(1)

Fil-21 ta’ Mejju 2021, ġiet ippreżentata talba lill-Kummissjoni għar-reġistrazzjoni tal-inizjattiva taċ-ċittadini Ewropej intitolata “NIPPREŻERVAW IL-KOŻMETIĊI LI MA JINVOLVUX KRUDELTÀ — NIMPENJAW RUĦNA GĦAL EWROPA MINGĦAJR L-ITTESTJAR FUQ L-ANNIMALI”.

(2)

L-objettivi tal-inizjattiva huma espressi kif ġej: “Flimkien mal-projbizzjoni tal-UE fuq it-testijiet tal-kożmetiċi fuq l-annimali ħarġet il-wegħda ta’ Ewropa li fiha l-annimali ma jibqgħux ibatu u jmutu minħabba l-kożmetiċi. Din il-wegħda nkisret. L-awtoritajiet għadhom jitolbu t-testijiet fuq l-annimali fir-rigward ta’ ingredjenti użati fil-kożmetiċi, li jmur kontra l-aspettattivi u x-xewqat tal-pubbliku u l-intenzjoni tal-leġiżlaturi. Madankollu, qatt ma kellna għodod daqshekk b’saħħithom li ma jinvolvux annimali biex tiġi żgurata s-sikurezza jew opportunità tad-deheb bħal din biex nirrevoluzzjonaw il-protezzjoni tal-bniedem u tal-ambjent. Il-Kummissjoni Ewropea għandha żżomm u ssaħħaħ il-projbizzjoni u t-tranżizzjoni lejn il-valutazzjoni tas-sigurtà mingħajr l-ittestjar fuq l-annimali.”

(3)

Il-grupp ta’ organizzaturi jistieden lill-Kummissjoni tieħu l-azzjoni li ġejja: (1) “Tipproteġi u ssaħħaħ il-projbizzjoni tal-ittestjar tal-kożmetiċi fuq l-annimali. Tniedi bidla leġiżlattiva biex tinkiseb il-protezzjoni tal-konsumaturi, tal-ħaddiema u tal-ambjent fir-rigward tal-ingredjenti kożmetiċi kollha mingħajr ma jsiru testijiet fuq l-annimali għall-ebda skop u fl-ebda ħin”; (2) “Tittrasforma r-regolament tal-UE dwar is-sustanzi kimiċi. Tiżgura li s-saħħa tal-bniedem u tal-ambjent jiġu protetti billi jiġu ġestiti sustanzi kimiċi mingħajr iż-żieda ta’ rekwiżiti ġodda għall-ittestjar fuq l-annimali”; (3) “L-immodernizzar tax-xjenza fl-UE. Impenn għal proposta leġiżlattiva li tfassal pjan direzzjonali għat-tneħħija gradwali tal-ittestjar kollu fuq l-annimali fl-UE qabel tmiem il-leġiżlatura attwali”.

(4)

L-Anness jipprovdi aktar dettalji dwar is-suġġett, l-objettivi u l-isfond tal-inizjattiva. L-Anness huwa maqsum fi tlieta: “Il-Projbizzjonijiet Pijunieri tal-UE fl-ambitu tal-Ittestjar ta’ Prodotti Kożmetiċi fuq l-Annimali u l-Kummerċjalizzazzjoni tagħhom”, “It-Trasformazzjoni tar-Regolament dwar is-Sustanzi Kimiċi” u l-“Modernizzazzjoni tax-Xjenza fl-UE”. L-Anness jispjega kif, skont l-organizzaturi, ir-Regolamenti (KE) Nru 1223/2009 (2) u (KE) Nru 1907/2006 (3) tal-Parlament Ewropew u tal-Kunsill, u d-Direttiva 2010/63/UE tal-Parlament Ewropew u tal-Kunsill (4) jenħtieġ li jiġu riveduti. L-Anness jipprovdi informazzjoni ta’ sfond li tispjega, b’mod partikolari, kif l-inizjattiva tikkontribwixxi għall-objettivi politiċi tal-Kummissjoni stabbiliti fl-“Istrateġija dwar is-Sustanzi Kimiċi għas-Sostenibbiltà (5)” u fil-“Patt Ekoloġiku Ewropew” (6). L-Anness jipproponi wkoll li l-Kummissjoni tieħu miżuri ta’ appoġġ, bħall-iżgurar tal-implimentazzjoni ta’ projbizzjonijiet eżistenti fuq l-ittestjar fuq l-annimali jew it-tfassil ta’ strateġija ta’ ttestjar għall-ingredjenti kożmetiċi bl-użu biss ta’ strateġiji disponibbli ta’ valutazzjoni li ma jinvolvux l-annimali. Miżuri bħal dawn jidhru li jikkomplementaw il-proposti għal atti legali li l-Kummissjoni qed tiġi mistiedna tadotta u għalhekk jistgħu jitqiesu bħala sempliċement anċillari.

(5)

Il-grupp ta’ organizzaturi ppreżenta wkoll informazzjoni addizzjonali fil-forma ta’ dokument ta’ politika li jipprovdi informazzjoni aktar dettaljata dwar it-tliet sejħiet ewlenin tiegħu għal azzjoni.

(6)

Sa fejn l-inizjattiva tfittex l-adozzjoni ta’ miżuri għall-approssimazzjoni tad-dispożizzjonijiet stabbiliti bil-liġi, b’regolament jew b’azzjoni amministrattiva fl-Istati Membri, li għandhom bħala l-għan tagħhom l-istabbiliment u l-funzjonament tas-suq intern, il-Kummissjoni għandha s-setgħa li tippreżenta proposta għal att legali abbażi tal-Artikolu 114 tat-Trattat.

(7)

Għal dawn ir-raġunijiet, l-ebda parti mill-inizjattiva ma taqa’ manifestament barra mill-qafas tas-setgħat tal-Kummissjoni li tippreżenta proposta għal att legali tal-Unjoni għall-fini tal-implimentazzjoni tat-Trattati.

(8)

Din il-konklużjoni hija mingħajr preġudizzju għall-valutazzjoni ta’ jekk il-kundizzjonijiet fattwali u sostantivi konkreti meħtieġa biex il-Kummissjoni taġixxi, inkluża l-konformità mal-prinċipju ta’ proporzjonalità u mad-drittijiet fundamentali, jkunux issodisfati f’dan il-każ.

(9)

Il-grupp ta’ organizzaturi pprovda evidenza xierqa li tissodisfa r-rekwiżiti stipulati fl-Artikolu 5(1) u (2) tar-Regolament (UE) 2019/788 u ħatar il-persuni ta’ kuntatt skont l-ewwel subparagrafu tal-Artikolu 5(3) ta’ dan ir-Regolament.

(10)

L-inizjattiva la hija manifestament abbużiva, frivola jew vessatorja u lanqas ma hija manifestament kuntrarja għall-valuri tal-Unjoni kif stabbiliti fl-Artikolu 2 tat-Trattat dwar l-Unjoni Ewropea u d-drittijiet minquxa fil-Karta tad-Drittijiet Fundamentali tal-Unjoni Ewropea.

(11)

L-inizjattiva intitolata “NIPPREŻERVAW IL-KOŻMETIĊI LI MA JINVOLVUX KRUDELTÀ — NIMPENJAW RUĦNA GĦAL EWROPA MINGĦAJR L-ITTESTJAR FUQ L-ANNIMALI” għandha għalhekk tiġi rreġistrata,