(1)

Id-Deċiżjoni ta' Implimentazzjoni tal-Kunsill 2010/583/UE (2) u, sussegwentement, id-Deċiżjoni ta' Implimentazzjoni tal-Kunsill 2013/676/UE (3) awtorizzaw lir-Rumanija biex tapplika miżura speċjali li tinnomina l-persuna taxxabbli li tirċievi l-provvisti ta' prodotti tal-injam mingħand persuni taxxabbli bħala l-persuna responsabbli għall-ħlas tat-taxxa fuq il-valur miżjud (VAT) fuq dawk il-provvisti. L-awtorizzazzjoni ġiet estiża sal-31 ta' Diċembru 2019 permezz tad-Deċiżjoni ta' Implimentazzjoni tal-Kunsill (UE) 2016/1206 (4).

(2)

Permezz tal-ittra rreġistrata mal-Kummissjoni fil-11 ta' Marzu 2019, ir-Rumanija talbet l-awtorizzazzjoni biex tkompli tapplika l-miżura speċjali wara l-31 ta' Diċembru 2019. It-talba kienet akkumpanjata minn rapport dwar l-applikazzjoni ta' dik il-miżura, kif stipulat bid-Deċiżjoni ta' Implimentazzjoni 2013/676/UE.

(3)

Permezz ta' ittri datati d-9 ta' April 2019, il-Kummissjoni infurmat lill-Istati Membri l-oħra bit-talba tar-Rumanija. Permezz ta' ittra datata l-10 ta' April 2019, il-Kummissjoni nnotifikat lir-Rumanija li kellha l-informazzjoni kollha meħtieġa biex tqis it-talba.

(4)

Skont l-informazzjoni pprovduta mir-Rumanija, is-sitwazzjoni fattwali li ġġustifikat l-applikazzjoni tal-miżura speċjali ma nbidlitx. Barra minn hekk, l-analiżi mill-awtoritajiet Rumeni tindika li l-miżura kienet effettiva fit-tnaqqis tal-evażjoni tat-taxxa.

(5)

Il-miżura speċjali hija proporzjonata mal-għanijiet li jridu jinkisbu peress li hija limitata għal operazzjonijiet speċifiċi ħafna f'settur li joħloq problemi konsiderevoli fir-rigward tal-evażjoni u l-evitar tat-taxxa. Barra minn hekk, l-applikazzjoni kontinwata tal-miżura ma għandux ikollha xi impatt negattiv fuq il-prevenzjoni ta' frodi fil-livell tal-bejgħ bl-imnut, f'setturi oħra jew fi Stati Membri oħra.

(6)

Għalhekk, jenħtieġ li r-Rumanija tkun awtorizzata tkompli tapplika l-miżura speċjali għal perjodu limitat ulterjuri sal-31 ta' Diċembru 2022.

(7)

B'mod ġenerali, id-derogi jiġu awtorizzati għal perjodu ta' żmien limitat biex ikun jista' jiġi vvalutat jekk il-miżuri speċjali humiex xierqa u effettivi. Id-derogi jagħtu lill-Istati Membri żmien sal-iskadenza tal-miżura speċjali biex jintroduċu miżuri konvenzjonali oħrajn biex jindirizzaw il-problema inkwistjoni. Derogi li jippermettu l-użu mill-mekkaniżmu ta' reverse chargejtingħataw biss eċċezzjonalment għal oqsma speċifiċi fejn isir abbuż, u jintużaw biss bħala l-aħħar alternattiva. Għaldaqstant, jeħtieġ li r-Rumanija timplimenta miżuri konvenzjonali oħra biex tiġġieled u tipprevjeni l-firxa ulterjuri tal-frodi tal-VAT fis-settur tal-injam u konsegwentement ma tibqagħlhiex bżonn ta' deroga mill-Artikolu 193 tad-Direttiva 2006/112/KE fir-rigward ta' tali provvisti.

(8)

Għaldaqstant, f'dan l-istadju m'hemmx bżonn li jiġu inklużi dispożizzjonijiet speċifiċi fid-Deċiżjoni ta' Implimentazzjoni 2013/676/UE li jikkonċernaw talbiet ulterjuri għall-estensjoni tad-deroga awtorizzata b'dik id-Deċiżjoni ta' Implimentazzjoni wara l-31 ta' Diċembru 2022.

(9)

Il-miżura speċjali ma għandha l-ebda impatt negattiv fuq ir-riżorsi proprji tal-Unjoni li jirriżultaw mill-VAT.

(10)

Għaldaqstant, jenħtieġ li d-Deċiżjoni ta' Implimentazzjoni 2013/676/UE tiġi emendata skont dan,

(1)

fl-Artikolu 1, id-data “il-31 ta' Diċembru 2019” hija sostitwita bid-data “il-31 ta' Diċembru 2022”;

(2)

l-Artikolu 3 jitħassar.