spreagann feirmeoirí cumhdach a thógáil amach le haghaidh réimse níos leithne rioscaí. |
|
(121) |
Dheimhnigh údaráis na Seice nach ndeonófaí aon chabhair do thairbhí a d’íoc an phréimh árachais bhliantúil sular cuireadh isteach an t-iarratas ar chabhair. |
|
(122) |
D’ainneoin an mhéid thuas, tugann údaráis na Seice dá n-aire nár cheart glacadh leis gurb é an dearbhchritéar chun an chabhair a dheonú an coinníoll lena gceanglaítear ar thairbhithe iarratas a dhéanamh ar an gcabhair roimh thús na n-oibreacha ar an tionscadal. Os a choinne sin, cinntear le cásdlí Chúirteanna an Aontais go bhféadfadh imthosca tarlú i gcásanna sonracha a mbeidh fíoréifeacht dreasachta acu fiú má cuireadh tús leis na hoibreacha ar an tionscadal roimh dháta an iarratais ar chabhair (29). Dá bhrí sin, cuireann údaráis na Seice an tuairim isteach nár cheart caitheamh leis an gceanglas le foirmiúlachas iomarcach. |
7. MEASÚNÚ
7.1. Cabhair a bheith ann de réir bhrí Airteagal 107(1) CFAE
|
(123) |
De réir Airteagal 107(1) CFAE, ‘[a]ch amháin mar a bhforáiltear a mhalairt sna Conarthaí, aon chabhair a thabharfaidh Ballstát nó a thabharfar trí bhíthin acmhainní Stáit i bhfoirm ar bith, agus a bhéarfaidh nó is baolach a bhéarfadh saobhadh ar iomaíocht trí thaobhú le gnóthais áirithe nó le táirgeadh earraí áirithe, ní luífidh sí leis an margadh inmheánach sa mhéid go dtéann sí i gcion ar an trádáil idir Ballstáit’. |
|
(124) |
De réir cásdlí socair, ceanglaítear na coinníollacha uile seo a leanas a chomhlíonadh chun beart náisiúnta a aicmiú mar ‘státchabhair’ de réir bhrí Airteagal 107(1) CFAE. Ar an gcéad dul síos, ní mór idirghabháil Stát nó idirghabháil trí acmhainní Stáit a bheith inti. Ar an dara dul síos, ní mór go bhféadfadh an idirghabháil sin difear a dhéanamh don trádáil idir na Ballstáit. Ar an tríú dul síos, ní mór di buntáiste roghnaitheach a thabhairt don fhaighteoir. Ar an gceathrú dul síos, ní mór di iomaíocht a shaobhadh nó an shaobhadh sin a bhagairt (30). |
|
(125) |
In aithris (40) den chinneadh tosaigh (31), tháinig an Coimisiún ar an réamhchonclúid gur comhlíonadh coinníollacha Airteagal 107(1) CFAE agus gur státchabhair a bhí sa scéim de réir bhrí an Airteagail sin. |
|
(126) |
Níor caitheadh amhras ar an réamhchonclúid sin sna barúlacha a fuarthas ón tSeicia. Thairis sin, thug an tSeicia féin fógra faoin scéim mar státchabhair. |
|
(127) |
Tá an scéim inleagtha ar an Stát toisc go bhfuil sí bunaithe ar na gníomhartha dlí ar a dtugtar tuairisc in aithris (11) agus go gcuireann údarás Stáit í chun feidhme (aithris (13)). D’íocfaí an chabhair ó bhuiséad an Stáit, trí acmhainní Stáit dá bhrí sin (aithris (12)). |
|
(128) |
Tugann na scéim buntáiste dá dtairbhithe i bhfoirm deontas díreach (aithris (14)). Dá bhrí sin, maolaítear costais do na tairbhithe sin leis an scéim, ar costais iad a bheadh le híoc acu faoi ghnáthdhálaí an mhargaidh. |
|
(129) |
Tá an scéim roghnaitheach ós rud é nach ndámhfaí cabhair ach do ghnóthais áirithe, go sonrach do ghnóthais mhóra atá gníomhach i dtáirgeadh príomhúil talmhaíochta (aithris (15)). Níl gnóthais eile i gcás dlíthiúil agus fíorasach inchomparáide incháilithe do chabhair agus, dá bhrí sin, ní gheobhadh siad an buntáiste céanna. Mar riail ghinearálta, ba cheart d’oibreoirí eacnamaíocha a gcostais féin a chumhdach. |
|
(130) |
De bhun chásdlí na Cúirte Breithiúnais, is cosúil go ndéanann cabhair do ghnóthas difear do thrádáil idir Ballstáit i gcás ina n-oibríonn an gnóthas sin i margadh atá oscailte do thrádáil laistigh den Aontas. Oibríonn na tairbhithe cabhrach in earnáil an táirgthe phríomhúil talmhaíochta, áit a dtarlaíonn trádáil laistigh den Aontas. Dá bhrí sin, tá an earnáil sin oscailte d’iomaíocht ar leibhéal an Aontais agus, dá bhrí sin, tá sí íogair maidir le haon bheart atá i bhfabhar na táirgeachta i mBallstát amháin nó níos mó. Dá bhrí sin, d’fhéadfadh an scéim iomaíocht a shaobhadh agus difear a dhéanamh do thrádáil idir na Ballstáit. |
|
(131) |
I bhfianaise a bhfuil thuas, comhlíontar coinníollacha Airteagal 107(1) CFAE. Dá bhrí sin, is féidir teacht ar an gconclúid gur státchabhair í an scéim de réir bhrí an Airteagail sin. Níor chuir údaráis na Seice i gcoinne na conclúide sin. |
|
(132) |
Ós rud é go bhfuil an chabhair bunaithe ar ghníomh faoina bhféadfaí, gan bearta cur chun feidhme breise a bheith ag teastáil (aithris (11)), dámhachtainí cabhrach aonair a dhéanamh do ghnóthais a shainítear laistigh den ghníomh ar bhealach ginearálta agus teibí (32), measann an Coimisiún gur scéim cabhrach í de réir bhrí phointe (35)(4) de Threoirlínte 2014 agus phointe (33)(13) de Threoirlínte 2023. |
|
(133) |
A mhéid a bhaineann leis an gcabhair aonair, measann an Coimisiún, i bhfianaise a gnéithe coiteanna leis an gcabhair a deonaíodh faoin scéim, go mbeidh feidhm mutatis mutandis ag breithnithe aithrisí (123) go (130) maidir leis an gcabhair aonair sin. Tagann an Coimisiún ar an gconclúid, dá bhrí sin, gur státchabhair í an chabhair aonair a deonaíodh cheana d’fhiontair mhóra de réir bhrí Airteagal 107(1) CFAE. |
7.2. Comhoiriúnacht na scéime leis an margadh inmheánach
7.2.1. Airteagal 107(3), pointe (c), CFAE agus treoirlínte is infheidhme
|
(134) |
Faoi Airteagal 107(3), pointe (c), CFAE, féadfar a mheas go bhfuil cabhair comhoiriúnach leis an margadh inmheánach má chinntear go n-éascaítear léi forbairt gníomhaíochtaí eacnamaíocha áirithe nó limistéar eacnamaíoch áirithe, i gcás nach ndéanann an chabhair sin difear díobhálach do dhálaí trádála an oiread go mbeadh dochar ann don leas comhchoiteann. |
|
(135) |
Dá bhrí sin, chun a chinneadh go bhfuil an chabhair comhoiriúnach faoi Airteagal 107(3), pointe (c), CFAE, ní mór di (i) forbairt gníomhaíochta eacnamaíche áirithe nó limistéar áirithe a éascú (coinníoll dearfach) agus (ii) gan difear díobhálach a dhéanamh do dhálaí trádála a mhéid a bheadh bunoscionn leis an leas comhchoiteann (coinníoll diúltach). |
|
(136) |
Déanfaidh an Coimisiún measúnú féachaint an bhfuil an dá choinníoll sin á gcomhlíonadh i bhfianaise na dtreoirlínte is infheidhme. Sa chinneadh tosaigh, rinne an Coimisiún measúnú ar chomhoiriúnacht na scéime i bhfianaise Threoirlínte 2014, a bhí i bhfeidhm tráth a glacadh an cinneadh tosaigh. Mar sin féin, cuireadh Treoirlínte 2023 in ionad Threoirlínte 2014, atá i bhfeidhm ón 1 Eanáir 2023. De bhun phointe (655) de Threoirlínte 2023, cuirfidh an Coimisiún na Treoirlínte sin i bhfeidhm maidir le gach beart cabhrach ar tugadh fógra ina leith agus a n-iarrtar air cinneadh a dhéanamh ina leith tar éis an 1 Eanáir 2023, fiú i gcás inar tugadh fógra faoin gcabhair roimh an dáta sin. Dá bhrí sin, sa chinneadh seo déanann an Coimisiún measúnú ar chomhoiriúnacht na scéime i bhfianaise Threoirlínte 2023. |
|
(137) |
A mhéid a bhaineann leis an gcabhair is féidir a dheonú ar bhonn na scéime, tá Caibidil 3 de Chuid I (Measúnú comhoiriúnachta de bhun Airteagal 107(3), pointe (c), CFAE) agus Roinn 1.2.1.6 de Chuid II (Cabhair chun préimheanna árachais a íoc) de Threoirlínte 2023 infheidhme. |
7.2.2. Coinníoll dearfach: ní mór don chabhair forbairt gníomhaíochta eacnamaíche nó limistéar eacnamaíoch áirithe a éascú
7.2.2.1. Gníomhaíocht eacnamaíoch a éascú
|
(138) |
De bhun phointe (43) de Threoirlínte 2023, ní mór don Bhallstát a léiriú go bhfuil sé d’aidhm ag an gcabhair forbairt na gníomhaíochta eacnamaíche sainaitheanta a éascú. |
|
(139) |
Tugann an Coimisiún dá aire go bhfuil an scéim ceaptha chun tacú le feirmeoirí trí theagmhais riosca agus géarchéime trí iad a dhreasú chun árachas a thógáil amach. Is uirlis thábhachtach é an t-árachas don earnáil feirmeoireachta, earnáil atá neamhchosanta ar theagmhais riosca agus géarchéime a tharlaíonn go minic. Ar an mbealach sin, tacaíonn an chabhair leis an táirgeadh príomhúil talmhaíochta (aithris (9)). |
|
(140) |
De bhun phointe (44) de Threoirlínte 2023, ní mór do na Ballstáit tuairisc a thabhairt freisin ar cé acu a rannchuideoidh nó nach rannchuideoidh an chabhair le cuspóirí CBT a bhaint amach agus, laistigh den bheartas sin, le cuspóirí Rialachán (AE) 2021/2115 agus, má rannchuideoidh, conas a rannchuideoidh sí leo, agus tuairisc níos sonraí a thabhairt ar thairbhí ionchasacha na cabhrach. Tá cuspóirí na scéime comhsheasmhach le cuspóir CBT earnáil talmhaíochta chliste, iomaíoch, athléimneach agus éagsúlaithe a chothú lena n-áiritheofar slándáil fhadtéarmach bia, a leagtar amach in Airteagal 5, pointe (a), de Rialachán (AE) 2021/2115, mar aon leis na cuspóirí a leagtar amach in Airteagal 6(1), pointí (a) agus (b), den Rialachán sin lena bhféachtar le tacú le hioncam feirme inmharthana agus athléimneacht na hearnála talmhaíochta agus iomaíochas feirme a mhéadú (aithris (36)). Dá bhrí sin, comhlíontar pointe (44) de Threoirlínte 2023. |
|
(141) |
Measann an Coimisiún, dá bhrí sin, go n-éascódh cabhair gníomhaíocht eacnamaíoch, sa mhéid agus go n-éascódh sí iomaíochas agus athléimneacht an táirgthe phríomhúil talmhaíochta. |
7.2.2.2. Éifeacht dreasachta (an tráth a cuireadh an t-iarratas isteach)
|
(142) |
Bhain an dara foras chun an t-imscrúdú foirmiúil a oscailt leis an gcoinníoll go mbeadh éifeacht dreasachta ag cabhair, go sonrach i ndáil leis an tráth a cuireadh an t-iarratas ar chabhair isteach (33). Bhí amhras ar an gCoimisiún an gcuirfí na hiarratais isteach roimh thús na n-oibreacha faoin scéim (féach freisin aithris (94)). |
|
(143) |
Meabhraíonn an Coimisiún, de bhun phointe (70) de Threoirlínte 2014 agus phointe (50) de Threoirlínte 2023, i gcás ina bhfuil obair nó gníomhaíocht tosaithe cheana féin sula gcuireann an tairbhí an iarratas ar chabhair faoi bhráid na n-údarás náisiúnta, nach dreasacht don tairbhí í an chabhair sin. |
|
(144) |
De bhun phointe 35(25) de Threoirlínte 2014 agus pointe 33(57) de Threoirlínte 2023, ciallaíonn ‘tús na n-oibreacha ar an tionscadal nó ar an ngníomhaíocht’ tús na ngníomhaíochtaí, nó na n-oibreacha tógála i ndáil leis an infheistíocht, pé acu is luaithe, nó an chéad ghealltanas atá ceangailteach ó thaobh dlí de chun trealamh a ordú nó seirbhísí a úsáid nó aon ghealltanas eile a d’fhág gur thionscadal nó gníomhaíocht dho-athraithe é nó í. |
|
(145) |
Thug údaráis na Seice freagra ar an amhras sin trí mhíniú mionsonraithe a sholáthar ar an nós imeachta a bhaineann leis na conarthaí árachais (aithrisí (113) go (122)). |
|
(146) |
Mhínigh údaráis na Seice go gceanglaítear leis an gcumhdach árachais le haghaidh bliain ábhartha ar an tairbhí an phréimh árachais bhliantúil a íoc. Gan íocaíocht bhliantúil lena gcumhdófar bliain atá le teacht, forghéillfear cumhdach na bliana sin. Sula n-íoctar an phréimh árachais, ní dhéanann fiontar an gealltanas atá ceangailteach ó thaobh dlí de a d’fhágfadh go mbeadh an t-árachas bliantúil do-athraithe. |
|
(147) |
D’áitigh údaráis na Seice nach gá go dtógfadh gnóthas atá faoi árachas in aon bhliain amháin an t-árachas amach don bhliain dár gcionn in éagmais cabhrach. Dá bhrí sin, ní mór breathnú ar gach árachas bliantúil mar thionscadal ar leithligh. Ní féidir a thuiscint as árachas bliantúil a bheith ann in aon bhliain amháin go leanfaidh gnóthas ar aghaidh leis an gconradh sa bhliain dár gcionn (aithris (113)). |
|
(148) |
Tugann an Coimisiún dá aire nach bhforchuirtear go huathoibríoch le tabhairt i gcrích an chonartha an oibleagáid an t-árachas bliantúil a íoc. Measann an Coimisiún, tar éis an conradh árachais a thabhairt i gcrích, nach bhfuil aon oibleagáid ar fheirmeoirí árachas bliantúil a íoc agus go bhfuil an discréid acu an t-árachas a thógáil le haghaidh bliain ar leith nó gan é a thógáil tríd an bpréimh árachais a íoc nó gan é a íoc. In imthosca den sórt sin, is é an tráth cinntitheach chun measúnú a dhéanamh ar éifeacht dreasachta na cabhrach an tráth a íoctar préimh árachais bhliantúil, go deimhin, agus ní an tráth a thugtar conradh, a bhfuil clásal um shíneadh uathoibríoch aige, i gcrích (aithris (112)). |
|
(149) |
Measann an Coimisiún, dá bhrí sin, go soláthraíonn an chabhair dreasacht d’fheirmeoirí an t-árachas bliantúil a thógáil amach, árachas a bhféadfadh sé nach dtógfaidís amach gan an chabhair. Thairis sin, dheimhnigh údaráis na Seice nach ndeonófaí aon chabhair do thairbhí a d’íoc an phréimh árachais bhliantúil roimh an iarratas ar chabhair (aithris (121)). |
|
(150) |
Dá bhrí sin, aontaíonn an Coimisiún le húdaráis na Seice nach mór tráth íoctha na préimhe árachais bliantúla a mheas mar ‘thús na n-oibreacha ar thionscadal nó ar ghníomhaíocht’ seachas an tráth a thugtar an conradh árachais i gcrích. |
|
(151) |
De bhun phointe (47) de Threoirlínte 2023, tá éifeacht dreasachta ag an scéim má athraíonn sí iompraíocht gnóthas ar bhealach go dtugann siad faoi ghníomhaíocht bhreise a rannchuidíonn le forbairt na hearnála, nach mbeadh siad ag tabhairt faoi de ghnáth gan chabhair nó ina mbeidís ag tabhairt faoi ar bhealach difriúil nó srianta. |
|
(152) |
De bhun phointe (48) de Threoirlínte 2023, maidir le bearta státchabhrach nach bhfuil beartaithe ach chun feabhas a chur ar staid airgeadais gnóthas ach nach rannchuidíonn ar aon bhealach le forbairt na hearnála, agus go háirithe cabhair nach ndeonaítear ach amháin ar bhonn praghais, cainníochta, aonad táirgthe nó aonad na modhanna táirgthe, meastar gur cabhair oibriúcháin iad atá neamhréir leis an margadh inmheánach. Thairis sin, mar gheall ar chineál na cabhrach sin, is dócha go gcuirfeadh cabhair den sórt sin isteach ar na sásraí lena rialaítear eagrú an mhargaidh inmheánaigh. |
|
(153) |
De bhun phointe (50) de Threoirlínte 2023, measann an Coimisiún nach dreasacht do thairbhí í cabhair in aon chás ina raibh obair ar an tionscadal nó ar an ngníomhaíocht ábhartha tosaithe cheana féin roimh don tairbhí an t-iarratas ar chabhair a dhéanamh chuig na húdaráis náisiúnta. |
|
(154) |
De bhun phointe (51) de Threoirlínte 2023, ní mór ainm an iarratasóra agus méid an ghnóthais a bheith ar a laghad a bheith san áireamh leis an iarratas ar chabhair, chomh maith le tuairisc ar an tionscadal nó ar an ngníomhaíocht, lena n-áirítear a shuíomh agus na dátaí tosaigh agus deiridh, an méid cabhrach is gá chun é a dhéanamh agus na costais incháilithe. Ina theannta sin, de bhun phointe (52) de Threoirlínte 2023, ní mór d’fhiontair mhóra tuairisc a thabhairt san iarratas ar an staid gan an chabhair, arb é an cás dá ngairtear an staid fhrithfhíorasach nó tionscadal nó gníomhaíocht mhalartach agus fianaise dhoiciméadach a chur isteach chun tacú leis an gcás fhrithfhíorasach ar a dtugtar tuairisc san iarratas. Níl feidhm ag an gceanglas sin maidir le bardais, ar údaráis áitiúla fhéinrialaitheacha iad ag a bhfuil buiséad bliantúil níos lú ná EUR 10 milliún agus níos lú ná 5 000 cónaitheoir. De bhun phointe (53) de Threoirlínte 2023, agus an t-iarratas á fháil, ní mór don údarás deonúcháin seiceáil inchreidteachta a dhéanamh ar an gcás frithfhíorasach agus a dheimhniú go bhfuil an éifeacht dreasachta ba ghá ag an gcabhair. Bíonn cás frithfhíorasach inchreidte má bhíonn sé fíor agus má bhaineann sé leis na tosca cinnteoireachta atá forleathan tráth an chinnidh ag an tairbhí maidir leis an tionscadal nó gníomhaíocht lena mbaineann. |
|
(155) |
Sa chinneadh tosaigh, chuir an Coimisiún amhras in iúl gur chomhlíon an bunús dlí náisiúnta pointe (70) de Threoirlínte 2014, atá comhionann le pointe (50) de Threoirlínte 2023. De réir na conclúide ar thángthas uirthi in aithris (150), measann an Coimisiún gurb é íocaíocht na préimhe árachais bliantúla sa chás atá idir lámha tráth thús na n-oibreacha ar an tionscadal nó ar an ngníomhaíocht. |
|
(156) |
Dheimhnigh údaráis na Seice go leagtar amach leis an scéim an coinníoll go gcuirfidh tairbhithe cabhrach an t-iarratas ar chabhair isteach roimh thús na n-oibreacha nó na gníomhaíochta (aithris (29) agus (150)). Níor mhór a áireamh san iarratas, ar a laghad, ainm an iarratasóra agus méid an ghnóthais, tuairisc ar an tionscadal nó ar an ngníomhaíocht, lena n-áirítear a shuíomh agus na dátaí tosaithe agus an dáta críochnaithe, an méid cabhrach is gá chun an tionscadal nó an ghníomhaíocht a dhéanamh agus na costais incháilithe (aithris (30)). Ní mór do ghnóthais mhóra an cás frithfhíorasach nó tionscadal nó gníomhaíocht mhalartach a chur isteach freisin agus fianaise dhoiciméadach a chur isteach ina dtacaíocht (aithris (31)). |
|
(157) |
Is féidir an chabhair a dheonú le haghaidh chostais na préimhe árachais (aithris (21)). Dá bhrí sin, ní dhéanfadh sé fóirdheonú ar chostais ghníomhaíochta a bheadh tabhaithe ag gnóthas in aon chás ná ní chúiteoidh sé an gnáthriosca gnó a bhaineann le gníomhaíocht eacnamaíoch ná ní raibh sé beartaithe ach chun feabhas a chur ar staid airgeadais gnóthas. |
|
(158) |
Ar an mbonn sin, tagann an Coimisiún ar an gconclúid go bhfuil éifeacht dreasachta ag an scéim. |
7.2.2.3. Ní dhéantar aon sárú ar fhorálacha ábhartha ná ar phrionsabail ghinearálta dhlí an Aontais
|
(159) |
De bhun phointe (61) de Threoirlínte 2023, más rud é go mbaineann sárú ar dhlí ábhartha an Aontais le beart státchabhrach, na coinníollacha a ghabhann leis, lena n-áirítear a mhodh maoiniúcháin nuair is cuid dhílis den bheart státchabhrach é an modh maoiniúcháin, nó má bhaineann sárú ar dhlí ábhartha an Aontais leis an ngníomhaíocht a mhaoinítear leis, ní féidir a dhearbhú go bhfuil an chabhair comhoiriúnach leis an margadh inmheánach. |
|
(160) |
Leagtar amach coinníollacha na scéime i gcomhréir leis an reachtaíocht is infheidhme de chuid an Aontais. Níl aon tásc ann go mbeadh aon sárú ar fhorálacha ábhartha agus ar phrionsabail ghinearálta dhlí an Aontais i gceist leis an gcabhair atá beartaithe ná leis na coinníollacha a ghabhann léi. Dá bhrí sin, measann an Coimisiún go gcomhlíontar pointe (61) de Threoirlínte 2023. |
|
(161) |
De bhun phointe (62) de Threoirlínte 2023, ní údaróidh an Coimisiún státchabhair atá neamhréir leis na forálacha lena rialaítear comheagrú an mhargaidh ná a chuirfeadh isteach ar fheidhmiú cuí an chomheagraithe. Níl aon tásc ann go mbeadh an chabhair atá beartaithe neamhréir leis na forálacha lena rialaítear comheagrú an mhargaidh ná go gcuirfeadh sí isteach ar an bhfeidhmiú cuí. |
|
(162) |
De bhun phointe (63) de Threoirlínte 2023, ní féidir a dhearbhú go bhfuil státchabhair comhoiriúnach leis an margadh inmheánach i gcás ina bhfuil dámhachtain na cabhrach faoi réir na hoibleagáide go n-úsáidfeadh an ngnóthas is tairbhí táirgí nó seirbhísí náisiúnta. Ní dhéantar foráil leis an scéim maidir le hoibleagáid den sórt sin. |
|
(163) |
De bhun phointe (64) de Threoirlínte 2023, ní údaróidh an Coimisiún cabhair le haghaidh gníomhaíochtaí a bhaineann le honnmhairiú chuig tríú tíortha ná chuig na Ballstáit a bheadh nasctha go díreach leis na cainníochtaí a onnmhairítear, cabhair atá ag brath ar úsáid earraí intíre seachas earraí allmhairithe, ná cabhair chun líonra dáileacháin a bhunú agus a oibriú ná chun aon chaiteachas eile atá nasctha le gníomhaíochtaí onnmhairiúcháin a chumhdach. Ní dhéantar foráil leis an scéim maidir leis na cineálacha cabhrach sin. |
7.2.2.4. Conclúid
|
(164) |
Measann an Coimisiún, dá bhrí sin, go n-éascófaí leis an scéim forbairt na gníomhaíochta táirgthe phríomhúil talmhaíochta. |
7.2.3. Coinníoll diúltach: ní mór nach ndéanfaidh an chabhair dochar míchuí do choinníollacha trádála chomh mór sin le bheith bunoscionn leis an leas comhchoiteann
|
(165) |
De bhun phointe (67) de Threoirlínte 2023, mar gheall ar a chineál féin, gineann aon bheart cabhrach saobhadh iomaíochta agus bíonn éifeacht aige ar thrádáil idir na Ballstáit. Mar sin féin, chun a shuí cibé acu atá iarmhairtí saobhacha na cabhrach teoranta don íosmhéid nó nach bhfuil, fíoraíonn an Coimisiún an bhfuil gá leis an gcabhair, an bhfuil sí iomchuí, an bhfuil sí comhréireach agus an bhfuil sí trédhearcach. |
|
(166) |
De bhun phointe (68) de Threoirlínte 2023, déanann an Coimisiún measúnú ansin ar iarmhairt shaobhach na cabhrach atá i gceist ar dhálaí iomaíochta agus trádála. Ansin déanfaidh an Coimisiún éifeachtaí dearfacha na cabhrach a chur i gcomparáid lena héifeachtaí diúltacha ar an iomaíocht agus ar an trádáil. I gcás inar mó na héifeachtaí dearfacha ná na héifeachtaí diúltacha, dearbhóidh an Coimisiún go bhfuil an chabhair comhoiriúnach. |
7.2.3.1. An gá atá le hidirghabháil Stáit
|
(167) |
De bhun phointe (70) de Threoirlínte 2023, féadfar cuspóir leasa choitinn a bhaint amach le státchabhair má dhírítear léi ar chlistí margaidh a cheartú. |
|
(168) |
Tugann an Coimisiún dá aire gur mhínigh údaráis na Seice go bhféachtar leis an scéim le leibhéal níos airde slándála a bhaint amach do ghnólachtaí talmhaíochta in aghaidh damáistí gan choinne trí chumhdach árachais a chur ar fáil go forleathan ar fud na hearnála talmhaíochta. Dá bhrí sin, is é is aidhm don scéim feirmeoirí a spreagadh chun an t-árachas a thógáil amach chun bainistiú níos fearr a dhéanamh ar tharlú teagmhas riosca agus géarchéime. |
|
(169) |
Measann an Coimisiún ar an mbonn sin go mbeadh árachas ar fáil go forleathan don earnáil feirmeoireachta mar thoradh ar an idirghabháil Stáit, earnáil a bhféadfadh praghsanna arda árachais a bheith os a comhair murach sin. Dá bhrí sin, measann an Coimisiún go gcomhlíontar pointe (70) de Threoirlínte 2023. |
|
(170) |
De bhun phointe (71) de Threoirlínte 2023, measann an Coimisiún nach bhfuil na cuspóirí ionchasacha á mbaint amach ag an margadh gan idirghabháil Stáit maidir leis na bearta cabhrach sin a chomhlíonann na coinníollacha sonracha a leagtar síos i gCuid II de Threoirlínte 2023. Tugann an Coimisiún dá aire go gcomhlíonann an scéim na ceanglais shonracha a leagtar síos i Roinn 1.2.1.6 de Chuid II de Threoirlínte 2023 (aithrisí (197) go (206)). Dá bhrí sin, i gcomhréir le pointe (71) de Threoirlínte 2023, measann an Coimisiún go bhfuil gá le hidirghabháil Stáit. |
7.2.3.2. Oiriúnacht na cabhrach
|
(171) |
De bhun phointe (72) de Threoirlínte 2023, ní mór an beart cabhrach atá beartaithe a bheith ina ionstraim beartais iomchuí chun aghaidh a thabhairt ar an gcuspóir beartais lena mbaineann. Ní mór don Bhallstát a léiriú go bhfuil an chabhair agus dearadh na cabhrach iomchuí chun cuspóir an bhirt ar a bhfuil an chabhair dírithe a bhaint amach. |
|
(172) |
Is é is cuspóir don scéim tacú le feirmeoirí a ngníomhaíochtaí a árachú in aghaidh teagmhais riosca agus géarchéime gan choinne chun feabhas a chur ar iomaíochas na bhfeirmeacha. Dá bhrí sin, measann an Coimisiún go gcuireann an scéim le hiomaíochas agus athléimneacht fhoriomlán na hearnála talmhaíochta. Dá bhrí sin, tagann an Coimisiún ar an gconclúid gur ionstraim beartais iomchuí í an scéim chun na cuspóirí sin a bhaint amach. |
Oiriúnacht i measc ionstraimí beartais malartacha
|
(173) |
Mar a fhoráiltear i bpointe (73) de Threoirlínte 2023, measann an Coimisiún gur ionstraim beartais iomchuí í cabhair a dheonaítear san earnáil talmhaíochta agus foraoiseachta lena gcomhlíontar na coinníollacha sonracha a leagtar síos sa Roinn ábhartha de Chuid II de Threoirlínte 2023. |
|
(174) |
Comhlíonann an scéim na ceanglais shonracha a leagtar síos i Roinn 1.2.1.6 de Chuid II de Threoirlínte 2023 (aithrisí (197) go (206)). Dá bhrí sin, is ionstraim beartais iomchuí é. |
|
(175) |
Níl feidhm ag pointe (74) de Threoirlínte 2023 sa chás seo, toisc nach bhfuil na hoibríochtaí atá incháilithe do chabhair cómhaoinithe faoi Phlean Straitéiseach CBT na Seice (aithris (36)). |
Oiriúnacht i measc ionstraimí cabhrach éagsúla
|
(176) |
De bhun phointe (75) de Threoirlínte 2023, féadfar cabhair a dheonú i bhfoirmeacha éagsúla. Mar sin féin, ba cheart do na Ballstáit a áirithiú go ndeonaítear an chabhair i bhfoirm is lú dóchúlacht go saobhfar trádáil agus iomaíocht. |
|
(177) |
De bhun phointe (76) de Threoirlínte 2023, i gcás ina leagtar amach foirm shonrach le haghaidh beart cabhrach mar a shonraítear i gCuid II de Threoirlínte 2023, meastar gur ionstraim cabhrach iomchuí í an fhoirm sin chun críoch na dTreoirlínte sin. Is iad na rialacha is infheidhme na rialacha sin i Roinn 1.2.1.6. de Chuid II de Threoirlínte 2023, nach leagtar amach foirm cabhrach shonrach iontu. |
|
(178) |
Faoin scéim, is féidir an chabhair a dheonú d’fheirmeoirí mar dheontas díreach (aithris (14)), rud a mheasann údaráis na Seice a bheith ar an bhfoirm is iomchuí chun tacú le costais phréimhe árachais. |
|
(179) |
Is é is cuspóir don scéim cúiteamh a thabhairt d’fheirmeoirí as na costais phréimhe árachais. Aontaíonn an Coimisiún gurb iad deontais dhíreacha an fhoirm is oiriúnaí i gcás ina bhfuil cuspóir cúiteach ag cabhair. Ar an mbonn sin, tagann an Coimisiún ar an gconclúid go gcomhlíonann an scéim pointe (76) de Threoirlínte 2023. |
7.2.3.3. Comhréireacht na cabhrach
|
(180) |
De bhun phointe (83) de Threoirlínte 2023, meastar cabhair a bheith comhréireach má tá a méid in aghaidh an tairbhí teoranta don íosmhéid is gá chun an ghníomhaíocht dá dtugtar cabhair a dhéanamh. De bhun phointe (84) de Threoirlínte 2023, chun go mbeidh an chabhair comhréireach, níor cheart an méid cabhrach a bheith níos mó ná na costais incháilithe, cé is moite de roinnt eisceachtaí. De bhun phointe (85) de Threoirlínte 2023, chun intuarthacht agus cothrom iomaíochta a áirithiú, cuireann an Coimisiún uasdéiní cabhrach i bhfeidhm. |
|
(181) |
De bhun phointe (86) de Threoirlínte 2023, má ríomhtar na costais incháilithe i gceart agus má urramaítear na huasdéiní cabhrach nó na huasmhéideanna cabhrach a leagtar amach i gCuid II de Threoirlínte 2023, meastar go gcomhlíontar an critéar comhréireachta. |
|
(182) |
De bhun phointe (87) de Threoirlínte 2023, ní mór don údarás deonúcháin an uasdéine cabhrach agus an t-uasmhéid cabhrach a ríomh agus an chabhair á deonú aige. Ní mór fianaise dhoiciméadach atá soiléir, sonrach agus cothrom le dáta a bheith ann le tacú leis na costais incháilithe. Chun an déine cabhrach agus na costais incháilithe a ríomh, caithfear na figiúirí uile a úsáidtear a ghlacadh sula n-asbhaintear aon cháin nó muirear eile. Níl CBL incháilithe do chabhair, ach amháin i gcás nach bhfuil sé in-aisghabhála faoi reachtaíocht náisiúnta CBL. |
|
(183) |
Cabhair a dheonaítear ar bhonn na scéime, ní bheadh sí níos mó ná 65 % de na costais incháilithe (aithrisí (22) agus (25)). Urramaítear leis an déine cabhrach sin an uasdéine cabhrach a cheadaítear le haghaidh na cabhrach préimhe árachais, a leagtar amach i bpointe (411) de Threoirlínte 2023. |
|
(184) |
Ní áirítear CBL leis na costais incháilithe (aithris (34)). |
|
(185) |
Thairis sin, tugann an Coimisiún dá aire gur dheimhnigh údaráis na Seice go ríomhfadh an t-údarás deonúcháin na costais incháilithe i gceart agus an chabhair á deonú aige (aithris (33)). |
|
(186) |
Tagann an Coimisiún ar an gconclúid, dá bhrí sin, go bhfuil an chabhair comhréireach. |
7.2.3.4. Carnadh na cabhrach
|
(187) |
De bhun phointe (103) de Threoirlínte 2023, féadfar cabhair a dheonú i gcomhthráth faoi roinnt scéimeanna nó a charnadh le cabhair ad hoc, ar choinníoll nach mó méid iomlán na státchabhrach le haghaidh gníomhaíochta nó tionscadail ná na huasteorainneacha cabhrach a leagtar síos i dTreoirlínte 2023. |
|
(188) |
De bhun phointe (104) de Threoirlínte 2023, féadfar cabhair lena ngabhann costais incháilithe in-sainaitheanta a charnadh le haon státchabhair eile, fad a bhaineann an chabhair sin le costais incháilithe in-sainaitheanta éagsúla. Féadfar cabhair lena ngabhann costais incháilithe in-sainaitheanta a charnadh le haon Státchabhair eile, i ndáil leis na costais incháilithe chéanna, bídís ag forluí go páirteach nó go hiomlán ar a chéile, ach amháin mura ndéantar an déine cabhrach nó an méid cabhrach is airde is infheidhme maidir leis an gcineál cabhrach sin faoi Threoirlínte 2023 a shárú de dheasca an charntha sin, agus sa chás sin amháin. |
|
(189) |
Tugann an Coimisiún dá aire gur dheimhnigh údaráis na Seice nach féidir cabhair faoin scéim a charnadh le cabhair ó fhoinsí eile áitiúla, réigiúnacha ná náisiúnta ná ó chistí an Aontais ná le cabhair de minimis ná cabhair ad hoc lena gcumhdaítear na costais incháilithe chéanna (aithris (32)). |
7.2.3.5. Trédhearcacht
|
(190) |
De bhun phointe (112) de Threoirlínte 2023, ní mór do na Ballstáit a áirithiú go bhfoilsítear an fhaisnéis a liostaítear sa phointe sin i modúl an Choimisiúin Eorpaigh maidir le trédhearcacht dámhachtana nó ar shuíomh gréasáin cuimsitheach státchabhrach ar an leibhéal náisiúnta nó réigiúnach. |
|
(191) |
Dheimhnigh údaráis na Seice go gcomhlíonfaí na coinníollacha trédhearcachta. Gheall siad a áirithiú go bhfoilseofaí i modúl an Choimisiúin Eorpaigh maidir le trédhearcacht dámhachtana téacs iomlán na scéime agus a forálacha cur chun feidhme nó a bunús dlí, céannacht an údaráis deonúcháin agus céannacht na dtairbhithe a gheobhadh dámhachtain cabhrach aonair os cionn EUR 60 000 (aithris (37)). Gheall údaráis na Seice an scéim a leasú chun na rialacha nua a chomhlíonadh, rialacha a tháinig i bhfeidhm an 1 Eanáir 2023. Faoi na rialacha sin, íslíodh an tairseach le haghaidh cabhair aonair nach mór a fhoilsiú go EUR 10 000. Ar bhonn ghealltanas údaráis na Seice na bearta iomchuí a dhéanamh, measann an Coimisiún go n-áirithíonn údaráis na Seice go n-urramófaí na ceanglais trédhearcachta a bhaineann le dámhachtainí cabhrach aonair, mar a leagtar amach i bpointe (112) de Threoirlínte 2023. |
|
(192) |
De bhun phointe (114) de Threoirlínte 2023, ní mór an fhaisnéis sin a fhoilsiú tar éis an cinneadh chun an chabhair a dheonú a bheith déanta, ní mór í a choinneáil ar feadh 10 mbliana ar a laghad agus a bheith ar fáil don phobal i gcoitinne gan srianta. Dheimhnigh údaráis na Seice go gcomhlíonfaí na ceanglais sin (aithris (37)). |
7.2.3.6. Éifeachtaí díobhálacha diúltacha ar an iomaíocht agus ar an trádáil a sheachaint
|
(193) |
De bhun phointe (117) de Threoirlínte 2023, sainaithníonn an Coimisiún an margadh / na margaí dá ndéanann an chabhair difear, agus an fhaisnéis a sholáthair an Ballstát ar an margadh / na margaí táirgí lena mbaineann á cur san áireamh, is é sin le rá an margadh / na margaí dá ndéanann an t-athrú ar iompraíocht thairbhí na cabhrach difear. Agus measúnú á dhéanamh ar éifeachtaí diúltacha an bhirt cabhrach, díreoidh an Coimisiún a chuid anailíse ar an saobhadh ar an iomaíocht ar an tionchar intuartha atá ag an gcabhair in earnáil na talmhaíochta agus in earnáil na foraoiseachta agus i limistéir thuaithe ar an iomaíocht idir gnóthais sa mhargadh nó sna margaí táirgí dá ndéantar difear. |
|
(194) |
De bhun phointe (118) de Threoirlínte 2023, má tá an chabhair spriocdhírithe go maith, comhréireach agus teoranta do na glanchostais bhreise, maolaítear a tionchar diúltach agus tá an riosca go saobhann sí an iomaíocht go díobhálach níos teoranta. Thairis sin, bunaíonn an Coimisiún uasdéiní cabhrach nó uasmhéideanna cabhrach. Is é is aidhm dó sin cosc a chur ar úsáid státchabhrach le haghaidh gníomhaíochtaí ina meastar go mbeidh an cóimheas idir an méid cabhrach agus na costais incháilithe an-ard agus gur an-dócha go mbeidh sé saobhach. Go ginearálta, dá mhéad na héifeachtaí dearfacha is dócha a eascróidh as an ngníomhaíocht dá dtugtar cabhair agus dá airde an gá is dócha a bheidh le cabhair, is ea is airde an uasteorainn ar dhéine cabhrach. |
|
(195) |
Sa chás seo, is féidir cabhair faoin scéim a dheonú le haghaidh chostais na préimhe árachais (aithris (21)). I gcomhréir le pointe (118) de Threoirlínte 2023, measann an Coimisiún go bhfuil tionchar diúltach na cabhrach sin teoranta, toisc go bhfuil an chabhair spriocdhírithe go maith ar a cuspóirí (aithris (172)) agus comhréireach (aithris (186)). |
|
(196) |
Dá bhrí sin, tagann an Coimisiún ar an gconclúid nach mbeadh saobhadh míchuí iomaíochta ná trádála mar thoradh ar an scéim. |
7.2.3.7. Coinníollacha sonracha Chuid II de Threoirlínte 2023
|
(197) |
Sa chás idir lámha, tá Roinn 1.2.1.6 (Cabhair chun préimheanna árachais a íoc) de Chuid II de Threoirlínte 2023 infheidhme. |
|
(198) |
De bhun phointe (403) de Threoirlínte 2023, tá feidhm ag Roinn 1.2.1.6 de Chuid II de Threoirlínte 2023 maidir le gnóthais atá gníomhach i dtáirgeadh príomhúil talmhaíochta. Comhlíontar an coinníoll sin, toisc nach bhfuil ach fiontair mhóra atá gníomhach i dtáirgeadh príomhúil talmhaíochta incháilithe (aithris (15)). |
|
(199) |
De bhun phointe (404) de Threoirlínte 2023, níor cheart an chabhair a bheith ina bacainn ar oibriú an mhargaidh inmheánaigh le haghaidh seirbhísí árachais. Go háirithe, ní mór nach mbeidh an chabhair teoranta d’árachas arna sholáthar ag cuideachta árachais aonair nó ag grúpa cuideachtaí ná ní bheidh sí coinníollach ar an gconradh árachais a thógáil le cuideachta atá bunaithe sa Bhallstát lena mbaineann. Comhlíonann an scéim na coinníollacha sin (aithris (27)). |
|
(200) |
Ní áirítear athárachas leis an scéim agus, dá bhrí sin, níl feidhm ag pointe (405) de Threoirlínte 2023. |
|
(201) |
De bhun phointe (406) de Threoirlínte 2023, is iad na costais incháilithe costais na bpréimheanna árachais le haghaidh árachais chun an damáiste a chumhdach a tharlaíonn de bharr tubaistí nádúrtha nó tarluithe eisceachtúla, teagmhais dhíobhálacha aeráide atá inchurtha le tubaistí nádúrtha, galair ainmhithe, lotnaidí plandaí agus speicis choimhthíocha ionracha, baint agus scriosadh stoic a fuair bás agus damáiste a tharlaíonn de bharr ainmhithe cosanta, dá dtagraítear i Ranna 1.2.1.1 go 1.2.1.5 de Threoirlínte 2023, agus de dheasca teagmhais dhíobhálacha aeráide eile nó damáiste a tharlaíonn de bharr teagmhais chomhshaoil. |
|
(202) |
Is féidir cabhair faoin scéim a dheonú chun préimheanna árachais a íoc lena gcumhdaítear damáiste a tharlaíonn de bharr tubaistí nádúrtha, teagmhais dhíobhálacha aeráide, lotnaidí plandaí agus galar ainmhithe (aithrisí (1) agus (20)). Dá bhrí sin, comhlíonann an scéim pointe (406) de Threoirlínte 2023. |
|
(203) |
De bhun phointe (407) de Threoirlínte 2023, ní fhéadfaidh an t-árachas ach an costas a bhaineann le slánú an damáiste dá dtagraítear i bpointe (406) de Threoirlínte 2023 a chúiteamh agus ní fhéadfaidh sé cineál ná cainníocht an táirgthe amach anseo a éileamh ná a shonrú. Comhlíontar an coinníoll sin (aithris (26)). |
|
(204) |
Ní chumhdaítear leis an scéim préimheanna árachais le haghaidh árachais in aghaidh caillteanas a tharlaíonn de bharr teagmhais chomhshaoil. Dá bhrí sin, níl feidhm ag pointí (408) ná (409) de Threoirlínte 2023. |
|
(205) |
De bhun phointe (411) de Threoirlínte 2023, ní mór gan an déine cabhrach a bheith níos mó ná 70 % de chostas na préimhe árachais. Maidir le cabhair chun an stoc a fuair bás a bhaint agus a scriosadh, ní mór nach rachaidh an déine cabhrach thar 100 % de chostas na préimhe árachais a mhéid a bhaineann le préimheanna árachais chun stoc a fuair bás a bhaint agus 75 % de chostas na préimhe árachais maidir le préimheanna árachais chun stoc den sórt sin a fuair bás a scriosadh. |
|
(206) |
Is féidir cabhair faoin scéim seo a dheonú suas le 65 % de na costais incháilithe (aithrisí (22) agus (25)). Dá bhrí sin, comhlíontar an uasdéine cabhrach a cheadaítear, a leagtar amach i bpointe (411) de Threoirlínte 2023. |
7.2.3.8. Éifeachtaí dearfacha agus diúltacha na cabhrach a thomhas
|
(207) |
De bhun phointe (134) de Threoirlínte 2023, déanann an Coimisiún measúnú ar cé acu is mó nó nach mó éifeachtaí dearfacha an bhirt cabhrach ná a éifeachtaí diúltacha sainaitheanta ar dhálaí iomaíochta agus trádála. Ní fhéadfaidh an Coimisiún teacht ar chonclúid maidir le comhoiriúnacht an bhirt cabhrach leis an margadh inmheánach ach amháin i gcás inar mó na héifeachtaí dearfacha ná na héifeachtaí diúltacha. |
|
(208) |
De bhun phointe (136) de Threoirlínte 2023, mar chuid den mheasúnú ar éifeachtaí dearfacha agus diúltacha na cabhrach, cuirfidh an Coimisiún san áireamh tionchar na cabhrach ar ghnóthú chuspóirí ginearálta agus sonracha CBT a leagtar amach in Airteagail 5 agus 6 de Rialachán (AE) 2021/2115, arb é is aidhm dóibh earnáil talmhaíochta chliste, iomaíoch, athléimneach agus éagsúlaithe a chothú, tacú le cosaint an chomhshaoil agus í a neartú, lena n-áirítear an bhithéagsúlacht, agus gníomhú ar son na haeráide agus rannchuidiú le cuspóirí an Aontais a bhaineann leis an gcomhshaol agus leis an aeráid a bhaint amach agus creatlach shocheacnamaíoch na limistéar tuaithe a neartú. |
|
(209) |
Thairis sin, de bhun phointe (137) de Threoirlínte 2023, i bprionsabal, mar gheall ar a héifeachtaí dearfacha ar fhorbairt na hearnála, measann an Coimisiún, i gcás ina gcomhlíonann cabhair na coinníollacha agus nach sáraíonn sí na huasdéiní cabhrach ábhartha ná na huasmhéideanna cabhrach ábhartha, a leagtar síos sna Ranna is infheidhme de Chuid II de Threoirlínte 2023, go bhfuil na héifeachtaí diúltacha ar an iomaíocht agus ar an trádáil teoranta don íosmhéid. |
|
(210) |
Comhlíonann an scéim ceanglais Roinn 1.2.1.6 de Chuid II de Threoirlínte 2023 (aithrisí (197) go (206)), lena n-áirítear an uasdéine cabhrach ábhartha (aithris (206)). |
|
(211) |
Thairis sin, tá na cuspóirí atá á saothrú comhsheasmhach leis na cuspóirí ginearálta agus sonracha a leagtar amach in Airteagail 5 agus 6 de Rialachán (AE) 2021/2115, arb é is aidhm dóibh earnáil talmhaíochta chliste, iomaíoch, athléimneach agus éagsúlaithe a chothú lena n-áiritheofar slándáil fhadtéarmach bia agus tacú le cosaint an chomhshaoil agus í a neartú agus rannchuidiú le cuspóirí comhshaoil an Aontais a bhaint amach (aithris (36)). |
|
(212) |
Dá bhrí sin, tagann an Coimisiún ar an gconclúid gur mó tionchar dearfach na scéime ná a héifeachtaí diúltacha i dtéarmaí saobhadh iomaíochta agus tionchar ar thrádáil idir na Ballstáit. |
7.2.4. Conclúid maidir le comhoiriúnacht na scéime
|
(213) |
I bhfianaise an mhéid thuas, tagann an Coimisiún ar an gconclúid go n-éascaíonn an scéim forbairt gníomhaíochta eacnamaíche agus nach ndéanann sí difear díobhálach do dhálaí trádála a mhéid a bheadh bunoscionn leis an leas coiteann. Dá bhrí sin, measann an Coimisiún go bhfuil an scéim comhoiriúnach leis an margadh inmheánach bunaithe ar Airteagal 107(3), pointe (c), CFAE mar a léirítear le forálacha ábhartha Threoirlínte 2023. |
7.3. Dlíthiúlacht na cabhrach aonair
|
(214) |
Ina chinneadh tosaigh, thagair an Coimisiún don fhaisnéis mhargaidh a fuarthas le linn an réamhscrúdaithe ar an scéim, inar tugadh le fios gur deonaíodh cabhair cheana féin do roinnt fiontair mhóra chun préimheanna árachais a íoc lena gcumhdaítear damáiste a tharlaíonn de dheasca tubaistí nádúrtha, teagmhais dhíobhálacha aeráide agus lotnaidí plandaí nó galar ainmhithe do bharra agus do bheostoc faoi seach. Léiríodh leis an réamhscrúdú go ndearna an t-údarás deonúcháin roinnt tairbhithe a aicmiú go hearráideach mar FBManna tráth deonaithe na cabhrach (34). Dá réir sin, dheonaigh sé cabhair go hearráideach do na cuideachtaí sin faoi scéim bhlocdhíolmhaithe SA.49594 (2017/XA), a bhí teoranta do FBManna. |
|
(215) |
A mhéid a bhaineann leis an aicmiú sin mar FBManna, chuir údaráis na Seice barúlacha isteach a leagtar amach in aithrisí (100) go (110). |
|
(216) |
Thíos, tugann an Coimisiún aghaidh ar bharúlacha na Seicia maidir le léiriú choincheap FBManna agus déanann sé measúnú ar dhlíthiúlacht na cabhrach aonair. |
7.3.1. A mhéid a bhaineann le léiriú choincheap FBManna
|
(217) |
Sa chinneadh tosaigh, d’easaontaigh an Coimisiún le meastóireacht an údaráis deonúcháin, ós rud é go ndearnadh í ar fhorais fhoirmiúla amháin, i.e. trí sheiceáil a dhéanamh go heisiach ar chomhlíonadh foirmiúil na gcritéar lena sainítear FBM, gan an réaltacht eacnamaíoch ná na prionsabail cásdlí a leagtar amach in aithrisí (58) go (61) den chinneadh tosaigh a chur san áireamh. |
|
(218) |
Bhí an breithniú a leag an Coimisiún amach sa chinneadh tosaigh bunaithe ar a léiriú ar Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta, mar a mhínítear in aithris (61) den chinneadh tosaigh. Shonraigh an Coimisiún go raibh a léiriú bunaithe ar chásdlí Chúirteanna an Aontais faoi threoir phrionsabal effet utile. |
|
(219) |
Ina n-aighneacht, chuir údaráis na Seice in iúl go soiléir, i gcur chun feidhme agus i bhfíorú riaracháin ex post na scéime blocdhíolmhaithe, nár mheas siad gur fiontair mhóra iad na tairbhithe sin a tháinig chun bheith ina bhfiontair mhóra tar éis cumaisc nó fála a tharla níos lú ná 2 bhliain roimh dháta deonaithe na cabhrach. Mheas údaráis na Seice gur FBManna iad tairbhithe den sórt sin le haghaidh an dá thréimhse chuntasaíochta leanúnacha a lean an dáta deonaithe cabhrach, agus dheonaigh siad cabhair dóibh ar bhonn scéim bhlocdhíolmhaithe SA.49594 (2017/XA) (aithrisí (100) go (110)). |
|
(220) |
Maidir leis na hargóintí a chuir an tSeicia i láthair i ndáil le léiriú Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta (aithrisí (98) go (111)), athdhearbhaíonn an Coimisiún a sheasamh a mhínítear go mion sa chinneadh tosaigh (35). |
|
(221) |
Meabhraíonn an Coimisiún, de réir phointe (35)(14) de Threoirlínte 2014 agus phointe (33)(36) de Threoirlínte 2023, gur gnóthais iad fiontair mhóra nach gcomhlíonann na critéir a leagtar síos in Iarscríbhinn I a ghabhann leis an Rialachán Blocdhíolúine Talmhaíochta. |
|
(222) |
De bhun aithris (39) den Rialachán Blocdhíolúine Talmhaíochta, is é an chúis fholuiteach atá le FBManna a dhíolmhú ón gceanglas fógra atá in Airteagal 108(3) CFAE go bhfuil ‘ról ríthábhachtach ag FBManna i gcruthú post agus, go ginearálta, is fachtóir cobhsaíochta sóisialta agus ceann tiomána an gheilleagair iad. Mar sin féin, d’fhéadfadh teipeanna margaidh teorainn a chur le forbairt FBManna, rud a fhágann go gcuirtear baic áirithe rompu. Is minic a bhíonn deacrachtaí ag FBManna caipiteal nó iasachtaí a fháil, i bhfianaise a chlaonta atá margaí airgeadais áirithe gan rioscaí a thógáil agus i bhfianaise na comhthaobhachta a fhéadfaidh siad a thairiscint, ar comhthaobhacht theoranta í go minic. De dheasca a n-acmhainní teoranta, féadfaidh an rochtain atá acu ar fhaisnéis a bheith srianta freisin, go háirithe maidir le teicneolaíocht nua agus margaí ionchasacha. Dá bhrí sin, chun forbairt gníomhaíochtaí eacnamaíochta FBManna a éascú, ba cheart, leis an Rialachán sin, catagóirí áirithe cabhrach i bhfabhar FBManna a dhíolmhú ón gceanglas fógra atá in Airteagal 108(3) den Chonradh. ’ |
|
(223) |
Mínítear in aithris (40) den Rialachán Blocdhíolúine Talmhaíochta go bhfuil an sainmhíniú ar FBM a úsáidtear chun críoch an Rialacháin sin bunaithe ar an sainmhíniú a leagtar síos i Moladh 2003/361/CE ón gCoimisiún (36), chun deireadh a chur le difríochtaí a d’fhéadfadh a bheith ina gcúis le saobhadh iomaíochta, chun comhordú a éascú idir tionscnaimh éagsúla an Aontais agus tionscnaimh éagsúla náisiúnta a bhaineann le FBManna agus ar mhaithe le soiléireacht riaracháin agus deimhneacht dhlíthiúil. |
|
(224) |
De bhun Airteagal 2(1) d’Iarscríbhinn I a ghabhann leis an Rialachán Blocdhíolúine Talmhaíochta, tá catagóir FBManna comhdhéanta d’fhiontair a fhostaíonn níos lú ná 250 duine agus ag a bhfuil láimhdeachas bliantúil nach mó ná EUR 50 milliún, agus/nó iomlán a chláir comhardaithe bhliantúil nach mó ná EUR 43 mhilliún. |
|
(225) |
De bhun Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta, i gcás ina gcinnfidh fiontar, ar dháta dúnta na gcuntas, gur sháraigh sé nó gur thit sé, ar bhonn bliantúil, faoin líon foirne nó faoi na huasteorainneacha airgeadais a shonraítear in Airteagal 2 den Rialachán sin, ní bheidh caillteanas ná gnóthú stádais mar fhiontar meánmhéide, fiontar beag nó micrifhiontar mar thoradh air sin, ach amháin má sháraítear na tairseacha sin thar dhá thréimhse cuntasaíochta leanúnacha. |
|
(226) |
Dheimhnigh Cúirteanna an Aontais ina gcásdlí nach mór an sainmhíniú ar FBM a léiriú go beacht, ós rud é gur eisceachtaí ar rialacha ginearálta iad na buntáistí a thugtar le stádas FBM i bhformhór na gcásanna (go háirithe i réimse na státchabhrach) (37). Ní mór grúpaí fiontar a bhféadfadh a gcumhacht eacnamaíoch a bheith níos mó ná cumhacht eacnamaíoch fíor-FBManna a bhaint den cháilíocht sin ar FBManna, fiú má chomhlíonann siad go foirmiúil na critéir a leagtar síos sa sainmhíniú ar FBM (38). De réir an chásdlí, ní mór a áirithiú freisin nach rachfar timpeall ar an sainmhíniú ar FBM ar mhodhanna foirmiúla amháin (39). |
|
(227) |
Dheimhnigh Cúirteanna an Aontais freisin nár cheart ach fiontair dá mbaineann baic is gnách do FBM a bheith i dteideal na mbuntáistí a eascraíonn as an stádas sin (40). Dá bhrí sin, measann an Coimisiún, i gcás nach mbaineann baic is gnách do FBM d’fhiontar, nár cheart eintiteas den sórt sin a aithint mar FBM. |
|
(228) |
I mír (91) dá breithiúnas i gcás T-745/17, dá ndearna údaráis na Seice tagairt ina n-aighneacht (aithris (110)), chinn an Chúirt Ghinearálta go substaintiúil gur cheart amhras a bheith ar an gCoimisiún i dtaobh an bhféadfaí fiontar a thiteann faoi thairseacha FBM dá bhforáiltear in Airteagal 2 d’Iarscríbhinn I a ghabhann le Rialachán (AE) Uimh. 651/2014 tráth deonaithe na cabhrach a mheas mar FBM d’ainneoin é a bheith nasctha le gnóthas mór le linn an dá thréimhse chuntasaíochta roimhe sin. |
|
(229) |
Is staid droim ar ais é an cás seo ar an staid i gcás T-745/17. An tráth a deonaíodh an chabhair aonair, sháraigh na tairbhithe na tairseacha FBM a leagtar amach in Airteagal 2 d’Iarscríbhinn I a ghabhann leis an Rialachán Blocdhíolúine Talmhaíochta. Sáraíodh na tairseacha FBM mar thoradh ar athrú buan ar a struchtúr úinéireachta a tharla le linn na tréimhse cuntasaíochta roimh dheonú na cabhrach aonair. An léiriú ar Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta a chuir údaráis na Seice isteach á rá gur cheart do na tairbhithe sin a stádas FBM a choinneáil ar feadh 2 bhliain tar éis dháta an athraithe ar a struchtúr úinéireachta, bheadh sé contrártha do mheon Airteagal 4(2), arb é is aidhm dó a áirithiú nár cheart ach fiontair dá mbaineann na baic is gnách do FBM a bheith i dteideal na mbuntáistí a eascraíonn as an stádas sin. |
|
(230) |
Bheadh sé in aghaidh phrionsabal effet utile solúbthacht den sórt sin a sholáthar d’fhiontair a sháraíonn tairseacha FBM ar bhonn marthanach mar thoradh ar athrú úinéireachta. Ba é cuspóir na solúbthachta dá bhforáiltear in Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta a áirithiú gur féidir le fiontair a bhfuil fás orthu agus a sháraíonn go sealadach na huasteorainneacha a leagtar síos in Airteagal 2 den Iarscríbhinn sin a stádas FBM a choinneáil. Dá bhrí sin, féachann sé le deimhneacht dhlíthiúil a áirithiú do na FBManna sin atá gníomhach i margaí an-luaineach. Mar sin féin, leis an athrú ar úinéireacht chuideachta tar éis cumaisc nó fála, tugtar isteach athrú struchtúrach nach bhfuil faoi réir luaineacht margaidh ná fás eacnamaíoch. |
|
(231) |
I bhfianaise na réasúnaíochta sin, measann an Coimisiún nach mór an tsolúbthacht dá bhforáiltear in Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta a theorannú do chásanna ina sáraítear na huasteorainneacha FBM ar bhonn sealadach (‘ach amháin má sháraítear na tairseacha sin thar dhá thréimhse cuntasaíochta leanúnacha’). |
|
(232) |
Ba é an príomhphrionsabal do léiriú an Choimisiúin gur gá a áirithiú nach bhfuil ach fiontair dá mbaineann na baic is gnách do FBM i dteideal na mbuntáistí a eascraíonn as an stádas sin agus go dtéann na bearta atá beartaithe do FBManna chun tairbhe iarbhír d’fhiontair ar bac é a méid agus nach mbaineann le grúpa mór agus, dá bhrí sin, a bhfuil rochtain acu ar chistí agus ar chúnamh nach bhfuil ar fáil d’iomaitheoirí ar comhionann a méid ach nach mbaineann le grúpa mór. |
|
(233) |
Dá bhrí sin, ní féidir a thuiscint le hAirteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta go gciallaíonn sé go bhféadfadh FBM a thagann chun bheith ina fhiontar mór de bharr fála nó cumaisc tairbhiú go huathoibríoch de stádas FBM ar feadh dhá thréimhse chuntasaíochta as a chéile. |
|
(234) |
Dá bhrí sin, ní aontaíonn an Coimisiún le léiriú údaráis na Seice go bhfuil feidhm ghinearálta ag an tréimhse chairde 2 bhliain maidir le gach cás ina sáraítear na huasteorainneacha FBM, gan beann ar an gcúis fholuiteach. Ní leanann fiontar de bheith ina FBM ná ní bhíonn na fadhbanna céanna aige (rochtain ar acmhainní, teicneolaíocht, etc.) nuair a thagann sé chun bheith ina chuid d’fhiontar mór mar gheall ar chumasc nó fáil, agus, dá réir sin, go sáraíonn sé tairseacha FBM ar bhonn marthanach. |
|
(235) |
Ar an gcaoi chéanna, ní aontaíonn an Coimisiún le seasamh údaráis na Seice nach mór an cásdlí dá dtagraítear in aithris (59) den chinneadh tosaigh a theorannú d’Airteagal 3 d’Iarscríbhinn I a ghabhann leis an Rialachán Blocdhíolúine Talmhaíochta (aithris (107)). Cé go bhféadfadh sé gur eisíodh an cásdlí sin go sonrach i ndáil le fiontair nasctha, mar a thugtar orthu, dar leis an gCoimisiúin, ní athraíonn sé sin ábharthacht ghinearálta phrionsabal effet utile ná ní chuireann sé srian leis. Measann an Coimisiún, dá bhrí sin, nach mór a mheas go rialaíonn sé go ginearálta cur chun feidhme an tsainmhínithe ar FBM, go háirithe ós rud é gur spreag Cúirteanna an Aontais ina gcuid rialuithe cur i bhfeidhm ‘mheon’ an tsainmhínithe ar FBM (e.g. ‘… d’fhonn a áirithiú nach dtairbheoidh ach na fiontair sin a bhfuil géarghá acu leis na buntáistí a fhabhraíonn do FBManna ó na rialacha nó na bearta éagsúla ina bhfabhar díobh i ndáiríre’ (41)). |
|
(236) |
Thairis sin, áitíonn an tSeicia, cé go bhféadfaí ábhar rialach dlí a shoiléiriú trí léiriú, nach bhféadfadh an léiriú míthuiscint a bhaint as dlí a bhfuil brí shoiléir intuigthe aige. Bheadh riosca ann go mbeadh easpa cinnteachta dho-ghlactha in idirbhearta dlíthiúla mar thoradh ar ghníomhaíocht den sórt sin (aithris (106)). |
|
(237) |
I ndáil leis sin, meabhraíonn an Coimisiún gur cheart, de réir chásdlí Chúirteanna an Aontais, aon téacs dlí a léiriú i gcomhréir lena fhoclaíocht (léiriú beacht) ach freisin le haird chuí ar rún an reachtóra agus an téacs á ghlacadh aige. Mhínigh an Coimisiún (42) gurb é cuspóir an tsainmhínithe ar FBM a áirithiú nach ndeonófar bearta tacaíochta ach do na fiontair sin a bhfuil géarghá acu leo. Ós rud é go bhfuil feidhm ag an sainmhíniú ar FBM maidir leis na beartais, na cláir agus na bearta a fhorbraíonn agus a oibríonn an Coimisiún do FBManna, tá sé tábhachtach a shainaithint cé na fiontair ar FBManna iad i ndáiríre toisc go bhfuil cúnamh uathu nach dteastaíonn ó fhiontair eile. I gcomparáid le fiontair eile, bíonn ar FBManna aghaidh a thabhairt ar shraith uathúil saincheisteanna, mar a mhínítear cheana in aithris (222), agus a thugann údar le cóireáil shonrach. |
|
(238) |
I bhfianaise na réasúnaíochta a thugtar in aithrisí (221) go (237), athdhearbhaíonn an Coimisiún nach bhfuil feidhm ghinearálta ná uathoibríoch ag Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta. Ina ionad sin, ní mór a shonrú ar dtús cén chuideachta atá ábhartha do ríomh na sonraí faoi Airteagal 2(1) den Iarscríbhinn sin agus cé na tréimhsí cuntasaíochta atá ábhartha. |
|
(239) |
Dá bhrí sin, i gcás inar athraigh fiontar a struchtúr nó a úinéireacht ar bhonn marthanach tar éis cumaisc nó fála agus ina n-oibríonn sé faoi rialú (de réir bhrí Airteagal 3(3) d’Iarscríbhinn I a ghabhann leis an Rialachán Blocdhíolúine Talmhaíochta) ‘fiontar mór’ (43) tráth an deonaithe, ní mór fiontar den sórt sin féin a mheas mar fhiontar mór (44). |
|
(240) |
Fágann sé sin nach bhféadfadh fiontar den sórt sin tairbhiú de stádas FBM agus nach mbeadh sé, dá bhrí sin, incháilithe do chabhair faoin scéim bhlocdhíolmhaithe. |
7.3.2. Cabhair aonair
|
(241) |
Sa chinneadh tosaigh, mheas an Coimisiún roimh ré gur cuireadh an scéim chun feidhme cheana féin sular tugadh fógra fúithi. |
|
(242) |
Le linn an nós imeachta imscrúdaithe fhoirmiúil, mhínigh údaráis na Seice nach raibh aon ghlao ar iarratais ar chabhair a chur isteach oscailte agus, dá bhrí sin, nár deonaíodh aon chabhair faoin scéim sin. |
|
(243) |
Aontaíonn an Coimisiún le húdaráis na Seice nach féidir a mheas gur deonaíodh an chabhair dá dtagraítear in aithris (3) faoin scéim, ós rud é gur tugadh fógra faoin scéim sin i ndréachtfhoirm agus, dá bhrí sin, nár fhormheas an Coimisiún í agus nach raibh sí i bhfeidhm nuair a deonaíodh an chabhair. |
|
(244) |
Ar na cúiseanna a luaitear thuas in aithrisí (217) go (240), ní féidir a mheas gur deonaíodh an chabhair sin ar bhonn scéim bhlocdhíolmhaithe SA.49594 (2017/XA) ach oiread, ós rud é gur deonaíodh í d’fhiontair mhóra, cé go raibh raon feidhme na scéime blocdhíolmhaithe teoranta do FBManna. |
|
(245) |
Dá réir sin, níor dámhadh an chabhair aonair dá dtagraítear in aithris (3) ar bhonn scéim cabhrach agus, dá bhrí sin, is ‘cabhair aonair’ í de réir bhrí Airteagal 1(e) de Rialachán (AE) 2015/1589 ón gComhairle (45). |
|
(246) |
Léiríodh leis an imscrúdú foirmiúil freisin, as measc na gcuideachtaí a liostaítear in aithris (97) thuas, gur deonaíodh an chabhair aonair do ZEV Šaratice, a.s. (‘ZEV Šaratice’) (46), an 17 Eanáir 2018. Ar dháta na cabhrach a deonaíodh, níor mhór ZEV Šaratice a mheas mar fhiontar mór, mar a mhínítear thíos. |
|
(247) |
Eascraíonn sé as an bhfaisnéis a chuir údaráis na Seice isteach go raibh LUKROM, spol. s.r.o. (‘LUKROM’) ina scairshealbhóir tromlaigh de ZEV Šaratice an 10 Feabhra 2017, agus 62,52 % dá scaireanna faoina úinéireacht. Tháinig méadú breise ar an sciar sin faoi dheireadh 2017 trí cheannacháin scaireanna de réir a chéile go 70.2 %. De réir údaráis na Seice, mar gheall ar úinéireacht tromlaigh na scaireanna, ón 10 Feabhra 2017 ar aghaidh, tháinig na cuideachtaí ZEV Šaratice agus LUKROM chun bheith ina bhfiontair nasctha de réir bhrí Airteagal 3(3)(a) d’Iarscríbhinn I a ghabhann leis an Rialachán Blocdhíolúine Talmhaíochta. |
|
(248) |
Ina n-aighneacht, thagair údaráis na Seice do bhreithiúnas na Cúirte Ginearálta i gcás T-745/17 (aithris (110)). Dar leo, tháinig an Chúirt Ghinearálta ar an gconclúid sa bhreithiúnas sin go bhfuil feidhm ag Airteagal 4(2) d’Iarscríbhinn I a ghabhann le Rialachán (AE) Uimh. 651/2014 (‘an Rialachán Ginearálta maidir le Blocdhíolúine’) fiú i gcás cumasc agus fálacha (aithris (110)). |
|
(249) |
Mar sin féin, bhí an staid sa chás sin éagsúil le cás ZEV Šaratice sa chás seo: i gcás T-745/17, rinneadh FBM de thairbhí na cabhrach mar gheall ar aistriú scaireanna chuig cuideachta eile. Sa chás seo, tá an staid droim ar ais: fuair fiontar mór, LUKROM, tromlach scaireanna ZEV Šaratice. |
|
(250) |
Go deimhin, dúnadh cuntais LUKROM do 2017 an 31 Nollaig 2017. CZK 2 742 344 000 (thart ar EUR 107 milliún (47)) a bhí in iomlán an chláir comhardaithe bhliantúil. Don tréimhse chéanna, tugadh le fios le clár comhardaithe LUKROM an meánlíon fostaithe 301, móide 372 fhostaí i gcuideachtaí eile a áirítear i gclár comhardaithe na cuideachta sin. Léiríonn na sonraí sin gurbh fhiontar mór é LUKROM in 2017. |
|
(251) |
Dúnadh cuntais LUKROM do 2016 an 31 Nollaig 2016. CZK 2 346 940 (thart ar EUR 86,8 milliún (48)) a bhí in iomlán an chláir comhardaithe bhliantúil. Don tréimhse chéanna, tugadh le fios le clár comhardaithe LUKROM an meánlíon fostaithe 299, móide 375 fhostaí i gcuideachtaí eile a áirítear i gclár comhardaithe na cuideachta sin. Léirítear leis na sonraí sin gurbh fhiontar mór é LUKROM in 2016 freisin. |
|
(252) |
Dá bhrí sin, measann an Coimisiún nach bhfuil an breithiúnas ar a bhfuil údaráis na Seice ag dul ar iontaoibh ábhartha chun Iarscríbhinn I a ghabhann leis an Rialachán Ginearálta maidir le Blocdhíolúine a chur i bhfeidhm sa chás seo (féach freisin aithris (229)). |
|
(253) |
Mar fho-anailís dhlíthiúil, áfach, cuirfidh an Coimisiún na prionsabail chéanna i bhfeidhm agus a chuireann an Chúirt Ghinearálta in iúl sa bhreithiúnas sin. |
|
(254) |
Mar a leagtar amach i mír 94 den bhreithiúnas sin, ní mór do na húdaráis náisiúnta agus don Choimisiún araon an tréimhse chuntasaíochta fhormheasta ábhartha agus an bhliain a chinneadh go beacht chun críocha ríomh comhpháirteach na sonraí faoi seach de réir bhrí Airteagal 2(1) d’Iarscríbhinn I a ghabhann leis an Rialachán Ginearálta maidir le Blocdhíolúine, arna léamh i gcomhar le hAirteagal 3(3) agus Airteagal 4(2) den Iarscríbhinn sin, agus a shonrú cén chuideachta nó cé na cuideachtaí nach mór a chur san áireamh chuige sin. |
|
(255) |
I mír 93 den bhreithiúnas sin, chinn an Chúirt Ghinearálta freisin gur gá sonraí cuideachta a chur san áireamh freisin, ar faoina rialú a rinne tairbhí na cabhrach cuid shubstaintiúil dá gníomhaíochtaí eacnamaíocha le linn na tréimhse cuntasaíochta faoi bhreathnú. |
|
(256) |
Agus an breithiúnas sin á chur i bhfeidhm maidir leis an staid atá idir lámha, déanann an Coimisiún measúnú go comhpháirteach ar shonraí ZEV Šaratice agus LUKROM. Cuirtear san áireamh le ríomh comhpháirteach den sórt sin meon Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta, mar a chuir an Chúirt Ghinearálta i dtábhacht i mír 94 den bhreithiúnas i gcás T-745/17. Murach sin, rachfaí timpeall ar an sainmhíniú ar FBM bunaithe ar mhodhanna foirmiúla amháin. Go deimhin, dá ndéanfaí an anailís ar choincheap FBManna 2 bhliain roimh an athrú corparáideach struchtúrach ar gach ceann de pháirtithe an idirbhirt ar leithligh, is éard a bheadh sa chonclúid i gcónaí síneadh ar choincheap FBManna a rachadh in aghaidh an ghá Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta a léiriú go beacht (aithris (230)) agus i gcomhréir lena mheon. |
|
(257) |
A mhéid a bhaineann leis an tréimhse chuntasaíochta fhormheasta ábhartha, bhain an dá thréimhse chuntasaíochta roimh dháta deonaithe na cabhrach leis na blianta 2017 agus 2016. |
|
(258) |
Dúnadh cuntais ZEV Šaratice do 2017 an 31 Nollaig 2017. CZK 120 286 000 (thart ar EUR 4,69 milliún (49)) a bhí in iomlán an chláir comhardaithe bhliantúil. Don tréimhse chéanna, tugadh le fios 8 bhfostaí le tuarascáil bhliantúil ZEV Šaratice. |
|
(259) |
Dúnadh cuntais ZEV Šaratice do 2016 an 31 Nollaig 2016. CZK 120 286 000 (thart ar EUR 4,39 milliún (50)) a bhí in iomlán an chláir comhardaithe bhliantúil. Don tréimhse chéanna, tugadh le fios 9 bhfostaí le tuarascáil bhliantúil ZEV Šaratice. |
|
(260) |
Mar a luaitear thuas in aithrisí (250) agus (251), léirítear le cuntais fhiontar nasctha ZEV Šaratice (LUKROM) le haghaidh an dá thréimhse chuntasaíochta roimh dháta deonaithe na cabhrach gur ‘fiontar mór’ é an fiontar nasctha sin amháin de réir bhrí Iarscríbhinn I a ghabhann leis an Rialachán Ginearálta maidir le Blocdhíolúine. |
|
(261) |
Dá bhrí sin, i gcomhréir le hAirteagal 2(1) d’Iarscríbhinn I a ghabhann leis an Rialachán Blocdhíolúine Talmhaíochta, ar dháta deonaithe na cabhrach, i.e. an 17 Eanáir 2018, bhí ZEV Šaratice nasctha le ‘fiontar mór’ de réir bhrí Iarscríbhinn I a ghabhann leis an Rialachán Blocdhíolúine Talmhaíochta agus, dá bhrí sin, bhí sé ina chuid de. Dá réir sin, ní raibh ZEV Šaratice incháilithe do chabhair faoin scéim SA.49594 (2017/XA), toisc nach raibh an chabhair sin ar fáil ach do FBManna. |
|
(262) |
A mhéid a bhaineann leis na cuideachtaí eile a liostaítear in aithris (97) thuas, níor mhínigh údaráis na Seice cén fáth ar seiceáladh na cuideachtaí sin, ós rud é, de réir na faisnéise a sholáthair údaráis na Seice, nár deonaíodh cabhair dóibh le haghaidh na préimhe árachais ón 1 Eanáir 2018. |
7.3.3. Neamhdhleathacht cabhrach aonair
|
(263) |
Ós rud é gur deonaíodh an chabhair aonair do chuideachtaí móra, ní thagann sí faoi aon cheann de chatagóirí an Rialacháin Blocdhíolúine Talmhaíochta. |
|
(264) |
Ós rud é nár deonaíodh an chabhair aonair sin ar bhonn aon scéim fhormheasta, ná nach bhféadfaí í a dhíolmhú faoin Rialachán Blocdhíolúine Talmhaíochta, deimhníonn an Coimisiún, dá bhrí sin, a réamhamhras agus cinneann sé go bhfuil an chabhair aonair a deonaíodh cheana d’fhiontair mhóra neamhdhleathach (51). |
7.4. Comhoiriúnacht na cabhrach aonair leis an margadh inmheánach
7.4.1. Treoirlínte is infheidhme
|
(265) |
De bhun phointe (656) de Threoirlínte 2023, déanfar measúnú ar chabhair neamhdhleathach i gcomhréir leis na rialacha atá i bhfeidhm ar dháta deonaithe na cabhrach. Dá bhrí sin, sa chinneadh seo, déanann an Coimisiún measúnú ar an gcabhair a deonaíodh sula ndearna an Coimisiún í a fhormheas ar bhonn Airteagal 107(3), pointe (c), CFAE agus, i gcás na cabhrach aonair uile a deonaíodh roimh an 1 Eanáir 2023 (aithris (3)), Treoirlínte 2014. |
7.4.2. Airteagal 107(3), pointe (c), CFAE agus treoirlínte is infheidhme
|
(266) |
Faoi Airteagal 107(3), pointe (c), CFAE, féadfar a mheas go bhfuil cabhair comhoiriúnach leis an margadh inmheánach má chinntear go n-éascaítear léi forbairt gníomhaíochtaí eacnamaíocha áirithe nó limistéar eacnamaíoch áirithe, i gcás nach ndéanann an chabhair sin difear díobhálach do dhálaí trádála an oiread go mbeadh dochar ann don leas comhchoiteann. |
|
(267) |
Dá bhrí sin, chun a chinneadh go bhfuil an chabhair comhoiriúnach faoi Airteagal 107(3), pointe (c), CFAE, ní mór di (i) forbairt gníomhaíochta eacnamaíche áirithe nó limistéar áirithe a éascú (coinníoll dearfach) agus (ii) gan difear díobhálach a dhéanamh do dhálaí trádála a mhéid a bheadh bunoscionn leis an leas comhchoiteann (coinníoll diúltach). Is coinníollacha carnacha iad an dá choinníoll sin. |
|
(268) |
Déanann an Coimisiún measúnú féachaint an bhfuil an dá choinníoll sin á gcomhlíonadh i bhfianaise na dtreoirlínte is infheidhme, arb iad Treoirlínte 2014. Go sonrach, sa chás seo, tá feidhm ag Caibidil 3 de Chuid I (Measúnú comhoiriúnachta de bhun Airteagal 107(3), pointe (c), CFAE) mar a léirítear le breithiúnas na Cúirte i gcás C-594/18 P (52) agus Roinn 1.2.1.6 de Chuid II (Cabhair chun préimheanna árachais a íoc). |
7.4.3. Maidir le cé acu a éascaíonn nó nach n-éascaíonn an chabhair forbairt gníomhaíochta eacnamaíche
7.4.3.1. An ghníomhaíocht eacnamaíoch a shainaithint
|
(269) |
Tugann an Coimisiún dá aire gur ceapadh an chabhair aonair chun tacú le feirmeoirí trí theagmhais riosca agus géarchéime trí iad a dhreasú chun árachas a thógáil amach. Is uirlis thábhachtach é an t-árachas le haghaidh bainistiú riosca agus géarchéime san earnáil feirmeoireachta, atá neamhchosanta ar theagmhais den sórt sin a tharlaíonn go minic. Ar an mbealach sin, tacaíonn an chabhair leis an táirgeadh príomhúil talmhaíochta (aithris (9)). |
|
(270) |
De bhun phointe (44) de Threoirlínte 2014, ba cheart dlúthbhaint a bheith ag cabhair san earnáil talmhaíochta agus san earnáil foraoiseachta agus i limistéir thuaithe le CBT, ba cheart di a bheith comhsheasmhach leis na cuspóirí forbartha tuaithe dá dtagraítear i bpointe (10) de na Treoirlínte sin agus ba cheart di a bheith comhoiriúnach leis na rialacha maidir le comheagrú na margaí i dtáirgí talmhaíochta. |
|
(271) |
De bhun phointe (46) de Threoirlínte 2014, measann an Coimisiún, maidir leis na bearta a chuirtear chun feidhme de bhun Rialachán (AE) Uimh. 1305/2013 ó Pharlaimint na hEorpa agus ón gComhairle (53) agus a ghníomhartha cur chun feidhme agus a ghníomhartha tarmligthe agus i gcomhréir leo, nó mar mhaoiniú náisiúnta breise faoi chuimsiú clár forbartha tuaithe, go bhfuil siad comhsheasmhach per se le cuspóirí na forbartha tuaithe agus go rannchuidíonn siad leo. |
|
(272) |
Níor cómhaoiníodh an chabhair reatha faoi bheart chlár forbartha tuaithe na Seicia, ach ceapadh í i gcomhréir leis na cuspóirí forbartha tuaithe (aithris (63)). |
|
(273) |
Measann an Coimisiún, dá bhrí sin, gur éascaíodh gníomhaíocht eacnamaíoch leis an gcabhair, sa mhéid agus gur chuir sí le hiomaíochas agus athléimneacht an táirgthe phríomhúil talmhaíochta. |
7.4.3.2. Easpa éifeachta dreasachta
|
(274) |
De bhun phointe (66) de Threoirlínte 2014, tá éifeacht dreasachta ag an gcabhair má athraíonn sí iompraíocht gnóthas ar bhealach go dtugann siad faoi ghníomhaíocht bhreise a rannchuidíonn le forbairt na hearnála, nach mbeadh siad ag tabhairt faoi de ghnáth gan chabhair nó ina mbeidís ag tabhairt faoi ar bhealach difriúil nó srianta. Ní mór nach bhfóirdheonaítear costais ghníomhaíochta leis an gcabhair, a bheadh tabhaithe ag gnóthas in aon chás, agus ní mór nach cúiteamh atá inti as an ngnáthriosca gnó a bhaineann le gníomhaíocht eacnamaíoch. |
|
(275) |
De bhun phointe (67) de Threoirlínte 2014, maidir le bearta státchabhrach aontaobhacha nach bhfuil beartaithe ach chun feabhas a chur ar staid airgeadais gnóthas ach nach rannchuidíonn ar aon bhealach le forbairt na hearnála, agus go háirithe cabhair nach ndeonaítear ach amháin ar bhonn praghais, cainníochta, aonad táirgthe nó aonad na modhanna táirgthe, meastar gur cabhair oibriúchán iad atá neamhréir leis an margadh inmheánach. Thairis sin, mar gheall ar chineál na cabhrach sin, is dócha go gcuirfeadh cabhair den sórt sin isteach ar na sásraí lena rialaítear eagrú an mhargaidh inmheánaigh. |
|
(276) |
Deonaíodh an chabhair le haghaidh chostais na préimhe árachais (aithris (21)). Dá bhrí sin, ní dhearna sé fóirdheonú ar chostais ghníomhaíochta a bheadh tabhaithe ag gnóthas in aon chás ná ní chúiteoidh sé an gnáthriosca gnó a bhaineann le gníomhaíocht eacnamaíoch ná ní raibh sé beartaithe ach chun feabhas a chur ar staid airgeadais gnóthas. |
|
(277) |
De bhun phointe (70) de Threoirlínte 2014, ní léirítear leis an gcabhair an dreasacht don tairbhí i gcás ina raibh tús curtha cheana féin leis an obair ar an tionscadal nó ar an ngníomhaíocht ábhartha sula ndearnadh an t-iarratas ar chabhair ón tairbhí chuig na húdaráis náisiúnta. De bhun phointe 35(25) de Threoirlínte 2014, ciallaíonn ‘tús na n-oibreacha ar an tionscadal nó ar an ngníomhaíocht’ tús na ngníomhaíochtaí, nó na n-oibreacha tógála i ndáil leis an infheistíocht, pé acu is luaithe, nó an chéad ghealltanas atá ceangailteach ó thaobh dlí de chun trealamh a ordú nó seirbhísí a úsáid nó aon ghealltanas eile a fhágann gur tionscadal nó gníomhaíocht dho-athraithe é nó í. |
|
(278) |
De bhun phointe (71) de Threoirlínte 2014, ní mór ainm an iarratasóra agus méid an ghnóthais a bheith ar a laghad a bheith san áireamh leis an iarratas ar chabhair, chomh maith le tuairisc ar an tionscadal nó ar an ngníomhaíocht, lena n-áirítear a shuíomh agus na dátaí tosaigh agus deiridh, an méid cabhrach is gá chun é a dhéanamh agus na costais incháilithe. |
|
(279) |
Ina theannta sin, de bhun phointe (72) de na Treoirlínte, ní mór d’fhiontair mhóra tuairisc a thabhairt san iarratas ar an gcás gan an chabhair, cás ar a dtugtar an cás frithfhíorasach nó tionscadal nó gníomhaíocht mhalartach, agus fianaise dhoiciméadach a chur isteach chun tacú leis an gcás frithfhíorasach ar a dtugtar tuairisc san iarratas. De bhun phointe (73) de na Treoirlínte, agus an t-iarratas á fháil, ní mór don údarás deonúcháin seiceáil inchreidteachta a dhéanamh ar an gcás frithfhíorasach agus a dheimhniú go bhfuil an éifeacht dreasachta ba ghá ag an gcabhair. Bíonn cás frithfhíorasach inchreidte má bhíonn sé fíor agus má bhaineann sé leis na tosca cinnteoireachta atá forleathan tráth an chinnidh ag an tairbhí maidir leis an tionscadal nó gníomhaíocht lena mbaineann. |
|
(280) |
Ós rud é go n-eascraíonn sé ó aithris (67) den chinneadh tosaigh, a mhéid a bhaineann leis an gcabhair aonair, thionscain an Coimisiún an nós imeachta de bhun Airteagal 108(2) CFAE ar an bhforas gur deonaíodh an chabhair go neamhdhleathach d’fhiontair mhóra, mar gheall ar amhras a bhain le (i) cur isteach an cháis fhrithfhíorasaigh agus (ii) an tráth a cuireadh an t-iarratas isteach (féach freisin aithris (8)). |
|
(281) |
Cur isteach an cháis fhrithfhíorasaigh |
|
(282) |
Ina mbarúlacha maidir leis an gcinneadh tosaigh, chuir údaráis na Seice i gcoinne léiriú an Choimisiúin ar Airteagal 4(2) d’Iarscríbhinn I a ghabhann leis an Rialachán Blocdhíolúine Talmhaíochta agus mhaígh siad nár deonaíodh aon chabhair do thairbhithe nach gcáileodh mar FBManna i gcomhréir leis an sainmhíniú a leagtar síos in Iarscríbhinn I a ghabhann leis an Rialachán Blocdhíolúine Talmhaíochta (54) (aithrisí (99) go (110)). |
|
(283) |
Dheimhnigh údaráis na Seice, áfach, nár chuir aon cheann de na tairbhithe a fuair cabhair ar bhonn scéim SA.49594 (2017/XA) cás frithfhíorasach isteach (aithris (98)). |
|
(284) |
Ní dhíospóideann údaráis na Seice nár leagadh síos le scéim SA.49594 (2017/XA) an ceanglas maidir leis an gcás frithfhíorasach a chur isteach ex ante. Níor iarr na húdaráis sin ach oiread go n-imeodh an Coimisiún ón gceanglas sin a leagtar amach i dTreoirlínte 2014 (55). |
|
(285) |
Dá réir sin, measann an Coimisiún gur deimhníodh an chéad fhoras den imscrúdú foirmiúil, sa mhéid nár chuir na fiontair mhóra ar deonaíodh cabhair aonair neamhdhleathach dóibh cás frithfhíorasach ex ante isteach lena gcruthaítear go raibh éifeacht dreasachta ag an gcabhair. |
7.4.3.3. Conclúid maidir leis an gcéad choinníoll (dearfach) a leagtar amach in Airteagal 107(3), pointe (c), CFAE
|
(286) |
In éagmais éifeacht dreasachta arna bunú go cuí, ní féidir a mheas go n-éascaítear leis an gcabhair aonair atá i gceist forbairt gníomhaíochta eacnamaíche áirithe ná limistéir áirithe. |
7.4.4. Conclúid maidir le comhoiriúnacht na cabhrach aonair leis an margadh inmheánach
|
(287) |
An chabhair aonair a deonaíodh cheana d’fhiontair mhóra chun préimheanna árachais a íoc lena gcumhdaítear damáiste a tharlaíonn de bharr tubaistí nádúrtha, teagmhais dhíobhálacha aeráide agus lotnaidí plandaí nó galar ainmhithe do bharra agus do bheostoc faoi seach (aithris (3)), ní féidir a mheas go n-éascaítear léi forbairt gníomhaíochta eacnamaíche áirithe nó limistéir áirithe. |
|
(288) |
Dá bhrí sin, ní féidir a mheas go bhfuil an chabhair aonair sin comhoiriúnach leis an margadh inmheánach de bhun Airteagal 107(3), pointe (c), CFAE (mar a léirítear i bhfianaise Threoirlínte 2014), gan é a bheith riachtanach scrúdú a dhéanamh ar an dara coinníoll diúltach a leagtar amach san fhoráil sin. |
8. AISGHABHÁIL
|
(289) |
De réir Airteagal 108 (2) CFAE agus chásdlí bunaithe Chúirteanna an Aontais, tá an Coimisiún inniúil chun a chinneadh go n-athróidh nó go gcuirfidh an Ballstát lena mbaineann deireadh le cabhair i gcás ina gcinnfidh sé go bhfuil an chabhair neamhréir leis an margadh inmheánach (56). Chinn Cúirteanna an Aontais go comhsheasmhach freisin, maidir leis an oibleagáid atá ar Bhallstát deireadh a chur le cabhair a mheasann an Coimisiún a bheith neamhréir leis an margadh inmheánach, gur oibleagáid í a ceapadh chun an staid a bhí ann roimhe a athbhunú (57). |
|
(290) |
Sa chomhthéacs sin, tá sé bunaithe ag Cúirteanna an Aontais go mbaintear an cuspóir sin amach a luaithe a aisíocann faighteoir na suimeanna a deonaíodh trí chabhair neamhdhleathach, rud lena bhforghéilleann sé an buntáiste a bhí aige ar a iomaitheoirí ar an margadh inmheánach, agus a luaithe a athbhunaítear an staid a bhí ann sular íocadh an chabhair (58). |
|
(291) |
I gcomhréir leis an gcásdlí, dearbhaítear in Airteagal 16(1) de Rialachán (AE) 2015/1589 ‘i gcás ina ndéanfar cinntí diúltacha i gcásanna a bhaineann le cabhair neamhdhleathach, cinnfidh an Coimisiún go ndéanfaidh an Ballstát lena mbaineann gach beart is gá chun an chabhair a aisghabháil ón tairbhí (cinneadh aisghabhála). Ní cheanglóidh an Coimisiún aisghabháil na cabhrach dá mbeadh sé sin contrártha do phrionsabal ginearálta de dhlí an Aontais’. |
|
(292) |
Dá bhrí sin, tá sé d’oibleagáid ar an tSeicia an chabhair aonair neamhdhleathach agus neamhréirach a aisghabháil (aithris (261)) ó ZEV Šaratice, a.s. agus ó na tairbhithe eile uile a bhí ina bhfiontair mhóra tráth a deonaíodh an chabhair aonair sin, ach amháin má chomhlíon sí coinníollacha uile Rialachán (AE) Uimh. 1408/2013 ón gCoimisiún (59) nó cur i bhfeidhm prionsabal ginearálta de dhlí an Aontais mar a maíodh le linn an imscrúdaithe fhoirmiúil. Maidir le haisghabháil, cumhdófar an tréimhse ón dáta a cuireadh an chabhair ar fáil don tairbhí go dtí an aisghabháil éifeachtach. Gearrfar ús ar an méid atá le haisghabháil go dtí an aisghabháil éifeachtach. |
TAR ÉIS AN CINNEADH SEO A GHLACADH:
Airteagal 1
Tá an scéim comhoiriúnach leis an margadh inmheánach de bhun Airteagal 107(3), pointe (c), CFAE.
Airteagal 2
An chabhair aonair a deonaíodh cheana d’fhiontair mhóra chun préimheanna árachais a íoc lena gcumhdaítear damáiste a tharlaíonn de bharr tubaistí nádúrtha, teagmhais dhíobhálacha aeráide agus lotnaidí plandaí nó galair ainmhithe do bharra agus do bheostoc faoi seach, deonaíodh í de shárú ar Airteagal 108(3) CFAE agus tá sí neamhréir leis an margadh inmheánach.
Airteagal 3
1. Aisghabhfaidh an tSeicia an chabhair neamh-chomhoiriúnach dá dtagraítear in Airteagal 2.
2. Gearrfar ús ar na suimeanna atá le haisghabháil ón dáta a cuireadh ar fáil iad do na tairbhithe is fiontair mhóra go dtí go ndéanfar iad a aisghabháil iarbhír.
Airteagal 4
1. I gcomhréir le hAirteagal 16(3) de Rialachán (AE) 2015/1589, beidh aisghabháil na cabhrach dá dtagraítear in Airteagal 2 den Rialachán sin láithreach agus éifeachtach (62).
2. Áiritheoidh an tSeicia go gcuirfear an Cinneadh seo chun feidhme laistigh de cheithre mhí tar éis an dáta a thabharfar fógra faoin gCinneadh seo.
Airteagal 5
1. Laistigh de ceithre mhí tar éis fógra a thabhairt faoin gCinneadh seo, cuirfidh an tSeicia an fhaisnéis seo a leanas faoi bhráid an Choimisiúin:
|
(a) |
liosta iomlán de thairbhithe ar fiontair mhóra iad de réir bhrí Iarscríbhinn I a ghabhann le Rialachán (AE) 2022/2472 ón gCoimisiún (63) nach bhfuil cás frithfhíorasach curtha isteach acu ina n-iarratas agus a fuair an chabhair neamh-chomhoiriúnach dá dtagraítear in Airteagal 2; |
|
(b) |
an méid iomlán (príomhshuim cabhrach agus ús aisghabhála) atá le haisghabháil ó na tairbhithe sin; |
|
(c) |
tuairisc mhionsonraithe ar na bearta a rinneadh cheana féin agus atá beartaithe chun an Cinneadh seo a chomhlíonadh; |
|
(d) |
doiciméid lena léirítear gur ordaíodh do na tairbhithe an chabhair a aisíoc. |
2. Coimeádfaidh an tSeicia an Coimisiún ar an eolas faoi dhul chun cinn na mbeart náisiúnta a rinneadh chun an Cinneadh seo a chur chun feidhme go dtí go dtabharfar aisghabháil na cabhrach dá dtagraítear in Airteagal 2 chun críche. Cuirfidh sí isteach láithreach, ar iarraidh shimplí ón gCoimisiún, faisnéis maidir leis na bearta a rinneadh cheana féin agus atá beartaithe chun an Cinneadh seo a chomhlíonadh. Soláthróidh sí faisnéis mhionsonraithe freisin maidir leis na méideanna cabhrach agus an t-ús aisghabhála a aisghabhadh cheana ó na tairbhithe is fiontair mhóra.
Airteagal 6
Is chuig Poblacht na Seice a dhírítear an Cinneadh seo.
Airteagal 7
1. Féadfaidh an Coimisiún céannacht thairbhithe na cabhrach neamhréire agus méideanna na cabhrach agus an úis ghnóthaithe a gnóthaíodh agus an Cinneadh seo a chur i bhfeidhm, gan dochar d’Airteagal 30 de Rialachán (AE) 2015/1589.
2. Má tá faisnéis rúnda sa chinneadh seo nár cheart a fhoilsiú, cuir an Coimisiún ar an eolas faoi sin laistigh de 15 lá oibre ón dáta a fhaightear é. Mura bhfaighidh an Coimisiún iarraidh réasúnaithe faoin spriocdháta sin, measfar go gcomhaontaíonn tú le foilsiú théacs iomlán an chinnidh. Ba cheart d’iarraidh lena sonraítear an fhaisnéis ábhartha a sheoladh go leictreonach chuig an seoladh seo a leanas:
|
European Commission |
|
Directorate-General Competition |
|
State Aid Greffe |
|
1049 Bruxelles/Brussel |
|
BELGIQUE/BELGIË |
Arna dhéanamh sa Bhruiséil, an 29 Iúil 2025.
Thar ceann an Choimisiúin
Teresa RIBERA
Leas-Uachtarán Feidhmiúcháin
(1) IO C 60, 19.2.2021, lch. 54.
(2) SA.49594 (2017/XA) Cabhair le haghaidh préimh árachais, TAM.
(3) Ibid.
(4) Ibid.
(5) Aithris (6) den chinneadh tosaigh. Ba é CZK 1 = EUR 0,03841 an ráta malairte CZK/EUR ar dháta fógartha na scéime sin (an 29 Meitheamh 2018).
(6) IO C 485, 21.12.2022, lch. 1.
(7) Roimh an 1 Eanáir 2018, deonaíodh cabhair ar bhonn SA.40185 (2014/XA).
(8) Rialachán (AE) Uimh. 702/2014 ón gCoimisiún an 25 Meitheamh 2014 lena ndearbhaítear go bhfuil catagóirí áirithe cabhrach, in earnáil na talmhaíochta agus in earnáil na foraoiseachta agus i limistéir thuaithe, comhoiriúnach leis an margadh inmheánach i gcur i bhfeidhm Airteagail 107 agus 108 de CFAE (IO L 193, 1.7.2014, lch. 1, ELI: http://data.europa.eu/eli/reg/2014/702/oj).
(9) Tá liosta de na gnóthais árachais lena mbaineann ar fáil ag: https://www.pgrlf.cz/programy/podpora-pojisteni-2/podpora-pojisteni/spolupracujici-pojistovny/.
(10) Rialachán (AE) 2021/2115 ó Pharlaimint na hEorpa agus ón gComhairle an 2 Nollaig 2021 lena mbunaítear rialacha maidir le tacaíocht do phleananna straitéiseacha atá le tarraingt suas ag na Ballstáit faoin gcomhbheartas talmhaíochta (Pleananna Straitéiseacha CBT) agus le maoiniú ag an gCiste Eorpach um Ráthaíocht Talmhaíochta (CERT) agus ag an gCiste Eorpach Talmhaíochta um Fhorbairt Tuaithe (CETFT) agus lena n-aisghairtear Rialacháin (AE) Uimh. 1305/2013 agus (AE) Uimh. 1307/2013 (IO L 435, 6.12.2021, lch. 1, ELI: http://data.europa.eu/eli/reg/2021/2115/oj).
(11) https://webgate.ec.europa.eu/competition/transparency/public/search/home/
(12) De bhun Roinn 3.2.4 de Chuid I de na Treoirlínte, tá sé d’oibleagáid ar na Ballstáit céannacht na dtairbhithe a fhaigheann dámhachtain cabhrach aonair os cionn EUR 10 000 a fhoilsiú, i gcomparáid le dámhachtainí aonair os cionn EUR 60 000 de bhun Threoirlínte 2014. Gheall údaráis na Seice an scéim a oiriúnú do na rialacha nua (aithris (38)).
(13) Treoirlínte an Aontais Eorpaigh maidir le státchabhair in earnáil na talmhaíochta agus na foraoiseachta agus i limistéir thuaithe 2014 go 2020.
(14) I litir dar dáta an 21 Feabhra 2023, thug an tSeicia a comhaontú neamhchoinníollach na scéimeanna cabhrach atá aici cheana a leasú chun Treoirlínte 2023 a chomhlíonadh faoin 30 Meitheamh 2023 ar a dhéanaí.
(15) Tá liosta de na gnóthais árachais lena mbaineann ar fáil ag: https://www.pgrlf.cz/programy/podpora-pojisteni-2/podpora-pojisteni/spolupracujici-pojistovny/.
(16) https://webgate.ec.europa.eu/competition/transparency/public/search/home/
(17) De bhun Roinn 3.2.4 de Chuid I de na Treoirlínte, tá sé d’oibleagáid ar na Ballstáit céannacht na dtairbhithe a fhaigheann dámhachtain cabhrach aonair os cionn EUR 10 000 a fhoilsiú, i gcomparáid le dámhachtainí aonair os cionn EUR 60 000 de bhun Threoirlínte 2014. Gheall údaráis na Seice an scéim a oiriúnú do na rialacha nua (aithris (38)).
(18) IO C 204, 1.7.2014, lch. 1.
(19) Aithris (66) den chinneadh tosaigh.
(20) Aithris (57) den chinneadh tosaigh.
(21) Aithris (62) den chinneadh tosaigh.
(22) Aithris (42) den chinneadh tosaigh.
(23) Aithrisí (58) go (61) den chinneadh tosaigh.
(24) Aithrisí (62) agus (67), an chéad phointe urchair, den chinneadh tosaigh.
(25) Aithris (67), an chéad phointe urchair, den chinneadh tosaigh.
(26) Breithiúnas na Cúirte Ginearálta an 9 Meán Fómhair 2020, Kerkosand v an Coimisiún, T-745/17, ECLI:EU:T:2020:400.
Aithris (66) den chinneadh tosaigh.
(27) Rialachán (AE) Uimh. 651/2014 ón gCoimisiún an 17 Meitheamh 2014 ina ndearbhaítear go bhfuil catagóirí áirithe cabhrach comhoiriúnach leis an margadh inmheánach i gcur i bhfeidhm Airteagail 107 agus 108 an Chonartha (IO L 187, 26.6.2014, lch. 1, ELI: http://data.europa.eu/eli/reg/2014/651/oj).
(28) Aithris (66) den chinneadh tosaigh.
(29) Breithiúnas na Cúirte an 13 Meitheamh 2013 i gcásanna uamtha C-630/11 P, HGA srl. agus Eile, C-631/11 P, Regione autonoma della Sardegna, C-632/11 P, Timsas srl. Agus C-633/11 P, Grand Hotel Abi d’Oru SpA, ECLI:EU:C:2013:387, míreanna 109 go 110.
(30) Breithiúnas na Cúirte an 7 Samhain 2024 i gcás C-588/22 P, Ryanair v an Coimisiún, ECLI:EU:C:2024:935, mír 100.
(31) Aithris (40) den chinneadh tosaigh.
(32) Féach go háirithe Ranna 2.2.3 agus 2.2.4.
(33) Aithris (67) an dara fleasc den chinneadh tosaigh.
(34) Aithris (57) den chinneadh tosaigh.
(35) Aithrisí (53) go (61) den chinneadh tosaigh.
(36) Moladh 2003/361/CE ón gCoimisiún an 6 Bealtaine 2003 maidir le micrifhiontair, fiontair bheaga agus fiontair mheánmhéide a shainmhíniú (IO L 124, 20.5.2003, lch. 36, ELI: http://data.europa.eu/eli/reco/2003/361/oj).
(37) Breithiúnas na Cúirte an 27 Feabhra 2014 i gcás C-110/13, HaTeFo, ECLI:EU:C:2014:114, mír 32.
(38) Féach, go háirithe: breithiúnas na Cúirte an 24 Meán Fómhair 2020 i gcás C-516/19, NMI Technologietransfer, ECLI:EU:C:2020:754, míreanna 31 go 34; breithiúnas na Cúirte an 29 Aibreán 2004 i gcás C-91/01, an Iodáil v an Coimisiún, ECLI:EU:C:2004:244 míreanna 31, 50 go 54; breithiúnas na Cúirte an 27 Feabhra 2014 i gcás C-110/13, HaTeFo, EU:C:2014:114, míreanna 34 agus 39; breithiúnas na Cúirte an 14 Deireadh Fómhair 2004 i gcás T-137/02, Pollmeier v an Coimisiún, ECLI:EU:T:2004:304, míreanna 61 go 62.
(39) Breithiúnas na Cúirte an 29 Aibreán 2004 i gcás C-91/01, an Iodáil v an Coimisiún, ECLI:EU:C:2004:244, mír 50; breithiúnas na Cúirte an 27 Feabhra 2014 i gcás C-110/13, HaTeFo, ECLI:EU:C:2014:114, mír 33.
(40) Breithiúnas na Cúirte an 27 Feabhra 2014 i gcás C-110/13, HaTeFo, ECLI:EU:C:2014:114, mír 33, breithiúnas na Cúirte an 29 Aibreán 2004 i gcás C-91/01, an Iodáil v an Coimisiún, ECLI:EU:C:2004:244, mír 50.
(41) Breithiúnas na Cúirte an 29 Aibreán 2004 i gcás C-91/01, an Iodáil v an Coimisiún, ECLI:EU:C:2004:244, mír 50; breithiúnas na Cúirte an 14 Deireadh Fómhair 2004 i gcás T-137/02, Pollmeier Malchow, ECLI:EU:T:2004:304, mír 61.
(42) Moladh 2003/361/CE, aithris (12).
(43) Féach freisin aithris (61) den chinneadh tosaigh.
(44) Féach freisin aithris (61) den chinneadh tosaigh.
(45) Rialachán (AE) 2015/1589 ón gComhairle an 13 Iúil 2015 lena leagtar síos rialacha mionsonraithe maidir le hAirteagal 108 den Chonradh ar Fheidhmiú an Aontais Eorpaigh a chur i bhfeidhm (IO L 248, 24.9.2015, lch. 9, ELI: http://data.europa.eu/eli/reg/2015/1589/oj).
(46) Deonaíodh do ZEV Šaratice, a.s. an chabhair aonair dá dtagraítear in aithris (3) le haghaidh méid CZK 234 722 (thart ar EUR 9 351; ráta malairte an 17 Eanáir 2018: EUR 1 = 25,371).
(47) Ráta malairte i mí na Nollag 2017: EUR 1 = CZK 25,647.
(48) Ráta malairte i mí na Nollag 2016: EUR 1 = CZK 27,03.
(49) Ráta malairte i mí na Nollag 2017: EUR 1 = CZK 25,647.
(50) Ráta malairte i mí na Nollag 2016: EUR 1 = CZK 27,03.
(51) Aithrisí (42) agus (50) den chinneadh tosaigh.
(52) Breithiúnas na Cúirte (an Mór-Dhlísheomra) an 22 Meán Fómhair 2020 i gcás C-594/18 P, an Ostair v an Coimisiún, ECLI:EU:C:2020:742.
(53) Rialachán (AE) Uimh. 1305/2013 ó Pharlaimint na hEorpa agus ón gComhairle an 17 Nollaig 2013 maidir le tacaíocht d’fhorbairt tuaithe ón gCiste Eorpach Talmhaíochta um Fhorbairt Tuaithe (CETFT) agus lena n-aisghairtear Rialachán (CE) Uimh. 1698/2005 ón gComhairle (IO L 347, 20.12.2013, lch. 487, ELI: http://data.europa.eu/eli/reg/2013/1305/oj).
(54) Ní bhaineann an bharúil sin ón tSeicia le tairbhithe móra ónar aisghabhadh cabhair cheana féin, mar a mhínítear in aithris (102) den Chinneadh seo.
(55) Aithris (47) den chinneadh tosaigh.
(56) Breithiúnas an 12 Iúil 1973, an Coimisiún v an Ghearmáin, C-70/72, ECLI:EU:C:1973:87, mír 13.
(57) Breithiúnas an 21 Márta 1990, an Bheilg v an Coimisiún, C-142/87, ECLI:EU:C:1990:125, mír 66.
(58) Breithiúnas an 17 Meitheamh 1999, an Bheilg v an Coimisiún, C-75/97, ECLI:EU:C:1999:311, míreanna 64 agus 65.
(59) Rialachán (AE) Uimh. 1408/2013 ón gCoimisiún an 18 Nollaig 2013 maidir le cur i bhfeidhm Airteagail 107 agus 108 den Chonradh ar Fheidhmiú an Aontais Eorpaigh i dtaca le cabhair de minimis san earnáil talmhaíochta IO L 352, 24.12.2013, lch. 9, ELI: http://data.europa.eu/eli/reg/2013/1408/oj).
(60) Rialachán (CE) Uimh. 794/2004 ón gCoimisiún an 21 Aibreán 2004 lena gcuirtear chun feidhme Rialachán (AE) 2015/1589 lena leagtar síos rialacha mionsonraithe maidir le hAirteagal 108 den chonradh ar fheidhmiú an Aontais Eorpaigh a chur i bhfeidhm (IO L 140, 30.4.2004, lch. 1, ELI: http://data.europa.eu/eli/reg/2004/794/oj).
(61) Rialachán (CE) Uimh. 271/2008 ón gCoimisiún an 30 Eanáir 2008 lena leasaítear Rialachán (CE) Uimh. 794/2004 lena gcuirtear chun feidhme Rialachán (CE) Uimh. 659/1999 ón gComhairle lena leagtar síos rialacha mionsonraithe chun Airteagal 93 de Chonradh CE a chur i bhfeidhm (IO L 82, 25.3.2008, lch. 1, ELI: http://data.europa.eu/eli/reg/2008/271/oj).
(62) Airteagal 16(3) de Rialachán (AE) 2015/1589 ón gComhairle an 13 Iúil 2015 lena leagtar síos rialacha mionsonraithe maidir le hAirteagal 108 CFAE a chur i bhfeidhm.
(63) Rialachán (AE) 2022/2472 ón gCoimisiún an 14 Nollaig 2022 lena ndearbhaítear go bhfuil catagóirí áirithe cabhrach in earnálacha na talmhaíochta agus na foraoiseachta agus i gceantair thuaithe comhoiriúnach don mhargadh inmheánach agus Airteagail 107 agus 108 den Chonradh ar Fheidhmiú an Aontais Eorpaigh á gcur i bhfeidhm (IO L 327, 21.12.2022, lch. 1, ELI: http://data.europa.eu/eli/reg/2022/2472/oj).
ELI: http://data.europa.eu/eli/dec/2025/2433/oj
ISSN 1977-0839 (electronic edition)