(1)

Le Cinneadh Cur Chun Feidhme (AE) 2018/1491 ón gComhairle (2), údaraíodh an Spáinn ráta laghdaithe dleachta máil a chur i bhfeidhm go dtí an 31 Nollaig 2024 maidir le leictreachas a sholáthraítear go díreach do shoithí atá i mbeart i gcalafoirt, ar soithí nach árthaí príobháideacha áineasa iad (‘leictreachas cois cladaigh’), i gcomhréir le hAirteagal 19 de Threoir 2003/96/CE.

(2)

I litir dar dáta an 27 Feabhra 2024, d’iarr an Spáinn údarú chun leanúint de ráta laghdaithe cánach leictreachais a chur i bhfeidhm maidir le leictreachas cois cladaigh de bhun Airteagal 19 de Threoir 2003/96/CE. Thug údaráis na Spáinne faisnéis bhreise a bhaineann leis an iarraidh i litreacha dar dáta an 11, an 14 agus an 15 Deireadh Fómhair 2024.

(3)

Leis an ráta laghdaithe cánach a bhfuil sé beartaithe ag an Spáinn a chur i bhfeidhm, tá sé d’aidhm aici leanúint d’úsáid leictreachais cois cladaigh a chur chun cinn. Úsáid leictreachais den sórt sin, meastar gur bealach é atá níos neamhdhíobhálaí don chomhshaol chun freastal ar riachtanais leictreachais soithí atá i mbeart i gcalafoirt ná na soithí sin a bheith ag dó breoslaí umair.

(4)

Sa mhéid go seachnaítear astaíochtaí truailleán aeir a eascraíonn as breoslaí umair a dhó le húsáid leictreachais cois cladaigh, rannchuidítear le cáilíocht aeir áitiúil i gcathracha calafoirt a fheabhsú agus torann a laghdú. Tá coinne leis go rannchuideoidh an beart, dá bhrí sin, le cuspóirí comhshaoil, sláinte agus beartas aeráide an Aontais.

(5)

Trí chead a thabhairt don Spáinn ráta laghdaithe cánachais a chur i bhfeidhm maidir le leictreachas cois cladaigh, ní théann an cead sin thar a bhfuil riachtanach chun úsáid an leictreachais sin a mhéadú, ós rud é go mbeidh giniúint an leictreachais ar bord mar rogha mhalartach níos iomaíche fós i bhformhór na gcásanna. Ar an gcúis chéanna, agus mar gheall gur íseal go leor é dul i bhfód na teicneolaíochta ar an margadh, ní dócha go mbeidh aon saobhadh mór ar an iomaíocht mar thoradh ar an mbeart sin le linn a thréimhse chur i bhfeidhm agus mar sin ní bheidh tionchar diúltach aige ar fheidhmiú cuí an mhargaidh inmheánaigh.

(6)

I gcomhréir le hAirteagal 19(2) de Threoir 2003/96/CE, tá gach údarú a dheonaítear faoin bhforáil sin le bheith teoranta ó thaobh ama de. Chun a áirithiú go mbeidh an tréimhse údarúcháin fada go leor ionas nach díspreagadh a bheidh ann d’oibreoirí ábhartha eacnamaíocha na hinfheistíochtaí is gá a dhéanamh, is iomchuí an t-údarú a dheonú ar feadh thréimhse 4 bliana. Mar sin féin, ba cheart an t-údarú scor d’fheidhm a bheith aige ó dháta chur i bhfeidhm aon fhoráil ghinearálta maidir le buntáistí cánach le haghaidh leictreachais cois cladaigh a ghlacfaidh an Chomhairle faoi Airteagal 113 den Chonradh ar Fheidhmiú an Aontais Eorpaigh, nó aon fhoráil ábhartha eile den Chonradh, i gcás ina ndéanfar forálacha den sórt sin infheidhme le linn thréimhse an údaraithe.

(7)

Chun deimhneacht dhlíthiúil a sholáthar d’oibritheoirí calafoirt agus d’oibreoirí long agus chun aon chur isteach agus méadú féideartha ar an ualach riaracháin le haghaidh dáileoirí agus athdháileoirí leictreachais a sheachaint, ba cheart a áirithiú go bhféadfaidh an Spáinn leanúint de ráta laghdaithe cánachais a chur i bhfeidhm maidir le leictreachas cois cladaigh. Ba cheart, dá bhrí sin, an t-údarú arna iarraidh a dheonú le héifeacht ón 1 Eanáir 2025, chun leanúint gan uaim de na réamhshocruithe faoi Chinneadh Cur Chun Feidhme (AE) 2018/1491.

(8)

Tá an Cinneadh seo gan dochar do chur i bhfeidhm rialacha an Aontais maidir leis an Státchabhair,