1.

Biex terminu jiġi osservat, għandha titqies id-data tar-riċezzjoni tal-informazzjoni jew dik li fiha tkun intbagħtet? Notifika tardiva x’konsegwenzi jkollha?

2.

Dawn id-domandi qegħdin isiru fil-kuntest ta’ deċiżjoni tal-awtorità kompetenti Awstrijaka li ċaħdet l-applikazzjoni ta’ EP Agrarhandel GmbH għall-għoti tal-primjums għall-baqar li jreddgħu għas-sena 2011 fir-rigward ta’ bhejjem ta’ iktar minn 40 annimal tal-ifrat, bir-raġunament li n-notifika ta’ moviment lejn mergħa tas-sajf waslet tard wisq.

3.

L-ewwel nett, il-Qorti tal-Ġustizzja għandha tieħu deċiżjoni dwar il-modalitajiet għall-osservanza tat-terminu u, jekk applikabbli, dwar l-effetti fuq l-eliġibbiltà għal primjums tal-annimali meta t-terminu għan-notifika ma jiġix osservat.

4.

Il-kuntest ġuridiku tal-Unjoni għall-kawża prinċipali huwa kkostitwit,mir-Regolament Nru 1760/2000 ( 2 ) dwar l-identifikazzjoni u r-reġistrazzjoni tal-annimali tal-ifrat, mid-Deċiżjoni tal-Kummissjoni 2001/672/KE adottata abbażi tal-Artikolu 7 tal-imsemmi regolament, kif emendata bid-Deċiżjoni 2010/300/UE ( 3 ), kif ukoll mir-Regolament (KE) Nru 73/2009 ( 4 ) dwar pagamenti diretti fil-politika agrikola, bir-Regolamenti ta’ Implementazzjoni tiegħu (KE) Nru 1121/2009 ( 5 ) u (KE) Nru 1122/2009 ( 6 ).

5.

Fl-ewwel lok, jeħtieġ li jsir riferiment għall-premessa 7 tar-Regolament Nru 1760/2000:

“B’riżultat, il-fiduċja tal-konsumatur fil-kwalità tal-laħam taċ-ċanga u l-prodotti mill-laħam taċ-ċanga tittejjeb, jiġi ppreservat livell aktar għoli tas-saħħa pubblika u l-istabbiltà fit-tul tas-suq tal-laħam taċ-ċanga tkun irrinfurzata.”

6.

L-ewwel paragrafu tal-Artikolu 3 tar-Regolament Nru 1760/2000 jiddeskrivi s-sistema għall-identifikazzjoni u għar-reġistrazzjoni tal-annimali tal-ifrat:

“Is-sistema għall-identifikazzjoni u r-reġistrazzjoni tal-bhejjemtal-fart għandha tinkludi l-elementi li ġejjin:

7.

L-Artikolu 7(1) tar-Regolament Nru 1760/2000 jirregola l-obbligi ta’ min iżomm l-annimali fil-kuntest tas-sistema tal-identifikazzjoni u tar-reġistrazzjoni tal-annimali tal-ifrat:

“Bl-eċċezzjoni tat-trasportaturi, kull min iżomm il-bhejjem għandu:

8.

Il-Kummissjoni adottat id-Deċiżjoni 2001/672 b’regoli speċjali għall-moviment lejn mergħa tas-sajf abbażi tat-tieni sentenza tat-tieni inċiż tal-Artikolu 7(1) tar-Regolament Nru 1760/2000.

9.

Fl-ewwel lok, jeħtieġ li jsir riferiment għall-premessa 3 tal-imsemmija deċiżjoni:

“Ir-regoli speċjali għandhom ikunu stabbiliti b’tali mod li huwa possibbli li jkun magħruf il-lok ta’ kwalunkwe annimal bovin fi kwalunkwe żmien.”

10.

Fil-paragrafu 2 tiegħu, l-Artikolu 2 tad-Deċiżjoni 2001/672 jirregola d-data li għandha tiġi nnotifikata. Il-paragrafu 4 jistabbilixxi t-terminu li għandu jiġi osservat minn min iżomm l-annimali għan-notifika:

“L-informazzjoni li tinstab fil-lista msemmija fil-paragrafu 2 hija introdotta fid-database għall-annimali bovini għal inqas sebat ijiem wara d-data meta l-annimali huma mdaħħla fil-mergħa.”

11.

Id-Deċiżjoni 2010/300 emendat l-Artikolu 2(4) tad-Deċiżjoni 2001/672 kif ġej:

“L-informazzjoni li tinsab fil-lista msemmija fil-paragrafu 2 għandha tiġi riportata lill-awtorità kompetenti skont l-Artikolu 7(1) tar-Regolament (KE) Nru 1760/2000 fil-15-il jum wara d-data ta’ meta l-annimali kienu ttieħdu fil-mergħa.”

12.

Skont il-premessa 5 tal-imsemmija deċiżjoni, l-emenda tal-Artikolu 2(4) tad-Deċiżjoni 2001/672 hija bbażata fuq il-kunsiderazzjoni li ġejja:

“Taħt ċerti kundizzjonijiet, l-annimali, li jiġu spustati minn azjendi differenti għall-istess żona muntanjuża ta’ mergħat għas-sajf, jaslu hemm fuq perjodu ta’ iktar minn sebat ijiem. Sabiex jitnaqqsu l-piżijiet amministrattivi bla bżonn, il-limiti ta’ żmien fid-Deċiżjoni 2001/672/KE għandhom għalhekk jiġu adattati sabiex jittieħed kont ta’ dak il-fatt prattiku mingħajr ma tkun kompromessa t-traċċabilità.”

13.

Ir-Regolament Nru 73/2009 jistabbilixxi regoli komuni għal pagamenti diretti fi ħdan il-politika agrikola komuni kif ukoll għal ċerti skemi ta’ għajnuna għall-bdiewa.

14.

It-Titolu II tar-Regolament Nru 73/2009 jipprevedi dispożizzjonijiet ġenerali dwar pagamenti diretti. L-Artikolu 21 u l-Artikolu 23 jirregolaw it-tnaqqis u l-esklużjoni fil-każ ta’ nuqqas ta’ osservanza tar-regoli ta’ eliġibbiltà jew fil-każ ta’ nuqqas ta’ konformità mar-regoli tal-kundizzjonalità tal-bidwi.

15.

It-Titolu III tar-Regolament Nru 73/2009 jinkludi regoli dwar l-iskema ta’ primjums uniformi li hija indipendenti mill-produzzjoni. It-Titolu IV (min-naħa l-oħra) jipprovdi skemi oħra ta’ għajnuna. L-ewwel kapitolu ta’ dan it-titolu (“Skemi komunitarji ta’ għajnuna”) jinkludi pagamenti għal-laħam taċ-ċanga u tal-vitella fit-Taqsima 11 tiegħu.

16.

L-Artikolu 111 tar-Regolament Nru 73/2009 jistipula l-primjums għall-baqar li jreddgħu:

“1.   Bidwi li jrabbi baqar li jreddgħu fl-impriża tiegħu jista’ jikkwalifika, malli japplika, għal primjum ta’ manteniment ta’ baqar li jreddgħu (‘primjum għall-baqar li jreddgħu’). Għandu jingħata f’forma ta’ primjum annwali għal kull sena kalendarja u għal kull bidwi skont il-limiti massimi individwali.

2.   Il-primjum għal baqar li jreddgħu għandu jingħata lil kull bidwi:

Madankollu, l-Istati Membri jistgħu jiddeċiedu abbażi ta’ kriterji oġġettivi u mhux diskriminatorji stabbiliti minnhom, li jbiddlu jew jirtiraw il-limitu kwantitattiv, dment li l-bidwi jżomm, għal talanqas sitt xhur konsekuttivi minn meta tiġi ppreżentata l-applikazzjoni, għadd ta’ baqar li jreddgħu mhux anqas minn 60 % u għadd ta’ erħiet li ma jaqbiżx 40 % tan-numru li għalih ġie mitlub il-primjum. […]”

17.

L-Artikolu 116 jirregola l-primjums għall-qatla fl-istess taqsima tar-Regolament Nru 73/2009. L-Artikolu 117 bl-intestatura “Regoli komuni dwar pirmjums”, u li jinsab fl-istess taqsima, jinkludi d-dispożizzjoni li ġejja:

“Biex jikkwalifika għall-pagamenti diretti taħt din it-Taqsima, annimal għandu jkun identifikat u rreġistrat skont ir-Regolament (KE) Nru 1760/2000.

Madankollu, annimal għandu wkoll jitqies eliġibbli għall-pagamenti meta l-informazzjoni stabbilita fit-tieni inċiż tal-Artikolu 7(1) tar-Regolament (KE) Nru 760/2000 tkun ġiet irraportata lill-awtorità kompetenti fl-ewwel jum tal-perijodu taż-żamma tal-annimal kif iddeterminat skont il-proċedura msemmija fl-Artikolu 141(2) ta’ dan ir-Regolament.”

18.

Ir-Regolament Nru 1121/2009 jinkludi regoli għall-implementazzjoni tal-iskemi ta’ għajnuna għall-bdiewa fit-Titolu IV tar-Regolament Nru 73/2009. Ma’ dawn jappartjenu l-primjums għall-baqar li jreddgħu rregolati fl-Artikolu 111 ta’ dan ir-regolament.

19.

L-Artikolu 61 tar-Regolament Nru 1121/2009 jistabbilixxi regoli dwar il-perijodu taż-żamma, li skont it-tieni subparagrafu tal-Artikolu 111(2) tar-Regolament Nru 73/2009 huwa kundizzjoni għall-eliġibbiltà tal-primjums għall-baqar li jreddgħu:

“Il-perjodu taż-żamma ta’ sitt xhur previst fit-tieni subparagrafu tal-Artikolu 111(2) tar-Regolament (KE) Nru 73/2009 għandu jibda fil-jum wara dak li fih tiġi ppreżentata l-applikazzjoni.

Madankollu, fejn Stat Membru jagħmel użu mill-possibbiltà prevista fit-tieni subparagrafu tal-Artikolu 16(3) tar-Regolament (KE) Nru 1122/2009, huwa għandu jiffissa d-data meta jibda l-perjodu msemmi fl-ewwel paragrafu ta’ dan l-Artikolu.”

20.

Fil-Parti II tiegħu, ir-Regolament Nru 1122/2009 jinkludi regoli għall-implementazzjoni tas-sistema integrata ta’ amministrazzjoni u kontroll li hija prevista fil-Kapitolu 4 tat-Titolu II (“Dispożizzjonijiet ġenerali dwar il-pagamenti diretti”) tar-Regolament Nru 73/2009.

21.

L-Artikolu 63 tar-Regolament Nru 1122/2009 jipprevedi d-dispożizzjonijiet għall-iffurmar tal-bażi tal-kalkolu għall-għajnuna li għandha tingħata. Il-paragrafi 3 u 4 tiegħu jadottaw dan li ġej:

“3.   Mingħajr preġudizzju għall-Artikoli 65 u 66, jekk l-għadd ta’ bhejjem dikjarati f’applikazzjoni għall-għajnuna jaqbeż dak determinat bħala riżultat ta’ kontrolli amministrattivi jew verifiki fuq il-post, l-għajnuna għandha tkun ikkalkulata abbażi tal-bhejjem determinati.

4.   Fejn jinstabu każi ta’ irregolaritajiet fir-rigward tas-sistema għall-identifikazzjoni u r-reġistrazzjoni għall-annimali bovini, għandhom japplikaw dawn li ġejjin:

L-Artikolu 21 għandu japplika fir-rigward tal-entrati fis-sistema għall-identifikazzjoni u r-reġistrazzjoni tal-annimali bovini.”

22.

Skont l-Artikolu 12 tar-Regolament Awstrijak dwar il-pagamenti diretti ( 7 ), l-informazzjoni fid-database elettronika għall-annimali tal-ifrat titqies bħala applikazzjoni għall-primjums għall-baqar li jreddgħu.

23.

Skont l-Artikolu 13(1) tar-Regolament Awstrijak dwar il-pagamenti diretti, bħala applikant jitqies dak il-bidwi li jrabbi baqar li jreddgħu, erieħ jew baqar tal-ħalib eliġibbli fl-1 ta’ Jannar, fis-16 ta’ Marzu jew fl-10 ta’ April, u li jkun ippreżenta, għas-sena kkunsidrata, applikazzjoni unika għall-impriża tiegħu. Skont il-paragrafu 2 ta’ dan l-artikolu, il-perijodu taż-żamma previst fl-Artikolu 111(2) tar-Regolament Nru 73/2009 jibda fit-2 ta’ Jannar, fis-17 ta’ Marzu għal baqar li jreddgħu li jiżdiedu wara l-1 ta’ Jannar tas-sena rispettiva u fil-11 ta’ April għal baqar li jreddgħu li għandhom jittieħdu inkunsiderazzjoni wara s-16 ta’ Jannar tas-sena rispettiva.

24.

Skont l-Artikolu 6(5) tar-Regolament Awstrijak dwar l-identifikazzjoni ta’ annimali tal-ifrat ( 8 ), in-notifika ta’ moviment lejn mergħa tas-sajf tista’ ssir bil-posta jew online. In-notifiki l-oħrajn jistgħu jsiru wkoll permezz ta’ telefonata. Skont il-paragrafu 6 ta’ dan l-artikolu, hija r-riċezzjoni li hija determinanti għall-konformità mat-terminu għan-notifika tal-moviment lejn il-mergħat tal-muntanji.

25.

EP Agrarhandel GmbH hija r-rikorrenti fil-proċedura fil-kawża prinċipali. Fis-17 ta’ Ġunju 2011, parti mill-merħla tal-baqar tagħha ttieħdet lejn mergħa f’żona muntanjuża. EP Agrarhandel GmbH bagħtet in-notifika ta’ dan il-moviment lejn il-mergħat tal-muntanji bil-posta fit-30 ta’ Ġunju 2011. Skont it-timbru tar-riċezzjoni, din waslet għand l-awtorità kompetenti fis-7 ta’ Lulju 2011.

26.

Bid-deċiżjoni tat-28 ta’ Marzu 2012 l-awtorità kompetenti tat lil EP Agrarhandel GmbH EUR 398.00 fi primjums għall-annimali tal-ifrat għas-sena 2011, liema deċiżjoni kienet ibbażata fuq l-informazzjoni fid-database elettronika. EP Agrarhandel GmbH ippreżentat oppożizzjoni (“appell”) kontra din id-deċiżjoni, minħabba li b’mod żbaljat, il-primjums għall-baqar li ttieħdu lejn mergħat fis-17 ta’ Ġunju 2011 ma ġewx awtorizzati.

27.

Il-Ministru Federali tal-Agrikoltura, tal-Forestrija, tal-Ambjent u tal-Ġestjoni tal-Ilma ċaħad dan ir-rimedju legali bid-deċiżjoni tas-6 ta’ Diċembru 2013. Il-motiv għal dik id-deċiżjoni kien li n-notifika tal-moviment lejn il-mergħat tal-muntanji waslet għand l-awtorità kompetenti biss wara li skada t-terminu ta’ 15-il jum u li għalhekk waslet tard wisq. Dan id-dewmien wassal biex ma setgħux jingħataw il-primjums.

28.

EP Agrarhandel GmbH ippreżentat rikors quddiem il-Verwaltungsgerichtshof (il-Qorti Amministrattiva, l-Awstrija) kontra d-deċiżjoni tas-6 ta’ Diċembru 2013. Il-Verwaltungsgerichtshof (il-Qorti Amministrattiva) għamlet id-domandi segwenti lill-Qorti tal-Ġustizzja skont l-Artikolu 267 TFUE għal deċiżjoni preliminari:

29.

Fil-proċedura quddiem il-Qorti tal-Ġustizzja, ġew sottomessi osservazzjonijiet bil-miktub mir-Repubblika tal-Awstrija u mill-Kummissjoni Ewropea.

30.

Din il-proċedura għal deċiżjoni preliminari tikkonċerna l-interpretazzjoni tal-Artikolu 2(4) tad-Deċiżjoni 2001/672 kif ukoll tal-Artikolu 117 tar-Regolament Nru 73/2009.

31.

L-interpretazzjoni tal-espressjoni “[l]-informazzjoni […] għandha tiġi riportata lill-awtorità kompetenti [..] fil-15-il jum wara d-data ta’ meta l-annimali kienu ttieħdu fil-mergħa”, inkluża fl-Artikolu 2(4) tad-Deċiżjoni 2001/672, hija s-suġġett tal-ewwel domanda preliminari. Il-qorti tar-rinviju tixtieq tkun taf jekk din tfissirx li l-informazzjoni trid tkun waslet għand l-awtorità kompetenti fi ħdan dan it-terminu jew jekk huwiex biżżejjed li din tkun intbagħtet fil-ħin. Iż-żewġ domandi preliminari l-oħra jirrigwardaw il-konsegwenzi legali ta’ notifika eventwalment tardiva. Bit-tieni domanda preliminari, il-qorti tar-rinviju tixtieq tkun taf jekk it-tieni paragrafu tal-Artikolu 117 tar-Regolament Nru 73/2009 jwassalx biex l-annimali jitqiesu bħala eliġibbli għal primjums minkejja n-notifika tardiva u, bit-tielet domanda, jekk għandhomx jiġu imposti sanzjonijiet minħabba n-notifika tardiva.

32.

L-ewwel nett għandu jiġi osservat li biex tingħata risposta għad-domandi preliminari għandhom jittieħdu inkunsiderazzjoni l-kuntest li jagħmlu parti minnu l-Artikolu 2(4) tad-Deċiżjoni 2001/672 u l-Artikolu 117 tar-Regolament Nru 73/2009, kif ukoll l-għanijiet tad-dispożizzjonijiet li jagħmlu parti minnhom.

33.

Ir-Regolament Nru 73/2009 jipprevedi regoli għal pagamenti diretti taħt il-politika agrikola komuni. Wieħed minn dawn il-pagamenti diretti, il-primjums għall-baqar li jreddgħu, iservi biex jappoġġja d-dħul tal-impriżi li jżommu l-għoġġiela għall-produzzjoni tal-laħam u jissupplimenta l-iskema ta’ pagament imħallsa fundamentalment li hija indipendenti mill-produzzjoni. Skont l-ewwel paragrafu tal-Artikolu 117 ta’ dan ir-regolament, il-primjums għall-baqar li jreddgħu jingħataw biss għal annimali li huma identifikati u rreġistrati konformement mar-Regolament Nru 1760/2000.

34.

Min-naħa tiegħu, ir-Regolament Nru 1760/2000 għandu l-għan li jsaħħaħ il-fiduċja tal-konsumaturi fil-kwalità taċ-ċanga u tal-vitella, li jippreserva protezzjoni għolja tas-saħħa pubblika u li jtejjeb l-istabbiltà fit-tul tas-suq tal-laħam taċ-ċanga u tal-vitella ( 9 ). Is-sistema ta’ identifikazzjoni u ta’ reġistrazzjoni pprovduta għal dan il-għan hija bbażata, inter alia, fuq it-twaqqif ta’ database nazzjonali tal-annimali tal-ifrat min-naħa tal-Istati Membri, fejn tiġi rreġistrata l-identità tal-annimali, l-impriżi kollha fit-territorju u l-movimenti kollha tal-annimali. Din is-sistema trid tkun kompleta u effettiva f’kull waqt, hekk li l-awtorità kompetenti tkun tista’ tistabbilixxi l-lok ta’ annimal tal-ifrat fi kwalunkwe żmien u hekk li din tkun f’pożizzjoni li tidentifika malajr l-oriġini ta’ annimal fil-każ ta’ epiżootija biex immedjatament tieħu miżuri għall-protezzjoni tas-saħħa pubblika ( 10 ).

35.

Fi ħdan is-sistema ta’ identifikazzjoni u ta’ reġistrazzjoni skont l-Artikolu 7(1) tar-Regolament Nru 1760/2000 min iżomm l-annimali huwa inter alia obbligat jinnotifika lill-awtoritajiet kompetenti bid-data eżatta ta’ kull moviment. Fundamentalment għal dan il-għan japplika terminu għan-notifika ta’ bejn tlieta sa mhux iżjed minn sebat ijiem. Dan l-artikolu jiddelega s-setgħa lill-Kummissjoni biex testendi t-terminu għan-notifika u tadotta regoli speċifiċi fil-każ tal-moviment tal-annimali tal-ifrat lejn mergħa tas-sajf. Il-Kummissjoni għamlet dan bid-Deċiżjoni 2001/672.

36.

Fl-aħħar nett, skont it-tieni paragrafu tal-Artikolu 117 tar-Regolament Nru 73/2009 l-annimali jitqiesu bħala eliġibbli għal primjums anki jekk l-informazzjoni skont l-Artikolu 7(1) tar-Regolament Nru 1760/2000 tiġi nnotifikata lill-awtorità kompetenti fl-ewwel jum tal-perijodu taż-żamma tal-annimal inkwistjoni.

37.

Bl-ewwel domanda tagħha, il-qorti tar-rinviju trid tkun taf, jekk l-Artikolu 2(4) tad-Deċiżjoni 2001/672 jipprekludix leġiżlazzjoni nazzjonali bħall-Artikolu 6(6) tar-Regolament Awstrijak dwar l-identifikazzjoni tal-annimali tal-ifrat, li jipprovdi li n-notifika dwar il-moviment tal-annimali tal-ifrat lejn mergħat tas-sajf trid tkun ġiet irċevuta mill-awtorità kompetenti fi żmien 15-il jum.

38.

Fil-każ ineżami, it-terminu beda jiddekorri permezz tal-moviment lejn il-mergħat fis-17 ta’ Ġunju 2011, hekk li beda fit-18 ta’ Ġunju 2011 f’00:00 u spiċċa fl-4 ta’ Lulju 2011 f’24.00 ( 11 ). Jekk, kif għamlet ir-Repubblika tal-Awstrija, titqies ir-riċezzjoni tan-notifika (7 ta’ Lulju 2011), in-notifika saret tard wisq. Min-naħa l-oħra, jekk wieħed, l-istess bħall-EP Agrarhandel GmbH u l-Kummissjoni, iqis id-data li fiha ntbagħtet in-notifika (30 ta’ Ġunju 2011), in-notifika tkun saret fiż-żmien stipulat.

39.

L-Artikolu 2(4) tad-Deċiżjoni 2001/672 jistabbilixxi sempliċement li “[l]-informazzjoni […] għandha tiġi riportata lill-awtorità kompetenti [mhux iktar tard minn] fil-15-il jum wara d-data ta’ meta l-annimali kienu ttieħdu fil-mergħa” ( 12 ).

40.

Madankollu, l-assenza ta’ dispożizzjoni speċifika dwar jekk huwiex determinanti meta jkun hemm riċezzjoni jew meta tintbagħat in-notifika, għall-finijiet tal-osservanza tat-terminu, ma tfissirx għaldaqsant li l-Isati Membri għandhom marġni ta’ diskrezzjoni. Dan għaliex jistgħu jiġu pperikolati l-applikazzjoni uniformi tad-dritt tal-Unjoni, l-ugwaljanza bejn l-operaturi ekonomiċi ( 13 ) u l-funzjonament tad-databases tal-annimali tal-ifrat. Iżda dan ma jipprekludix miżura nazzjonali, dment li din tkun ristretta li tadotta ċerti punti tal-leġiżlazzjoni tad-dritt tal-Unjoni, għall-finijiet tal-koerenza interna ta’ dawn id-dispożizzjonijiet u għall-komprensjoni tagħhom ( 14 ). L-Artikolu 6(6) tar-Regolament Awstrijak dwar l-identifikazzjoni tal-annimali tal-ifrat ikun jikkostitwixxi sempliċi repetizzjoni bħal din jekk l-Artikolu 2(4) tad-Deċiżjoni 2001/672 jiġi interpretat fis-sens li hija determinanti r-riċezzjoni tan-notifika.

41.

F’dan l-isfond għandu jiġi ddeterminat, permezz tal-interpretazzjoni, fuq liema avveniment huwa bbażat l-Artikolu 2(4) tad-Deċiżjoni 2001/672. Minbarra t-test (ara Taqsima 1) għandhom jittieħdu inkunsiderazzjoni speċjalment il-kuntest li fih tintuża l-iskema (ara Taqsima 2) u l-għan tagħha (ara Taqsima 3).

42.

Fil-fehma tiegħi, il-verżjoni Ġermaniża tal-Artikolu 2(4) tad-Deċiżjoni 2001/672 (“sind […] zu übermitteln”) iktar tindika li għandha tkun determinanti r-riċezzjoni tan-notifika fiż-żmien stipulat. Dan peress li proċess tal-komunikazzjoni jibda malli tintbagħat l-informazzjoni u jispiċċa biss meta din l-informazzjoni tasal. Dan japplika wkoll għall-formulazzjonijiet “mitteilen” jew “unterrichten” li jikkorrispondu mal-verżjoni lingwistika Franċiża (“sont communiquées”), Taljana (“sono comunicate”), Spanjola (“se comunicará”) u Olandiża (“worden meegedeelt”).

43.

Madankollu, irid jiġi kkonċedut li dawn it-termini huma ta’ natura ġenerali u għalhekk huma suġġetti għal interpretazzjoni ( 15 ). Dan diġà jidher fis-sentenza Borgmann, fejn il-Qorti tal-Ġustizzja kienet tal-fehma li l-espressjonijiet “tittrażmetti” jew “tirrapporta” kienu “jimplikaw pjuttost li l-informazzjoni trid tintbagħat qabel l-iskadenza tat-terminu”, filwaqt li madankollu ma llimitatx ruħha għall-analiżi tat-test fl-interpretazzjoni tagħha ( 16 ).

44.

Lanqas il-kuntest li fih l-Artikolu 2(4) tad-Deċiżjoni 2001/672 juża l-kelma “riportata” ma joffri kjarezza. Minn naħa waħda, wieħed jista’ jinterpreta r-riferiment espliċitu għad-destinatarju (“għandha tiġi riportata lill-awtorità kompetenti”) bħala sinjal li n-notifika trid ukoll tasal għand l-awtorità ( 17 ). Min-naħa l-oħra, wieħed jista’ wkoll jifhem l-espressjoni “fil-15-il jum wara” bħala li tfisser li anki fil-15-il jum irid għadu jkun possibbli li l-informazzjoni tiġi kkomunikata b’suċċess. Iżda f’dan ir-rigward irid jiġi osservat li pereżempju l-verżjoni lingwistika Portugiża (“no prazo de 15 dias”, jiġifieri fi żmien 15-il jum) hija espressa f’sens differenti u l-Artikolu 2(4) tad-Deċiżjoni 2001/672 ma jispeċifikax li n-notifika trid bilfors issir bil-posta. Anzi, kif juri b’mod eżemplari l-Artikolu 6(5) tar-Regolament Awstrijak dwar l-identifikazzjoni tal-annimali tal-ifrat, l-informazzjoni tista’ tiġi kkomunikata wkoll online jew bit-telefon.

45.

Fid-dawl ta’ dawn il-kunsiderazzjonijiet għandu jiġi kkonstatat li l-verżjonijiet lingwistiċi differenti ma jwasslux għal konklużjoni preċiża. Għalhekk, sabiex jiġu ggarantiti l-interpretazzjoni u l-applikazzjoni uniformi tad-dritt tal-Unjoni, id-dispożizzjoni inkwistjoni trid tiġi interpretata abbażi tal-ekonomija ġenerali u tal-iskop tal-leġiżlazzjoni li tagħmel parti minnha ( 18 ).

46.

F’dak li għandu x’jaqsam mal-kuntest tal-leġiżlazzjoni, għandu jiġi kkonstatat li l-Artikolu 2(4) tad-Deċiżjoni 2001/672 huwa bbażat fuq it-tieni inċiż tal-Artikolu 7(1) tar-Regolament Nru 1760/2000.

47.

Huwa minnu li l-espressjoni użata “[min iżomm l-annimali] jirrapporta lill-awtorità kompetenti” ukoll ma hijiex ċara ( 19 ). Madankollu, permezz tal-kuntest joħroġ biċ-ċar li l-ispeċifikazzjoni tat-terminu ta’ 15-il jum tikkostitwixxi eċċezzjoni speċifika għall-prinċipju stabbilit fl-ewwel sentenza tat-tieni inċiż tal-Artikolu 7(1) tar-Regolament Nru 1760/2000. Skont dan il-prinċipju, it-terminu għan-notifika tal-moviment tal-annimali huwa bejn tliet u seba’ ġranet massimu. Dan ifisser li l-Artikolu 2(4) tad-Deċiżjoni 2001/672 għandu jiġi interpretat f’sens strett, abbażi tal-prinċipju ġenerali li l-eċċezzjonijiet għandhom jiġu interpretati restrittivament ( 20 ).

48.

Barra minn hekk, dan il-kuntest jitlob li l-modalitajiet tal-osservanza tat-terminu fl-Artikolu 2(4) tad-Deċiżjoni 2001/672 u fl-Artikolu 7(1) tar-Regolament Nru 1760/2000 għandhom jiġu interpretati b’mod uniformi. Iżda mbagħad l-adozzjoni ta’ approċċ ibbażat fuq id-data li fiha tintbagħat in-notifika tkun f’kontradizzjoni mas-setgħa ddelegata lill-Istati Membri biex jistabbilixxu terminu massimu “ta’ bejn tlieta jew sebat ijiem”. L-influenza possibbli tal-Istati Membri tiġi fattwalment innewtralizzata minħabba rotot postali b’tul differenti. Min-naħa l-oħra, jekk wieħed jieħu inkunsiderazzjoni r-riċezzjoni tan-notifika, l-Istati Membri tassew ikollhom marġni ta’ diskrezzjoni. L-Artikolu 6(5) tar-Regolament Awstrijak dwar l-identifikazzjoni tal-annimali tal-ifrat juri b’mod eżemplari li fil-każ ineżami ma kienx impossibbli li min iżomm l-annimali jħares it-terminu, peress li n-notifiki, li għalihom japplika dan it-terminu qasir, jistgħu jsiru mhux biss bil-posta iżda anki online jew bit-telefon.

49.

Wieħed irid jikkunsidra wkoll li fil-verżjoni oriġinali tiegħu l-Artikolu 2(4) tad-Deċiżjoni 2001/672 kien jitlob li n-notifika tasal fiż-żmien stipulat. Peress li l-informazzjoni kellha tiġi “introdotta fid-database għall-annimali tal-ifrat għal inqas [mhux iktar tard minn] sebat ijiem wara d-data meta l-annimali huma mdaħħla fil-mergħa”, loġikament dan jirrikjedi li l-informazzjoni tasal qabel l-iskadenza tat-terminu. Kuntrarjament għall-Kummissjoni, ma nqisx li l-interpretazzjoni a contrario li t-tħassir tal-espressjoni “introdotta fid-database” ifisser li issa huwa biżżejjed li n-notifika tintbagħat fi żmien 15-il jum hija ammissibbli.

50.

L-ewwel nett, ma hemm l-ebda indikazzjoni li d-Deċiżjoni 2010/300 riedet tibdel il-modalitajiet tal-osservanza tat-terminu. Infatti, il-premessi tad-Deċiżjoni 2010/300 jiġġustifikaw l-emenda sempliċement bin-neċessità li l-“limiti ta’ żmien fid-Deċiżjoni 2001/672/KE […] jiġu adattati” ( 21 ).

51.

It-tieni nett, l-emenda fit-test tispjega ruħha mill-fatt li tadatta l-Artikolu 2(4) tad-Deċiżjoni 2001/672 mal-espressjoni fit-tieni inċiż tal-Artikolu 7(1) tar-Regolament Nru 1760/2000 u hija fformulata espressament bħala obbligu tal-persuni li jżommu l-annimali.

52.

It-tielet nett, l-approċċ ibbażat fuq id-data li fiha tintbagħat in-notifika jkollu l-konsegwenza li t-terminu oriġinali mhux biss jiżdied b’iktar mid-doppju iżda jitwal ukoll bil-fattur X li jirrappreżenta t-tul tar-rotta postali. Kif juri dan il-każ (in-notifika ntbagħtet fit-30 ta’ Ġunju u waslet fis-7 ta’ Lulju 2011), il-mod postali jista’ jieħu ammont kunsiderevoli ta’ żmien. B’dan il-mod it-terminu jispiċċa jiżdied b’mod sinjifikattiv u b’mod differenti f’kull każ. Dan mhux biss jikkontradixxi l-prinċipju tal-interpretazzjoni stretta tal-eċċezzjonijiet, iżda jwassal ukoll għal inċertezza legali u jipperikola n-natura attwali tad-databases nazzjonali tal-annimali tal-ifrat. Fil-fehma tiegħi, rieda korrispondenti min-naħa tal-leġiżlatur li jadotta leġiżlazzjoni daqstant ġeneruża kien ikollha tiġi riflessa fit-test jew tal-inqas fil-premessi tad-Deċiżjoni 2010/300.

53.

Bħala konklużjoni, il-kuntest li fih jinsab l-Artikolu 2(4) tad-Deċiżjoni 2001/672 jiffavorixxi, kif intqal iktar ’il fuq, li n-notifika trid tasal għand l-awtorità kompetenti fit-terminu stipulat.

54.

Din l-interpretazzjoni hija kkonfermata permezz tal-għanijiet segwiti mid-Deċiżjoni 2001/672 u mir-Regolament Nru 1760/2000.

55.

Mill-premessa 7 tar-Regolament Nru 1760/2000 jirriżulta li s-sistema ta’ reġistrazzjoni u ta’ identifikazzjoni sservi biex “il-fiduċja tal-konsumatur fil-kwalità tal-laħam taċ-ċanga u l-prodotti mill-laħam taċ-ċanga tittejjeb, jiġi ppreservat livell aktar għoli tas-saħħa pubblika u l-istabbiltà fit-tul tas-suq tal-laħam taċ-ċanga tkun irrinfurzata”. Konformement, skont il-premessa 3 tad-Deċiżjoni 2001/672, id-dispożizzjonijiet tal-imsemmija deċiżjoni għandhom l-għan li jkun “possibbli li jkun magħruf il-lok ta’ kwalunkwe annimal bovin fi kwalunkwe żmien” ( 22 ). Anki l-interpretazzjoni tal-modalitajiet tal-osservanza tat-terminu trid torjenta ruħha lejn dawn l-għanijiet.

56.

Dan jissuġġerixxi li għandha tittieħed inkunsiderazzjoni r-riċezzjoni tan-notifika, peress li għall-finijiet tal-attwalità tad-databases nazzjonali tagħmel differenza kunsiderevoli jekk l-awtorità kompetenti tiġix infurmata bil-moviment tal-annimali mhux iktar tard minn 15-il jum wara jew jekk dan jiħux iktar żmien skont il-każ individwali minħabba dewmien fil-posta.

57.

Kuntrarjament għall-Kummissjoni lanqas ma jiena tal-fehma li min iżomm l-annimali inġustament ser ikollu jġorr riskju inaċċettabbli, jiġifieri li r-riċezzjoni tan-notifika sseħħ fit-terminu stipulat. Fid-dawl tas-sinjifikat li l-attwalità tar-reġistri nazzjonali għandha għall-protezzjoni tas-saħħa pubblika, għat-trasparenza u għall-istabbiltà tas-suq tal-laħam taċ-ċanga u tal-vitella, ma huwiex inaċċettabbli li min iżomm l-annimali jibgħat l-informazzjoni li hija suġġetta għan-notifika fil-ħin bil-posta jew b’mod ieħor biex tasal għand l-awtorità fit-terminu stipulat. In-notifika hija possibbli mill-mument li jsir il-moviment lejn mergħat tal-muntanja. Jekk min iżomm l-annimali tant idum jistenna biex jimposta n-notifika li r-riċezzjoni tagħha fil-ħin ma tkunx żgurata, għall-inqas ikun raġonevoli li dan jikkomunika l-informazzjoni lill-awtorità permezz tal-internet. L-Artikolu 6(5) tar-Regolament Awstrijak dwar l-identifikazzjoni tal-annimali tal-ifrat espliċitament jirreferi għal din il-possibbiltà. Barra minn hekk, fuq livell ta’ konsegwenzi ġuridiċi jittieħdu inkunsiderazzjoni l-eventwali ċirkustanzi eċċezzjonali li jwasslu għan-nuqqas ta’ osservanza tat-terminu ( 23 ). Minħabba r-raġunijiet preċedenti lanqas ma jiena tal-fehma li l-prinċipju tan-nondiskriminazzjoni jitlob li tittieħed inkunsiderazzjoni d-data li fiha tintbagħat in-notifika ( 24 ).

58.

Għandha ssir distinzjoni wkoll bejn dan it-terminu għan-notifika dwar il-movimenti tal-annimali u t-terminu għall-komunikazzjoni tal-kwantitajiet ta’ ħalib, li kien is-suġġett fil-kawża Borgmann u li jrid isir sal-15 ta’ Mejju ta’ kull sena ( 25 ). Infatti, tal-aħħar għandu l-iskop li jiżgura l-kalkolu u l-iffissar fil-ħin tal-imposta addizzjonali fuq il-ħalib sabiex tkun tista’ titħallas sal-1 ta’ Settembru. Il-fatt li huwa deċiżiv li n-notifika tintbagħat fiż-żmien stipulat ma jipperikolax dan l-għan. Iżda l-għan tan-notifika tal-movimenti tal-annimali tal-ifrat konformi mat-terminu huwa proprju “li jkun magħruf il-lok ta’ kwalunkwe annimal bovin fi kwalunkwe żmien” kif stabbilit fil-premessa 3 tad-Deċiżjoni 2001/672 u, kif tenfasizza l-Qorti tal-Ġustizzja, li s-sistema ta’ identifikazzjoni u ta’ reġistrazzjoni “tkun totalment effettiva u li wieħed ikun jista’ jiddependi fuqha f’kull mument biex, b’mod partikolari, tippermetti lill-awtoritajiet kompetenti jindividwaw malajr kemm jista’ jkun, fil-każ ta’ [epiżutija], il-provenjenza ta’ annimal u li tieħu immedjatament il-miżuri neċessarji sabiex tevita kull riskju għas-saħħa pubblika” ( 26 ).

59.

Barra minn hekk, il-premessa 5 tad-Deċiżjoni 2010/300 tipprovdi tagħrif dwar l-iskop reali tal-emenda tal-Artikolu 2(4) tad-Deċiżjoni 2001/672. Infatti, l-emenda tieħu inkunsiderazzjoni l-fatt li l-moviment tal-annimali “minn azjendi differenti għall-istess żona muntanjuża ta’ mergħat għas-sajf [jista’ jdum] iktar minn sebat ijiem”. Għalhekk, biex jiġu evitati “piżijiet amministrattivi bla bżonn”, it-termini kellhom “jiġu adattati”. Fis-sitwazzjoni legali preċedenti, seta’ jinħoloq piż amministrattiv bla bżonn jekk min iżomm l-annimali, li kellu bżonn iktar minn sebat ijiem għall-moviment tal-annimali tiegħu minn ażjendi differenti għall-istess mergħa, ma setax idaħħal il-moviment tal-annimali kollha f’notifika waħda. Peress li t-terminu għan-notifika ta’ annimal jibda mal-moviment ta’ dan l-annimal, f’tali każ l-istess terminu jkun diġà skada fil-mument li jkun sar il-moviment tal-aħħar annimal.

60.

Permezz taż-żieda tat-terminu għal 15-il jum għandu jiġi evitat il-piż amministrattiv bla bżonn li jinħoloq għal min iżomm l-annimali u għall-awtorità minħabba għadd ta’ notifiki paralleli. Madankollu, ma hemmx għalfejn tittieħed inkunsiderazzjoni d-data li fiha tintbagħat in-notifika biex jintlaħaq dan l-iskop. Kif diġà semmejt, la l-Artikolu 2(4) tad-Deċiżjoni 2001/672 u lanqas l-Artikolu 7 tar-Regolament Nru 1760/2000 ma jispeċifikaw li n-notifika għandha tintbagħat bil-posta. Għall-kuntrarju, teżisti l-possibbiltà li l-informazzjoni tiġi kkomunikata online jew bit-telefon ( 27 ). Iżda anki jekk min iżomm l-annimali jiddeċiedi li jibgħatha bil-posta, it-terminu ta’ 15-il jum huwa biżżejjed biex din tasal fil-ħin.

61.

Konformement mal-kunsiderazzjonijiet preċedenti, l-Artikolu 2(4) tad-Deċiżjoni 2001/67 għandu jiġi interpretat fis-sens li jfisser li n-notifika dwar il-moviment lejn mergħa tas-sajf trid tasal għand l-awtorità kompetenti mhux iktar tard minn 15-il jum wara l-moviment tal-annimali lejn il-mergħa. Konsegwentement, id-dritt tal-Unjoni ma jipprojbixxix leġiżlazzjoni nazzjonali li tistabbilixxi dan.

62.

Għalhekk għandha tingħata r-risposta li ġejja għall-ewwel domanda:

L-Artikolu 2(4) tad-Deċiżjoni 2001/672 fil-verżjoni tad-Deċiżjoni 2010/300 ma jipprekludix li dispożizzjoni nazzjonali li tipprevedi, għall-finijiet tal-osservanza tat-terminu ta’ notifika ta’ movimenti lejn mergħat tas-sajf, li r-riċezzjoni tan-notifika inkwistjoni titqies bħala determinanti.

63.

It-tieni domanda tal-qorti tar-rinviju għandha tingħata risposta biss jekk tingħata r-risposta proposta għall-ewwel domanda preliminari.

64.

Bit-tieni domanda preliminari, il-qorti tar-rinviju essenzjalment tixtieq tkun taf jekk l-annimali jkunux xorta waħda eliġibbli għal primjums skont it-tieni paragrafu tal-Artikolu 117 tar-Regolament Nru 73/2009 minkejja li l-moviment tagħhom lejn mergħat tas-sajf ikun ġie nnotifikat tardivament fis-sens tal-Artikolu 2(4) tad-Deċiżjoni 2001/672, bħal fil-każ tal-kawża prinċipali.

65.

Peress li l-Kummissjoni u l-qorti tar-rinviju jesprimu dubji dwar kemm in-notifika tardiva tal-moviment lejn mergħat tas-sajf twassal għat-telf tal-eliġibbiltà għall-primjums skont l-ewwel paragrafu tal-Artikolu 117 tar-Regolament Nru 73/2009, fl-ewwel lok għandu jiġi indirizzat dan l-aspett (ara Taqsima 1). Infatti, jekk in-notifika tardiva ma għandhiex influwenza fuq l-eliġibbiltà għall-primjums, ma tqumx il-kwistjoni dwar l-applikazzjoni tat-tieni paragrafu tal-Artikolu 117 tar-Regolament Nru 73/2009 (ara Taqsima 2). F’każ li n-notifika tardiva twassal fundamentalment għat-telf tal-primjums u ma taqax taħt l-eċċezzjoni stabbilita, għandu jiġi evalwat jekk dan l-eżitu jikkontradixxix il-prinċipju ta’ proporzjonalità (ara Taqsima 3).

66.

Jekk min iżomm l-annimali ma josservax it-terminu previst fl-Artikolu 2(4) tad-Deċiżjoni 2001/672, dan ikun qed jikser l-obbligu tiegħu tan-notifika fit-terminu stipulat skont it-tieni inċiż tal-Artikolu 7(1) tar-Regolament Nru 1760/2000. La d-Deċiżjoni 2001/672 u lanqas ir-Regolament Nru 1760/2000 ma jirregolaw il-konsegwenzi tal-ksur. Madankollu, l-ewwel paragrafu tal-Artikolu 117 tar-Regolament Nru 73/2009 jipprovdi li l-pagamenti jingħataw biss għal dawk l-annimali li huma identifikati u rreġistrati skont ir-Regolament Nru 1760/2000.

67.

Jirriżulta b’mod ċar mill-kliem tal-imsemmi artikolu li l-għoti tal-primjums huwa suġġett għal konformità minn dawk li jżommu l-annimali inkwistjoni tad-dispożizzjonijiet rilevanti tal-Unjoni dwar l-identifikazzjoni u r-reġistrazzjoni ta’ annimali tal-ifrat ( 28 ). L-Artikolu 7 jagħmel parti mid-dispożizzjonijiet inklużi taħt l-ewwel titolu bl-intestatura “L-identifikazzjoni u r-reġistrazzjoni tal-bhejjem tal-fart” tar-Regolament Nru 1760/2000. Barra minn hekk, l-Artikolu 3 tal-imsemmi titolu jiċċara li s-sistema għall-identifikazzjoni u għar-reġistrazzjoni tal-annimali tal-ifrat hija bbażata partikolarment fuq id-databases elettroniċi. Dawn huma magħmula mill-informazzjoni li min iżomm l-annimali jkun ikkomunika lill-awtorità skont l-Artikolu 7.

68.

Għalhekk, l-uniku aspett dubjuż huwa jekk fih innifsu n-nuqqas ta’ komunikazzjoni fiż-żmien stipulat iwassalx biex annimal tal-ifrat jitqies bħala mhux irreġistrat.

69.

Dan huwa sostnut, l-ewwel nett, bil-fatt li l-Artikolu 7 tar-Regolament Nru 1760/2000 jesprimi t-termini għan-notifika f’termini obbligatorji filwaqt li jispeċifika u jillimita b’mod preċiż il-possibbiltajiet li jiġi pprovdut terminu itwal ( 29 ). Huwa minnu li d-Deċiżjoni 2001/672, kif emendata bid-Deċiżjoni 2010/300, ittawwal it-terminu għal 15-il jum, iżda xorta waħda tuża espressjoni f’termini obbligatorji. Hija tistabbilixxi li l-informazzjoni “għandha tiġi riportata lill-awtorità kompetenti fil-15-il jum wara d-data ta’ meta l-annimali kienu ttieħdu fil-mergħa”. Madankollu, l-indikazzjoni speċifikata ta’ dawn il-metodi tkun bla effett utli jekk min iżomm l-annimali jkun ħieles milli josserva dawn it-termini għan-notifika ( 30 ).

70.

Bħala kunsiderazzjoni sussidjarja, nosserva li dik il-konklużjoni tidher li hija kkorroborata mit-tieni paragrafu tal-Artikolu 117 innifsu tar-Regolament Nru 73/2009. Dan jipprovdi li annimal “għandu wkoll” jitqies eliġibbli għal primjums meta l-informazzjoni suġġetta għan-notifika tkun ġiet mgħoddija lill-awtorità kompetenti fl-ewwel jum tal-perijodu taż-żamma tal-annimal. Wieħed jista’ jikkonkludi li, skont l-ewwel paragrafu tal-Artikolu 117 tar-Regolament Nru 73/2009, annimal tal-ifrat huwa fundamentalment eliġibbli għal primjums biss jekk l-informazzjoni suġġetta għal obbligu ta’ notifika tkun ġiet ikkomunikata f’mument ieħor, jiġifieri f’dak previst fl-Artikolu 7 tar-Regolament Nru 1760/2000. Il-konklużjoni opposta, li l-mument tan-notifika ma għandux impatt fuq l-eliġibbiltà għal primjums, ma hijiex konvinċenti peress li mbagħad in-notifika tkun tista’ tiġi rregolarizzata fi kwalunkwe waqt. Dan jirrendi t-tieni paragrafu tal-Artikolu 117 superfluwu.

71.

Din l-interpretazzjoni hija kkonfermata permezz tal-għanijiet segwiti bid-Deċiżjoni 2001/672 u bir-Regolament Nru 1760/2000 li ġew stabbiliti fil-punt 55. Kif speċifikat il-Qorti tal-Ġustizzja, biex dawn l-għanijiet jintlaħqu, is-sistema ta’ identifikazzjoni u ta’ reġistrazzjoni trid tkun totalment effettiva u li wieħed ikun jista’ jiddependi fuqha f’kull mument, hekk li tippermetti l-ittraċċar effettiv tal-annimali, pereżempju f’każ ta’ epiżootija ( 31 ). Iżda dan ma jkunx possibbli jekk min iżomm l-annimali ma jinnotifikax lid-database elettronika fi ħdan it-termini previsti dwar il-movimenti tal-annimali tal-ifrat tiegħu. Li kieku l-eliġibbiltà għal primjums skont l-Artikolu 117 tar-Regolament Nru 73/2009 ma kinitx tiddependi mill-konformità mat-terminu, min iżomm l-annimali ma kienx ikollu inċentiva finanzjarja biex jissodisfa l-obbligi tiegħu fit-terminu previst ( 32 ).

72.

Din l-interpretazzjoni hija kkonfermata wkoll permezz tar-Regolament Nru 1122/2009, li ġie adottat għall-implementazzjoni tar-Regolament Nru 73/2009. L-Artikolu 63(3) tiegħu jipprovdi li l-kalkolu tal-ammont tal-għajnuna ma huwiex ibbażat fuq in-numru tal-annimali indikati fl-applikazzjoni għall-għajnuna, iżda fuq in-numru “dikjarat” waqt il-kontrolli. It-tieni sentenza tal-paragrafu 4(b) tal-imsemmi artikolu tipprovdi li fejn jinstabu każijiet ta’ irregolaritajiet fir-rigward tas-sistema ta’ identifikazzjoni u ta’ reġistrazzjoni, l-annimali jitqiesu fundamentalment bħala mhux determinati. L-Artikolu 63 tar-Regolament jipprovdi eċċezzjonijiet għall-korrezzjoni ta’ żbalji manifesti ( 33 ) u għat-telf ta’ lametta tal-widna ( 34 ) biss. Jeżisti rilassament għal entrati inkorretti fir-reġistru jew fil-passaporti tal-bhejjem, hekk li annimal jitqies bħala mhux iddeterminat biss mat-tieni irregolarità fi żmien sentejn ( 35 ). Barra minn hekk, skont l-Artikolu 75(1) tar-Regolament Nru 1122/2009 hija mogħtija eċċezzjoni għal każijiet meta l-bidwi kien ostakolat milli josserva l-obbligi tiegħu minħabba forza maġġuri jew ċirkustanzi eċċezzjonali. Għalhekk, il-konsegwenzi legali minħabba n-nuqqas ta’ osservanza mat-terminu għan-notifika jistgħu jkunu iktar moderati f’sitwazzjonijiet speċjali. Min-naħa l-oħra, fil-każijiet l-oħra kollha, inkluż dak ineżami, l-annimali jitqiesu bħala mhux determinati. B’hekk ma jittieħdux inkunsiderazzjoni fil-formazzjoni tal-bażi tal-kalkolu. Għalhekk ma tingħatax għajnuna fir-rigward tagħhom.

73.

Fl-aħħar mill-aħħar, il-konklużjoni li n-notifika tardiva tal-moviment lejn mergħat fil-prinċipju twassal għat-telf tal-primjums għall-baqar li jreddgħu hija wkoll konformi mal-ġurisprudenza tal-Qorti tal-Ġustizzja fis-sentenza Maatschap Schonewille-Prins ( 36 ). Fid-deċiżjoni dwar il-primjums għall-qatla, il-Qorti tal-Ġustizzja ddeċidiet li l-ksur tal-obbligu ta’ notifika stipulat fit-tieni inċiż tal-Artikolu 7(1) tar-Regolament Nru 1760/2000 iwassal għat-telf ta’ dawn il-primjums ( 37 ).

74.

L-oġġezzjonijiet li l-Kummissjoni tippreżenta kontra t-trasferiment tal-imsemmija ġurisprudenza ma humiex konvinċenti minħabba r-raġunijiet li ġejjin.

75.

F’dan ir-rigward, għandu jiġi rrilevat, l-ewwel nett, li ma tistax tagħmel differenza li hemmhekk huwa kkonċernat il-primjum għall-qatla u hawnhekk għall-baqar li jreddgħu. Is-sentenza tal-Qorti tal-Ġustizzja hija bbażata fuq l-Artikolu 21 tar-Regolament Nru 1254/1999 ( 38 ), ( 39 ). B’espressjoni kważi identika għall-ewwel paragrafu tal-Artikolu 117 tar-Regolament Nru 73/2009, din id-dispożizzjoni tirregola li l-eliġibbiltà għall-primjum tiddependi mill-konformità mad-dispożizzjonijiet tal-attwali Regolament Nru 1760/2000 ( 40 ). Barra minn hekk, id-dispożizzjonijiet imsemmija ma jirregolawx dan ir-rekwiżit speċifikament għall-primjums għall-qatla jew għall-baqar li jreddgħu, iżda huma dispożizzjonijiet ġenerali li japplikaw għall-pagamenti kollha tat-taqsima rispettiva. Jagħmlu parti minn dawn kemm il-primjums għall-baqar li jreddgħu kif ukoll dawk għall-qatla ( 41 ).

76.

Barra minn hekk, l-oġġezzjoni li hawnhekk huwa rakkomandabbli eżitu differenti għax b’differenza għan-notifika ta’ “moviment [tal-annimali] lejn u mill-impriża”, in-notifika tal-moviment lejn mergħa ma hijiex ta’ natura kostituttiva għall-bhejjem iżda hija ta’ natura provviżorja biss u inqas importanti fir-rigward tal-qatla u tal-konsum immedjat għandha tiġi miċħuda.

77.

L-ewwel nett, is-sentenza Maatschap Schonewille-Prins ma kinitx tirreferi pereżempju għan-notifika tardiva tal-qatla ta’ annimal tal-ifrat, iżda għan-notifika tardiva tal-wasla ta’ annimal fl-impriża ( 42 ). Iżda peress li, l-istess bħan-notifika dwar il-moviment lejn mergħat tas-sajf, din lanqas ma tippreċedi immedjatament il-konsum tal-laħam taċ-ċanga u tal-vitella mill-konsumatur, dan l-aspett ma jistax ikollu rwol għad-deċiżjoni tal-Qorti tal-Ġustizzja.

78.

It-tieni nett, l-oġġezzjoni hija bbażata fuq il-premessa żbaljata li l-moviment lejn mergħa tas-sajf ma jirrigwardax “[i]l-movimenti kollha lejn u mill-impriża” fis-sens tal-ewwel sentenza tat-tieni inċiż tal-Artikolu 7(1) tar-Regolament Nru 1760/2000. Għaliex, kif turi d-definizzjoni fit-tieni inċiż tal-Artikolu 2 tar-Regolament Nru 1760/2000, “impriża” hija dak l-istabbiliment jew dik il-kostruzzjoni fejn fil-prinċipju jinżammu l-annimali. Għaldaqstant, il-moviment lejn mergħa tas-sajf huwa sottokategorija u mhux natura differenti tal-kunċett. Għalhekk, it-test tal-Artikolu 7 tar-Regolament Nru 1760/2000 ma jipprovdix indikazzjoni għal distinzjoni korrispondenti tal-konsegwenzi legali meta ma jiġix imħares it-terminu. L-istess japplika għad-Deċiżjoni 2001/672.

79.

It-tielet nett, distinzjoni skont it-tip tat-terminu għan-notifika lanqas ma hija konvinċenti fid-dawl tal-għanijiet stabbiliti fil-punt 56 u fil-punt 71 iktar ’il fuq, segwiti mid-Deċiżjoni 2001/672 u mir-Regolament Nru 1760/2000. Peress li epiżootija tista’ tfaqqa’ fuq mergħat tas-sajf bl-istess mod bħal f’impriża, anki l-moviment lejn mergħat tas-sajf irid jiġi nnotifikat mill-iktar fis possibbli fil-kuntest ta’ dak li huwa prattikament raġonevoli.

80.

Bħala riżultat għandu jiġi kkonstatat li n-notifika tardiva tal-moviment lejn mergħat tas-sajf għandha l-konsegwenza li l-annimali inkwistjoni ma jkunux irreġistrati skont l-ewwel paragrafu tal-Artikolu 117 tar-Regolament Nru 73/2009 li jikkorrispondi mar-Regolament Nru 1760/2000 u li għalhekk fil-prinċipju ma humiex eliġibbli għall-primjums.

81.

Huwa f’dan il-kuntest li hemm lok li jiġi ċċarat jekk, f’każ bħal dak ineżami, it-tieni paragrafu tal-Artikolu 117 tar-Regolament Nru 73/2009 jwassalx biex l-annimali, eċċezzjonalment, jitqiesu bħala eliġibbli għall-primjums xorta waħda. Il-kundizzjoni tkun li l-informazzjoni suġġetta għan-notifika tiġi mgħoddija lill-awtorità kompetenti fl-ewwel jum tal-perijodu taż-żamma tal-annimal inkwistjoni.

82.

Il-“perjodu taż-żamma” huwa l-perijodu li fih annimal, li għalih issir applikazzjoni għal għajnuna, irid jinżamm fl-impriża ( 43 ). Skont it-tieni subparagrafu tal-Artikolu 111(2) tar-Regolament Nru 73/2009, għall-primjums għall-baqar li jreddgħu huwa previst perijodu taż-żamma ta’ sitt xhur “mill-jum meta tiġi ppreżentata l-applikazzjoni”. L‑Artikolu 13(1) tar-Regolament Awstrijak dwar il-pagamenti diretti jiffissa l-1 ta’ Jannar, is-16 ta’ Marzu u l-10 ta’ April bħala l-jiem li fihom issir l-applikazzjoni għall-primjums ( 44 ). Għalhekk, skont l-Artikolu 13(2) ta’ dan ir-regolament, l-ewwel jum tal-perijodu taż-żamma huwa t-2 ta’ Jannar jew is-17 ta’ Marzu jew il-11 ta’ April tas-sena rispettiva (għall-baqar li jreddgħu li għandhom jittieħdu inkunsiderazzjoni wara l-1 ta’ Jannar jew is-16 ta’ Marzu) ( 45 ).

83.

Peress li hawnhekk il-moviment sar fis-17 ta’ Ġunju 2011, huwa kkonċernat avveniment li jinsab wara l-aħħar data possibbli ta’ bidu tal-perijodu taż-żamma (fil-11 ta’ April). Għalhekk, l-informazzjoni suġġetta għan-notifika ma ġietx trażmessa lill-awtorità kompetenti fl-ewwel jum tal-perijodu taż-żamma tal-annimali inkwistjoni. Li dan ma kienx possibbli f’każ bħal dak ineżami joħroġ biċ-ċar min-natura eċċezzjonali tat-tieni paragrafu tal-Artikolu 117 tar-Regolament Nru 73/2009. Huwa biss meta min iżomm l-annimali jirreġistra annimal ġdid fid-database nazzjonali qabel ma jibda l-aħħar perijodu taż-żamma possibbli li dan għandu jkollu l-possibbiltà li jirċievi l-primjums minkejja ksur tal-persuna li żżomm l-annimali preċedenti tal-obbligu tan-notifika.

84.

Għalhekk, l-istess bħar-Repubblika tal-Awstrija, jiena tal-fehma li t-tieni paragrafu tal-Artikolu 117 tar-Regolament Nru 73/2009 ma jkoprix sitwazzjonijiet bħal dik inkwistjoni fil-kawża prinċipali.

85.

Konsegwentement, b’mod konklużiv tqum il-kwistjoni dwar jekk l-Artikolu 117 tar-Regolament Nru 73/2009 jikkorrispondix mal-prinċipju tal-proporzjonalità sa fejn minn dan jirriżulta t-telf tal-primjums għall-baqar li jreddgħu bħala konsegwenza tan-notifika tardiva tal-moviment lejn mergħat tas-sajf.

86.

Peress li l-leġiżlatur tal-Unjoni għandu setgħa diskrezzjonali wiesgħa fil-qasam tal-politika agrikola li tikkorrispondi mar-responsabbiltajiet politiċi li jattribwixxulu l-Artikoli 40 TFUE sa 43 TFUE, l-istħarriġ tal-proporzjonalità min-naħa tal-Qorti tal-Ġustizzja għandu jkun limitat għall-evalwazzjoni intiża biex jiġi ddeterminat jekk il-leġiżlatur tal-Unjoni qabiżx manifestament il-limiti tas-setgħa diskrezzjonali tiegħu ( 46 ).

87.

F’dan ir-rigward, għandu jiġi rrilevat, qabel kollox, li, meta l-leġiżlatur tal-Unjoni – bħal fl-ewwel paragrafu tal-Artikolu 117 tar-Regolament Nru 73/2009 – jistabbilixxi kundizzjonijiet ta’ eliġibbiltà għall-għoti ta’ għajnuna, l-esklużjoni li hija riżultat tan-nuqqas ta’ konformità ma’ waħda minn dawn il-kundizzjonijiet ma tammontax għal sanzjoni, iżda għal sempliċi konsegwenza tan-nuqqas ta’ konformità mal-imsemmija kundizzjonijiet previsti mil-liġi ( 47 ).

88.

Jekk il-leġiżlatur tal-Unjoni jirregola – bħal fl-Artikolu 23(1) tar-Regolament Nru 1122/2009 – li l-preżentazzjoni tardiva tal-applikazzjoni għall-għajnuna twassal biss għal tnaqqis fl-ammont mogħti, dan ma jirriflettix prinċipju ġenerali iżda deċiżjoni intenzjonali tal-leġiżlatur, skont liema l-osservanza tat-terminu eċċezzjonalment ma kinitx ikkunsidrata bħala sinjifikattiva ( 48 ).

89.

Bil-kontra, kif joħroġ partikolarment mill-punt 69 u mill-punt 71 ta’ dawn il-konklużjonijiet, l-obbligu li jiġi osservat it-terminu għan-notifika previst fl-Artikolu 2(4) tad-Deċiżjoni 2001/672 huwa ta’ importanza speċjali għall-għanijiet imfittxin bis-sistema ta’ identifikazzjoni u ta’ reġistrazzjoni. Barra minn hekk, kif ġie spjegat fil-punt 72 ta’ dawn il-konklużjonijiet, huma previsti wkoll eċċezzjonijiet għal ċirkustanzi speċjali, bħal f’każijiet ta’ forza maġġuri.

90.

Għalhekk, il-leġiżlatur tal-Unjoni ma eċċediex manifestament il-limiti tad-diskrezzjoni tiegħu ( 49 ). Għalhekk, bħala konklużjoni, l-Artikolu 117 tar-Regolament Nru 73/2009 ma jippreġudikax il-prinċipju ta’ proporzjonalità.

91.

B’konformità mal-kunsiderazzjonijiet preċedenti, it-tieni domanda preliminari għandha tingħata risposta kif ġej:

It-tieni paragrafu tal-Artikolu 117 tar-Regolament Nru 73/2009 għandu jiġi interpretat fis-sens li ma għandux bħala effett, fil-każ ta’ notifika tardiva tal-moviment tal-annimali tal-ifrat lejn mergħat tas-sajf, li jseħħ wara l-bidu tal-perijodu ta’ żamma, li l-annimali kkonċernati min-notifika huma madankollu meqjusa bħala eliġibbli għall-benefiċċju tal-primjum.

92.

Jekk il-Qorti tal-Ġustizzja ssegwi l-proposta tiegħi għar-risposta tal-ewwel u tat-tieni domanda preliminari, it-tielet domanda preliminari ma għandhiex għalfejn tiġi risposta. Il-qorti tar-rinviju tagħmel din id-domanda għall-każ li għalkemm in-notifika tal-moviment lejn mergħa tas-sajf għandha titqies li saret tardivament, dan xorta ma jwassalx għat-telf tal-primjums għall-baqar li jreddgħu.

93.

Il-qorti tar-rinviju essenzjalment trid tkun taf jekk imbagħad għandhomx jiġu imposti sanzjonijiet minħabba n-notifika tardiva. Mill-motivazzjoni tat-tielet domanda preliminari joħroġ li l-qorti tar-rinviju qiegħda tirreferi għat-tnaqqis u għall-esklużjonijiet abbażi tal-Artikolu 21 u tal-Artikolu 23 tar-Regolament Nru 73/2009 u skont l-Artikolu 23 tar-Regolament Nru 1122/2009.

94.

Ir-risposta għal din id-domanda għandha tkun fin-negattiv. Huwa minnu li r-Regolamenti Nru 73/2009 u Nru 1122/2009 jipprevedu, fid-dispożizzjonijiet iċċitati iktar ’il fuq, sanzjonijiet korrispondenti mal-preżentazzjoni tardiva tal-applikazzjoni għall-għajnuna ( 50 ), man-nuqqas ta’ konformità mar-regoli ta’ eliġibbiltà ( 51 ) u man-nuqqas ta’ konformità mar-“regoli tal-kundizzjonalità” tal-bidwi ( 52 ). Madankollu, skont l-ewwel paragrafu tal-Artikolu 74 u l-Artikolu 73(1) tar-Regolament Nru 1122/2009, it-tnaqqis u l-esklużjoni ma japplikawx jekk il-bidwi jkun ipprovda informazzjoni korretta. Peress li mit-talba għal deċiżjoni preliminari ma jirriżulta xejn li jagħti x’jifhem li l-informazzjoni nnotifikata tardivament kienet inkorretta, ma għandhomx jiġu imposti sanzjonijiet minħabba notifika tardiva tal-moviment lejn mergħat tas-sajf skont dawn id-dispożizzjonijiet.

95.

Għalhekk, ir-risposta li għandha tingħata għat-tielet domanda għandha tkun li meta n-notifika tardiva tal-moviment tal-annimali tal-ifrat lejn mergħat tas-sajf skont it-tieni paragrafu tal-Artikolu 117 tar-Regolament Nru 73/2009 ma twassalx għat-telf tal-eliġibbiltà għall-primjums, it-tnaqqis u l-esklużjonijiet previsti fl-Artikolu 21 tar-Regolament Nru 73/2009, fl-Artikolu 65 tar-Regolament Nru 1122/2009, fl-Artikolu 23 tar-Regolament Nru 73/2009, fl-Artikoli 70 sa 72 tar-Regolament Nru 1122/2009 u fl-Artikolu 23 tar-Regolament Nru 1122/2009 ma japplikawx jekk l-informazzjoni fattwali nnotifikata tardivament tkun korretta.

96.

Fid-dawl tal-kunsiderazzjonijiet li saru iktar ’il fuq, nipproponi lill-Qorti tal-Ġustizzja illi tirrispondi d-domandi preliminari tal-Verwaltungsgerichtshof (Il-Qorti Amministrattiva, l-Awstrija) kif ġej: